Kokarbens liyofilizat №3 in'ektsiya uchun eritma (ampulalar) + erituvchi 2 ml dan (ampulalar)

Tarkib

1 ampula tarkibiga quyidagilar kiradi:

Faol moddalar: nikotinamid - 20 mg, kokarboksilaza - 60 mg, sianokobalamin - 600 mkg, dinatriy adenozintrifosfat trigidrat - 10 mg.

Erituvchining har bir ampulasi quyidagilarni o‘z ichiga oladi: 10 mg lidokain, 2 ml 0,5% gidroxlorid eritmasi ko‘rinishida.

Yordamchi moddalar: glitsin, metilparagidroksibenzoat.

Tavsif

Pushti rangli liofillashgan quruq g‘ovak massa. Gigroskopik.

Farmakologik ta’siri

Farmakodinamika

ATF yurak qon tomirlari tizimini kengaytiradi va yurak mushaklarining qon bilan ta’minlanishini yaxshilaydi. ATFning yuqori energiyali fosfoefir bog‘i uzilishi natijasida ajralib chiqqan energiya yurak mushagini energiya bilan ta’minlashga sarflanadi.

Kokarboksilaza koferment bo‘lib, organizmda tiaminning fosforlanishi natijasida hosil bo‘ladi va organizmning ko‘plab funksiyalariga boshqaruvchi ta’sir ko‘rsatadi. Moddalar almashinuvi jarayonida ishtirok etadi, ayniqsa uglevodorodlar almashinuvida muhim rol o‘ynaydi; asab to‘qimasi trofikasini yaxshilaydi; yurak-qon tomir tizimi funksiyasini me’yorlashtirishga yordam beradi.

Sianokobalamin (vitamin B12) transmetillanish jarayonida; metionin, nuklein kislota va kolin sintezlanish jarayonlarida; eritrotsitlar hosil bo‘lishida ishtirok etadi. B12 vitamini asab tizimi faoliyatiga ijobiy ta’sir ko‘rsatadi, bosh miya faoliyatini yaxshilaydi, miyelin qobig‘iga kiruvchi lipoproteinlarni ishlab chiqarish uchun zarur bo‘lgan fermentlar sintezida ishtirok etadi.

Nikotinamid fosforlanish jarayonlarini, suv va elektrolitlar almashinuvini boshqaradi. Nikotinamidning yurak-qon tomir tizimiga farmakologik ta’siri uning tomirlarni kengaytiruvchi ta’siri bilan bog‘liq.

Farmakokinetika

Nikotinamid - barcha to‘qimalarga tez tarqaladi. Yo‘ldosh to‘sig‘i orqali va ona sutiga o‘tadi. Jigarda metabolizmga uchrab, nikotinamid-Nmetilnikotinamid hosil qiladi. Buyraklar orqali chiqariladi.

Plazmadan yarim chiqarilish davri taxminan 1,3 soatni, statsionar taqsimlanish hajmi taxminan 60 litrni, umumiy klirens taxminan 0,6 l/daqiqani tashkil etadi.

Kokarboksilaza - mushak orasiga yuborilgandan keyin tez so‘riladi. Organizmning ko‘pchilik to‘qimalariga kiradi. Metabolik parchalanishga uchraydi. Metabolizm mahsulotlari asosan buyraklar orqali chiqariladi.

Sianokobalamin - qonda sianokobalamin uni to‘qimalarga tashiydigan I va II transkobalaminlar bilan bog‘lanadi. Asosan jigarda to‘planadi. Plazma oqsillari bilan bog‘lanishi - 90%. Mushak orasiga yuborilgandan keyin tez va to‘liq so‘riladi. Mushak orasiga yuborilgandan so‘ng maksimal konsentratsiyasiga 1 soat o‘tgach erishiladi. Jigardan o‘t orqali ichakka chiqariladi va yana qonga so‘riladi. Buyrak faoliyati me’yorida bo‘lganda - 7-10% buyraklar, taxminan 50% - ichak orqali chiqariladi. Buyraklar funksiyasi pasayganda - 7% buyraklar, 70-100% - ichaklar. Yo‘ldosh to‘sig‘i orqali ko‘krak sutiga o‘tadi.

