Alzepil tabletkalari 5 mg №28 (2 dona blister х 14 tabletka)

Tarkib

Faol modda:

Qobiq bilan qoplangan har bir 5 mg li tabletka 5 mg donepezil gidroxlorid (donepezil gidroxlorid monogidrat shaklida 5,21 mg) saqlaydi.

Qobiq bilan qoplangan har bir 10 mg li tabletka 10 mg donepezil gidroxlorid (donepezil gidroxlorid monogidrat shaklida 10,42 mg) saqlaydi.

Yordamchi moddalar:

Tabletka yadrosi: mikrokristall sellyuloza, almashinish darajasi past bo‘lgan gidroksipropilsellyuloza (L-HPC B1), magniy stearati.

Qobiq tarkibi: Opadry Y-1-7000 oq: gipromelloza, titan dioksidi, makrogol 400.

Tavsif

Qobiq bilan qoplangan 5 mg li tabletkalar: oq yoki deyarli oq, dumaloq, ikki tomoni qavariq, qobiq bilan qoplangan, tabletkaning bir tomoniga "E 381" deb o‘yib yozilgan, hidsiz yoki deyarli hidsiz tabletkalar.

Qobiq bilan qoplangan 10 mg li tabletkalar: oq yoki deyarli oq, dumaloq, ikki tomoni qavariq, qobiq bilan qoplangan, tabletkaning bir tomoniga "E 382" o‘yib yozilgan, hidsiz yoki deyarli hidsiz tabletkalar.

Dori shakli

Qobiq bilan qoplangan tabletkalar.

Farmakoterapevtik guruh

Psixoanaleptiklar, demensiyani davolash uchun preparatlar, antixolinesterazlar. ATX kodi: N06DA02.

Farmakologik xususiyatlari

Farmakodinamika

Ta’sir mexanizmi va farmakodinamik ta’siri

Donepezil gidroxlorid bosh miyaning asosiy xolinesterazasi - atsetilxolinesterazaning o‘ziga xos va qaytar ingibitori hisoblanadi. In vitro tajribalarida donepezil gidroxloridning ushbu fermentga ingibirlovchi ta’siri uning asosan markaziy asab tizimidan tashqarida joylashgan ferment - butirilxolinesterazaga ta’siridan 1000 baravar kuchliroq bo‘ldi.

Farmakodinamik samara

Klinik sinovlarda ishtirok etgan Alsgeymer demensiyasi bo‘lgan bemorlarda 5 mg yoki 10 mg donepezil gidroxloridni kuniga bir marta yuborish atsetilxolinesteraza faolligini (preparat yuborilgandan keyin eritrotsitlar membranalarida o‘lchangan) mos ravishda 63,6% va 77,3% ga uzoq muddatli bostirishga olib keldi. Donepezil gidroxloridni kiritishda eritrotsitlarda atsetilxolinesteraza pasayishining ADAS-cog shkalasi - kognitiv funksiyaning alohida jihatlarini o‘lchaydigan sezgir shkala ko‘rsatkichlarining o‘zgarishi bilan bog‘liqligi ko‘rsatilgan. Donepezil gidroxloridning yondosh nevrologik kasalliklar kechishini o‘zgartirish qobiliyati o‘rganilmagan. Shunday qilib, donepezil gidroxlorid bunday kasalliklarning rivojlanishiga ta’sir qiladi deb hisoblash mumkin emas.

Klinik samaradorlik va xavfsizlik

Donepezilning samaradorligi to‘rtta platsebo-nazoratli sinovda, ikkita olti oylik va bitta bir yillik sinovda o‘rganildi. Aniqlanishicha, donepezil gidroxlorid davolanishga javob beruvchi deb topilgan bemorlar sonining dozaga bog‘liq holda statistik jihatdan sezilarli darajada oshishiga olib keldi.

