Mezakar (Mezacar) tabletkalari 200 mg №50 (5 blister х 10 tabletka)

Tarkib

1 ta tabletka tarkibida quyidagilar mavjud:

Ta’sir etuvchi moddasi: karbamazepin 200 mg.

Yordamchi moddalar: mikrokristall sellyuloza, gipromeloza E5, natriy krosskarmeloza, suvsiz kolloid kremniy dioksidi, magniy stearati.

Chiqarish formasi

Blisterda 10 tadan tabletka, o‘ramda 5 tadan blister.

Farmakoterapevtik guruh

Epilepsiyaga qarshi vositalar. ATX kodi: N03AF01.

Farmakologik xususiyatlari

Tritsiklik iminostilben hosilasi bo‘lgan tutqanoqqa qarshi vosita. O‘rtacha antidepressiv va normotimik ta’sir ko‘rsatadi. Terapevtik samara, birinchi navbatda, nerv impulslarining sinaptik uzatilishini tormozlash va shu bilan tutqanoq razryadlarining tarqalishini kamaytirish bilan bog‘liq. Bundan yuqori konsentratsiyalarda karbamazepin posttetanik potensiyalanishni pasaytiradi. Uch shoxli nerv nevralgiyasida og‘riq hissini kamaytiradi. Bu ta’sir uch shoxli nervning orqa miya yadrosida ta’sirotlarning sinaptik uzatilishi tormozlanishi bilan bog‘liq.

Qandsiz diabetda preparat antidiuretik ta’sir ko‘rsatadi, bu osmoretseptorlarga gipotolomik ta’sir ko‘rsatishi mumkin.

Farmakokinetika

Peroral qo‘llangandan so‘ng karbamazepin sekin va deyarli to‘liq so‘riladi.

Yarim chiqarilish davri 8,5 soatni tashkil etadi va katta diapazonga ega (taxminan 1,72−12 soat). Bir martalik qabuldan so‘ng, kattalarda karbamazepinning qon plazmasidagi maksimal konsentratsiyasiga 4−16 soatdan so‘ng (juda kam hollarda − 35 soatdan so‘ng), bolalarda esa taxminan 4−6 soatdan so‘ng erishiladi. Karbamazepinning qon plazmasidagi konsentratsiyasi dozaga chiziqli bog‘liq emas va yuqoriroq dozalar qo‘llanilganda plazmadagi konsentratsiya egri chizig‘i plato ko‘rinishida bo‘ladi.

Muvozanat konsentratsiyasiga 2−8 kundan keyin erishiladi. Karbamazepin dozasi va qon plazmasidagi barqaror muvozanat konsentratsiyasi o‘rtasida yaqin bog‘liqlik mavjud emas.

Karbamazepinning qon plazmasidagi terapevtik va toksik konsentratsiyalariga kelsak, uning qon plazmasidagi darajasi 4−12 mkg/ml bo‘lganda xurujlarning yo‘qolishi qayd etiladi. Dori vositasining qon plazmasidagi 20 mkg/ml dan yuqori konsentratsiyasi kasallik manzarasini yomonlashtiradi.

Faol moddaning qon plazmasidagi konsentratsiyasi 5−18 mkg/ml bo‘lganda, uch shoxli nerv nevralgiyasidagi og‘riqlarni bartaraf etadi.

Karbamazepinning 70−80% qismi qon plazmasi oqsillari bilan bog‘lanadi. Oqsillar bilan bog‘lanmagan karbamazepinning bir qismi uning 50 mkg/ml konsentratsiyasida doimiy bo‘lib qoladi. Karbamazepin-10,11-epoksid farmakologik faol metabolitining 48−53% qon plazmasi oqsillari bilan bog‘lanadi. Karbamazepinning orqa miya suyuqligidagi konsentratsiyasi qon plazmasidagi konsentratsiyaning 33% ini tashkil etadi.

Karbamazepin ichga bir marta qabul qilingandan so‘ng, dozaning 72 foizi metabolitlar ko‘rinishida buyraklar orqali organizmdan chiqariladi. Qolgan 28% qismi axlat bilan qisman o‘zgarmagan holda chiqariladi.

Qo‘llanilishi

Epilepsiya: oddiy parsial xurujlar (fokal xurujlar); murakkab parsial xurujlar (psixomotor xurujlar); asosan fokal genezli katta xurujlar (uyqu paytidagi katta xurujlar, diffuz katta xurujlar); epilepsiyaning aralash shakllari.

