Koglumet

Tarkib

Ta’sir etuvchi moddasi: kobaltning glutamin kislotasi va U vitamini bilan hosil qilgan kompleks birikmasi - koglumet.

Farmakoterapevtik guruh

Immunomodulyator, virusga qarshi vosita (sitokin induktori).

Farmakologik xususiyatlari

Koglumetning yaqqol klinik ta’siri preparat tarkibiy qismlarining xususiyatlari bilan ham, ularning o‘ziga xos endogen faolligini sezilarli darajada oshiradigan yagona biokompleks tarkibiga bog‘langanligi bilan ham bog‘liq.

Struktura hosil qiluvchi element sifatida koglumet tarkibiga kiruvchi kobalt hayotiy zarur mikroelement bo‘lib, organizmda nihoyatda muhim rol o‘ynaydi. U oqsil, yog‘ va uglevod almashinuviga ijobiy ta’sir ko‘rsatadi, organizmda A, C va K vitaminlari hamda B guruhi vitaminlarining to‘planishiga yordam beradi, nikotin kislotasi, piridoksin, NAD sintezini kuchaytiradi. Kobalt ta’sirida antioksidant tizim fermentlari faollashadi, asosiy almashinuv kuchayadi, to‘qimalarning nafas olishi yaxshilanadi. Kobalt minerallar almashinuvini, jumladan, temir, kalsiy va fosforning organizm tomonidan o‘zlashtirilishini yaxshilaydi.

Kobalt immunogenez jarayonida muhim omil hisoblanadi. U komplement tizimini va antitelolar hosil bo‘lish jarayonini faollashtiradi, umumiy rezistentlikning oshishiga yordam beradi va buning natijasida organizmning turli infeksiyalarga chidamliligi kuchayadi.

Koglumet tarkibiga kiruvchi U vitamini muhim biokimyoviy reaksiyalarda: transmetillash, transsulfatlash, transaminlashda faol ishtirok etish orqali organizmning metabolik jarayonlarida muhim rol o‘ynaydi. Detoksikatsion, regeneratsiyalovchi, antioksidant xususiyatlarga ega. Transmetillanish reaksiyalarida hujayra membranalari fosfolipidlari, neyrotransmitterlar, nuklein kislotalar, oqsillar, gormonlar va boshqalar sintezi uchun zarur bo‘lgan metil guruhlarining donori vazifasini bajaradi hamda radikallarni hamda ekzo- va endogen tabiatli bir qator toksik birikmalarni metillash orqali ularni toksik bo‘lmagan shakllarga o‘tkazadi.

U vitamini ta’sirida endogen fosfatidilxolin sintezining me’yorlashuvi hujayra membranalarining regeneratsiyasiga, ularning oquvchanligi va qutblanishining oshishiga yordam beradi, natijada hujayra funksiyasi tiklanadi va faollashadi. Shuningdek, u konyugatsiya jarayonlarini faollashtirish orqali gepatotsitlardagi o‘t kislotalarining zaharliligini pasaytiradi. Lipotrop ta’sirga ega, shu tufayli jigar yog‘ distrofiyasining oldini oladi, antigistamin va antiaterosklerotik xususiyatga ega.

Koglumet tarkibiga kiruvchi glutamin kislotasi atsetilxolin sinteziga, kaliy ionlarining tashilishiga yordam beradi, bosh miya oq va kulrang moddasining oqsil va uglevod almashinuvida ishtirok etadi. U miya to‘qimasi hujayralarida kechadigan oksidlanish-qaytarilish reaksiyalarida muhim rol o‘ynaydi, ATF ko‘rinishida zaxiralanadigan energiya ajralib chiqadi, neyromediator vazifasini bajaradi va boshqalar.

Glutamin kislotasining muhim xossalaridan biri uning azot almashinuvi jarayonida ishtirok etishidir. U ammiakni zararsizlantirishga va uning buyraklar orqali chiqib ketishiga yordam beradi. Ammiakni bog‘lash va zararsizlantirish markaziy asab tizimining normal faoliyatida, shu jumladan ensefalopatiyaning oldini olish yoki bartaraf etishda muhim rol o‘ynaydi.

Koglumet, umuman olganda, gepatoprotektor, antiparazitar, mikroblarga qarshi ta’sirga ega, shuningdek, kuchli immunomodullovchi, virusga qarshi (sitokindutsirlovchi), xlamidiyaga qarshi va toksoplazmozga qarshi ta’sirga ega.

Preparat ham hujayraviy, ham gumoral immun javobning induktorlik xususiyatini namoyon qiladi.

Koglumet ta’sirida qisqa vaqt ichida samarali immunologik javobga erishiladi. Preparat T- va B-limfotsitlarning kooperatsiya jarayonini rag‘batlantiradi va shu bilan antitana ishlab chiqaruvchi hujayralarning samarali ishlab chiqarilishiga yordam beradi.

