Troxevasin

Tarkib

100 g gel tarkibida quyidagilar mavjud:

Ta’sir etuvchi modda: trokserutin 2,0 g.

Yordamchi moddalar: karbomer 0,60 g, trolamin (trietanolamin) 0,70 g, dinatriy edetat digidrati 0,05 g, benzalkoniy xlorid 0,10 g, tozalangan suv 96,55 g.

Tavsif

Gel sariqdan och jigarranggacha bo‘ladi.

Chiqarish shakli

Sirtga qo‘llash uchun 2% li gel.

Farmakoterapevtik guruh

Venotonizatsiyalovchi va venoprotektor vosita. Trokserutin. ATX kodi: C05CA04.

Farmakologik xususiyatlari

Farmakodinamika

Troksevazin® flavonoid (rutinning hosilasi) hisoblanadi. P-vitamin faolligiga ega; venotonik, venoprotektor, shishga qarshi, yallig‘lanishga qarshi, qon ivishiga qarshi va antioksidant ta’sir ko‘rsatadi. Kapillyarlarning o‘tkazuvchanligi va mo‘rtligini kamaytiradi, ularning tonusini oshiradi. Tomir devorining zichligini oshiradi, plazmaning suyuq qismi ekssudatsiyasini va qon hujayralari diapedezini kamaytiradi.

Tomir devoridagi yallig‘lanishni kamaytiradi, uning yuzasiga trombotsitlarning yopishib qolishini cheklaydi.

Farmakokinetika

Zararlangan sohaga gel surtilganda, ta’sir etuvchi modda epidermis orqali tez o‘tadi, 30 daqiqadan so‘ng dermada, 2-5 soatdan so‘ng esa teri osti yog‘ to‘qimasida aniqlanadi.

Ko‘rsatmalar

Oyoq venalarining varikoz kengayishi.

Surunkali venoz yetishmovchilik belgilari: shish, og‘riq, oyoqlarda og‘irlik hissi.

Yuza tromboflebit, periflebit, flebotromboz.

Posttrombotik sindrom.

Posttrombotik shish, gematomalar.

Venalardagi operatsiyalardan keyingi asoratlarning oldini olish.

Qarshi ko‘rsatmalar

Trokserutinga yoki preparat tarkibiga kiruvchi har qanday yordamchi moddalarga yuqori sezuvchanlik.

Teri qoplamlari butunligining buzilishi.

18 yoshgacha bo‘lgan bolalar (klinik qo‘llash tajribasi yetarli emas).

Ehtiyotkorlik bilan

Surunkali buyrak yetishmovchiligi (uzoq muddat qo‘llanganda).

Agar sizda yuqorida sanab o‘tilgan kasalliklardan biri bo‘lsa, preparatni qo‘llashdan oldin shifokor bilan maslahatlashish zarur.

Qo‘llash usuli va dozalari

Tashqariga!

Agar shifokor tomonidan boshqacha tavsiya etilmagan bo‘lsa, u holda gelning 1-3 sm uzunlikdagi tasmasi (zararlangan yuza maydoniga qarab) sutkada 2 marta ertalab va kechqurun zararlangan soha terisiga yupqa qatlam qilib surtiladi va to‘liq so‘rilguncha yumshoq ishqalanadi. Kerak bo‘lsa, gelni okklyuzion bog‘lam ostiga surtish mumkin.

Ta’sirini kuchaytirish uchun Troksevazin® kapsulalarini qabul qilish tavsiya etiladi.

Agar davolanishdan 6-7 kun o‘tgach, ahvol yaxshilanmasa yoki alomatlar og‘irlashsa yoki yangi alomatlar paydo bo‘lsa, shifokor bilan maslahatlashish kerak.

Preparatni faqat ko‘rsatmalarga, qo‘llash usuliga va yo‘riqnomada ko‘rsatilgan dozalarda qo‘llang.

Nojo‘ya ta’sirlari

Immun tizimi tomonidan buzilishlar: kamdan-kam hollarda - eshakemi, ekzema, dermatit.

