Ambcet tabletkalari 60 mg + 5 mg №10 (1 blister)

Tarkib

Har bir tabletka tarkibiga quyidagilar kiradi:

faol moddalar: ambroksol gidroxlorid - 60 mg, setirizin gidroxlorid - 5 mg;

yordamchi moddalar: kalsiy gidrofosfat (suvsiz), laktoza, makkajo‘xori kraxmali, metilgidroksibenzoat, propilgidroksibenzoat, tozalangan talk, magniy stearat, natriy kraxmal glikolat, kolloid kremniy dioksidi.

Tavsif

Oq, yassi, dumaloq, qobiqsiz, bir tomonida sinish chizig‘i bo‘lgan tabletkalar.

Farmakoterapevtik guruh

Balg‘am ko‘chiruvchi va antigistamin vositalar. ATX kodi: R05C A.

Farmakologik xususiyatlari

Preparat ambroksol gidroxlorid va setirizin gidroxloridning kombinatsiyalangan preparati hisoblanadi.

Ambroksol gidroxlorid bronxosekretolitik, sekretomotor (balg‘am ko‘chiruvchi) ta’sirga ega mukolitik vositadir. Surfaktant hosil bo‘lishini rag‘batlantiradi, o‘zgargan bronx-o‘pka sekretsiyasini me’yorlashtiradi, balg‘amning reologik ko‘rsatkichlarini yaxshilaydi, uning yopishqoqligi va adgeziv xususiyatlarini kamaytiradi, mukotsiliar transportni oshiradi, balg‘amning bronxlardan chiqarilishini osonlashtiradi. Preparat ortiqcha sekret hosil qilmaydi, bronxlar giperreaktivligini kamaytiradi.

Setirizin gidroxlorid - periferik gistamin H1-retseptorlarining selektiv blokatori, gidroksizin metaboliti, antigistamin, allergiyaga qarshi ta’sir ko‘rsatadi. Allergik reaksiyalar rivojlanishining oldini oladi va kechishini yengillashtiradi, qichishishga qarshi va antiekssudativ ta’sirga ega.

Allergik reaksiyalarning erta bosqichiga ta’sir qiladi, shuningdek, yallig‘lanish hujayralari migratsiyasini kamaytiradi; kechki allergik reaksiyada ishtirok etuvchi mediatorlar ajralishini susaytiradi. Kapillyarlar o‘tkazuvchanligini kamaytiradi, to‘qimalar shishining oldini oladi, silliq mushaklar spazmini bartaraf etadi. Gistamin, maxsus allergenlar yuborilishiga, shuningdek, sovutishga (sovuq eshakemda) teri reaksiyasini bartaraf etadi. Yengil kechuvchi bronxial astmada gistaminoindutsirlangan bronxokonstruksiyani pasaytiradi. Tavsiya etilgan dozalarda qo‘llanilganda deyarli sedativ ta’sirga ega emas va deyarli antixolinergik hamda antiserotonin ta’sir ko‘rsatmaydi.

Farmakokinetika

Preparatning so‘rilishi tez va yetarlicha to‘liq bo‘lib, terapevtik diapazonda chiziqli bog‘liqlikka ega. Ta’sir etuvchi moddaning plazmadagi maksimal konsentratsiyasiga 30 daqiqa - 3 soatdan keyin erishiladi. Plazmada preparatning taxminan 90% i proteinlar bilan bog‘lanadi. Preparatning qon va to‘qimalar orasida taqsimlanishi tez kechadi, o‘pkada faol moddalarning yuqori konsentratsiyasi kuzatiladi. Plazmadan yarim chiqarilish davri 7-12 soatni tashkil etadi, to‘qimalarda to‘planishi aniqlanmagan. Preparat asosan jigarda konyugatsiya yo‘li bilan metabolizmga uchraydi. Preparatning 90% ga yaqini buyraklar orqali chiqariladi.

Qo‘llanilishi

Shamollash va burun oqishi, yo‘tal, allergik rinit, sinusit: rinosinusit, pichan isitmasi, traxeobronxitning barcha shakllari, bronxit bilan emfizema, pnevmokonioz, o‘pkaning surunkali yallig‘lanish holatlari, bronxoektaziya va bronxospazmik astma bilan kechuvchi bronxit. Bronxitning keskin zo‘rayishida preparatni adekvat antibiotik bilan birga qo‘llash lozim.

Qo‘llash usuli va dozalari

Kattalar va 12 yoshdan oshgan bolalar: kuniga 1-2 tabletkadan alohida dozalarda yoki terapevt ko‘rsatmasiga binoan.

2-12 yoshli bolalar: 1/2 tabletkadan kuniga ikki mahal alohida dozalarda yoki terapevt ko‘rsatmasiga binoan.

Nojo‘ya ta’sirlari

Ovqat hazm qilish yo‘li tomonidan: ko‘ngil aynishi, qusish, ich ketishi, gastralgiya, epigastral sohada noqulaylik, jig‘ildon qaynashining yengil ko‘rinishlari.

Allergik reaksiyalar: teri toshmasi, qichishish, eshakemi, kamdan kam hollarda - kontakt dermatit, Kvinke shishi, anafilaktik shok, terining shikastlanishi (Stivens-Jonson sindromi va Layell sindromi) haqida juda kam xabar berilgan.