Farmakokinetika

So‘rish

Qon plazmasidagi maksimal konsentratsiyaga preparat ichga qabul qilingandan taxminan 3-4 soat o‘tgach erishiladi. Preparatning plazmadagi konsentratsiyasi va farmakokinetik egri chiziq ostidagi maydon dozaga proporsional ravishda o‘sadi. Oxirgi yarim chiqarilish davri taxminan 70 soatni tashkil etadi. Takroriy dozalarni kuniga bir marta yuborish asta-sekin muvozanat holatiga olib keladi. Davolash boshlanganidan keyin 3 hafta ichida taxminan muvozanat holatiga erishiladi. Muvozanat holatiga erishilgandan so‘ng, qon plazmasidagi donepezil gidroxlorid konsentratsiyasi va tegishli farmakodinamik faollik kun davomida kam o‘zgaradi.

Ovqat donepezil gidroxloridning so‘rilishiga ta’sir qilmaydi.

Taqsimlash

Donepezil gidroxloridning taxminan 95% i qon plazmasi oqsillari bilan bog‘lanadi. 6-O-dezmetil donepezil faol metabolitining plazma oqsillari bilan bog‘lanishi ma’lum emas. Donepezil gidroxloridning organizmning turli to‘qimalarida tarqalishi to‘liq o‘rganilmagan. Sog‘lom ko‘ngilli erkaklarda 5 mg/kg 14C-belgilangan donepezil gidroxloridning bir martalik dozasi yuborilgandan 240 soat o‘tgach, belgining taxminan 28% organizmda ushlanib qoldi. Bu shuni ko‘rsatadiki, donepezil gidroxlorid va/yoki uning metabolitlari organizmda 10 kundan ortiq vaqt davomida saqlanishi mumkin.

Biotransformatsiya

Donepezil gidroxlorid buyraklar orqali ham o‘zgarmagan holda, ham sitoxrom P450 tizimi tomonidan hosil qilingan ko‘plab metabolitlar ko‘rinishida chiqariladi, ularning barchasi ham aniqlanmagan. 14C-belgilangan donepezil gidroxloridning 5 mg dozasi bir marta yuborilgandan so‘ng, kiritilgan dozaning foizida ifodalangan plazmaning radioaktivligi asosan intakt donepezil gidroxlorid (30%), 6-O-dezmetil donepezil (11% - donepezil gidroxlorid faolligiga o‘xshash faollikka ega bo‘lgan yagona metabolit), donepezil -sis-N-oksid (9%), 5-O-dezmetil donepezil (7%) va 5-O-dezmetil donepezilning glyukuronid kon’yugati (3%) bilan ifodalandi.

Chiqarish

Umumiy kiritilgan radioaktivlikning taxminan 57% siydikda (17% o‘zgarmagan donepezilda) va 14,5% najasda aniqlandi, bu biotransformatsiya va buyraklar orqali chiqarilish preparatning asosiy chiqarish yo‘llari ekanligini ko‘rsatadi. Donepezil gidroxlorid va/yoki uning metabolitlaridan birining ichak-jigar retsirkulyatsiyasi tasdiqlanmagan.

Qon plazmasidagi donepezil konsentratsiyasi taxminan 70 soatlik yarim chiqarilish davri bilan pasayadi.

Jins, irq va chekish qon plazmasidagi donepezil gidroxlorid konsentratsiyasiga klinik jihatdan sezilarli ta’sir ko‘rsatmaydi. Donepezilning farmakokinetikasi sog‘lom keksa sinaluvchilar, Alsgeymer kasalligi yoki qon tomir demensiyasi bilan og‘rigan bemorlarda maxsus o‘rganilmagan. Biroq, bemorlarning qon plazmasidagi preparatning o‘rtacha konsentratsiyasi yosh sog‘lom ko‘ngillilar plazmasidagi konsentratsiyaga juda yaqin edi.

Jigar faoliyatining yengil yoki o‘rtacha buzilishi bo‘lgan bemorlarda qon plazmasida donepezilning muvozanat konsentratsiyasi oshgan. AUC ning o‘rtacha qiymati 48% ga va Cmax ning o‘rtacha qiymati 39% ga oshdi.

