Doprokin-C og'iz suspenziyasi 1 mg/ml + 4 mg/ml 60 ml (shisha)

Tarkib

1 ml suspenziya tarkibiga quyidagilar kiradi:

faol moddalar: domperidon - 1 mg, simetikon - 4 mg;

yordamchi moddalar: natriy metilparagidroksibenzoat, natriy propilparagidroksibenzoat, saxaroza, limon kislotasi monogidrati, sorbitolning kristallanmaydigan eritmasi, natriy krosskarmelloza, polisorbat 80, "Ananas" xushbo‘ylantirgichi, titan dioksidi, tozalangan suv.

Tavsif

Ananas hidli, oq rangli suspenziya.

Dori shakli

Ichish uchun suspenziya.

Farmakoterapevtik guruh

Funksional oshqozon-ichak kasalliklarida qo‘llaniladigan vositalar. ATX kodi: A03.

Farmakologik xususiyatlari

Doprokin-S - qayt qilishga qarshi preparat, oshqozon-ichak trakti motorikasini rag‘batlantiradi.

Domperidon - periferik dofamin retseptorlarining selektiv antagonisti bo‘lib, qusishga qarshi xususiyatlarga ega. Qusishga qarshi ta’sir, ehtimol, periferik (gastrokinetik) ta’sir va xemoretseptorlarning trigger zonasida dofamin retseptorlariga nisbatan antagonizmning kombinatsiyasi bilan bog‘liq bo‘lishi mumkin.

Domperidon ichga qabul qilinganda me’daning antral qismi va o‘n ikki barmoqli ichakning peristaltik qisqarishlari davomiyligini oshiradi, me’daning bo‘shatilishi sekinlashgan holda uni tezlashtiradi va sog‘lom odamlarda qizilo‘ngachning pastki qismi sfinkterining bosimini oshiradi.

Domperidon oshqozon sekretsiyasiga ta’sir ko‘rsatmaydi, gematoensefalik to‘siqdan (GEB) yomon o‘tadi.

Simetikon sirt-faol xususiyatga ega bo‘lib, ichakda gazlar miqdorini kamaytiradi. Ovqat hazm qilish yo‘lidagi gaz pufakchalarining yuza tarangligini pasaytirib, ularning yorilishiga olib keladi; pufakchalar parchalanganda ajralib chiqadigan gazlar ichak devorlariga yutiladi yoki peristaltika tufayli tashqariga chiqariladi.

Farmakokinetika

Doprokin-S preparatining farmakokinetikasi tarkibiga kiruvchi komponentlar - domperidon va simetikonning farmakokinetikasi bilan bog‘liq.

Ichga qabul qilinganda domperidon to‘planmaydi va o‘z metabolizmini keltirib chiqarmaydi. Domperidon plazma oqsillari bilan 91-93% bog‘lanadi. Simetikon ichak bo‘shlig‘iga tarqaladi. Domperidon jigarda gidroksillanish va N-dezalkillanish yo‘li bilan metabolizmga uchraydi. Simetikon organizmda metabolizmga uchramaydi. Domperidonning siydik va najas bilan chiqarilishi ichilgan dozaning mos ravishda 31% va 66% ini tashkil etadi. O‘zgarmagan holda najas bilan (10%) va siydik bilan (taxminan 1%) chiqariladi. Sog‘lom ko‘ngillilarda bir martalik dozani qabul qilgandan so‘ng qon plazmasidan yarim chiqarilish davri (T1/2) 7-9 soatni tashkil etadi va og‘ir buyrak yetishmovchiligi bo‘lgan bemorlarda uzayadi (zardob kreatinin darajasi 6 mg/dl dan yuqori). Simetikon o‘zgarmagan holda najas bilan chiqariladi.