Uch shoxli nerv nevralgiyasi.

Genuin glosofaringeal nevralgiya.

Diabetik neyropatiyada og‘riq.

Tarqoq sklerozda epileptiform talvasalar.

Alkogol abstinent sindromida tutqanoq xurujlari rivojlanishining oldini olish.

Psixozlar (asosan maniakal-depressiv holatlarda, xavotirli-agitatsion va gipoxondrik depressiyalarda, katatonik qo‘zg‘alishda).

Qo‘llash usuli va dozalari

Mezakar® preparati bilan davolash kichik dozadan boshlanib, kasallikning xususiyati va og‘irlik darajasiga qarab har bir bemor uchun alohida tanlanadi. Keyin doza eng samarali qo‘llab-quvvatlovchi dozaga erishilgunga qadar asta-sekin oshiriladi. Bemor uchun preparatning optimal dozasi, ayniqsa kombinatsiyalangan terapiyada, uning qon plazmasidagi darajasiga qarab aniqlanadi. Karbamazepinning qon plazmasidagi terapevtik konsentratsiyasi, to‘plangan tajribaning guvohlik berishicha, 4−12 mkg/ml ni tashkil etadi.

Umumiy qabul qilingan dozalar diapazoni kuniga 400-1200 mg Mezakar® ni tashkil etadi, ular kuniga 1−2 marta bir martalik dozalarga bo‘linadi. Umumiy kunlik dozani 1200 mg dan oshirish mantiqqa to‘g‘ri kelmaydi. Maksimal sutkalik doza 1600 mg dan oshmasligi kerak.

Ayrim hollarda davolash uchun zarur bo‘lgan doza tavsiya etilgan boshlang‘ich va qo‘llab-quvvatlovchi dozadan sezilarli darajada farq qilishi mumkin (masalan, jigarning mikrosomal fermentlari induksiyasi yoki kombinatsiyalangan terapiyada dori vositalarining o‘zaro ta’siri tufayli metabolizmning tezlashishi oqibatida).

Shifokorning maxsus ko‘rsatmasisiz preparatni qo‘llashning bunday taxminiy sxemasiga amal qilinadi.

Talvasaga qarshi davolash.

Kattalarda boshlang‘ich doza 1/2 - 1 tabletkadan kuniga 2-3 marta (bu 100-200 mg karbamazepinga to‘g‘ri keladi) kuniga 800-1200 mg karbamazepinning qo‘llab-quvvatlovchi dozasiga asta-sekin oshiriladi.

Tavsiya etilgan dozalash tartibi:

Boshlang‘ich doza har kuni Qo‘llab-quvvatlovchi doza har kuni

Kattalarga 1 tabletkadan Kattalarga 1−2 tabletkadan sutkasiga 1 marta. Kuniga 3 marta.

Alkogol abstinent sindromida statsionar sharoitda talvasa xurujlari rivojlanishining oldini olish.

O‘rtacha sutkalik doza 600 mg ni tashkil etadi, ular kuniga 3 marta bir martalik dozalarga taqsimlanadi. Og‘ir hollarda bu doza dastlabki kunlarda 1200 mg gacha oshirilishi mumkin (2 tabletkadan kuniga 3 mahal).

Mezakar® ni sedativ-gipnotik vositalar bilan oq isitmada birga qo‘llash mumkin emas. Klinik talablarga muvofiq, zarurat tug‘ilganda, Mezakar® alkogol abstinensiyasini davolash uchun qo‘llaniladigan boshqa moddalar bilan kombinatsiyalanishi mumkin.

Davolashning butun davri davomida qon plazmasidagi Mezakar® miqdorini muntazam ravishda nazorat qilib borish zarur.

Markaziy va vegetativ asab tizimi tomonidan nojo‘ya ta’sirlar rivojlanishi munosabati bilan bemorlar sinchkovlik bilan klinik kuzatuvga olinadi.

Uch shoxli nerv nevralgiyasi, genuin glossofaringeal nevralgiya.

Boshlang‘ich doza kuniga 200−400 mg ni tashkil etadi, ular kuniga 1−2 marta bir martalik dozalarga taqsimlanadi. Ushbu doza og‘riq to‘liq yo‘qolguncha sutkasiga o‘rtacha 400−800 mg ga oshiriladi, ular kuniga 2−4 marta bir martalik dozalarga taqsimlanadi. Shundan so‘ng, bemorlarning ma’lum bir qismida davolanish pastroq ushlab turuvchi doza bilan davom ettirilishi mumkin, bu hali ham og‘riq xurujlarining oldini olishi mumkin va kuniga 2 marta bir martalik dozalarga bo‘lingan 400 mg ni tashkil qiladi.

