Dipnovet

Tarkib

1 g surtmada quyidagilar mavjud:

faol moddalar: betametazon dipropionat - 0,5 mg, salitsilat kislota - 30 mg, mochevina - 100 mg, natriy laktat - 20 mg;

yordamchi moddalar: xlorkrezol, natriy digidrofosfat monogidrati, fosfat kislotasi, vazelin, mineral moy, makrogol setostearat, setostearil spirti (setil spirti 60%, stearil spirti 40%), natriy gidroksid, tozalangan suv.

Tavsif

Sirtga qo‘llash uchun surtma: oq, yarim shaffof, gomogen surtma.

Dori shakli

Surtma 20 g (tubalar).

Farmakoterapevtik guruh

Psoriaz, vitiligoni davolash uchun vosita.

Farmakologik ta’siri

DIPNOVET ® - Tashqi qo‘llash uchun glyukokortikosteroid.

Yallig‘lanishga qarshi, qichishishga qarshi, allergiyaga qarshi, tomirlarni toraytiruvchi, ekssudatsiyaga qarshi, antiproliferativ, keratolitik va namlantiruvchi ta’sir ko‘rsatadi. Preparat teri yuzasiga surtilganda yallig‘lanish o‘chog‘iga tez va kuchli ta’sir ko‘rsatib, obyektiv simptomlar (eritema, shish, lixenifikatsiya) va subyektiv sezgilar (qichishish, ta’sirlanish, og‘riq) ifodalanishini kamaytiradi.

Ko‘rsatmalar

Mahalliy kortikosteroidlar bilan davolashga ta’sir qiluvchi holatlar, shu jumladan:

atopik dermatit /neyrodermit;

allergik kontakt dermatit;

ekzema (turli shakllari);

kontakt dermatit (shu jumladan kasbiy) va boshqa noallergik dermatitlar (shu jumladan quyosh va nur dermatiti);

hasharotlar chaqishiga bo‘lgan reaksiyalar;

psoriaz;

yallig‘lanish dermatozlari;

diskoid qizil volchanka;

qizil yassi temiratki;

ekssudativ ko‘p shaklli eritema;

turli etiologiyali teri qichishishi.

Qo‘llash usuli va dozalari

Tashqarida. DIPNOVET - tashqi qo‘llash uchun surtma terining zararlangan sohasiga kuniga ikki marta yupqa qatlam bilan yengil ishqalab surtiladi. Terisi zichroq bo‘lgan joylarga (masalan, tirsak, kaft va oyoq panjalariga), shuningdek, preparat oson yuviladigan joylarga DIPNOVETni tez-tez surtish mumkin.

Uzluksiz davolashning davomiyligi odatda 4 haftadan oshmaydi.

Surunkali kasalliklarni davolashda qaytalanishning oldini olish uchun barcha alomatlar yo‘qolganidan keyin ham terapiyani yana birmuncha vaqt davom ettirish lozim. Yil davomida terapiyani bir necha marta takrorlash mumkin.

Sirtga qo‘llash uchun surtma shaklidagi DIPNOVET o‘tkir osti va surunkali dermatozlarni, shu jumladan quruq, lixenizatsiyalangan va po‘st tashlaydigan shikastlanishlarni davolash uchun yoki surtmaning okklyuzion ta’siri zarur bo‘lgan hollarda mo‘ljallangan.

DIPNOVETni 6 oylik bolalarga ehtiyotkorlik bilan va iloji boricha qisqa muddatga buyurish mumkin.

Preparatni bog‘lamlar ostiga va ayniqsa plastifikatsiyalangan tagliklar ostiga qo‘llash mumkin emas, chunki bu preparatning so‘rilishini kuchaytiradi va nojo‘ya ta’sirlar rivojlanish xavfini oshiradi.