Qo‘llanilishi

ko‘pincha oshqozon bo‘shashining sekinlashishi, oshqozon-qizilo‘ngach reflyuksi, ezofagit bilan bog‘liq bo‘lgan dispeptik alomatlar majmuasi (epigastral sohada to‘lish hissi, qorin dam bo‘lishi hissi, qorinning yuqori qismida og‘riq, kekirish, meteorizm, ko‘ngil aynishi, qusish, jig‘ildon qaynashi va regurgitatsiya);

radioterapiya, dori terapiyasi yoki parhezning buzilishi natijasida kelib chiqqan funksional, organik, yuqumli sabablarga ko‘ra ko‘ngil aynishi va qusish;

Parkinson kasalligida dofamin agonistlari (masalan, L-dopa va bromokriptin) qo‘llanilganda kelib chiqadigan ko‘ngil aynishi va qusish;

qusish sindromi, davriy qusish, oshqozon-qizilo‘ngach reflyuksi va bolalarda oshqozon motorikasining boshqa buzilishlari.

Qo‘llash usuli va dozalari

Ichish uchun suspenziya.

Suspenziya solingan flakonni ishlatishdan oldin chayqatish kerak. Suspenziyani dozalash uchun 5 ml, 10 ml, 15 ml ga darajalangan o‘lchov stakani ishlatiladi.

Kattalar va 12 yoshdan kattalar

Surunkali dispepsiyada ovqatdan 15-30 daqiqa oldin va zarur bo‘lsa, uxlashdan oldin 10 ml suspenziyadan sutkada 3 marta buyuriladi.

Ko‘ngil aynishi va qusishda sutkada 3-4 marta ovqatdan oldin va uyqudan oldin 10-20 ml suspenziya buyuriladi.

12 yoshgacha bo‘lgan bolalar

Surunkali dispepsiyada tana vaznining har 10 kg qismiga 2,5 ml suspenziya hisobida sutkada 3 mahal ovqatdan oldin va zarur bo‘lsa, uyqudan oldin buyuriladi.

Ko‘ngil aynishi va qusishda preparat 10 kg tana vazniga 5 ml suspenziya hisobida sutkada 3-4 marta ovqatdan oldin va uyqudan oldin buyuriladi.

Doprokin-S preparati tarkibiga kiruvchi domperidonning maksimal sutkalik dozasi 80 mg (80 ml preparat) dan oshmasligi kerak.

Nojo‘ya ta’sirlari

Nojo‘ya ta’sirlari kam kuzatiladi.

Ovqat hazm qilish tizimi tomonidan: kamdan-kam hollarda - oshqozon-ichak trakti (OIT) buzilishlari; kamdan-kam hollarda - ichakning o‘tkinchi spazmlari.

MAT tomonidan: ekstrapiramidal simptomlar (juda kam hollarda - bolalarda; yakka hollarda - kattalarda); to‘liq qaytuvchan va davolash to‘xtatilgandan keyin yo‘qoladi.

Endokrin tizim tomonidan: kamdan-kam hollarda galaktoreya, ginekomastiyaga olib keladigan giperprolaktinemiya bo‘lishi mumkin; amenoreya.

Allergik reaksiyalar: kamdan-kam hollarda - toshma, eshakemi, qichishish.

Qarshi ko‘rsatmalar

preparat komponentlariga yuqori sezuvchanlik;

oshqozon-ichakdan qon ketishi;

me’da harakat funksiyasini rag‘batlantirish xavfli bo‘lishi mumkin bo‘lgan mexanik tutilish yoki teshilish;

gipofizning prolaktin ishlab chiqaruvchi o‘smasi (prolaktinoma).

Dorilarning o‘zaro ta’siri

Antixolinergik preparatlar Doprokin-S preparatining antidispeptik ta’sirini neytrallashi mumkin.

Preparatning ichga qabul qilishdagi biosinguvchanligi oldingi simetidin yoki natriy gidrokarbonat qabul qilishdan keyin kamayadi.

Antatsid va antisekretor preparatlarni Doprokin-S preparati bilan bir vaqtda qabul qilish mumkin emas, chunki ular preparatning biosinguvchanligini pasaytiradi.

Domperidonning metabolik o‘zgarishlarining asosiy yo‘li sitoxrom P450 tizimining 3A4 izofermenti ishtirokida sodir bo‘ladi. In vitro tadqiqotlari asosida taxmin qilish mumkinki, domperidon va ushbu izofermentni sezilarli darajada ingibirlovchi dori vositalari bir vaqtda qo‘llanganda, plazmadagi domperidon miqdori oshishi mumkin.

