Siriglobin siropi 200 ml (shisha)

Tarkib

Har 15 ml sirop tarkibida quyidagilar mavjud:

faol moddalar: temir ammoniy nitrat - 150 mg; folat kislotasi - 500 mkg; sianokobalamin - 7,5 mkg;

yordamchi moddalar: bronopol, limon kislotasi monogidrati, dinatriy edetat, natriy propilaraben, natriy metilparaben, natriy benzoat, natriy gidroksid granulalari, ksantan yelimi, 70% li sorbitol eritmasi, "shirin apelsin" ta’mi, apelsin moyi ta’mi, aralash meva ta’mi, karamel bo‘yog‘i, Supra Idacol eritrozin bo‘yog‘i, saxaroza, neotam shirinlashtiruvchisi, tozalangan suv.

Tavsif

Qo‘ng‘ir rangli xushbo‘y qiyom.

Dori shakli

Sirop 200 ml N1 (flakonlar o‘lchov stakani bilan).

Farmakoterapevtik guruh

Temir preparatlari.

Farmakologik ta’siri

Suyak ko‘migida normal qon yaratish jarayoni uchun zarur bo‘lgan ikki valentli temir, B12 vitamini va folat kislotasining muvozanatli majmuasi. Temir gemoglobin, mioglobin, turli fermentlar tarkibiga kiradi, kislorodni qaytar bog‘laydi va uning to‘qimalarga tashilishini ta’minlaydi, oksidlanish-qaytarilish reaksiyalarida ishtirok etadi, eritropoezni rag‘batlantiradi.

Temirga bo‘lgan ehtiyoj ayniqsa faol o‘sish, homiladorlik, emizish davrida, hayz ko‘rish va boshqa qon ketishlarda kuchayadi. Folat kislota sianokobalamin bilan birgalikda eritropoezni rag‘batlantiradi, aminokislotalar, nukleotidlar, nuklein kislotalar sintezida, xolin almashinuvida ishtirok etadi. Homiladorlik davrida u homila nerv tolalarining normal rivojlanishi uchun zarur, uni teratogen omillar ta’siridan himoya qiladi, hujayra immuniteti reaksiyalarida muhim rol o‘ynaydi. Sianokobalamin nukleotidlar sintezida ishtirok etadi, epitelial hujayralarning normal o‘sishi va rivojlanishining muhim omili hisoblanadi, normal qon yaratilishi va eritrotsitlarning yetilishi uchun zarur, folat kislotasi metabolizmi va miyelin sintezi uchun zarur. Sianokobalamin va folat kislotasi megaloblastik kamqonlik va nevrologik buzilishlar rivojlanishining oldini oladi.

Farmakokinetika

Ichga qabul qilingandan so‘ng, preparat tarkibidagi temir ikki valentli ion shaklida ovqat hazm qilish traktida deyarli to‘liq so‘riladi va tizimli qon oqimiga o‘tadi. Temirning qon zardobidagi maksimal konsentratsiyasi preparat qabul qilingandan 2-4 soat o‘tgach hosil bo‘ladi. Temir qon plazmasi transferrinlari bilan deyarli to‘liq bog‘lanadi va gemoglobin, mioglobin, sitoxromoksidaza, katalaza hamda retikuloendotelial tizimning hosil bo‘lish jarayoniga jalb qilinadi. Yarim chiqarilish davri 12 soat atrofida. Axlat, siydik va ter bilan chiqariladi. Folat kislotasining qon plazmasi oqsillari bilan bog‘lanishi 60-65% ni tashkil etadi, uning metabolizmi jigarda sodir bo‘ladi. Asosan buyraklar orqali, qisman ichak orqali chiqariladi.

Ko‘rsatmalar

Temir tanqisligi va folat tanqisligi anemiyasini davolash; temir va preparatning boshqa tarkibiy qismlariga bo‘lgan yuqori ehtiyoj bilan bog‘liq holatlar, ya’ni homiladorlik, emizish, gipoxlorgidriya, surunkali qon yo‘qotish, kuyish kasalligi, oshqozon operatsiyalaridan keyin, gemodializ, seliakiya, nospetsifik yarali kolit va Kron kasalligi, enteritlar, gijja invaziyasi, malabsorbsiya sindromi, tana vaznining keskin kamayishi, kaxeksiya, jadal o‘sish va balog‘atga yetish davrida.