Qariyalar va yuqori sezuvchanlikka ega bemorlarga Mezakar® kuniga 200 mg bo‘lgan boshlang‘ich dozada buyuriladi. (1/2 tabletkadan sutkasiga 2 mahal).

Diabetik nevropatiyada og‘riq.

O‘rtacha sutkalik doza 600 mg ni tashkil etadi, ular kuniga 3 marta bir martalik dozalarga taqsimlanadi. Istisno hollarda Mezakar® 1200 mg dozada buyurilishi mumkin, ular kuniga 3 marta bir martalik dozalarga bo‘linadi.

Tarqoq sklerozda epileptiform talvasalar.

O‘rtacha sutkalik doza 400−800 mg (1−2 tabletkadan kuniga 2−4 marta).

Ko‘rsatma. Og‘ir yurak-qon tomir kasalliklari, jigar va buyrak zararlanishi bo‘lgan bemorlarga, shuningdek, keksalarga preparatning kamroq dozalari buyuriladi.

Tabletkalar ovqat vaqtida yoki ovqatdan keyin yetarli miqdorda suyuqlik bilan ichiladi.

Ba’zi hollarda kunlik dozani kuniga 4−5 ta bir martalik dozaga bo‘lish ayniqsa samarali bo‘ldi.

Qo‘llash davomiyligi ko‘rsatma va bemorning preparatga bo‘lgan individual reaksiyasiga bog‘liq.

Epilepsiyani davolash uzoq davom etadi. Bemorni Mezakarga o‘tkazish, qo‘llash davomiyligi va uni bekor qilish masalasini har bir alohida holatda mutaxassis shifokor hal qilishi lozim. Dori-darmon dozasini 2−3 yillik xurujlar bo‘lmaganidan keyin kamaytirish yoki davolanishni to‘xtatish mumkin.

Davolash 1−2 yil davomida preparat dozasini asta-sekin kamaytirish bilan to‘xtatiladi. Bunda bolalarda tana vaznining o‘sishini hisobga olish zarur. Bunda EEG ko‘rsatkichlari yomonlashmasligi kerak.

Nevralgiyani davolashda Mezakar®ni bir necha hafta davomida og‘riqni qoldirish uchun yetarli bo‘lgan qo‘llab-quvvatlovchi dozada buyurish foydali bo‘ldi. Dozani ehtiyotkorlik bilan pasaytirish orqali kasallik belgilarining o‘z-o‘zidan remissiyaga uchramaganligini aniqlash kerak.

Og‘riq xurujlari qayta boshlanganida, davolash avvalgi qo‘llab-quvvatlovchi doza bilan davom ettiriladi.

Diabetik nevropatiyada va epileptiform talvasalarda, tarqoq sklerozda og‘riqni davolash davomiyligi nevralgiyalardagi kabi belgilangan.

Alkogol abstinent sindromini Mezakar® preparati bilan davolash 7−10 kun davomida dozani asta-sekin kamaytirish orqali to‘xtatiladi.

Nojo‘ya ta’sirlari

Nojo‘ya ta’sirlar monoterapiyaga qaraganda kombinatsiyalangan davolashda ko‘proq uchraydi. Dozaga qarab va asosan davolashning boshida ma’lum nojo‘ya ta’sirlar paydo bo‘lishi mumkin.

Markaziy asab tizimi/Psixika.

Ko‘pincha hushning xiralashishi va buzilishi (uyquchanlik), bosh aylanishi, charchoq, yurish va harakatlarning buzilishi (miyacha ataksiyasi) hamda bosh og‘rig‘i paydo bo‘lishi mumkin. Keksa yoshdagi bemorlarda es-hushning chalkashligi va bezovtalik rivojlanishi mumkin.

Ayrim hollarda tushkun kayfiyat, tajovuzkor xulq-atvor, fikrlashning tormozlanishi, motivatsiyaning pasayishi, shuningdek, gallyutsinatsiyalar va quloqlarda shovqin kuzatiladi. Mezakar® preparati bilan davolanganda yashirin psixozlar faollashishi mumkin.

