Ambroksol (Ambroxol) Spring farmatsevtika tabletkalari 30 mg №20 (2 blister х 10 tabletka)

Tarkib

1 ta tabletka tarkibida quyidagilar mavjud:

faol modda: ambroksol gidroxlorid, 100% moddaga qayta hisoblaganda - 30 mg;

yordamchi moddalar: kartoshka kraxmali, laktoza monogidrati, kalsiy stearati.

Tavsif

Oq yoki sarg‘ish tusli oq rangli, dumaloq shaklli, tekis yuzali, faskali tabletkalar.

Dori shakli

Tabletkalar.

Farmakoterapevtik guruh

Balg‘am ko‘chiruvchi preparatlar. Mukolitiklar. Ambroksol. ATX kodi: R05SV06.

Farmakologik xususiyatlari

Farmakokinetika

Ambroksolning so‘rilishi tez va yetarlicha to‘liq bo‘lib, terapevtik diapazonda chiziqli bog‘liqlikka ega. Ta’sir etuvchi moddaning plazmadagi maksimal konsentratsiyasiga 30 daqiqa - 3 soatdan keyin erishiladi. Plazmada preparatning taxminan 90% i proteinlar bilan bog‘lanadi. Ambroksolning qon va to‘qimalar orasida taqsimlanishi tez kechadi, faol moddalarning o‘pkada yuqori konsentratsiyasi kuzatiladi. Plazmadan yarim chiqarilish davri 7-12 soatni tashkil etadi, to‘qimalarda to‘planishi aniqlanmagan. Ambroksol asosan jigarda konyugatsiya yo‘li bilan metabolizmga uchraydi. Preparatning 90% ga yaqini buyraklar orqali chiqariladi.

Farmakodinamika

Ambroksol gidroxlorid bronxosekretolitik, sekretomotor (balg‘am ko‘chiruvchi) ta’sir ko‘rsatadigan mukolitik vositadir. Surfaktant hosil bo‘lishini rag‘batlantiradi, o‘zgargan bronx-o‘pka sekretsiyasini me’yorlashtiradi, balg‘amning reologik ko‘rsatkichlarini yaxshilaydi, uning yopishqoqligi va adgeziv xususiyatlarini kamaytiradi, mukotsiliar transportni oshiradi, balg‘amning bronxlardan chiqarilishini osonlashtiradi. Preparat ortiqcha sekret hosil qilmaydi, bronxlar giperreaktivligini kamaytiradi. Ambroksol gidroxlorid bromgeksinning metaboliti bo‘lib, oxirgisiga qaraganda samaraliroq, zaharsiz va yaxshi o‘zlashtiriladi.

Ko‘rsatmalar

Bronxial sekretsiya va balg‘am ajralishi buzilishi bilan bog‘liq o‘tkir va surunkali bronxopulmonal kasalliklarda sekretolitik terapiya.

Qo‘llash usuli va dozalari

Tabletkalar ovqatdan keyin suv bilan ichiladi. 12 yoshdan oshgan bolalar va kattalarga sxema bo‘yicha birinchi 2-3 kunda 1 tabletkadan (30 mg) sutkada 3 marta, keyin 1 tabletkadan sutkada 2 marta buyuriladi. Davolash kursi 4-5 kun. Yo‘tal belgilari kuchaygan taqdirda, bemor shifokorga murojaat qilishi lozim.

Nojo‘ya ta’sirlari

Ko‘ngil aynishi, qusish, diareya, qabziyat, gastralgiya, epigastral sohadagi noqulaylik, jig‘ildon qaynashining yengil ko‘rinishlari, allergik reaksiyalar - teri toshmasi, qichishish, eshakemi, kamdan kam hollarda - kontakt dermatit, Kvinke shishi, anafilaktik shok. Teri shikastlanishlari (Stivens-Jonson sindromi va Layell sindromi) haqida juda kam xabar berilgan.

Boshqalar: holsizlik, bosh og‘rig‘i, dizuriya, rinoreya.

Qarshi ko‘rsatmalar

Ambroksol gidroxloridga va/yoki preparatning boshqa komponentlariga yuqori sezuvchanlik, oshqozon va o‘n ikki barmoqli ichak yara kasalligi, laktozani irsiy ko‘tara olmaslik, homiladorlikning I trimestri, emizish davri, 12 yoshgacha bo‘lgan bolalar.

Dozani oshirib yuborish

Belgilari: nojo‘ya reaksiyalarning kuchayishi.

Davolash: sun’iy qusish, preparatni qabul qilgandan keyingi dastlabki 1-2 soatda oshqozonni yuvish; tarkibida yog‘ bo‘lgan mahsulotlarni qabul qilish.

Maxsus ko‘rsatmalar

Ambroksol tabletkalari laktozani o‘z ichiga olganligi sababli, kam uchraydigan irsiy galaktozani ko‘tara olmaslik, Lapp laktoza tanqisligi yoki glyukoza, galaktoza so‘rilishining buzilishi bilan og‘rigan bemorlar ushbu preparatni qabul qilmasligi kerak. Buyrak faoliyati buzilgan va/yoki og‘ir jigar kasalligi bo‘lgan bemorlarga Ambroksol buyurilganda, shifokorning sinchkov nazorati zarur. Bunday hollarda dozani kamaytirish va/yoki qabullar orasidagi vaqtni uzaytirish tavsiya etiladi.

Homiladorlik va laktatsiya davrida qo‘llash

Homiladorlikning I trimestrida Ambroksol qo‘llash mumkin emas. Homiladorlikning II yoki III trimestrida Ambroksolni qo‘llash faqat ona uchun kutilayotgan foyda va homila uchun ehtimoliy xavf nisbatini oldindan baholaganidan so‘ng mumkin. Ambroksol ko‘krak suti bilan ajraladi, shuning uchun emizish davrida qo‘llash mumkin emas.

Dorilarning o‘zaro ta’siri

Ambroksolni antibiotiklar amoksitsillin, sefuroksim, eritromitsin, doksitsiklin bilan bir vaqtda qo‘llash o‘pka to‘qimasida antibiotiklar konsentratsiyasining oshishiga yordam beradi.

Preparatni yo‘talga qarshi faollikka ega bo‘lgan (masalan, tarkibida kodein bo‘lgan) dori vositalari bilan bir vaqtda qo‘llash tavsiya etilmaydi, chunki yo‘tal kamayishi fonida bronxlardan balg‘am chiqarilishi qiyinlashadi. Ambroksolni yurak glikozidlari, diuretiklar bilan birga qo‘llash mumkin.

Chiqarish shakli

Polivinilxlorid plyonkasi va laklangan alyuminiy bosma folgasidan yasalgan konturli katakli o‘ramga 10 tadan tabletka solinadi. 2 tadan kontur yacheykali o‘ramlar davlat va rus tillarida tibbiy qo‘llash bo‘yicha yo‘riqnoma bilan birga karton qutiga joylashtiriladi.

Saqlash shartlari

Asl qadoqda 25 °C dan yuqori bo‘lmagan haroratda saqlang. Bolalar qo‘li yetmaydigan joyda saqlang.