Benzonal Tatximfarmpreparatlari tabletkalari 100 mg №50

Tarkib

Faol moddasi: benzobarbital (benzonal), 100% moddaga qayta hisoblaganda - 0,100 g.

Yordamchi moddalar: kartoshka kraxmali - 0,0089 g, povidon (kollidon 90 F) - 0,0035 g, natriy karboksimetilkraxmal (primogel) - 0,0047 g, kalsiy stearat - 0,0009 g.

Tavsif

Tabletkalar oq rangda, dumaloq, yassi silindrsimon shaklda, faskali va chiziqli.

Dori shakli

Tabletkalar.

Farmakoterapevtik guruh

Epilepsiyaga qarshi vosita. Barbituratlar va ularning hosilalari. ATX: N03AA.

Farmakodinamika

Epilepsiyaga qarshi vosita bo‘lib, deyarli uyqu keltirmaydi. Markaziy asab tizimida, ayniqsa, talamusda, miya ustunining yuqoriga ko‘tariluvchi faollashtiruvchi retikulyar formatsiyasida kiritma neyronlar darajasida tormozlovchi GAMK-ergik ta’sirlarni kuchaytiradi. Nerv tolalari membranalarining Na+ uchun o‘tkazuvchanligini pasaytirib, epileptik faollik o‘chog‘idan impulslarning tarqalishini kamaytiradi. Ta’siri og‘iz orqali qabul qilingandan 20-60 daqiqa o‘tgach boshlanadi.

Farmakokinetika

Organizmda tez metabolizmga uchrab, epilepsiyaga qarshi ta’sir ko‘rsatadigan fenobarbitalni ajratib chiqaradi. Plazma oqsillari bilan bog‘lanishi kuchsiz. Miya, jigar va buyraklarda yuqori konsentratsiya hosil qiladi. Gistogematik to‘siqlar orqali va ko‘krak sutiga o‘tadi. Yarim chiqarilish davri - 3-4 kun. Buyraklar orqali ham o‘zgarmagan holda, ham metabolitlar holida chiqariladi.

Ko‘rsatmalar

Turli genezli epilepsiya, tarqalgan va parsial tutqanoqlar, epileptik sindrom.

Qarshi ko‘rsatmalar

yuqori sezuvchanlik;

jigar yetishmovchiligi;

surunkali buyrak yetishmovchiligi;

II-III darajali surunkali yurak yetishmovchiligi;

porfiriya;

kamqonlik;

bronxial astma;

nafas yetishmovchiligi;

qandli diabet;

tireotoksikoz;

buyrak usti bezi yetishmovchiligi;

giperkinezlar;

depressiv holatlar (o‘z joniga qasd qilishga urinishlar bilan);

homiladorlik (I va III trimestr);

emizish davri;

3 yoshgacha bo‘lgan bolalar uchun.

Qo‘llash usuli va dozalari

Ichga, ovqatdan keyin, sutkada 3 marta.

Bir martalik doza - 0,1-0,15-0,2 g; maksimal bir martalik doza - 0,3 g, maksimal sutkalik doza - 0,8 g. Dozalash tartibi individual bo‘lib, shifokor tomonidan belgilanadi. Davolash kursi uzluksiz va uzoq, kamida 2 yil.

3 yoshdan 6 yoshgacha bo‘lgan bolalar uchun bir martalik doza - 0,25-0,05 g, sutkalik - 0,1-0,15 g; 7 yoshdan 10 yoshgacha bir martalik doza - 0,05-0,1 g, sutkalik - 0,15-0,3 g; 11 yoshdan 14 yoshgacha bir martalik doza - 0,1 g, sutkalik - 0,3-0,4 g; katta yoshdagi bolalar uchun maksimal bir martalik doza - 0,15 g, maksimal sutkalik - 0,45 g.

Nojo‘ya ta’sirlari

O‘rganib qolish, dorilarga qaramlik, "bekor qilish" sindromi, bronxospazm, arterial bosimning pasayishi, trombotsitopeniya, anemiya, tromboflebit, uyquchanlik, lanjlik, tormozlanish, bosh og‘rig‘i, ishtahaning pasayishi, nutqning qiyinlashishi, ataksiya; nistagm, ruhiy reaksiyalarning sekinlashishi; allergik reaksiyalar.