Kamdan-kam hollarda ixtiyorsiz harakatlar paydo bo‘ladi, masalan, keng ko‘lamli tremor, mushaklarning qisqarishi yoki ko‘z olmasining titrashi (nistagm). Bundan tashqari, keksa yoshdagi va bosh miyasi shikastlangan bemorlarda yuz-jag‘ sohasida tirishish (yuz-jag‘ diskineziyalari), aylanma harakatlar (xoreoatetoz) ko‘rinishidagi ixtiyorsiz harakatlar paydo bo‘lishi mumkin. Ayrim hollarda nutqning buzilishi, soxta sezgilar, mushaklar kuchsizligi, asablarning yallig‘lanishi (periferik nevrit), shuningdek, oyoqlarning falajlanishi (parezlar) va ta’m bilishning buzilishi holatlari qayd etilgan.

Ushbu hodisalarning aksariyati 8-14 kundan keyin yoki dozani vaqtincha pasaytirgandan so‘ng o‘z-o‘zidan yo‘qoladi. Shuning uchun Mezakar® dozasi ehtiyotkorlik bilan tanlanadi, davolanishni past dozalardan boshlab, so‘ngra asta-sekin oshirib boriladi.

Ko‘rish a’zosi.

Ayrim hollarda ko‘z shilliq pardasining yallig‘lanishi (kon’yunktivitlar) yuzaga kelib, ba’zan ko‘rishning buzilishiga (ko‘z akkomodatsiyasining buzilishi, ko‘zning ikkilanishi, ko‘rishning noaniqligi) o‘tadi. Ko‘z gavharining xiralashishi holatlari qayd etilgan.

Glaukoma bilan og‘rigan bemorlarda ko‘z ichki bosimini muntazam ravishda o‘lchab turish zarur.

Harakat tizimi.

Ayrim hollarda bo‘g‘imlar va mushaklarda og‘riq (artralgiya, mialgiya) hamda mushaklar spazmi kuzatilgan. Bu hodisalar dori-darmonlarni qabul qilish to‘xtatilgandan so‘ng yo‘qolgan.

Teri va shilliq qavatlar.

Isitma bilan yoki isitmasiz kechuvchi allergik teri reaksiyalari, masalan, eshakem (urtikariya), teri qichishi, ba’zan terining yirik plastinkasimon yoki tangachasimon yallig‘lanishi (eksfoliativ dermatit, eritrodermiya), pufakchalar hosil bo‘lishi bilan terining yuza qismlarining nekrozi (Layell sindromi), yorug‘likka sezuvchanlik (fotosensibilizatsiya), gemorragiyalar (ekssudativ ko‘p shaklli eritema, tugunli eritema, Stivens-Jonson sindromi), teriga petexial qon quyilishi va qizil volchanka (qizil tarqoq volchanka) ko‘rinishidagi polimorf toshmalar bilan terining qizarishi holatlari qayd etilgan. Ayrim yoki kamdan kam hollarda alopetsiya va terlash (diaforez) kuzatilgan.

Qon aylanish va limfa tizimlari.

Mezakar® preparati bilan davolashda yuqori sezuvchanlik reaksiyalari tufayli qon manzarasining quyidagi buzilishlari yuzaga kelishi mumkin: periferik qonda leykotsitlar yoki trombotsitlar sonining ko‘payishi (leykotsitoz, eozinofiliya) yoki kamayishi (leykopeniya) (trombotsitopeniya). Adabiyot ma’lumotlariga ko‘ra, ko‘pincha leykopeniyaning xavfsiz shakli paydo bo‘ladi (taxminan 10% hollarda - vaqtinchalik, 2% hollarda - barqaror).

Anemiyaning boshqa shakllari (gemolitik, megaloblastik) bilan bir qatorda agranulotsitoz, aplastik anemiya, shuningdek taloq va limfa tugunlarining kattalashishi kabi ba’zan hatto bemor hayotiga xavf soluvchi qon kasalliklarining kamdan-kam holatlari ma’lum.

Leykopeniya (ko‘pincha neytropeniya), trombotsitopeniya, terida allergik toshmalar (ekzantemalar) va isitma paydo bo‘lganda Mezakar® bekor qilinadi.

Oshqozon-ichak yo‘li.