Qo‘llanilishi

Alzepil® yengil yoki o‘rtacha og‘irlikdagi Altsgeymer kasalligini simptomatik davolash uchun tavsiya etiladi.

Qo‘llash usuli va dozalari

Dozalash tartibi

Kattalar va keksa yoshdagi bemorlarga

Davolash 5 mg dan kuniga 1 marta boshlanadi. Preparatni kechqurun uyquga yotishdan oldin ichish kerak. Davolashga eng erta klinik javoblarni baholash va donepezilning muvozanatli konsentratsiyasiga erishish uchun kunlik 5 mg dozani kamida bir oy davomida qabul qilish lozim. Kuniga 5 mg dozaning ta’sirini bir oylik klinik baholashdan so‘ng, Alzepil® preparatining dozasini kuniga bir marta 10 mg gacha oshirish mumkin.

Tavsiya etilgan maksimal sutkalik doza 10 mg ga teng. Kuniga 10 mg dan ortiq dozalar klinik sinovlarda o‘rganilmagan.

Keltirilgan dozalardan boshqa dozalarni tayinlash zarur bo‘lsa, boshqa preparatlarni qo‘llash lozim.

Davolashni Alsgeymer demensiyasini tashxislash va davolashda tajribaga ega bo‘lgan shifokor nazorati ostida boshlash va o‘tkazish lozim. Tashxis qabul qilingan tavsiyalarga asoslanishi kerak, masalan, DSM IV, BNO 10. Donepezil bilan davolashni faqat bemorga qaraydigan va preparatning qabul qilinishini muntazam kuzatib turishga qodir bo‘lgan shaxslar mavjud bo‘lgandagina boshlash mumkin. Qo‘llab-quvvatlovchi terapiya bemorda terapevtik samara kuzatilguncha davom ettirilishi kerak. Shu sababli, donepezilning klinik ta’sirini muntazam ravishda baholab borish lozim. Agar terapevtik samara endi kuzatilmasa, preparatni qabul qilishni to‘xtatish imkoniyatini ko‘rib chiqish lozim. Donepezilga individual javobni oldindan aytib bo‘lmaydi.

Preparatni qabul qilish to‘xtatilgandan so‘ng, Alzepil® preparatining ijobiy ta’siri asta-sekin susayishi kuzatiladi. Preparatni keskin to‘xtatgandan keyin samara kuzatilmaydi.

Bemorlarning maxsus guruhlari

Buyrak funksiyasining buzilishi.

Buyrak faoliyati buzilgan bemorlarda davolash sxemasini o‘zgartirishga hojat yo‘q, chunki bu holat donepezil gidroxlorid klirensiga ta’sir qilmaydi.

Jigar faoliyatining buzilishi.

Jigar faoliyatining yengil yoki o‘rtacha buzilishida tizimli ta’sirning oshishi mumkinligi sababli, dozani oshirishni individual ko‘tara olishni hisobga olgan holda amalga oshirish lozim. Jigar faoliyatining og‘ir buzilishlari bo‘lgan bemorlarda preparatni qo‘llash haqida ma’lumotlar yo‘q.

18 yoshgacha bo‘lgan bolalar va o‘smirlar

Alzepil®ni bolalar va o‘smirlarga buyurish tavsiya etilmaydi.

Qo‘llash usuli

Ichish uchun.

Alzepil® tabletkalarini kechqurun, bevosita uyquga yotishdan oldin qabul qilish lozim.

Nojo‘ya ta’sirlari

Eng ko‘p uchraydigan noxush holatlar diareya, mushak spazmlari, charchoq, qusish va uyqusizlikdir.

Alohida holatlarga qaraganda ko‘proq qayd etilgan nojo‘ya reaksiyalar organ tizimlarining sinflari va chastotasi bo‘yicha quyida keltirilgan.