Dinatriy adenozintrifosfat trigidrat - parenteral yuborilgandan so‘ng organ hujayralariga kiradi, u yerda energiya ajralib chiqishi bilan adenozin va noorganik fosfatga parchalanadi. Keyinchalik parchalanish mahsulotlari ATF resinteziga qo‘shiladi.

Ko‘rsatmalar

nevritlar, neyropatiyalar (qandli diabet, pernitsioz anemiya va boshqalarda);

kelib chiqishi turlicha bo‘lgan nevralgiyalar;

mialgiya, ishialgiya;

lyumbago, radikulit;

bursitlar, tendinitlar;

yurak ishemik kasalligi, miokardit, miokardiopatiya;

diabetik angiopatiya; homiladorlar toksikozi;

homila gipoksiyasi;

ko‘ruv nervi nevriti;

ko‘z tubining distrofik o‘zgarishlari.

Qo‘llash usuli

Preparat chuqur mushak orasiga (dumba mushagiga) yuboriladi.

Og‘riq sindromi kuchli bo‘lgan hollarda davolashni o‘tkir simptomlar yo‘qolguncha sutkasiga 1 ampuladan (2 ml) mushak orasiga yuborishdan boshlash maqsadga muvofiqdir.

Qo‘llash muddati - 9 kun.

Simptomlar yaxshilangandan so‘ng yoki polineyropatiya simptomlari o‘rtacha ifodalangan hollarda: 1 ampuladan haftasiga 2-3 marta, 2-3 hafta davomida.

Tavsiya etilgan davolash kursi kasallikning og‘irligiga qarab 3-9 inyeksiya. Davolashning davomiyligi va takroriy kurslarni o‘tkazish kasallik xususiyati hamda og‘irligiga qarab shifokor tomonidan belgilanadi.

Nojo‘ya ta’sirlari

Salbiy nojo‘ya reaksiyalarning namoyon bo‘lish chastotasi JSST tasnifiga muvofiq keltirilgan: juda tez-tez (1/10 dan ko‘p); tez-tez (1/10 dan kam, lekin 1/100 dan ko‘p); tez-tez emas (1/100 dan kam, lekin 1/1000 dan ko‘p); kamdan-kam (1/1000 dan kam, lekin 1/10000 dan ko‘p); juda kamdan-kam (1/10000 dan kam), shu jumladan alohida holatlar; chastotasi noma’lum.

Immun tizimi tomonidan: kamdan-kam hollarda - allergik reaksiyalar (teri toshmasi, nafas olishning qiyinlashuvi, anafilaktik shok, Kvinke shishi).

Asab tizimi tomonidan: ayrim hollarda - bosh aylanishi, bosh og‘rig‘i, qo‘zg‘alish, ongning chalkashishi.

Yurak tomonidan: juda kam hollarda - taxikardiya; ayrim hollarda bradikardiya, aritmiya; chastotasi noma’lum - yurak sohasidagi og‘riqlar.

Tomirlar tomonidan: chastotasi noma’lum - yuz va tananing yuqori yarmi terisining qizarishi, sanchish va achishish hissi, "toshqinlar."

Oshqozon-ichak trakti tomonidan: ayrim hollarda - qusish, diareya.

Teri va teri osti to‘qimalari tomonidan: juda kam hollarda - ko‘p terlash, akne, qichishish, eshakemi.

Suyak-mushak va biriktiruvchi to‘qima tomonidan: juda kam hollarda - talvasalar.

Umumiy buzilishlar va yuborish joyidagi buzilishlar: juda kamdan-kam hollarda - preparat yuborilgan joyda ta’sirlanish, og‘riq va achishish, holsizlik paydo bo‘lishi mumkin.

Agar ko‘rsatilgan istalmagan reaksiyalardan birortasi og‘irlashsa yoki yo‘riqnomada ko‘rsatilmagan boshqa istalmagan reaksiyalar paydo bo‘lsa, bu haqda shifokorga xabar berish kerak.

Yaqqol noxush reaksiyalar rivojlanganda preparat bekor qilinadi.

Dozani oshirib yuborish

Belgilari: preparatning nojo‘ya ta’sirlari kuchayishi.

Davolash: preparatni yuborish darhol to‘xtatiladi, simptomatik terapiya, shu jumladan desensibilizatsiyalovchi terapiya buyuriladi.

