Vizin ko'z tomchilari 0,05%, 15 ml (shisha)

Tarkib

Faol moddasi: tetrizolin gidroxlorid 0,5 mg/ml (0,05%).

Yordamchi moddalar: borat kislota, natriy xlorid, dinatriy edetat, benzalkoniy xloridning 50% li eritmasi, natriy borat, tozalangan suv.

Tavsif

Shaffof rangsiz eritma.

Dori shakli

Ko‘z tomchilari.

Farmakoterapevtik guruh

Dekongestant sifatida ishlatiladigan simpatomimetik. ATX kodi: S01GA02.

Farmakologik xususiyatlari

Tetrizolin simpatik asab tizimining alfa-adrenoretseptorlarini rag‘batlantiradigan, ammo beta-adrenoretseptorlarga ta’sir ko‘rsatmaydigan yoki kuchsiz ta’sir ko‘rsatadigan simpatomimetik preparatdir. Tetrizolin simpatomimetik amin bo‘lib, tomirlarni toraytiruvchi ta’sirga ega va to‘qimalar shishini kamaytiradi.

Ta’siri tomizilgandan 60 soniya o‘tgach boshlanadi va 4-8 soat davom etadi.

Farmakokinetika

Mahalliy qo‘llanilganda deyarli so‘rilmaydi. Ko‘z tomchilarining mahalliy qo‘llanilishidan keyin batafsil farmakokinetik tadqiqotlar o‘tkazilmagan.

Qo‘llanilishi

Kattalar va 2 yoshdan oshgan bolalarga allergiya paytida yoki kimyoviy va fizik omillar (tutun, chang, xlorli suv, yorug‘lik, kosmetik vositalar, kontakt linzalar) ta’sirida yuzaga keladigan konyunktiva shishi va giperemiyasini (ko‘z qizarishi) bartaraf etish uchun buyuriladi.

6 yoshgacha bo‘lgan bolalarga shifokor nazorati ostida buyuriladi.

Qo‘llash usuli va dozalari

Zararlangan ko‘zga 1 yoki 2 tomchidan sutkada 2-3 marta.

Preparatni 4 kundan ortiq uzluksiz qo‘llash tavsiya etilmaydi.

Flakon-tomizgichdan foydalanish.

Flakon-tomizgichning qopqog‘ini olib, flakonni ag‘daring.

Flakon uchini biror-bir yuzaga tekkizmaslik.

Qo‘llagandan so‘ng, flakon-tomizgich qopqog‘ini burab yoping.

Qarshi ko‘rsatmalar

2 yoshgacha bo‘lgan bolalar yoshi.

Vizin® preparatini preparat komponentlariga yuqori sezuvchanligi bo‘lgan bemorlarga, yopiq burchakli glaukoma va shox pardaning endotelial-epitelial distrofiyasi bo‘lgan bemorlarga buyurmaslik kerak.

Ehtiyotkorlik bilan

Og‘ir yurak-qon tomir kasalliklari (yurak ishemik kasalligi, arterial gipertenziya, aritmiyalar, anevrizma), gipertireoz, feoxromotsitoma, qandli diabet bilan og‘rigan bemorlarda va monoaminooksidaza ingibitorlari yoki qon bosimini ko‘tarishga qodir boshqa vositalarni qabul qilayotgan bemorlarda. Preparatni qo‘llashdan oldin shifokor bilan maslahatlashish zarur.

Nojo‘ya ta’sirlari

Vizin® preparatini qo‘llashda kamdan-kam hollarda achishish hissi, ko‘z qizarishi, ko‘z og‘rig‘i, ko‘z sanchishi, ko‘rishning xiralashishi, konyunktivaning ta’sirlanishi va qorachiqning kengayishi kuzatilishi mumkin. Yuqorida sanab o‘tilgan belgilar paydo bo‘lganda shifokorga murojaat qiling. Tizimli ta’sirlar (yurak urishining tezlashishi, bosh og‘rig‘i, titroq, holsizlik, terlash, qon bosimining ko‘tarilishi) paydo bo‘lishi mumkin.

Ko‘rlikning ayrim holatlari haqida xabar berilgan, biroq preparatni qabul qilish bilan sababiy bog‘liqlik aniqlanmagan.

Dorilarning o‘zaro ta’siri

MAO ingibitorlari va tritsiklik antidepressantlarni bir vaqtda qabul qilish tomir toraytiruvchi ta’sirning kuchayishiga va arterial bosimning ko‘tarilishiga olib kelishi mumkin.

Maxsus ko‘rsatmalar

Kontakt linzalarni preparatni tomizishdan oldin yechib olish va taxminan 15 daqiqadan so‘ng o‘rnatish lozim.