Hodisalarning chastotasiga qarab ular quyidagicha aniqlanadi: juda tez-tez (≥1/10), tez-tez (≥1/100 - <1/10), tez-tez bo‘lmagan (≥1/1000 - ≤1/100), kam uchraydigan (≥1/10000 - ≤1/1000), juda kam uchraydigan (≤1/10000) yoki noma’lum chastota bilan kuzatiladigan (mavjud ma’lumotlar bo‘yicha baholash mumkin emas).

Organlar sistemasi va sinfi Juda tez-tez uchraydigan Tez-tez uchramaydigan Kam uchraydigan Juda kam uchraydigan

Yuqumli va parazitar kasalliklar

Shamollash

Metabolizm va ovqatlanish buzilishlari

Anoreksiya

(ishtaha pasayishi yoki yo‘qolishi)

Ruhiy buzilishlar

Gallyutsinatsiyalar

Qo‘zg‘alish **

Agressiv xulq-atvor**

G‘ayritabiiy tushlar va dahshatli tushlar**

Asab tizimi faoliyatining buzilishi

Hushdan ketish*

Bosh aylanishi

Uyqusizlik

Tutqanoq xurujlari* Ekstrapiramidal alomatlar, yomon sifatli neyro-leptik sindrom

Yurak funksiyasining buzilishi

Yurak urishining sekinlashishi

Sinoatrial blokada

Bo‘lmacha-qorincha blokadasi

Oshqozon-ichak tizimi buzilishlari

Ich ketishi

Ko‘ngil aynishi

Qusish

Oshqozon buzilishi

Oshqozon-ichak traktidan qon ketishi

Me’da va o‘n ikki barmoqli ichak yaralari,

Ko‘p so‘lak oqishi

Jigar va o‘t yo‘llarining buzilishi

Jigar faoliyatining buzilishi, shu jumladan gepatit***

Teri va teri osti to‘qimalarining buzilishlari

Toshma

Teri qichishishi

Skelet-mushak va biriktiruvchi to‘qima buzilishlari

Mushak spazmlari

Rabdomioliz

****

* Hushdan ketish yoki tutqanoq xurujlari bo‘lgan bemorlarni tekshirishda yurak blokadasi yoki sinus ritmida uzoq tanaffuslar ehtimolini hisobga olish kerak.

Gallyutsinatsiyalar, g‘ayritabiiy tushlar, qo‘rqinchli tushlar, qo‘zg‘alish va tajovuzkor xatti-harakatlarning rivojlanishi haqida xabar berilgan hollarda, bu ko‘rinishlar dozani kamaytirgandan yoki preparatni to‘xtatgandan so‘ng to‘xtadi.

*** Etiologiyasi aniqlanmagan jigar faoliyati buzilishida Alzepil® preparatini bekor qilish imkoniyatini ko‘rib chiqish lozim.

**** Ma’lum bo‘lishicha, rabdomioliz xavfli neyroleptik sindromdan qat’i nazar va donepezilni qabul qilishni boshlash yoki dozasini oshirish bilan vaqtincha chambarchas bog‘liq holda rivojlanishi mumkin.

Ehtimoliy nojo‘ya ta’sirlar haqida xabar berish

Dori vositasining taxminiy nojo‘ya ta’sirlari haqidagi ma’lumotlarni taqdim etish dori vositasining xavf/foyda nisbatini uzluksiz kuzatib borish imkonini beruvchi juda muhim jihat hisoblanadi. Tibbiyot xodimlari har qanday taxmin qilingan salbiy reaksiyalar haqida yo‘riqnoma oxirida ko‘rsatilgan kontaktlar orqali, shuningdek, milliy ma’lumot yig‘ish tizimi orqali ma’lumot berishlari kerak.

Qarshi ko‘rsatmalar

Alzepil® anamnezida donepezil gidroxlorid, piperidin hosilalari yoki preparatning har qanday yordamchi komponentlariga yuqori sezuvchanligi bo‘lgan bemorlarga tavsiya etilmaydi.

Dorilarning o‘zaro ta’siri

Donepezil gidroxlorid va/yoki uning har qanday metabolitlari odamda teofillin, varfarin, simetidin yoki digoksin metabolizmini susaytirmaydi. Digoksin yoki simetidin bir vaqtda yuborilganda donepezil metabolizmi o‘zgarmaydi.