Ba’zan ishtahaning pasayishi, og‘iz qurishi, ko‘ngil aynishi va qusish, kamdan-kam hollarda ich ketishi yoki qabziyat paydo bo‘ladi. Ba’zi hollarda qorinda og‘riq va burun-halqum bo‘shlig‘i shilliq qavatlarining yallig‘lanishi (stomatit, gingivit, glossit) ma’lum. Bu hodisalar davolanishning 8-14 kunidan keyin yoki dori dozasini vaqtincha kamaytirgandan keyin o‘z-o‘zidan o‘tib ketadi. Ularni oldini olish uchun preparatning past dozalarini asta-sekin oshirib borish kerak.

Adabiyotlarda karbamazepin ba’zan me’da osti bezining yallig‘lanishini (pankreatit) keltirib chiqarishi mumkinligi haqida ma’lumotlar uchraydi.

Jigar va o‘t yo‘llari.

Ba’zan jigar funksional sinamalari ko‘rsatkichlarida o‘zgarishlar aniqlanadi, ba’zi hollarda sariqlik paydo bo‘ladi, ayrim hollarda gepatitning turli shakllari (xolestatik, gepatotsellyulyar, granulyomatoz, aralash) yuzaga keladi.

O‘tkir intermittirlovchi porfiriyaning ikkita holati tasvirlangan.

Gormonal, suv va tuz almashinuvi.

Erkaklarda sut bezlarining kattalashishi (ginekomastiya) va ayollarda sut bezlaridan sutning o‘z-o‘zidan oqishi (galaktoreya) ning ayrim holatlari haqida xabar berilgan.

Mezakar® qalqonsimon bez funksiyasi parametrlariga (triyodtironin, tiroksin, tireotrop gormon va erkin tiroksin) ta’sir ko‘rsatishi mumkin, ayniqsa uni boshqa tutqanoqqa qarshi vositalar bilan birga qo‘llanilganda.

Mezakar® ning organizmdan siydik chiqarilishini kamaytiradigan ta’siri (antidiuretik ta’siri) tufayli, ayrim hollarda qon zardobida natriy miqdorining pasayishi (giponatriyemiya) kuzatilishi mumkin, bu esa qusish, bosh og‘rig‘i va ongning chalkashligi bilan kechadi.

Shish paydo bo‘lishi va tana vaznining ortishi ayrim hollarda kuzatilgan.

Mezakar® qon zardobidagi kalsiy darajasini pasaytirishi mumkin. Ayrim hollarda bu suyaklarning yumshashiga (osteomalyatsiyaga) olib keladi.

Nafas olish organlari.

Preparatga nisbatan o‘pkaning yuqori sezuvchanligi reaksiyalarining isitma, hansirash (dispnoe), o‘pka yallig‘lanishi va o‘pka fibrozi bilan kechadigan alohida holatlari tasvirlangan.

Siydik-tanosil yo‘llari.

Kamdan kam hollarda buyrak funksiyasining buzilishi yuzaga keladi, bu siydikda oqsil miqdorining ko‘payishi (proteinuriya), siydikda qon paydo bo‘lishi (gematuriya), siydik ajralishining kamayishi (oliguriya) bilan ifodalanadi, ba’zi hollarda ular buyrak yetishmovchiligiga aylanadi. Ehtimol, bu buzilishlar dori moddasining antidiuretik ta’siri bilan bog‘liq bo‘lishi mumkin. Ba’zan dizuriya, pollakiuriya va siydik tutilishi paydo bo‘ladi.

Bundan tashqari, jinsiy buzilishlar, masalan, impotensiya va jinsiy maylning pasayishi kabi holatlar ham ma’lum.

Yurak-qon tomir tizimi.

Juda kamdan-kam hollarda, asosan keksa yoshdagi odamlarda yoki yurak faoliyati buzilgan bemorlarda yurak qisqarishlari chastotasining pasayishi (bradikardiya), yurak ritmining buzilishi, shuningdek, yurak ishemik kasalligining kuchayishi kuzatilishi mumkin.

Yurakda qo‘zg‘alish o‘tkazilishining buzilishi (atrioventrikulyar blokada) kamdan-kam hollarda hushdan ketish bilan birga kuzatiladi. Bundan tashqari, ayrim hollarda qon bosimi juda pasayadi yoki ko‘tariladi. Arterial bosimning pasayishi asosan preparat yuqori dozada qo‘llanganda sodir bo‘ladi.

Shuningdek, vaskulit, tromboflebit va tromboemboliya kuzatildi.

Yuqori sezuvchanlik reaksiyalari.