Vizin® preparatini faqat ko‘zning yengil ta’sirlanishida qo‘llash maqsadga muvofiqdir. Agar 48 soat ichida ahvol yaxshilanmasa yoki ta’sirlanish va qizarish saqlanib qolsa yoki kuchaysa, preparatni bekor qilish va shifokorga murojaat qilish kerak. Ko‘zlarda kuchli og‘riq, bosh og‘rig‘i, ko‘rish qobiliyatining yo‘qolishi, to‘satdan ko‘z oldida "suzuvchi" dog‘lar paydo bo‘lishi, ko‘zning qizarishi, yorug‘lik ta’sirida og‘riq yoki ko‘zning ikkilanishi kuzatilsa, zudlik bilan shifokorga murojaat qilish lozim. Agar ta’sirlanish yoki qizarish ko‘rish a’zosining jiddiy kasalliklari: infeksiya, yot jism yoki shox pardaning kimyoviy shikastlanishi bilan bog‘liq bo‘lsa, Vizin® preparatini qo‘llamang.

Agar dori vositasi yaroqsiz holga kelgan yoki yaroqlilik muddati tugagan bo‘lsa - uni oqova suvga to‘kmang va ko‘chaga tashlamang! Dori vositasini paketga soling va axlat qutisiga tashlang. Bu chora-tadbirlar atrof-muhitni muhofaza qilishga yordam beradi!

Avtomobilni boshqarish va texnikadan foydalanish qobiliyatiga ta’siri

Kamdan-kam hollarda Vizin® ko‘z tomchilarini qo‘llagandan so‘ng ko‘z qorachig‘ining kengayishi va ko‘rishning xiralashishi kuzatiladi, bu esa avtomobil va mexanizmlarni boshqarish qobiliyatiga ta’sir ko‘rsatishi mumkin.

Homiladorlik va laktatsiya

Umumiy reaksiyalar xavfini hisobga olgan holda, preparatni homiladorlik va laktatsiya davrida faqat shifokorning fikriga ko‘ra, kutilayotgan foyda ehtimoliy xavfdan yuqori bo‘lgan taqdirdagina qo‘llash mumkin.

Preparatni bolalar qo‘li yetmaydigan joyda saqlang va yaroqlilik muddati tugaganidan keyin ishlatmang.

Dozani oshirib yuborish

Ko‘rsatmaga muvofiq qo‘llanganda, dozani oshirib yuborish xavfi minimal bo‘ladi.

Biroq, ehtiyotsizlik oqibatida oshqozon-ichak yo‘liga (OIT) tushib qolsa, quyidagi dozani oshirib yuborish alomatlari kuzatilishi mumkin: ko‘z qorachig‘ining kengayishi, ko‘ngil aynishi, sianoz, isitma, talvasalar, taxikardiya, yurak aritmiyasi, yurak to‘xtashi, qon bosimining ko‘tarilishi, o‘pka shishi, nafas olish funksiyasining, markaziy asab tizimi funksiyasining buzilishi, koma.

Preparatning so‘rilishi bilan bog‘liq dozani oshirib yuborish belgilarining paydo bo‘lish xavfi yangi tug‘ilgan chaqaloqlar va yosh bolalarda, ayniqsa yutilganda yuqori bo‘ladi. Arterial bosimning pasayishi, bradikardiya, uyquchanlik, tana haroratining pasayishi kabi kamdan-kam holatlar qayd etilgan.

Tetrizolin gidroxloridning antidoti noma’lum.

Doza oshirib yuborilganda faollashtirilgan ko‘mir, oshqozonni yuvish, kislorod ingalyatsiyasi, isitma tushiruvchi va talvasaga qarshi vositalar buyuriladi. Qon bosimini pasaytirish uchun fentolamin fiziologik eritmada 5 mg dan asta-sekin vena ichiga yoki 100 mg dan ichishga qo‘llaniladi. Arterial bosimi past bo‘lgan bemorlarga vazopressor vositalar qo‘llash mumkin emas.

Dozani oshirib yuborishning har qanday alomatlari paydo bo‘lganda, darhol shifokorga murojaat qilish lozim!

Chiqarish shakli

Ko‘z tomchilari 0,05%. Tomizgichli va polipropilen tasmali burab yopiladigan qopqoqli plastik flakonda 15 ml dan preparat - birinchi ochishni nazorat qilish. Karton qutida qo‘llanilishi bo‘yicha yo‘riqnoma yozilgan bitta flakon.

Saqlash shartlari

30 °C dan yuqori bo‘lmagan haroratda saqlanadi.

Yaroqlilik muddati

3 yil.

Ochiq flakon ichidagini 4 hafta davomida ishlatish kerak.

Dorixonalardan berish shartlari

Retseptsiz.

Ishlab chiqaruvchi

"Yanssen Farmatsevtika N.V.," Belgiya

Yuridik manzil

Janssen Pharmaceutica N.V., Turnhootseweg 30, B-2340 Beerse, Belgiya/Yanssen Farmatsevtika N.V., Turnhootseweg 30, B-2340 Beerse, Belgiya

Rossiyadagi vakolatxona (da’volarni qabul qiluvchi tashkilot)

"Jonson & Jonson" MCHJ, Rossiya, 121614, Moskva sh., Krilatskaya ko‘chasi, 17-uy, 2-bet, tel.