In vitro tadqiqotlar shuni ko‘rsatdiki, sitoxrom P450 ning 3A4 va kamroq darajada 2D6 izofermentlari donepezil metabolizmida ishtirok etadi. Dorilarning in vitro o‘zaro ta’sirini o‘rganish shuni ko‘rsatdiki, ketokonazol va xinidin - mos ravishda CYP3A4 va 2D6 ingibitorlari - donepezil metabolizmini bostiradi. Shuning uchun bu va boshqa CYP3A4 ingibitorlari, masalan, itrakonazol va eritromitsin, shuningdek, CYP2D6 ingibitorlari, masalan, fluoksetin, donepezil metabolizmini susaytirishi mumkin. Sog‘lom ko‘ngillilar tadqiqotida ketokonazol donepezilning o‘rtacha konsentratsiyasini taxminan 30% ga oshirdi.

Rifampitsin, fenitoin, karbamazepin va alkogol kabi ferment induktorlari donepezil darajasini pasaytirishi mumkin. Ushbu ingibitor yoki indutsirlovchi ta’sirlarning amplitudalari noma’lum bo‘lganligi sababli, bunday kombinatsiyalarni tayinlashda ehtiyotkorlik bilan yondashish lozim.

Donepezil gidroxlorid antixolinergik faollikka ega bo‘lgan preparatlar bilan o‘zaro ta’sirlashishi mumkin. Yo‘ldosh preparatlar, masalan, suksinilxolin, nerv-mushak o‘tkazuvchanligining boshqa blokatorlari, shuningdek, yurak o‘tkazuvchanligiga ta’sir qiluvchi xolinergik agonistlar yoki beta-blokatorlar bilan ham sinergizm bo‘lishi mumkin.

Maxsus ko‘rsatmalar

Donepezilning samaradorligi og‘ir Altsgeymer demensiyasi, demensiyaning boshqa turlari yoki xotira buzilishi (masalan, kognitiv funksiyaning yoshga bog‘liq pasayishi) bo‘lgan bemorlarda aniqlanmagan.

Anesteziya

Alzepil® xolinesteraza ingibitori hisoblanadi, shu sababli u suksinilxolin yordamida narkoz paytida mushaklarning bo‘shashishini kuchaytirishi mumkin.

Yurak-qon tomir kasalliklari

Xolinesteraza ingibitorlari farmakologik ta’siri tufayli yurak ritmini sekinlashtirishi mumkin. Bunday ta’sir qilish imkoniyatini, ayniqsa, sinus tugunining zaifligida yoki yurakdagi qorincha usti o‘tkazuvchanligining boshqa buzilishlarida, masalan, sino-atrial yoki atrioventrikulyar blokadada hisobga olish kerak.

Hushdan ketish va tutqanoq xurujlari haqida xabar berilgan. Bunday bemorlarni tekshirishda yurak blokadasi yoki sinus ritmida uzoq pauzalar bo‘lishi mumkinligini hisobga olish kerak.

Oshqozon-ichak tizimi faoliyatining buzilishi

Yaralar rivojlanish xavfi yuqori bo‘lgan bemorlar, masalan, anamnezida yara kasalligi bo‘lgan yoki nosteroid yallig‘lanishga qarshi vositalar (NYAQV) bilan yondosh davolanayotgan bemorlar, yara paydo bo‘lish belgilarini aniqlash uchun kuzatuvga muhtoj bo‘ladilar. Biroq, donepezilning klinik sinovlari platseboga nisbatan peptik yaralar yoki oshqozon-ichak tizimidan qon ketish chastotasining oshishini aniqlamadi.

Siydik-tanosil tizimi

Xolinomimetiklar siydik pufagidan siydik oqib chiqishining buzilishiga olib kelishi mumkin, biroq donepezilning klinik sinovlarida bunday ta’sirlar kuzatilmagan.

