Fosfolipiale

Tarkib

Har bir ampula tarkibiga quyidagilar kiradi:

faol modda: soya dukkaklaridan olingan essensial fosfolipidlar (fosfatidilxolin) 250,0 mg;

yordamchi moddalar: natriy dezoksixolat, etil spirti, DL-alfa-tokoferol atsetat (E-atsetat vitamini), riboflavin (B2 vitamini), benzil spirti, natriy xlorid, natriy gidroksid, inyeksiya uchun suv.

Tavsif

Tiniq sariq-yashil rangli eritma.

Dori shakli

Vena ichiga yuborish uchun eritma.

Farmakoterapevtik guruh

Jigar va o‘t yo‘llari kasalliklarini davolash uchun preparatlar. Gepatoprotektor vosita. ATX kodi: A05BA.

Farmakologik xususiyatlari

Farmakodinamika

Fosfolipiale preparati tarkibiga kiruvchi fosfolipidlar hujayra qobig‘i va hujayra organellalari tuzilishining asosiy elementlari hisoblanadi; kimyoviy tuzilishi bo‘yicha endogen fosfolipidlarga mos keladi, ammo tarkibidagi ko‘p to‘yinmagan yog‘ kislotalari miqdori yuqoriligi sababli faolligi bo‘yicha endogen fosfolipidlardan ustun turadi. Ushbu yuqori energiyali molekulalarning gepatotsitlar hujayra membranalarining shikastlangan qismlariga kiritilishi jigar hujayralarining yaxlitligini tiklaydi, ularning regeneratsiyasiga yordam beradi. Ularning ko‘p to‘yinmagan yog‘ kislotalarining sis-qo‘sh bog‘lari fosfolipid membranalarining uglevodorod zanjirlarining parallel joylashishiga to‘sqinlik qilgani sababli, fosfolipid tuzilmalarining joylashish zichligi zaiflashadi, bu esa moddalar almashinuvi tezligini oshiradi. Hosil bo‘lgan funksional bloklar membranalarda fiksatsiyalangan fermentlarning faolligini oshiradi va eng muhim metabolik jarayonlarning normal, fiziologik tarzda kechishiga yordam beradi. Fosfolipidlar lipoproteinlar metabolizmini tartibga soladi, neytral yog‘lar va xolesterinni oksidlanish joylariga olib boradi, bu asosan yuqori zichlikdagi lipoproteinlarning xolesterin bilan bog‘lanish qobiliyatini oshirish orqali sodir bo‘ladi.

Shunday qilib, lipidlar va oqsillar almashinuviga; jigarning dezintoksikatsion funksiyasiga; jigarning hujayraviy tuzilishi va fosfolipidlarga bog‘liq ferment tizimlarining tiklanishi va saqlanishiga me’yorlashtiruvchi ta’sir ko‘rsatadi, bu esa oxir-oqibat jigarda biriktiruvchi to‘qima shakllanishiga to‘sqinlik qiladi.

Fosfolipidlar o‘tga ekskretsiya qilinganda litogen indeks pasayadi va o‘t barqarorlashadi.

Farmakokinetika

Fosfatidilxolin asosan yuqori zichlikdagi lipoproteidlar bilan bog‘lanib, jigar hujayralariga o‘tadi. Xolin komponentining yarim chiqarilish davri 66 soatni, to‘yinmagan yog‘ kislotalarining yarim chiqarilish davri esa 32 soatni tashkil etadi.

Preparatning 5% ga yaqini najas bilan chiqib ketadi.

Qo‘llanilishi

jigarning yog‘ distrofiyasi (shu jumladan qandli diabetda);

o‘tkir va surunkali gepatitlar, jigar sirrozi, jigar hujayralari nekrozi, jigar ensefalopatiyasi, koma va prekoma, jigarning toksik shikastlanishlari (shu jumladan alkogolizmda);

jigarning dorilar ta’sirida zararlanishi;

homiladorlar toksikozlari va gestozlarida jigar funksional sinamalarining yaqqol o‘zgarishi; o‘tkir sariq jigar distrofiyasi (o‘tkir gepatoz, Shixen sindromi); homiladorlarning xavfsiz xolestaz kasalligi (homiladorlar gepatozi);

operatsiyadan oldingi va keyingi davolash, ayniqsa gepatobiliar sohadagi operatsiyalarda;

xolestaz va o‘t toshlarining qaytalanishining oldini olish;

psoriaz (yordamchi davolash sifatida);

nur kasalligi

Qo‘llash usuli va dozalari

Fosfolipiale preparati vena ichiga yuborish uchun mo‘ljallangan bo‘lib, mahalliy ta’sirlanish reaksiyalari yuzaga kelishi mumkinligi sababli uni teri ostiga va mushak orasiga yuborish mumkin emas.

Kattalar va 12 yosh va undan katta bolalarga, boshqa tavsiyalar bo‘lmasa, preparat vena ichiga oqim bilan kuniga 5-10 ml (1-2 ampula) dan, og‘ir holatlarda - kuniga 10 ml dan 20 ml gacha (2-4 ampula) yuborilishi kerak. Bir martada 10 ml gacha (2 ampula) dori yuborish mumkin.

6 yoshdan 12 yoshgacha bo‘lgan bolalarga sutkada 2-5 ml dan buyuriladi.

