Amizon Maks (Amizon Max) kapsulalari 0,5 g №10 (1 blister)

Tarkib

1 kapsulada quyidagilar mavjud:

faol modda: amizon (enisamum yodid) 0,5 g;

yordamchi modda: magniy stearat;

jelatinli kapsula quyidagilarni o‘z ichiga oladi: jelatin, titan dioksidi (E171), FCF sariq zaqat (E110).

Tavsif

No1 yoki No0 silindrsimon shakldagi qattiq jelatinli kapsulalar. Korpusi va qopqog‘i sariq rangda. Kapsula tarkibi - sariq yoki sariq-yashil rangli kristall kukun.

Farmakoterapevtik guruh

Tizimli qo‘llash uchun virusga qarshi vositalar. ATX kodi: J05A X.

Farmakologik xususiyatlari

Amizon - izonikotin kislotasining hosilasi. Gripp viruslariga ingibirlovchi ta’sir ko‘rsatadi, interferonogen xususiyatga ega, organizmning virusli infeksiyalarga chidamliligini oshiradi, yallig‘lanishga qarshi, isitma tushiruvchi va og‘riq qoldiruvchi ta’sir ko‘rsatadi.

Amizonning virusga qarshi ta’siri uning gripp virusi gemagglyutininlariga bevosita ta’siri bilan bog‘liq bo‘lib, buning natijasida virion keyingi replikatsiya uchun nishon-hujayralarga birikish qobiliyatini yo‘qotadi.

Yallig‘lanishga qarshi ta’sir hujayra va lizosomal membranalarning barqarorlashuvi, bazofillar degranulyatsiyasining sekinlashuvi, antioksidant ta’sir, yallig‘lanish o‘chog‘ida prostaglandinlar, siklik nukleotidlar va energiya almashinuvining me’yorlashuvi natijasidir. Ushbu vositaning haroratni pasaytiruvchi xususiyatlari miyaning termoregulyatsiya markazlariga ta’siri bilan bog‘liq. Preparatning og‘riq qoldiruvchi ta’siri miya ustunining retikulyar formatsiyasi orqali amalga oshiriladi.

Amizon qon plazmasida endogen interferon darajasini 3-4 marta, lizotsim va infeksiya qo‘zg‘atuvchilariga qarshi antitanalar titrini oshirish, shuningdek, T-limfotsitlar va makrofaglarning funksional faolligini rag‘batlantirish orqali hujayraviy immunitetni kuchaytirish orqali doimiy immunitetni kuchaytiradi. Ushbu vosita endogen interferonning kuchli induktoridir.

Amizon og‘iz orqali qabul qilingandan so‘ng qonga tez tushadi, uning qondagi maksimal konsentratsiyasi qabul qilingandan 2-2,5 soat o‘tgach kuzatiladi. Amizon va uning metabolitlari qon oqimida uzoq vaqt aylanib yuradi (yarim chiqarilish davri 13,5-14 soat), jigarda metabolizmga uchraydi, lekin to‘qimalardan tez chiqariladi (yarim chiqarilish davri 2-3 soat). Organizmdan 90-95% siydik bilan metabolitlar holida chiqariladi.

Qo‘llanilishi

Gripp va O‘RVI ni davolash.

Qo‘llash usuli va dozalari

Amizon Maks ovqatdan keyin chaynamay ichiladi.

Kattalarga 1 kapsuladan kuniga 2-4 marta 5-7 kun davomida buyuriladi.

Maksimal bir martalik doza - 1 g, kunlik - 2 g.

Nojo‘ya ta’sirlari

Allergik reaksiyalar: yuqori sezuvchanlik reaksiyalari, shu jumladan teri toshmalari, eshakemi, angionevrotik shish, qichishish.