Koglumet interleykinlar induksiyasi mexanizmlari orqali B-limfotsitlarning o‘sishi va tabaqalanishiga yordam beradi, makrofaglarni, T-limfotsitlarni faollashtiradi, alohida sinf immunoglobulinlarining ishlab chiqarilishini kuchaytiradi.

Preparat ta’sirida immunokompetent hujayralar o‘sishini faollashtiruvchi markerlarga ega limfotsitlar soni sezilarli darajada oshadi.

Koglumet immunotsitlarda kechadigan hujayra ichidagi jarayonlarga rag‘batlantiruvchi ta’sir ko‘rsatadi va shu bilan ularning tez yetilishiga hamda maxsus retseptor molekulalari sinteziga yordam beradi.

Preparat turli immunopatologik holatlarda o‘zak hujayralar proliferatsiyasiga rag‘batlantiruvchi ta’sir ko‘rsatadi.

Koglumet immun javobda antigenlar raqobatini bekor qilish xususiyatiga ega va buning natijasida poliantigenlarning har bir turiga nisbatan kuchli immunitet shakllanishiga yordam beradi.

Preparat yuqori va uzoq muddatli interferon indutsirlovchi faolligi tufayli virusga qarshi xususiyatga ega. Uning ta’sirida "erta" interferon sintezi kuzatiladi.

Preparat gepatitning surunkali shakllari bilan og‘rigan bemorlarda (shuningdek, virus tashuvchanlik bilan birga) qisqa vaqt ichida gepatit V va S viruslariga seronegativ reaksiyani keltirib chiqaradi, bilirubinning yuqori darajasini va jigar fermentlari faolligini pasaytiradi, kattalashgan jigar hajmini samarali kamaytiradi, jigarning antitoksik funksiyalarini sezilarli darajada oshiradi.

Preparatni xlamidioz bilan kasallangan bemorlarni kompleks davolashga kiritish organizmning tez va deyarli to‘liq sanatsiyasiga olib keladi.

OIV bilan kasallangan va OITS bilan kasallangan bemorlarda koglumetni monoterapiya preparati sifatida yoki ARVT preparatlari bilan birgalikda qo‘llash asosiy kasallikning klinik ko‘rinishini sezilarli darajada barqarorlashtirish, immunologik ko‘rsatkichlarning sezilarli yaxshilanishi, shuningdek, opportunistik infeksiya bilan bog‘liq bo‘lgan yondosh kasalliklarning (gepatitlar, kamqonlik, TORCH-infeksiyalar va boshqalar) jadal regressiyasi bilan birga keladi.

OIV infeksiyasiga chalingan va OITS bilan og‘rigan bemorlarning preparatni qabul qilishi umumiy ahvolni, uyquni va ishtahani yaxshilaydi, hayotiy tonusni, ish qobiliyatini oshiradi va shu bilan hayot sifatini yaxshilaydi. ARVT va koglumet preparatlarini birgalikda qo‘llash nojo‘ya ta’sirlarni sezilarli darajada kamaytirishga va ARV terapiyasi preparatlariga xos bo‘lgan asoratlarning oldini olishga yordam beradi.

SARS-CoV-2 bilan kasallangan bemorlarda Koglumetni qo‘llash laboratoriya va instrumental tahlillar ko‘rsatkichlarining sezilarli darajada yaxshilanishi bilan birga keldi.

Koglumet ta’sirida koronavirus infeksiyasi bilan og‘rigan bemorlarda tana haroratining pasayishi, nafas olish va yurak ritmining me’yorlashishi yoki sezilarli darajada yaxshilanishi qisqa vaqt ichida kuzatiladi. Koglumet, kasallikning og‘irligiga qarab, COVID-19 bilan og‘rigan bemorlarda virusli pnevmoniyaning og‘irlik darajasini sezilarli darajada pasaytiradi yoki regressiyasini ta’minlaydi. Preparat ta’sirida eng qisqa vaqt ichida SARS-CoV-2 ga nisbatan yuqori immun javob shakllanadi.

Ko‘g‘lumet COVID-19 bilan kasallangan bemorlarning umumiy ahvolini sezilarli darajada yaxshilaydi. Natijada uyqu va ishtahaning erta me’yorlashuvi, hayotiy tonusning oshishi kuzatiladi.