Nevrologik holatlar

Xolinomimetiklar tarqoq tutqanoq xurujlarini qo‘zg‘atishga birmuncha moyil deb hisoblanadi. Biroq, tutqanoq faolligi Altsgeymer kasalligining ko‘rinishi ham bo‘lishi mumkin.

Xolinomimetiklar ekstrapiramidal belgilarni kuchaytirishi yoki keltirib chiqarishi mumkin.

Xavfli neyroleptik sindrom (XNS)

Juda kamdan kam hollarda hayot uchun potensial xavfli bo‘lgan, gipertermiya (isitma), mushaklar rigidligi, vegetativ asab tizimi buzilishlari, ongning o‘zgarishi, qon zardobidagi kreatinin fosfokinaza darajasining oshishi bilan tavsiflangan ZNT rivojlanishi mumkin. Qo‘shimcha alomatlarga mioglobinuriya (rabdomioliz) va o‘tkir buyrak yetishmovchiligi kirishi mumkin.

Donepezilni qo‘llash bilan bog‘liq xavfli neyroleptik sindromning rivojlanishi haqida juda kamdan-kam xabarlar mavjud, ayniqsa antipsixotik dori vositalari bilan birga davolanayotgan bemorlarda.

Agar bemorda ZNS belgilari va alomatlari rivojlangan bo‘lsa yoki qo‘shimcha klinik belgilarsiz tushuntirib bo‘lmaydigan yuqori harorat mavjud bo‘lsa, davolanishni to‘xtatish lozim.

O‘pka funksiyasining buzilishi

Xolinomimetik ta’siri tufayli, xolinesteraza ingibitorlari anamnezida astma yoki o‘pkaning obstruktiv kasalligi bo‘lgan bemorlarga ehtiyotkorlik bilan tayinlanishi kerak.

Alzepil® preparatini va boshqa atsetilxolinesteraza ingibitorlarini, shuningdek, xolinergik tizim agonistlari yoki antagonistlarini bir vaqtning o‘zida yuborishdan saqlanish kerak.

Jigar funksiyasining og‘ir buzilishi

Jigar faoliyatining og‘ir buzilishlari bo‘lgan bemorlarda preparatni qo‘llash haqida ma’lumotlar yo‘q.

Qon tomir demensiyasi klinik tekshiruvlarida o‘lim darajasi

Altsgeymer kasalligining klinik tadqiqotlari, shuningdek, Altsgeymer kasalligining qon tomir demensiyasi tadqiqotlari bilan birlashtirilgan materiallarida platsebo guruhlaridagi o‘lim ko‘rsatkichlari donepezil gidroxlorid qabul qilgan guruhlardagi xuddi shunday ko‘rsatkichlardan sezilarli darajada yuqori ekanligi ko‘rsatilgan.

Homiladorlik va emizish davri

Homiladorlik

Homilador ayollarda donepezilni qo‘llash haqida yetarli ma’lumotlar yo‘q.

Hayvonlarda o‘tkazilgan tadqiqotlar teratogen ta’sirlarni aniqlamadi, ammo perinatal va postnatal toksiklik belgilarini aniqladi. Odamdagi potensial xavf noma’lum.

Homiladorlikda Alzepil® ni aniq zarurat bo‘lmasa qo‘llash mumkin emas.

Emizish

Donepezil kalamushlarda sut bilan ajraladi. Donepezilning inson ko‘krak sutiga ajralishi aniqlanmagan; emizikli ayollar ishtirokida tadqiqotlar o‘tkazilmagan. Shuning uchun donepezil qabul qilayotgan ayollar bolani emizmasligi kerak.

Transport vositalarini boshqarish va mexanizmlar bilan ishlash qobiliyatiga ta’siri

Donepezil transport vositalarini boshqarish va mexanizmlar bilan ishlash qobiliyatiga kam yoki o‘rtacha ta’sir ko‘rsatadi.