Boshqalar: holsizlik, bosh og‘rig‘i, charchash, migren.

Qarshi ko‘rsatmalar

Ambset preparatning biron-bir tarkibiy qismiga yuqori sezuvchanligi bo‘lgan bemorlarda qo‘llash mumkin emas. Homilador va emizikli ayollarda xavfsizligi aniqlanmaganligi sababli, preparatni homiladorlik va emizikli davrda qo‘llash mumkin emas. Ambsetni 2 yoshdan kichik bolalarga buyurish mumkin emas.

Dorilarning o‘zaro ta’siri

Ambroksolni antibiotiklar: amoksitsillin, sefuroksim, eritromitsin, doksitsiklin bilan bir vaqtda qo‘llash o‘pka to‘qimasida antibiotiklar konsentratsiyasining oshishiga yordam beradi.

Preparatni yo‘talga qarshi faollikka ega bo‘lgan (masalan, tarkibida kodein bo‘lgan) dori vositalari bilan bir vaqtda qo‘llash tavsiya etilmaydi, chunki yo‘talning kamayishi fonida bronxlardan balg‘amning chiqarilishi qiyinlashadi. Ambroksolni yurak glikozidlari, diuretiklar bilan birga qo‘llash mumkin.

Setirizinning alkogol bilan o‘zaro ta’siri haqida hozirgacha ma’lumotlar olinmagan, shunga qaramay, setirizin bilan davolash paytida spirtli ichimliklarni iste’mol qilish tavsiya etilmaydi.

Maxsus ko‘rsatmalar

Tabletkalarni uzoq davom etadigan kasalliklarda uzoq muddatli davolash sifatida qo‘llash mumkin emas. Agar preparatni qo‘llashning qisqa muddatidan so‘ng uning samarasi sezilarli bo‘lmasa, shifokor bilan maslahatlashish tavsiya etiladi.

Agar balg‘am ajralishi va yo‘tal davolashning 2 haftasidan keyin kamaymasa, bunday chidamlilik sabablarini aniqlash va nafas yo‘llarining xavfli kasalligini istisno qilish uchun terapevt bilan maslahatlashish tavsiya etiladi.

Agar balg‘am ajralishi va yo‘tal davolashning 2 haftasidan keyin kamaymasa, bunday chidamlilik sabablarini aniqlash va nafas yo‘llarining xavfli kasalligini istisno qilish uchun terapevt bilan maslahatlashish tavsiya etiladi.

Bronxial astma bilan og‘rigan bemorlar davolanish davrida diqqat bilan kuzatilishi kerak. Bronxospazm yuzaga kelganda, preparat bilan davolashni darhol to‘xtatish lozim. Anamnezida peptik yara bo‘lgan bemorlarda tabletkalarni ehtiyotkorlik bilan qo‘llash lozim, chunki preparat tufayli kelib chiqadigan ko‘ngil aynishi va qusish oshqozon-ichak tizimidan qon ketish xavfini oshiradi, shuningdek, mukolitik me’da shilliq qavatini buzishi mumkinligi haqidagi nazariy xavf tufayli. Tabletkalarni qo‘llashni teri allergik testidan bir necha kun oldin to‘xtatish kerak, chunki preparat allergen ekstraktlariga terining gistamin javobini bostirishi mumkin.

Homiladorlik va laktatsiya davri

Homilador va emizikli ayollarda xavfsizligi aniqlanmaganligi sababli, preparatni homiladorlik va emizikli davrda qo‘llash mumkin emas. Bundan tashqari, tabletkalar tarkibidagi setirizin ko‘krak sutiga o‘tadi.

Bolalarda qo‘llanilishi

2 yoshdan kichik bolalarda xavfsizlik va samaradorlik yetarli darajada isbotlanmagan.

Avtomobilni boshqarish va mexanizmlar bilan ishlash qobiliyatiga ta’siri

Tavsiya etilmaydi.

Dozani oshirib yuborish

Belgilari: nojo‘ya reaksiyalarning kuchayishi.

Davolash: simptomatik. Maxsus antidot yo‘q.

Chiqarish shakli

10 ta tabletka blisterda; Tibbiy qo‘llash bo‘yicha yo‘riqnomaga ega karton qutida 1 yoki 3 ta yoki blister.

Saqlash shartlari

Quruq va yorug‘likdan himoyalangan joyda, 30 °C dan yuqori bo‘lmagan haroratda saqlang.

Preparatni bolalar qo‘li yetmaydigan joyda saqlang.

Yaroqlilik muddati

2 yil.

Yaroqlilik muddati o‘tgandan keyin iste’mol qilinmaydi.

Dorixonalardan berish shartlari

Retseptsiz.

Ishlab chiqaruvchi

Fourrts (India) Laboratories Pvt. Ltd"

Vandalur Road, Kelambakkam - 603103, Tamil Nadu, Hindiston

O‘zbekiston Respublikasi hududida dori vositalarining sifati bo‘yicha e’tirozlarni (takliflarni) qabul qiluvchi tashkilotning nomi va manzili

"Serene Pharma" MCHJ

Manzil: Toshkent shahri, Yashnobod tumani, M. Ashrafiy ko‘chasi, 2-berk ko‘cha, 9-uy

Tel.: + 99871-2910140