Ovqat hazm qilish tizimi tomonidan: og‘iz qurishi va achishishi, og‘iz bo‘shlig‘i shilliq qavatining shishishi, gipersalivatsiya, tilning sariq rangga kirishi, ko‘ngil aynishi, qusish, jig‘ildon qaynashi, qorinda og‘riq, o‘ng qovurg‘a ostida og‘irlik, ich ketishi, qorin dam bo‘lishi.

Nafas olish tizimi tomonidan: hansirash, tomoqda achishish hissi.

Boshqalar: bosh og‘rig‘i, bosh aylanishi, holsizlik, qon bosimining o‘zgarishi.

Qarshi ko‘rsatmalar

Yod preparatlari va preparatning boshqa komponentlariga yuqori sezuvchanlik. Anamnezida allergen tabiatidan qat’i nazar, allergik reaksiyalarning mavjudligi. Jigar va buyrakning og‘ir organik zararlanishi.

Dorilarning o‘zaro ta’siri

Amizon Maks antibakterial va immunomodullovchi vositalarning ta’sirini kuchaytiradi. Ushbu preparatni askorbin kislotasi va boshqa vitaminlar bilan kombinatsiya qilish maqsadga muvofiqdir. Shuningdek, Amizon Maksni rekombinant interferonni qo‘llash bilan bir vaqtda buyurish mumkin.

Maxsus ko‘rsatmalar

Preparatni qalqonsimon bez kasalliklari bilan og‘rigan bemorlarga, ayniqsa gipertireozda, ehtiyotkorlik bilan buyurish lozim.

Homiladorlik yoki emizish davrida qo‘llash. Preparatni homiladorlikning birinchi uch oyligida qo‘llash mumkin emas. Ikkinchi va uchinchi trimestrda qo‘llash faqat shifokor ko‘rsatmasi bilan mumkin. Preparatni emizikli ayollarga qo‘llash bo‘yicha ma’lumotlar yo‘q.

Bolalar. Preparat ushbu dori shaklida bolalarga qo‘llanilmaydi.

Avtotransportni boshqarishda yoki boshqa mexanizmlar bilan ishlashda reaksiya tezligiga ta’sir ko‘rsatish qobiliyati. Amizon Maks preparatini qabul qilish avtotransportni boshqarish va boshqa mexanizmlar bilan ishlash qobiliyatiga ta’sir qilmaydi.

Dozani oshirib yuborish

Amizon Max dozasini oshirib yuborish holatlari haqida xabar berilmagan. Doza oshirib yuborilganda nojo‘ya reaksiyalar namoyon bo‘lishi kuchayishi mumkin: shilliq pardalarning jigarrang tusga kirishi, reflektor qusish, qorinda og‘riq va ich ketishi. Shishlar, eritema, husnbuzarsimon va pufakli toshmalar, isitma paydo bo‘lishi mumkin.

Davolash: oshqozonni yuvish, simptomatik davolash.

Chiqarish shakli

Blisterda 10 tadan kapsula. Qutida 1 tadan blister.

Saqlash shartlari

Yorug‘likdan himoyalangan quruq joyda, 25 °C dan yuqori bo‘lmagan haroratda saqlang.

Bolalar qo‘li yetmaydigan joyda saqlang.

Yaroqlilik muddati

2 yil.

Preparatni qadoqda ko‘rsatilgan yaroqlilik muddati tugagandan keyin qo‘llamang.

Dorixonalardan berish shartlari

Retseptsiz.

Ishlab chiqaruvchining nomi va manzili

"Farmak" OAJ.

Ukraina, 04080, Kiyev sh., Frunze ko‘chasi, 74.

O‘zbekiston Respublikasi hududida dori vositalarining sifati bo‘yicha e’tirozlarni (takliflarni) qabul qiluvchi tashkilot to‘g‘risida ma’lumot

"Farmak" OAJning O‘zbekistondagi vakolatxonasi.

100000, Toshkent sh., A. Qodiriy ko‘chasi, 39.

Tel./faks: 235-77-13, 235-67-05