Nojo‘ya ta’sirlari

Odatda, kuchsiz ifodalangan xarakterga ega. Kamdan-kam hollarda, boshqa glyukokortikosteroidlar qo‘llanganda bo‘lgani kabi, yuqori sezuvchanlik reaksiyalari (qichishish, achishish yoki qizarish), aknesimon o‘zgarishlar, gipopigmentatsiya, striyalar, teri atrofiyasi, gipertrixoz, teleangiektaziyalar, terining ikkilamchi infeksiyalari rivojlanishi mumkin. O‘ta sezuvchanlik reaksiyasi yoki nojo‘ya ta’sirlar paydo bo‘lgan taqdirda, terapiyani bekor qilish va shifokorga murojaat qilish lozim.

Qarshi ko‘rsatmalar

Betametazonga yoki preparatning har qanday yordamchi komponentlariga yuqori sezuvchanlik. Teri sili, zaxmning teri ko‘rinishlari, suvchechak, terining virusli, bakterial va zamburug‘li infeksiyalari, emlashdan keyingi teri reaksiyalari, ochiq yaralar, trofik yaralar, rozatsea, vulgar husnbuzarlar, teri va teri osti tuzilmalari o‘smalari, 6 oylikkacha bo‘lgan bolalar.

Dozani oshirib yuborish

Preparatni uzoq vaqt davomida uzluksiz qo‘llashda, ayniqsa bolalarda, terining keng yuzalarida, butunligi buzilgan teriga surtilganda yoki okklyuzion bog‘lam ostida qo‘llanilganda, buyrak usti bezi po‘stlog‘i funksiyasining susayishi va yetishmovchiligi bilan bog‘liq nojo‘ya ta’sirlar rivojlanishi mumkin. Davolash: preparatni bekor qilish va zarur bo‘lsa, simptomatik davo o‘tkazish tavsiya etiladi.

Maxsus shartlar

Preparatni yuz terisiga uzoq muddat tashqi qo‘llash tavsiya etilmaydi, chunki rozatsea, perioral dermatit va akne rivojlanishi mumkin. Preparatni ko‘z sohasiga qo‘llash mumkin emas, chunki preparat shilliq qavatga tushishi mumkin, bu esa katarakta, glaukoma, ko‘zning zamburug‘li infeksiyalari rivojlanishiga va gerpetik infeksiyaning kuchayishiga olib kelishi mumkin. Tananing ba’zi qismlari, masalan, qo‘ltiq osti chuqurliklari, chov burmalari, o‘ziga xos tabiiy okklyuziya mavjud bo‘lgan joylarda strialar paydo bo‘lish xavfi ko‘proq bo‘ladi, shuning uchun terining bu qismlarida preparatni qo‘llash qisqa muddatli bo‘lishi kerak. Terida zamburug‘li yoki bakterial infeksiya rivojlanganda, qo‘shimcha ravishda antibakterial yoki zamburug‘ga qarshi vositani qo‘llash zarur.

BILISH MUHIM!

Dermatozlar kelib chiqishi har xil va klinik belgilari xilma-xil bo‘lgan teri kasalliklarining katta guruhining umumiy nomidir. Patologiyalar har qanday yoshdagi odamlarga ta’sir qilishi mumkin.

DERMATOZLARNING KELIB CHIQISH SABABLARI

Dermatozlar bir qator ekzo- va endogen omillar ta’sirida rivojlanishi mumkin. Ekzogenlarga, xususan, yuqori harorat va agressiv kimyoviy birikmalar ta’siri (kuyish), virusli va bakterial yuqumli agentlar hamda mexanik shikastlanishlar kiradi. Terining zararlanishi ko‘pincha hasharotlar chaqqanida toksinlarning ta’siri, shuningdek, hayvonlar chaqqanidan keyin infeksiyalanish oqibati hisoblanadi.Endogen (ichki) omillar qatoriga yuqumli va yallig‘lanish genezli umumiy kasalliklar, shuningdek, asab, ovqat hazm qilish va yurak-qon tomir tizimi patologiyalari kiradi.

