Sinaflan Altayvitaminli malhami tashqi foydalanish uchun 0,025% har biri 10 g (naycha)

Tarkib

100 g surtma uchun:

Ta’sir etuvchi modda: fluotsinolon atsetonid (sinaflan) - 0,025 g.

Yordamchi moddalar: propilenglikol - 4,975 g, vazelin - 80,0 g, lanolin (suvsiz lanolin) - 5,0 g, serezin - 10,0 g.

Tavsif

Surtma och sariqdan sariq ranggacha.

Chiqarish shakli

Sirtga qo‘llash uchun surtma 0,025%.

Farmakoterapevtik guruh

Mahalliy qo‘llash uchun glyukokortikosteroid. Fluotsinolon atsetonid. ATX kodi: D07AC04.

Farmakologik xususiyatlari

Farmakodinamika

Tashqi qo‘llash uchun mo‘ljallangan glyukokortikosteroid vosita (GKS); yallig‘lanishga qarshi, allergiyaga qarshi, eksudatsiyaga qarshi va qichishishga qarshi ta’sirga ega. Yallig‘lanish mediatorlarining hosil bo‘lishi, ajralishi va faolligini kamaytiradi. Teriga ta’sir qilganda neytrofillarning chetki to‘planishining oldi olinadi, bu yallig‘lanish ekssudati va sitokinlar ishlab chiqarilishining kamayishiga, makrofaglar migratsiyasining tormozlanishiga, infiltratsiya va granulyatsiya jarayonlarining kamayishiga olib keladi.

Farmakokinetika

Teri yuzasidan so‘rilgandan so‘ng plazma oqsillari bilan bog‘lanadi, asosan jigarda sodir bo‘ladigan metabolizmga uchraydi. Buyraklar orqali chiqariladi.

Ko‘rsatmalar

Terining quruqligi bilan kechadigan, mikrobli bo‘lmagan etiologiyali o‘tkir va surunkali yallig‘lanish hamda allergik teri kasalliklari (seboreyali dermatit, turli genezli va lokalizatsiyali ekzema, neyrodermit, teri qichishishi, psoriaz, quyoshdan kuyish, hasharotlar chaqishi).

Qarshi ko‘rsatmalar

Fluotsinolonga yoki preparatning har qanday tarkibiy qismiga yuqori sezuvchanlik, pushti husnbuzarlar, akne, perioral dermatit, terining bakterial, virusli yoki zamburug‘li infeksiyasi, teri sili, zaxm, emlashdan keyingi reaksiyalar, boldirning trofik yaralari, anogenital qichishish, teri saratoni, 2 yoshgacha bo‘lgan bolalar, homiladorlik, emizish davri.

Ehtiyotkorlik bilan

Qizlarda balog‘atga yetish davrida; 2 yoshdan oshgan bolalarda; terisida atrofik o‘zgarishlar bo‘lgan bemorlarda, ayniqsa keksa odamlarda; yuzga, burmalarga, tabiiy bukilgan joylarga, terining nozik joylariga surtilganda qo‘llaniladi.

Qo‘llash usuli va dozalari

Kattalar va 2 yoshdan oshgan bolalarga - tashqariga.

Antiseptik suyuqlik bilan ho‘llangan tampon bilan oldindan artilgan teriga oz miqdorda preparat surtiladi va kuniga 2-4 marta yengil ishqalanadi. Zararlanish o‘choqlari chegaralangan bo‘lsa, ta’sirni kuchaytirish uchun malhamni okklyuzion bog‘lam ostiga qo‘llash mumkin. Surtmani bir kecha-kunduzda 2 g dan ortiq bog‘lam ostiga qo‘llash mumkin emas. Surtmani dermatozlarning quruq shakllarida qo‘llash ma’qul.

Davolash davomiyligi kasallikning tabiatiga bog‘liq bo‘lib, odatda 5-10 kunni, kasallik uzoq davom etganda esa 25 kungacha davom etadi.

Bolalarda davolash kursi 5 kundan oshmasligi kerak.

Agar davolanishdan so‘ng ahvol yaxshilanmasa yoki yangi alomatlar paydo bo‘lsa, shifokor bilan maslahatlashish zarur. Preparatni faqat yo‘riqnomada ko‘rsatilgan tartibda va dozalarda qo‘llang. Zarur hollarda, iltimos, dori vositasini qo‘llashdan oldin shifokor bilan maslahatlashing.