Kamdan-kam hollarda isitma, teri toshmasi, qon tomirlarining yallig‘lanishi, limfa tugunlarining kattalashishi, bo‘g‘imlardagi og‘riqlar, periferik qondagi leykotsitlar sonining o‘zgarishi, jigar va taloqning kattalashishi, jigar funksional sinamasi ko‘rsatkichlarining o‘zgarishi bilan kechadigan preparatga nisbatan sekinlashgan yuqori sezuvchanlik reaksiyalari rivojlanadi, bular turli kombinatsiyalarda paydo bo‘lishi, shuningdek, boshqa a’zolarni, masalan, o‘pka, buyrak, oshqozon osti bezi va miokardni jarayonga jalb qilishi mumkin.

Keksa yoshdagi bemorlarga Mezakar® pastroq dozalarda buyuriladi.

Qarshi ko‘rsatmalar

Suyak ko‘migi shikastlanganda, yurakda qo‘zg‘alish o‘tkazilishining buzilishida (atrioventrikulyar blokada), ta’sir etuvchi moddaga, uch siklli antidepressantlarga yoki preparatning yordamchi komponentlariga yuqori sezuvchanlikda, shuningdek, o‘tkir almashinuvchi porfiriyada Mezakar® qo‘llanilishi mumkin emas. Mezakar® litiy preparatlari bilan bir vaqtda qo‘llanilmasligi kerak.

Mezakar®ni MAO ingibitorlari bilan bir vaqtda qo‘llash mumkin emas. MAO ingibitorlari bilan o‘tkaziladigan terapiya Mezakar® preparati bilan davolash boshlanishidan kamida 14 kun oldin to‘xtatiladi.

Davolash xavfi va kutilayotgan ijobiy ta’sirni sinchkovlik bilan taqqoslagandan so‘ng, shuningdek tegishli ehtiyot choralariga rioya qilgan holda, Mezakar®ni qon yaratuvchi a’zolar kasalliklarida, yurak, jigar va buyrak faoliyatining og‘ir buzilishlarida, natriy almashinuvi buzilishlarida qo‘llash mumkin.

Keksa yoshdagi bemorlarga Mezakar® kamroq dozalarda buyuriladi.

Dorilarning o‘zaro ta’siri

Markaziy asab tizimi tomonidan nojo‘ya ta’sirlar rivojlanishi sababli, Mezakar®ni MAO ingibitorlari bilan birgalikda qo‘llashdan saqlanish lozim. Bir dori vositasidan ikkinchisiga o‘tganda, davolanishda 14 kunlik tanaffus qilinadi!

Mezakar® ning qon plazmasidagi boshqa dori vositalari konsentratsiyasiga ta’siri.

Mezakar® jigarning ayrim fermentlari faolligini oshirishi va shu bilan qon plazmasidagi boshqa dorilar darajasini pasaytirishi mumkin. Shu sababli, bir vaqtning o‘zida qo‘llaniladigan va kimyoviy tuzilishi bo‘yicha Mezakarga® yaqin bo‘lgan ba’zi boshqa dori vositalarining ta’siri susayishi yoki hatto umuman namoyon bo‘lmasligi mumkin.

Mezakar® bir vaqtning o‘zida qo‘llanilganda, klinik talablarga muvofiq, zarur hollarda quyidagi ta’sir etuvchi moddalarning dozalari o‘zgartiriladi: klonazepam, etosuksimid, primidon, valproat kislotasi, lamotrijin (epilepsiyani davolash uchun boshqa vositalar), alprazolam, klobaz, kortikosteroidlar (masalan, prednizolon, deksametazon), siklosporin, digoksin, tetratsiklinlar, masalan, doksitsiklin, felodipin, galoperidol, imipramin, metadon, teofillin, antikoagulyantlar, masalan, varfarin, fenprokomon, dikumarol.

Boshqa tutqanoqqa qarshi vositalar singari, Mezakar® ham gormonal kontratseptivlarning (homiladorlikdan himoya qiluvchi dori vositalari, "mini-pile" deb ataladigan) ta’sirini susaytirishi mumkin. Hayz oralig‘ida qon ketishining paydo bo‘lishi homiladorlikdan gormonal himoyaning yetarli emasligidan dalolat beradi. Shuning uchun bunday hollarda boshqa nogormonal kontratseptiv vositalarni qo‘llash tavsiya etiladi.

