Rinlakin infuzion eritmasi, 100 ml (flakon)

Tarkib

1000 ml eritmada quyidagilar mavjud:

faol moddalar: natriy laktat - 3,2 g, natriy xlorid - 6,0 g, kaliy xlorid - 0,4 g, kalsiy xlorid - 0,27 g;

yordamchi modda: inyeksiya uchun suv 1000 ml gacha.

Dori shakli

Infuziya uchun eritma.

Farmakologik xususiyatlari

Farmakodinamika

Tuzli eritma, regidratatsiya uchun vosita. Hujayradan tashqari suyuqlikda uchta eng muhim kation - Na+, K+, Ca2+ o‘rnini qoplashni ta’minlaydi, metabolik atsidozni bir vaqtning o‘zida tuzatish bilan birga suv muvozanatining buzilishini kompensatsiyalaydi; dezintoksikatsion va gemodinamikani tartibga soluvchi ta’sir ko‘rsatadi. Diurezni oshiradi, tuzli diuretiklar ta’sirini kuchaytiradi.

Ko‘rsatmalar

Normal kislota-ishqor muvozanati yoki kuchsiz atsidozda gipovolemiya va degidratatsiya bilan kechadigan o‘tkir qon aylanish buzilishlarini davolash: kuyish, travmatik, gemorragik, operatsion va operatsiyadan keyingi shok, peritonit, turli etiologiyali og‘ir qusish va diareya, shuningdek, metabolik atsidoz.

Qo‘llash usuli va dozalari

Kuniga 2500 ml gacha vena ichiga yuboriladi, o‘rtacha yuborish tezligi – 60 tomchi/daqiqa, shoshilinch holatlarda – 100 tomchi/daqiqagacha. Qo‘llaniladigan eritma miqdori bemorning klinik holatiga bog‘liq.

Nojo‘ya ta’sirlari

Qaltirash, tana haroratining ko‘tarilishi. Noadekvat yuqori dozada suv va elektrolitlar muvozanati buzilishi, shu jumladan gipervolemiya, gipernatriyemiya, giperkaliyemiya, giperkalsiyemiya, giperxloremiya kuzatilishi mumkin. Preparatni tez yuborish o‘tkir qon aylanish yetishmovchiligi va o‘pka shishini keltirib chiqarishi mumkin.

Qarshi ko‘rsatmalar

Alkaloz, organizmga ko‘p miqdorda suyuqlik yuborishga qarshi ko‘rsatmalarning mavjudligi (bosh suyagining yopiq jarohati kalla ichi gipertenziyasi bilan, yurak yetishmovchiligi, o‘pka shishi va boshqalar), jigar faoliyatining og‘ir buzilishlari, o‘tkir buyrak yetishmovchiligi, laktotsidoz, gipertonik degidratatsiya, qon aylanishi yetishmovchiligi, gipernatriyemiya, gipergidratatsiya, preparatga yuqori sezuvchanlik.

Dozani oshirib yuborish

Doza ancha oshirib yuborilganda alkaloz va gipergidratatsiya hodisalari kuzatilishi mumkin. Bu holda preparatni yuborish darhol to‘xtatiladi. Simptomatik terapiya o‘tkaziladi.

Ehtiyot choralari va qo‘llash xususiyatlari

Shoshilinch holatlarda plazma hajmini fiziologik chegaralarda vaqtincha saqlab turish uchungina qo‘llaniladi. Na+, K+, Ca2+ ning og‘ir tanqisligida va ko‘rsatilgan plazma quyish o‘rniga qo‘llash mumkin emas. Surunkali yurak yetishmovchiligi, buyrak faoliyatining buzilishi, jigar kasalliklari va gipoproteinemiyada, shuningdek, kortikosteroidlar va kortikotropin bilan davolash fonida alohida ehtiyotkorlik bilan qo‘llaniladi. Uzoq vaqt davomida ko‘p miqdorda qo‘llanganda, plazma va siydikdagi elektrolitlar miqdorini hamda diurezni nazorat qilish lozim. Homiladorlik davrida ona uchun kutilayotgan foyda homila uchun ehtimoliy xavfdan yuqori bo‘lgan hollarda qo‘llaniladi. Eritma dozasi oshirib yuborilganda, ko‘p hollarda yuborishni to‘xtatish kifoya qiladi. Buyrak yetishmovchiligida kislota-ishqor muvozanatini uzluksiz nazorat qilgan holda gemodializdan foydalanish mumkin.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Dorilarning o‘zaro ta’siri

Preparatni fosfatli va karbonatli eritmalar bilan aralashtirish mumkin emas. Boshqa dori vositalarining erituvchisi yoki tashuvchisi sifatida ishlatish mumkin emas, chunki ularni qo‘shish fizik-kimyoviy xossalarning o‘zgarishiga olib kelishi mumkin. Agar bunday qo‘shimcha zarur bo‘lsa, ularning mosligini sinchiklab tekshirish lozim. Preparat ampitsillin, vibramitsin, monotsiklin bilan mos kelmaydi.

Chiqarilish shakli, o‘rami

Infuziya uchun eritma 100 ml, 250 ml va 500 ml dan flakonlarda.

Saqlash shartlari

Quruq, yorug‘likdan himoyalangan joyda, 25 °C dan yuqori bo‘lmagan haroratda.

Yaroqlilik muddati

3 yil.

Ishlab chiqaruvchi

Jurabek Laboratories, QK, MCHJ. O‘zbekiston.