Dozani oshirib yuborish

Preparatdan zaharlanish markaziy nerv sistemasi funksiyasining susayishi (uyquchanlik, ko‘rishning yomonlashuvi, ataksiya, dizartriya, nistagm), hatto komagacha borishi bilan namoyon bo‘ladi. Nafas markazining susayishi kuzatiladi; arterial bosim pasayadi, buyraklar funksiyasi buziladi.

Simptomlari: bosh og‘rig‘i, karaxtlik, kuchli holsizlik, tana haroratining ko‘tarilishi yoki pasayishi, nafas olishning sekinlashishi va qiyinlashishi, hansirash, qo‘zg‘alish, ko‘z qorachiqlarining torayishi, taxikardiya yoki bradikardiya, sianoz, bosim joylarida gemorragiyalar, ongning chalkashishi, o‘pka shishi, koma. Surunkali intoksikatsiyada - asabiylashish, tanqidiy baholash qobiliyatining susayishi, uyquning buzilishi, ongning chalkashligi.

Davolash: nafas olish va yurak-qon tomir tizimi, jigar, buyrak, markaziy asab tizimi faoliyatini tiklash va qo‘llab-quvvatlashga qaratilgan simptomatik va reanimatsion terapiya. Bu tadbirlar komatoz holatdagi traxeyani intubatsiya qilish, markaziy gipoventilyatsiyada o‘pkani sun’iy ventilyatsiya qilish, faol antibiotikoterapiya va glyukoza hamda elektrolitlar eritmalari bilan vena ichiga terapiya o‘tkazish, yurak-qon tomir vositalari va gormonlarni qo‘llashni o‘z ichiga oladi.

O‘zaro aloqa

Narkotik analgetiklar, umumiy anesteziya uchun dori vositalari, neyroleptiklar, trankvilizatorlar, tritsiklik antidepressantlar, etanol, uxlatuvchi dori vositalarining ta’sirini kuchaytiradi; pasaytiradi - paratsetamol, antikoagulyantlar, tetratsiklinlar, grizeofulvin, glyukokortikosteroidlar, mineralokortikoidlar, yurak glikozidlari, xinidin, D vitamini, ksantinlar.

Maxsus ko‘rsatmalar

Ilgari boshqa barbi turatalarni qabul qilgan bemorlarda benzobarbital bilan davolanishga o‘tilganda, uyqu buzilishi mumkin, bu kechasi fenobarbital (0,05-0,1 g) yoki boshqa uyqu dorilarini buyurish bilan bartaraf etiladi.

Hozirgi vaqtda epilepsiya bilan og‘rigan bemorlarni davolashni nojo‘ya ta’siri kamroq bo‘lgan boshqa epilepsiyaga qarshi dori vositalari (valproat kislota, karbamazepin va boshqalar) bilan boshlashadi. Benzobarbital, agar bu vositalar samara bermasa, ko‘pincha kombinatsiyalangan terapiya tarkibida buyuriladi.

Davolanish davrida spirtli ichimliklarni iste’mol qilmaslik kerak.

Homiladorlik va laktatsiya

Preparatni homiladorlikning I va III trimestrida qo‘llash mumkin emas. Homiladorlikning II trimestrida preparatni qo‘llash, agar ona uchun kutilayotgan foyda homila uchun potensial xavfdan yuqori bo‘lsa, mumkin.

Davolash davrida emizishni to‘xtatish masalasini hal qilish kerak.

Transport vositalari va mexanizmlarini boshqarish qobiliyatiga ta’siri

Benzobarbitalni qabul qilish vaqtida diqqatning yuqori konsentratsiyasini va psixomotor reaksiyalarning tezligini talab qiladigan potensial xavfli faoliyat turlaridan tiyilish kerak.

Chiqarilish shakli/dozasi

Tabletkalar 100 mg.

Qadoq

10 yoki 25 ta tabletka kontur katakli o‘ramga solinadi. 10 ta tabletkadan iborat 5 ta kontur yacheykali o‘ram yoki 25 ta tabletkadan iborat 2 ta kontur yacheykali o‘ram qo‘llash bo‘yicha yo‘riqnoma bilan birga karton qutiga joylanadi.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlang.Bolalarning qo‘li yetmaydigan joyda saqlang.

Dorixonalardan berish shartlari

Retsept bo‘yicha.

Ishlab chiqaruvchi

Tatximfarmpreparatlar, AJ. Rossiya.