Demensiya transport vositalarini boshqarish qobiliyatini yomonlashtirishi yoki mexanizmlar bilan ishlash qobiliyatini pasaytirishi mumkin. Bundan tashqari, donepezil asosan kurs boshida yoki dozani oshirganda charchoq, bosh aylanishi va mushak spazmlarini keltirib chiqarishi mumkin.

Davolovchi shifokor donepezil qabul qilayotgan bemorlarning transport vositalarini yoki murakkab mexanizmlarni boshqarish qobiliyatini doimiy ravishda baholab borishi lozim.

Dozani oshirib yuborish

Belgilari

Xolinesteraza ingibitorlarining dozasini oshirib yuborish kuchli ko‘ngil aynishi, qusish, so‘lak oqishi, terlash, bradikardiya, gipotenziya, nafas qisilishi, kollaps va talvasalar bilan tavsiflanuvchi xolinergik krizga olib kelishi mumkin. Mushaklar kuchsizligi kuchayishi mumkin, bu nafas mushaklari shikastlanganda o‘limga olib kelishi mumkin.

Davolash

Dozani oshirib yuborishning har qanday holatida bo‘lgani kabi, umumiy qo‘llab-quvvatlovchi davolashni tayinlash lozim. Uchlamchi antixolinergik dorilar, masalan, atropin, Alzepil® preparatining dozasi oshirib yuborilganda antidot sifatida qo‘llanilishi mumkin. Atropin sulfatni ta’sirga erishguncha ortib boruvchi dozalarda vena ichiga yuborish tavsiya etiladi: avval 1-2 mg/kg v/i yuboriladi, so‘ngra klinik javobga qarab qo‘shimcha dozalar beriladi. Arterial bosim va yurak qisqarishlari chastotasining atipik reaksiyalari boshqa xolinomimetiklar to‘rtlamchi antixolinergik preparatlar, masalan, glikopirrolat bilan birgalikda yuborilganda qayd etilgan. Donepezil gidroxlorid va/yoki uning metabolitlarini dializ (gemodializ, peritoneal dializ yoki gemofiltratsiya) yordamida chiqarib yuborish mumkinligi noma’lum.

Chiqarish shakli

Qobiq bilan qoplangan 14 ta tabletka alyuminiy folgali PVX/PVXD plyonkali blisterga joylashtirildi.

2 yoki 4 ta blister tibbiy qo‘llash bo‘yicha yo‘riqnoma yozilgan karton qutiga joylangan.

Saqlash shartlari

30 °C dan yuqori bo‘lmagan haroratda saqlanadi.

Bolalar qo‘li yetmaydigan joyda saqlang.

Yaroqlilik muddati

5 yil.

Qadoqda ko‘rsatilgan yaroqlilik muddati tugagandan keyin ishlatilmasin.

Yaroqlilik muddatining tugash sanasi ko‘rsatilgan oyning oxirgi kuni hisoblanadi.

Dori vositalarini maishiy chiqindilarga yoki oqova suvlarga tashlamaslik kerak. Agar endi kerak bo‘lmagan preparatni chiqindiga tashlash kerak bo‘lsa, farmatsevt bilan maslahatlashing. Bu chora-tadbirlar atrof-muhit ifloslanishining oldini olishga yordam beradi.

Dorixonalardan berish shartlari

Retsept bo‘yicha.

Ishlab chiqaruvchi

"EGIS farmatsevtika zavodi" YoAJ

1165 Budapesht, Bo‘kenfeldi ko‘chasi, 118-120

VENGRIYA

Ro‘yxatdan o‘tganlik guvohnomasi egasi

"EGIS farmatsevtika zavodi" YoAJ

1106 Budapesht, Keresturi ko‘chasi, 30-38

VENGRIYA

O‘zbekiston Respublikasi hududida dori vositalarining sifati bo‘yicha e’tirozlarni (takliflarni) qabul qiluvchi tashkilotning nomi va manzili

"EGIS farmatsevtika zavodi" YoAJning O‘zbekistondagi vakolatxonasi

Toshkent shahri, Afrosiyob ko‘chasi, 4B-uy

Tel.: (99871) 1404119, faks: (99871) 1404490.