Qo‘llash usuli va dozalari

Dozani va qabul qilish sonini shifokor belgilaydi. Odatda 15 ml dan kuniga 1-2 marta ovqatdan yarim soat oldin yoki ovqatdan yarim soat keyin qo‘llaniladi.

Nojo‘ya ta’sirlari

Preparat yaxshi o‘zlashtiriladi, ayrim hollarda individual o‘zlashtira olmaslik natijasida qorinda og‘riq, ko‘ngil aynishi, qusish, ich ketishi yoki qabziyat kuzatilishi mumkin. Ko‘rsatilgan ta’sirlar vaqtinchalik xususiyatga ega bo‘lib, doza kamaytirilganda yoki preparat bekor qilinganda yo‘qoladi. Juda kamdan-kam hollarda preparatni to‘xtatish va desensibilizatsiyalovchi terapiya o‘tkazishni talab qiladigan allergik reaksiyalar (teri qichishishi, toshmalar) paydo bo‘lishi mumkin.

Qarshi ko‘rsatmalar

Organizmda temirning ortiqcha to‘planishi (gemoxromatoz, gemosideroz); temir o‘zlashtirilishining buzilishi (gipo-, aplastik va gemolitik anemiyalar); oshqozon va o‘n ikki barmoqli ichakning faol bosqichdagi peptik yarasi; o‘tkir enterokolit; preparat komponentlariga yuqori sezuvchanlik.

Dozani oshirib yuborish

Belgilari: ko‘ngil aynishi, qusish, epigastral sohada og‘riq, ich ketishi (preparat to‘xtatilgandan keyin tezda yo‘qoladi). Dozaning ozgina oshirib yuborilishi maxsus choralar ko‘rishni talab qilmaydi.

Davolash: Doza sezilarli darajada oshib ketganda preparatni bekor qilish, oshqozonni natriy gidrokarbonat eritmasi bilan yuvish, antidot sifatida deferoksamindan foydalanish tavsiya etiladi. Ko‘rsatmalarga ko‘ra - simptomatik terapiya.

Maxsus shartlar

Preparatning tavsiya etilgan dozalaridan oshirmaslik kerak. Preparat avtomobilni boshqarish va mexanizmlar bilan ishlash qobiliyatiga ta’sir qilmaydi.

Homiladorlik va emizish davrida

Preparatni homiladorlik va emizish davrida xavf/foyda nisbatini hisobga olgan holda, tavsiya etilgan dozalardan oshirmasdan qo‘llash mumkin.

Jigar faoliyati buzilishlarida

Jigar, ovqat hazm qilish trakti faoliyati buzilgan, gemoglobinopatiyasi bor, temir almashinuvi buzilgan bemorlarga ehtiyotkorlik bilan buyuriladi. Preparatni og‘iz orqali qabul qilishni ularni parenteral yuborish bilan, shuningdek takroriy gemotransfuziyalar bilan birga qo‘llash tavsiya etilmaydi.

Dorilarning o‘zaro ta’siri

Kalsiy preparatlari, antatsidlar, simetidin, kolistiramin, ftorxinolonlar, tarkibida gidrokarbonatlar, karbonatlar, oksalatlar, fosfatlar bo‘lgan dori vositalari va oziq-ovqat mahsulotlari, choy, kofe temirning ichakda so‘rilishini kamaytiradi. Preparatni metotreksat, disulfiram, pirimetamin, triamteren va trimetoprim bilan birga qo‘llash tavsiya etilmaydi. Temir preparatlari tetratsiklin so‘rilishini va penitsillaminning terapevtik samaradorligini pasaytiradi.

Saqlash shartlari

25 °S dan yuqori bo‘lmagan haroratda, yorug‘lik va namlikdan himoyalangan joyda saqlanadi.

Yaroqlilik muddati

Ishlab chiqarilgan sanadan boshlab 2 yil. Yaroqlilik muddati tugaganidan keyin ishlatilmasin.

Chiqarish shakli

200 ml qiyom flakonda; bitta flakon karton qutida, qo‘llash bo‘yicha yo‘riqnoma va o‘lchov stakani bilan.

Ishlab chiqaruvchi

Serene Healthcare Pvt. Ltd, Hindiston tomonidan ishlab chiqarilgan: Corona Remedies Pvt. Ltd, Hindiston.