Mezakar® qon plazmasida fenitoin konsentratsiyasini oshirishi yoki kamaytirishi mumkin, natijada favqulodda hollarda hushning chalkashishi va hatto koma holati rivojlanishi mumkin.

Qon plazmasidagi Mezakar® konsentratsiyasining boshqa dori vositalari bilan pasayishi.

Qon plazmasidagi Mezakar® darajasini quyidagilar pasaytirishi mumkin: fenobarbital, primidon, valproat kislotasi, teofillin. Boshqa tomondan, valproat kislotasi va primidon qon zardobidagi farmakologik faol metabolit (Mezakar® metabolizmi mahsuloti) karbamazepin-10,11-epoksid darajasini oshirishi mumkin.

O‘zaro ta’sir tufayli, ayniqsa bir nechta tutqanoqqa qarshi dori vositalarini bir vaqtning o‘zida qo‘llashda, ularning qon plazmasidagi miqdorini nazorat qilish va zarur hollarda Mezakar® dozasini o‘zgartirish tavsiya etiladi.

Boshqa dori vositalari bilan qon plazmasida Mezakar® konsentratsiyasini oshirish.

Quyidagi faol moddalar qon plazmasida Mezakar® konsentratsiyasini oshirishi mumkin: antibiotik-makrolidlar (eritromitsin, jozamitsin), izoniazid, kalsiy antagonistlari (verapamil, diltiazem), atsetazolamid, dekstropropoksifen/propoksifen, viloksazin, danazol, kattalarda yuqori dozalarda nikotinamid (B guruhi vitamini), shuningdek, simetidin va dezipramin.

Qon plazmasida Mezakar® darajasining oshishi "Nojo‘ya ta’sirlar" bo‘limida keltirilgan alomatlarning rivojlanishiga sabab bo‘lishi mumkin (masalan, bosh aylanishi, charchoq hissi, ishonchsiz yurish, ko‘zlarda ikkilanish). Shuning uchun, bunday alomatlar paydo bo‘lganda, karbamazepinning qon plazmasidagi konsentratsiyasi nazorat qilinadi va zarur bo‘lsa, dozasi pasaytiriladi.

Mezakar® bilan davolanish paytida spirtli ichimliklarni iste’mol qilishdan voz kechish kerak, chunki u Mezakar® ta’sirini kutilmagan tarzda o‘zgartirishi va kuchaytirishi mumkin.

Maxsus ko‘rsatmalar

Nojo‘ya ta’sirlar, shuningdek, preparatga yuqori sezuvchanlik reaksiyalari yuzaga kelishi mumkinligi sababli, vaqti-vaqti bilan qon manzarasi tahlillarini o‘tkazish hamda jigar va buyrak faoliyatini tekshirish tavsiya etiladi. Bu muolaja boshlanishidan oldin, keyin muolajaning birinchi oyida haftasiga 1 marta, keyin esa oyiga 1 marta amalga oshiriladi. 6 oylik davolanishdan so‘ng, bu nazoratlar yiliga 2−4 marta amalga oshiriladi.

Shuningdek, kombinatsiyalangan terapiyani o‘tkazishda Mezakar® va boshqa epilepsiyaga qarshi vositalarning qon plazmasidagi konsentratsiyasini muntazam nazorat qilish va zarur bo‘lsa, kunlik dozalarni kamaytirish zarur.

Epilepsiya bilan og‘rigan bemorlarda Mezakar® bilan davolashni to‘xtatish va ularni boshqa epilepsiyaga qarshi vositaga o‘tkazish asta-sekin, uning dozasini kamaytirgan holda amalga oshiriladi.

Glaukoma bilan og‘rigan bemorlarda ko‘z ichki bosimi muntazam nazorat qilib turiladi.

Shuni hisobga olish kerakki, Mezakar® ning nojo‘ya ta’sirlari alkogolizmdagi abstinensiya holatlariga o‘xshash bo‘lishi va ular bilan osongina adashtirilishi mumkin.

Homiladorlik yoki emizish davrida qo‘llash

Homiladorlik davrida karbamazepinni tayinlash masalasini hal qilishda terapiyaning kutilayotgan afzalliklari va uning mumkin bo‘lgan asoratlarini, ayniqsa homiladorlikning birinchi 3 oyida, sinchiklab taqqoslash kerak.

Homiladorlik davrida, ayniqsa homiladorlikning 20 va 40-kunlari orasida, Mezakar® xurujlarni nazorat qiluvchi eng past dozada buyuriladi.