Nojo‘ya ta’sirlari

Achishish, teri qichishishi, terining quruqligi, steroid husnbuzarlar, follikulit. Terining ikkilamchi infeksion zararlanishlari va unda atrofik o‘zgarishlar rivojlanishi mumkin. Uzoq muddat qo‘llanganda - ikkilamchi immunitet tanqisligi, gipertrixoz, alopetsiya (ayniqsa ayollarda), teri atrofiyasi, preparat qo‘llanilgan joyda girsutizm, teleangiektaziyalar, purpura, pigmentatsiyaning buzilishi kuzatiladi. Keng yuzalarga surtilganda tizimli ko‘rinishlar kuzatilishi mumkin: gastrit, oshqozonning steroid yarasi, buyrak usti bezi yetishmovchiligi, Itsenko-Kushing sindromi, steroid qandli diabet, striyalar, reparativ jarayonlarning sekinlashishi.

Agar yo‘riqnomada ko‘rsatilgan nojo‘ya ta’sirlarning birortasi og‘irlashsa yoki yo‘riqnomada ko‘rsatilmagan boshqa har qanday nojo‘ya ta’sirlar kuzatilsa, bu haqda darhol shifokorga xabar berish kerak.

Dozani oshirib yuborish

O‘tkir dozani oshirib yuborish ehtimoli kam, biroq preparatni rezorbsiya qobiliyati yuqori bo‘lgan zararlangan terining katta qismlarida uzoq vaqt davomida yoki okklyuzion bog‘lam yordamida qo‘llanilganda, giperkortitsizm belgilari: giperglikemiya, glyukozuriya, buyrak usti bezi po‘stlog‘i funksiyasining qaytariladigan susayishi, Itsenko-Kushing sindromi ko‘rinishlari bilan kechadigan surunkali dozani oshirib yuborish mumkin.

Davolash: simptomatik, zarur bo‘lganda - suv-elektrolit muvozanatini tuzatish, preparatni bekor qilish (uzoq muddatli terapiyada - asta-sekin bekor qilish).

O‘zaro aloqa

Mikroblarga qarshi dori vositalari bilan mos keladi.

Gipotenziv, diuretik, antiaritmik dori vositalari, kaliy preparatlari faolligini pasaytiradi.

Siydik haydovchi dorilar (kaliy saqlovchilaridan tashqari) gipokaliyemiya rivojlanish xavfini oshiradi.

Glyukokortikosteroidlar bilan davolash vaqtida preparatning immunodepressiv ta’siri tufayli emlash va immunizatsiya o‘tkazmaslik kerak.

Maxsus ko‘rsatmalar

Terining kichik qismlarida faqat qisqa kurslar bilan qo‘llaniladi.

Preparatning ko‘zga tushishidan saqlanish kerak. Davolanish vaqtida keng kiyim kiyish tavsiya etiladi.

Oddiy yoki pushti husnbuzar bilan og‘rigan bemorlarda davolash fonida kasallikning zo‘rayishi mumkin. Mahalliy infeksion asoratlarning oldini olish uchun mikroblarga qarshi vositalar bilan birgalikda buyurish tavsiya etiladi.

Terida atrofik o‘zgarishlar mavjud bo‘lgan shaxslarda, ayniqsa keksa yoshdagi odamlarda ehtiyotkorlik bilan qo‘llash lozim.

Agar preparatni qo‘llash bilan bog‘liq bo‘lgan yuqori sezuvchanlik yoki terining ta’sirlanishi belgilari kuzatilsa, davolanishni to‘xtatish va shifokorga murojaat qilish lozim.

Uzoq davolanganda, preparatni terining keng yuzalariga surtilganda, okklyuzion bog‘lamlar ishlatilganda, shuningdek, bolalarda glyukokortikosteroidning tizimli so‘rilishi yuzaga kelishi mumkin; gipotalamo-gipofizar-buyrak usti bezi tizimi funksiyasining susayishi va giperkortitsizm belgilari rivojlanishi mumkin.

Yuz terisida tananing boshqa yuzalariga qaraganda ko‘proq, mahalliy ta’sir etuvchi glyukokortikosteroidlar bilan uzoq vaqt davolangandan so‘ng atrofik o‘zgarishlar namoyon bo‘lishi mumkin. Bunda davolash kursi 5 kundan oshmasligi kerak.