3 yoshdan 6 yoshgacha bo‘lgan bolalarga kuniga 2 ml dan buyuriladi.

Preparatni bemor qoni bilan 1:1 nisbatda suyultirish tavsiya etiladi. Bemorning o‘z qonidan foydalanish imkoni bo‘lmagan taqdirda, preparatni suyultirish uchun tarkibida elektrolitlar bo‘lmagan, infuzion yuborish uchun 5% yoki 10% li dekstroza (glyukoza) eritmasidan 1:1 nisbatda foydalanish lozim. Davolash davomiyligi klinik-laborator ko‘rsatkichlarni hisobga olgan holda shifokor tomonidan individual belgilanadi va 2-5 kundan 10-20 kungacha bo‘lishi mumkin.

Preparatni shifokor ko‘rsatmasi bo‘yicha tomchilab, daqiqasiga 40-50 tomchi tezlikda 250-300 ml 5% li dekstroza (glyukoza) da eritib yuborish mumkin.

Suyultirilgan preparat eritmasi butun yuborish vaqti davomida tiniq bo‘lib qolishi kerak.

Parenteral yuborishni iloji boricha tezroq preparatni og‘iz orqali qabul qilish bilan almashtirish tavsiya etiladi.

Bir shprisda boshqa dori preparatlari bilan aralashtirilmasin. Natriy xloridning 0,9% li eritmasida va Ringer eritmasida suyultirilmasin!

Nojo‘ya ta’sirlari

Nojo‘ya ta’sirlar chastotasini baholash maqsadida quyidagi ta’riflar qo‘llaniladi: juda tez-tez (>1/10), tez-tez (>1/100- <1/10), tez-tez emas (>1/1000- <1/100), kamdan-kam (>1/10000- <1/1000), juda kamdan-kam (<1/10000), noaniq chastota (mavjud ma’lumotlarga ko‘ra paydo bo‘lish chastotasini aniqlash imkonsiz).

Ovqat hazm qilish tizimi tomonidan: yuqori dozalarda qo‘llanganda ich ketishi kamdan-kam hollarda rivojlanishi mumkin.

Immun tizimi tomonidan: kamdan-kam hollarda preparat tarkibida benzil spirti mavjudligi sababli yuqori sezuvchanlik reaksiyalari rivojlanishi mumkin; juda kam hollarda teri allergik reaksiyalari (toshma, ekzantema yoki eshakemi) kuzatilishi mumkin; noaniq chastota - qichishish.

Qarshi ko‘rsatmalar

preparat komponentlariga yuqori sezuvchanlik;

3 yoshgacha bo‘lgan bolalar yoshi, shu jumladan yangi tug‘ilgan va chala tug‘ilgan bolalar.

Dorilarning o‘zaro ta’siri

Antikoagulyantlar bilan o‘zaro ta’sir bo‘lishi mumkin, shuning uchun bir vaqtning o‘zida qo‘llanilganda antikoagulyant dozasini o‘zgartirish lozim. Preparatning boshqa dori vositalari bilan o‘zaro ta’siri noma’lum.

Maxsus ko‘rsatmalar

Faqat shaffof eritmalardan foydalanish kerak!

Vena ichiga yuboriladigan eritmani suyultirish uchun elektrolit eritmalaridan foydalanmaslik kerak.

Homiladorlik va laktatsiyada qo‘llash

Homiladorlikda Fosfolipial tarkibida yo‘ldosh to‘sig‘i orqali o‘tishi mumkin bo‘lgan benzil spirti mavjudligi sababli, preparatni qo‘llash faqat ona uchun terapiyaning kutilayotgan foydasi homila uchun potensial xavfdan yuqori bo‘lgan hollardagina mumkin.

Laktatsiya davrida Fosfolipialeni qo‘llash zarurati tug‘ilganda, preparatni qo‘llash xavfsizligi to‘g‘risida ma’lumotlar yo‘qligi sababli emizishni to‘xtatish lozim.

Pediatriyada qo‘llanishi

Preparatni 3 yoshgacha bo‘lgan bolalarda qo‘llash mumkin emas (preparat tarkibida benzil spirti borligi sababli).

Avtotransport va mexanizmlarni boshqarish qobiliyatiga ta’siri

Preparat avtotransportni boshqarish qobiliyatiga, shuningdek, diqqatning yuqori konsentratsiyasi bilan bog‘liq ishlarni bajarishga ta’sir ko‘rsatmaydi.

Preparat yaroqlilik muddati tugagandan so‘ng qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Belgilanmagan

Chiqarish shakli

Vena ichiga yuborish uchun 5 ml eritma siniq halqali to‘q rangli shisha ampulalarda.

5 ta ampula kontur katakli o‘ramda. Qo‘shimcha varaq bilan birga karton qutida konturli katakli qadoq.

Saqlash shartlari

2 °C dan 8 °C gacha haroratda saqlang. Muzlatmang!

Yaroqlilik muddati

Ishlab chiqarilgan sanadan boshlab 3 yil.

Dorixonalardan berish shartlari

Retsept bilan beriladi.

Ishlab chiqaruvchi

"K.O. Romfarm Kompani S.R.L.," Ruminiya, Ilfov, 075100 Otopen shahri, Eroilor ko‘chasi, №1A

("S.C. Rompharm Company S.R.L.," Romania, Ilfov, 75100 Otopeni, Str. Eroilor, Nr. 1A).