Maxsus shartlar

Kokarbens preparatini qo‘llashda gipoglikemik dori vositasining dozasini to‘g‘ri tanlash va qandli diabet kechishini adekvat nazorat qilish zarur. Tayyorlangan eritmaning rangi qizil bo‘lishi kerak. Eritma rangi o‘zgargan bo‘lsa, preparatni qo‘llash mumkin emas.

Eritma tayyorlangandan so‘ng darhol qo‘llanilishi kerak.

Preparat tarkibida metilparaben mavjud bo‘lib, u allergik reaksiyalarni (ehtimol sekinlashgan turdagi) va istisno hollarda bronxospazmni keltirib chiqarishi mumkin.

Avtomobil haydash va mexanizmlar bilan ishlashga ta’siri

Markaziy asab tizimi tomonidan nojo‘ya ta’sirlar (bosh aylanishi, es-hushning chalkashligi) yuzaga kelganda, transport vositalari va boshqa mexanizmlarni boshqarishdan tiyilish tavsiya etiladi.

Qarshi ko‘rsatmalar

Preparatning har qanday komponenti yoki erituvchiga yuqori sezuvchanlik;

Yurak-qon tomir kasalliklari: o‘tkir miokard infarkti, nazoratsiz arterial gipertenziya, arterial gipotenziya, bradiaritmiyalarning og‘ir shakllari, II-III darajali AV blokada, surunkali yurak yetishmovchiligi (NYHA bo‘yicha III-IV daraja), kardiogen shok va shokning boshqa turlari, QT uzayish sindromi, tromboemboliyalar, gemorragik insult;

O‘pkaning yallig‘lanish kasalliklari, surunkali obstruktiv o‘pka kasalliklari, bronxial astma;

Ko‘krak suti bilan oziqlantirish davri; 18 yoshgacha bo‘lgan bolalar; giperkoagulyatsiya (shu jumladan o‘tkir trombozlarda), eritremiya, eritrotsitoz; oshqozon yoki o‘n ikki barmoqli ichakning xuruj bosqichidagi yara kasalligi; podagra; gepatit, jigar sirrozi.

Stenokardiyada preparatni ehtiyotkorlik bilan qo‘llash lozim.

Homiladorlik va laktatsiya davri

Homiladorlik davrida Kokarbensni faqat ona uchun kutilayotgan foyda homila uchun potensial xavfdan yuqori bo‘lgan taqdirdagina qo‘llash lozim.

Preparat bilan davolash vaqtida emizishni to‘xtatish tavsiya etiladi.

Bolalarda qo‘llanilishi

Bolalarda Kokarbens preparatini qo‘llash samaradorligi va xavfsizligi bo‘yicha ma’lumotlar mavjud emas.

Dorilarning o‘zaro ta’siri

Kokarboksilaza yurak glikozidlarining kardiotonik ta’sirini kuchaytiradi. Nikotinamid va dinatriy adenozintrifosfat trigidrat vazodilatatorlar ta’sirini kuchaytiradi. B1, B6, B12 vitaminlarini birgalikda (bir shprisda) yuborish tavsiya etilmaydi, chunki sianokobalamin molekulasidagi kobalt ioni boshqa vitaminlarning parchalanishiga yordam beradi. B12 vitamini B1 vitamini keltirib chiqaradigan allergik reaksiyalarni kuchaytirishi mumkinligini ham hisobga olish zarur.

Chiqarish shakli

Preparat: nominal hajmi 2 ml bo‘lgan to‘q neytral shishadan yasalgan SHP turidagi ampulalardagi liofillangan preparat.

Erituvchi: 2 ml 0,5% li lidokain gidroxlorid eritmasi neytral shishadan yasalgan SHP tipidagi ampulalarda, nominal hajmi 2 ml.

Ikkilamchi qadoqlash: 3 ampula preparat va 3 ampula erituvchi polivinilxlorid blisterga joylanadi.

1 ta blister qo‘llash bo‘yicha yo‘riqnoma bilan birga yaltiroq kartondan tayyorlangan, poligrafik bezatilgan qutiga joylashtiriladi.

Saqlash shartlari

Quruq, yorug‘likdan himoyalangan joyda, 25 °C dan yuqori bo‘lmagan haroratda saqlang. Bolalar qo‘li yetmaydigan joyda saqlang.

Yaroqlilik muddati

3 yil. Yaroqlilik muddati tugagandan keyin ishlatilmasin.

Ishlab chiqaruvchi

Biofarm, AJ, Gruziya.