Preparatni yuzga, burmalarga, tabiiy bukilgan joylarga, terining nozik joylariga surtishda ehtiyot bo‘lish kerak.

Preparatni shilliq qavatlarga surtmang.

Shuni hisobga olish kerakki, glyukokortikosteroidlar ba’zi teri kasalliklarining namoyon bo‘lishini o‘zgartirishga qodir, bu esa tashxis qo‘yishni qiyinlashtirishi mumkin. Bundan tashqari, glyukokortikosteroidlarni qo‘llash yaralar bitishining kechikishiga sabab bo‘lishi mumkin.

Glyukokortikosteroidlar bilan uzoq muddatli terapiyada terapiyaning to‘satdan to‘xtatilishi terining intensiv qizarishi va achishish hissi bilan dermatit shaklida namoyon bo‘ladigan "rikoshet" sindromi rivojlanishiga olib kelishi mumkin. Shuning uchun uzoq davolanishdan so‘ng preparatni to‘xtatishni asta-sekin amalga oshirish kerak, masalan, uni qabul qilishni butunlay to‘xtatishdan oldin intermittirlovchi davolash sxemasiga o‘tish kerak.

Preparat tarkibidagi propilenglikol, lanolin surtilgan joyni ta’sirlantirishi mumkin. Bunday hollarda preparatni qo‘llashni to‘xtatish kerak.

Pediatriyada qo‘llanishi. Preparatni 2 yoshdan boshlab bolalarda qo‘llash mumkin. Yosh bolalarda teri burmalari, yo‘rgaklar, tagliklar okklyuzion bog‘lam ta’siriga o‘xshash ta’sir ko‘rsatishi va glyukokortikosteroidning tizimli so‘rilishini oshirishi mumkinligini hisobga olish zarur. Bundan tashqari, bolalarda teri qoplamlari yuzasi va tana vazni o‘rtasidagi nisbat, shuningdek, terining yetarli darajada yetilmaganligi sababli tizimli rezorbsiyaning yuqori darajasi kuzatilishi mumkin. Bolalarni glyukokortikosteroidlar bilan uzoq vaqt davolash ularning o‘sishi va rivojlanishining buzilishiga olib kelishi mumkin. Shuning uchun preparatni uzoq muddat qo‘llash shifokor nazorati ostida o‘tkazilishi kerak. Bolalar ta’sirga erishish uchun yetarli bo‘lgan preparatning minimal dozasini olishlari kerak.Bolalarda davolash kursi 5 kundan oshmasligi kerak.

Homiladorlik va laktatsiya

Preparatni homiladorlik va laktatsiya davrida qo‘llash mumkin emas. Laktatsiya davrida preparatni qo‘llash zarur bo‘lganda, davolash davrida emizishni to‘xtatish tavsiya etiladi, chunki flyuotsinolon atsetonidni tashqi qo‘llashda ko‘krak sutiga qanday darajada o‘tishi noma’lum. Faqat favqulodda hollarda, shifokor bilan maslahatlashgandan so‘ng, preparat qisqa muddatga va terining cheklangan qismlariga qo‘llanilishi mumkin. Preparatni sut bezlari terisiga qo‘llash tavsiya etilmaydi.

Transport vositalari va mexanizmlarini boshqarish qobiliyatiga ta’siri

O‘rganilmagan.

Qadoq

10 g yoki 15 g dan bushonli alyuminiy tubalarga solinadi. Har bir tuba qo‘llanilishi bo‘yicha yo‘riqnoma bilan birga karton qutiga solinadi.

Saqlash shartlari

25 °C dan yuqori bo‘lmagan haroratda.

Bolalar qo‘li yetmaydigan joyda saqlang.

Yaroqlilik muddati

5 yil.

Preparat qadog‘ida ko‘rsatilgan yaroqlilik muddati tugagandan keyin qo‘llanilmasin.

Dorixonalardan berish shartlari

Retseptsiz.

Ro‘yxatdan o‘tish guvohnomasi egasi

ALTAYVITAMINLAR AJ Rossiya.

Ishlab chiqaruvchi

ALTAYVITAMINLAR AJ Rossiya.