Qo‘llanilishi

Immunomodulyatsiyalovchi vosita sifatida:

ikkilamchi immunitet tanqisligi holatlari: o‘tkir, surunkali va qaytalanuvchi infeksiyalar hamda yuqumli-yallig‘lanish kasalliklari;

teri kasalliklari: psoriaz, allergodermatozlar, belbog‘simon temiratki;

virusli, bakterial va zamburug‘li etiologiyali urogenital infeksiyalar: ureomikoplazmali etiologiyali surunkali uretrit, mikotik etiologiyali kolpit va surunkali endotservitsit, bakterial vaginoz, xlamediyali-bakterial etiologiyali surunkali uretrit va boshqalar.

Virusga qarshi (sitokindutsirlovchi) vosita sifatida:

parazitar etiologiyali kasallik, toksoplazmoz, xlamidioz;

surunkali gepatit V, S;

SMV;

gerpes;

OIV infeksiyasi va OITS;

Coronaviridae oilasi, shu jumladan SARS-CoV-2 bilan bog‘liq virusli kasalliklarda.

Qo‘llash usullari va dozalari

Ichkariga. Preparat monoterapiya sifatida yoki kompleks terapiya tarkibida, ovqatdan 30-60 daqiqa oldin, kasallikning nozologik shakliga bog‘liq sxema bo‘yicha buyuriladi.

Koglumetni immunomodullovchi vosita sifatida qo‘llash:

ikkilamchi immunitet tanqisligi holatlarida 1 tabletkadan kuniga 2 yoki 3 marta 10-15 kun davomida buyuriladi;

bakterial, virusli va zamburug‘li etiologiyali teri kasalliklari va urogenital infeksiyalarda 1 tabletkadan kuniga 2 yoki 3 mahal 14 kun davomida buyuriladi.

Koglumetni virusga qarshi (sitokin indutsirlovchi) vosita sifatida qo‘llash:

surunkali B va C gepatitlarida ikki oygacha kuniga 2 yoki 3 marta 1 tabletkadan buyuriladi;

surunkali hujayra ichi infeksiyalarida (TORCH-infeksiyalar): sitomegaloviruslar, gerpes (oddiy va o‘rab oluvchi gerpes), toksoplazmoz va xlamidioz 1 tabletkadan kuniga 2 yoki 3 marta buyuriladi, davolash kursi davomiyligi 1 oygacha.

Zarurat tug‘ilganda davolash kurslari uzaytirilishi yoki qayta tayinlanishi mumkin. Kurslar orasidagi tanaffus 1 oydan oshmasligi kerak.

OIV infeksiyasining barcha bosqichlarida qo‘llaniladi. OIV infeksiyasining boshlang‘ich bosqichlarida koglumet monoterapiya preparati sifatida qo‘llaniladi. OIV infeksiyasining zo‘rayib boruvchi bosqichi bo‘lgan bemorlarda va "OIV/Sil" yoki "Sil/OIV" tipidagi aralash infeksiyalarda Koglumetni ARVT preparatlari bilan birgalikda qo‘llash lozim.

OIV yuqqan va OITS bilan kasallangan bemorlarda preparatning dozasi va qo‘llash davomiyligi: 1 tabletkadan kuniga 2 mahal; jigarning yondosh kasalliklarida, kamqonlik va silda 1 tabletkadan kuniga 3 mahal. Davolash kursi kamida 6 oy, kurslar orasidagi tanaffus 3 oydan oshmasligi kerak.

Coronaviridae oilasi, shu jumladan SARS-CoV-2 bilan bog‘liq virusli kasalliklarda 2 tabletkadan kuniga 2 yoki 3 marta buyuriladi. Zarurat tug‘ilganda doza oshirilishi mumkin: 4 tabletkadan kuniga 2 mahal. Davolash kursi 15 kundan 30 kungacha.

Nojo‘ya ta’sirlari

Preparat yaxshi qabul qilinadi. Hech qanday nojo‘ya ta’sirlar aniqlanmagan.

Qarshi ko‘rsatmalar

Preparat komponentlariga yuqori sezuvchanlik.

Maxsus ko‘rsatmalar

Koglumet aralash immun javob induktori xususiyatini namoyon qiladi: immun tanqisligining nisbatan yengil shakllarida preparat ta’sirida hujayraviy immunitetning faollashuvi (Th1-tip) ustunlik qiladi, nisbatan og‘ir shakllarida esa immun javobning gumoral turi (Th2) ko‘proq faollashadi.

OIV yuqqan bemorlarda preparatni qabul qilishdagi tanaffuslar koglumetga chidamlilikning paydo bo‘lishiga olib kelmaydi.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Dorilarning o‘zaro ta’siri

Koglumetning bazis terapiya preparatlari bilan mos kelmaslik holatlari aniqlanmadi.

Chiqarish shakli

0,005 g li tabletkalar blisterlarda va flakonlarda.

Saqlash shartlari

Yorug‘likdan himoyalangan quruq joyda, 25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

"A.B.-BIOKOM" MCHJ.