Karbamazepinning ta’sir etuvchi moddasi qo‘llanilishi munosabati bilan ayrim hollarda homilaning rivojlanish nuqsonlari, shu jumladan spina bifidaning ayrim holatlari haqida xabar berilgan. Iloji bo‘lsa, Mezakar®ni boshqa tutqanoqqa qarshi vositalar yoki boshqa dorilar bilan birlashtirishdan saqlanish kerak, chunki bunda homilaning rivojlanish nuqsonlari paydo bo‘lish xavfi ortadi.

Karbamazepinning fermentlarni qo‘zg‘atuvchi xususiyatlari tufayli, folat kislotasini homiladorlikdan oldin va homiladorlik davrida buyurish maqsadga muvofiqdir.

Chaqaloqda gemorragik asoratlarning oldini olish uchun homiladorlikning so‘nggi haftalarida ayolga yoki tug‘ilgandan so‘ng darhol chaqaloqqa K1 vitaminini profilaktik ravishda yuborish tavsiya etiladi.

Mezakar® ona sutiga o‘tadi, ammo juda oz miqdorda, terapevtik dozalarda qo‘llanilganda bola uchun umuman xavf tug‘dirmaydi. Faqat emizikli bolada vaznning yetarli darajada qo‘shilmasligi yoki uyquchanlikning ortishi (sedativ ta’sir) qayd etilsagina, emizish to‘xtatiladi.

Bolalar

Bolalar uchun qo‘llab-quvvatlovchi doza sutkasiga tana vazniga nisbatan o‘rtacha 10−20 mg/kg ni tashkil etadi.

4 yoshdan oshgan bolalar uchun boshlang‘ich doza sutkasiga 100 mg ni tashkil etadi. Bu sutkalik dozani kun ora 100 mg ga oshirib borish mumkin, toki optimal dozaga erishilguncha. Shu bilan birga, yuqorida ko‘rsatilgan doza diapazonlari oshib ketmasligi kerak.

Avtotransport yoki boshqa mexanizmlarni boshqarishda reaksiya tezligiga ta’sir qilish qobiliyati

Davolash vaqtida avtotransportni boshqarishda va diqqatning yuqori konsentratsiyasini va psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishda ehtiyot bo‘lish kerak.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin qo‘llamaslik kerak.

Dozani oshirib yuborish

Preparat dozasini oshirib yuborish preparatni zudlik bilan to‘xtatishni talab qiladi. Dozaning oshirib yuborilishi, masalan, qaltirash (tremor), bosh miya qo‘zg‘alganda yuzaga keladigan tutqanoq xurujlari (tonik-klonik tutqanoqlar), qo‘zg‘alish, shuningdek, nafas olish va yurak-qon tomir tizimi faoliyatining buzilishi, ko‘pincha qon bosimining pasayishi (ba’zan ko‘tarilishi), yurak urish tezligining oshishi (taxikardiya) va yurakda qo‘zg‘alish o‘tkazilishining buzilishi (atrioventrikulyar blokada, EKGning o‘zgarishi), nafas olish va yurak faoliyatining to‘xtashigacha ongning buzilishi kabi nojo‘ya ta’sirlarning kuchayishi bilan tavsiflanadi.

Mezakar® o‘tkir zaharlanishini davolash uchun maxsus antidot mavjud emas. Davolash kasalxonada zaharlanishning og‘ir-yengilligiga qarab olib boriladi. Dozaning oshirib yuborilishi simptomatik tarzda davolanadi: imkon qadar tezroq qusish yoki/va oshqozonni yuvish, shuningdek, faollashtirilgan ko‘mir va surgi vositalarini qo‘llash orqali oshqozondan zaharli modda chiqarib tashlanadi.

Karbamazepinning qon oqsillari bilan yuqori darajada bog‘lanishi sababli, zaharlanishda tezlashtirilgan diurez, shuningdek, gemodializ yoki peritoneal dializ kam samara beradi.

Saqlash shartlari

Harorati 25 °C dan yuqori bo‘lmagan quruq, yorug‘lik tushmaydigan joyda.

Yaroqlilik muddati

3 yil.

Ta’til shartlari

Retsept bo‘yicha.

Ishlab chiqaruvchi

KUSUM XELTXKER PVT. LTD.

SP 289 (A), Riico Indl. Area, Chopanki, Bhiwadi (Raj.), Hindiston.