Dermatozlarning anchagina qismi rivojlanishiga a’zolar funksional faolligining o‘zgarishi va metabolizmning (modda almashinuvi jarayonlarining) buzilishi sabab bo‘ladi. Immun tizimining holati ham katta ahamiyatga ega. Teri patologiyalari ko‘pincha qon yaratish tizimi kasalliklari bilan birga keladi. Ekssudativ eritema, shuningdek, qichimali dermatoz va eshakyemi bemor organizmida surunkali infeksion o‘choqlar (shu jumladan, kasal tishlar) mavjudligining bevosita oqibati bo‘lishi mumkin.Moddalar almashinuvi jarayonlarining buzilishi va immunitet tizimining o‘ta reaktivligi natijasida bullyoz (pufakli) dermatozlar, shuningdek, eshakyemi ko‘rinishidagi terining allergik shikastlanishlari rivojlanadi. Kattalarda qichishadigan dermatozlar, shular jumlasiga neyrodermit ham kiradi, tez-tez ro‘y berib turadigan psixoemotsional zo‘riqishlar (stresslar) tufayli nerv sistemasi ishining izdan chiqishi oqibati bo‘lishi mumkin.

Ba’zi dermatozlarning belgilari butun hayot davomida namoyon bo‘ladi (surunkali dermatozlar), bir qator kasalliklar esa vaqtinchalik xususiyatga ega bo‘lib, organizmning endokrin va immun tizimlarining qayta qurilishi bilan bog‘liq (xususan, homiladorlar dermatozi). Bolalar qichima dermatoziga bola organizmining ona qornida rivojlanish davridayoq zaharlanishi sabab bo‘lishi mumkin. Go‘daklarda bir qancha hollarda qo‘tir dermatozi aniqlanib, asosan yuz va qo‘l-oyoq terisi zararlanadi. Organizmda gormonal o‘zgarishlar faol kechayotgan o‘smirlik davri uchun seboreya va husnbuzar toshmalari (akne) paydo bo‘lishi xosdir. Keksa yoshdagi bemorlarda, odatda, virus etiologiyali dermatozlar, shuningdek, tabiiy qarish jarayonlari tufayli terining yupqalashishi kuzatiladi. Har qanday yoshda organizm reaktivligining pasayishi fonida (ya’ni immunitet susayganida) terining zararlanishi rivojlanishi mumkin.

Homiladorlik va emizish davrida

Homilador ayollarda DIPNOVET preparatini mahalliy qo‘llash ona uchun taxmin qilinayotgan foyda homila uchun xavfdan yuqori bo‘lgan hollarda ruxsat etiladi. Bunday hollarda preparatni qo‘llash qisqa muddatli bo‘lishi va teri qoplamining kichik qismlari bilan cheklanishi kerak. Emizish davrida DIPNOVET preparatini qat’iy ko‘rsatmalar bo‘yicha qo‘llash mumkin, lekin bunda preparatni emizishdan oldin sut bezi terisiga surtish mumkin emas.

Dorilarning o‘zaro ta’siri

Sirtga qo‘llash uchun mo‘ljallangan DIPNOVET surtmasining boshqa dori vositalari bilan o‘zaro ta’siri aniqlanmagan.

Saqlash shartlari

Quruq, yorug‘likdan himoyalangan joyda +25 °S dan yuqori bo‘lmagan haroratda saqlanadi. Bolalar qo‘li yetmaydigan joyda saqlanadi!

Yaroqlilik muddati

Ishlab chiqarilgan sanadan boshlab 3 yil. Yaroqlilik muddati tugagandan keyin ishlatilmasin.

Chiqarish shakli

Sirtga surtish uchun surtma; epoksid lok bilan qoplangan va membrana hamda polietilen vintli qalpoqcha bilan berkitilgan alyuminiy tubalarda 20 g dan surtma; karton qutida qo‘llash bo‘yicha yo‘riqnoma bilan birga 1 ta tuba.

Ishlab chiqaruvchi

Brassica Pharma Pvt. Ltd, Hindiston.