Doprokin-S ta’sirini kuchaytirmaydigan neyroleptiklar; dofaminergik retseptorlar agonistlari (bromokriptin, L-dopa) bilan ham birga ishlatilishi mumkin, ularning ovqat hazm qilish buzilishi, ko‘ngil aynishi, qusish kabi noxush periferik ta’sirlarini asosiy xususiyatlarini neytrallashtirmasdan bostiradi.

Maxsus ko‘rsatmalar

Jigar yetishmovchiligi bo‘lgan bemorlarga doprokin-S ni ehtiyotkorlik bilan buyurish kerak, bunda jigarda domperidon metabolizmining yuqori darajasi hisobga olinadi. Uzoq muddatli terapiyada bunday bemorlar muntazam kuzatuv ostida bo‘lishlari kerak.

Buyrak yetishmovchiligida preparatni qabul qilish oralig‘ini uzaytirish tavsiya etiladi. Preparatning kam miqdori o‘zgarmagan holda buyraklar orqali chiqarilishi sababli, buyrak yetishmovchiligi bo‘lgan bemorlarda bir martalik dozani tuzatish talab etilmaydi. Biroq, takroran buyurilganda, buyrak faoliyati buzilishining og‘irligiga qarab, qabul qilish chastotasini kuniga 1-2 martagacha kamaytirish lozim, shuningdek, dozani kamaytirish talab etilishi mumkin.

Homiladorlik va laktatsiyada qo‘llash

Doprokin-S preparatini homiladorlikda qo‘llash faqat ona uchun terapiyaning kutilayotgan foydasi homila uchun potensial xavfdan yuqori bo‘lgan taqdirdagina mumkin.

Laktatsiya davrida preparatni qo‘llash zarur bo‘lganda, ko‘krak suti bilan emizishni to‘xtatish masalasini hal qilish lozim.

Pediatriyada qo‘llanishi

Hayotning birinchi oylarida metabolik va gematoensefalik to‘siq (GEB) funksiyalari to‘liq rivojlanmaganligi, shuningdek, domperidonga xos bo‘lgan MNTga ta’sir etmasligi asosan GEBdan kuchsiz o‘tish natijasi ekanligini hisobga olgan holda, preparatni 1 yoshgacha bo‘lgan bolalarda qo‘llash tavsiya etilmaydi.

Avtotransport va mexanizmlarni boshqarish qobiliyatiga ta’siri

Doprokin-S avtotransportni boshqarish va mexanizmlar bilan ishlash qobiliyatiga ta’sir ko‘rsatmaydi.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Dozani oshirib yuborish

Belgilari: uyquchanlik, dezoriyentatsiya va ekstrapiramidal reaksiyalar, ayniqsa bolalarda.

Davolash: Faollashtirilgan ko‘mir qo‘llash va sinchiklab kuzatish. Antixolinergik vositalar, parkinsonizmni davolash uchun qo‘llaniladigan dorilar yoki antigistamin preparatlar ekstrapiramidal reaksiyalar paydo bo‘lganda samarali bo‘lishi mumkin.

Chiqarish shakli

Ichish uchun mo‘ljallangan suspenziya vintli plastik qopqoqli 60 ml li sariq shisha flakonda.

Karton qutida o‘lchov stakani va varaq-qo‘yilmasi bo‘lgan 1 flakon.

Saqlash shartlari

25 °C dan yuqori bo‘lmagan haroratda saqlanadi.

Flakon ochilgandan so‘ng preparat 28 kun davomida ishlatiladi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

Savdo belgisi va ro‘yxatdan o‘tkazish guvohnomasining egasi kompaniya hisoblanadi

"Uorld Meditsin Iloch San. ve Tij. A.Sh.," Turkiya

("World Medicine Ilaç San. ve Tic. A.Ş.," Turkey).

Ishlab chiqarilgan

"Zentiva Sag‘lık Yürünleri Sana yi ve Ticaret A.Ş.," Turkiya

(Kyuchyukkarishtiron mahallasi, Merkez Sokak, No: 223/A,

39780 Buyukqorishtiron, Lyuleburgaz, Qirqlarelli)

"Zentiva Sag‘lık Ürünleri Sanayi ve Ticaret A.Ş.," Turkey

(Küçükkarıştıran mahallasi, Merkez ko‘chasi, No: 223/A,

39780 Büyükkarıştıran, Lüleburgaz, Kırkirili).