Agar sizda yo‘riqnomada ko‘rsatilgan nojo‘ya ta’sirlar kuzatilsa yoki ular og‘irlashsa, yoki yo‘riqnomada ko‘rsatilmagan boshqa nojo‘ya ta’sirlarni sezsangiz, bu haqda shifokorga xabar bering.

Dozani oshirib yuborish

Trokserutinni mahalliy qo‘llashda dozani oshirib yuborish holatlari qayd etilmagan.

Bexosdan ko‘p miqdorda gel yutib yuborilganda, preparatni organizmdan chiqarishning umumiy choralarini (qusish vositalari) o‘tkazish va shifokorga murojaat qilish kerak. Ko‘rsatma bo‘lsa, peritoneal dializ o‘tkaziladi.

Preparat dozasi oshirib yuborilganda shifokorga murojaat qilish zarur.

O‘zaro aloqa

Trokserutinning boshqa dori vositalari bilan o‘zaro ta’siri haqida ma’lumotlar yo‘q.

Maxsus ko‘rsatmalar

Gel faqat shikastlanmagan yuzaga surtiladi.

Ochiq yaralar, ko‘zlar va shilliq qavatlarga tegishdan saqlaning!

Qon tomirlarining o‘tkazuvchanligi yuqori bo‘lgan holatlarda (shu jumladan skarlatina, gripp, qizamiq, allergik reaksiyalar) gel askorbin kislotasi bilan birgalikda uning ta’sirini kuchaytirish uchun ishlatiladi.

Preparatni mustaqil qo‘llashda maksimal muddatlar va tavsiya etilgan dozalardan oshib ketish mumkin emas.

Kasallik belgilari kamaymasa yoki og‘irlashsa, shifokorga murojaat qilish zarur.

Yordamchi moddalar

Preparat tarkibida benzalkoniy xlorid, qo‘zg‘atuvchi modda bo‘lib, teri reaksiyalarini keltirib chiqarishi mumkin.

Homiladorlik va laktatsiya

Homiladorlik

Homiladorlikning I trimestrida klinik qo‘llash tajribasi yo‘qligi sababli preparatni qo‘llash mumkin emas. Homiladorlikning II va III trimestrlarida, agar ona uchun kutilayotgan foyda homila uchun potensial xavfdan yuqori bo‘lsa, preparatni qo‘llash mumkin. Homiladorlikning II va III trimestrlarida preparatni qo‘llashdan oldin shifokor bilan maslahatlashish zarur.

Emizish davri

Trokserutinning ona sutiga o‘tishi haqida ma’lumotlar yo‘q. Preparatni emizish davrida qo‘llash mumkin emas.

Transport vositalari va mexanizmlarini boshqarish qobiliyatiga ta’siri

Troksevazin® geli transport vositalarini boshqarish va mexanizmlar bilan ishlash qobiliyatiga ta’sir ko‘rsatmaydi.

Qadoq

Alyuminiy membrana bilan ichki lak qoplamali alyuminiy tubaga 40 g dan yoki alyuminiy membrana bilan laminat (plastik) tubaga 20 g, 40 g yoki 100 g dan solinadi. Har bir tuba tibbiy qo‘llash bo‘yicha yo‘riqnoma bilan birga karton qutiga joylashtiriladi, unga qo‘shimcha ravishda himoya yorliqlari yopishtirilishi mumkin.

Saqlash shartlari

25 °C dan yuqori bo‘lmagan haroratda saqlanadi.

BOLALAR QO‘L YETMAYDIGAN JOYDA SAQLANG!

Yaroqlilik muddati

Alyuminiy tuba uchun - 5 yil.

Laminat (plastik) tuba uchun - 5 yil.

Yaroqlilik muddati o‘tgandan keyin qo‘llanilmaydi.

Dorixonalardan berish shartlari

Retseptsiz.

Ro‘yxatdan o‘tish guvohnomasi egasi

BALKANFARMA - Bolgariya.

Ishlab chiqaruvchi

BALKANFARMA - Bolgariya.