Platifillin

Tarkib

faol modda: platifillin gidrotartrat - 2,0 g;

yordamchi moddalar: inyeksiya uchun suv.

Tavsif

Rangsiz tiniq suyuqlik.

Dori shakli

Inyeksiya uchun eritma 0,2% 1 ml N10 (ampulalar).

Farmakologik ta’siri

M-xolinoretseptorlar blokatori. Atropinga nisbatan periferik m-xolinoretseptorlarga kamroq ta’sir ko‘rsatadi (oshqozon-ichak trakti a’zolarining silliq mushak hujayralariga va rangdor pardaning sirkulyar mushagiga ta’siri bo‘yicha atropinga nisbatan 5-10 marta kuchsizroq). M-xolinoretseptorlarni bloklab, postganglionar xolinergik nervlardan ular innervatsiya qiladigan effektor a’zo va to‘qimalarga (yurak, silliq mushak a’zolari, tashqi sekretsiya bezlari) nerv impulslarining o‘tishini buzadi; n-xolinoretseptorlarni ham susaytiradi (ancha kuchsizroq). Xolinobloklovchi ta’sir ko‘proq vegetativ nerv tizimining parasimpatik qismi tonusining oshishi yoki m-xolinstimulyatorlar ta’siri fonida namoyon bo‘ladi.

Atropinga qaraganda kamroq darajada, ayniqsa yuqori dozalarda qo‘llanganda, taxikardiya chaqiradi. N.vagus ta’sirini kamaytirib, yurak o‘tkazuvchanligini yaxshilaydi, miokard qo‘zg‘aluvchanligini oshiradi, daqiqalik hajmini oshiradi. To‘g‘ridan-to‘g‘ri miotrop spazmolitik ta’sir ko‘rsatadi, terining mayda tomirlarini kengaytiradi. Yuqori dozalarda tomirlarni harakatlantiruvchi markazni susaytiradi va simpatik gangliyalarni bloklaydi, natijada tomirlar kengayadi va AB pasayadi (asosan v/i yuborilganda). Atropin ichki sekretsiya bezlari sekretsiyasini kuchsizroq susaytiradi; silliq mushaklar tonusini, oshqozon, o‘n ikki barmoqli ichak, ingichka va yo‘g‘on ichak peristaltik qisqarishlari amplitudasi va chastotasini sezilarli darajada pasaytiradi, o‘t pufagi tonusini o‘rtacha pasaytiradi (o‘t yo‘llari giperkineziyasi bo‘lgan shaxslarda); gipokineziyada - o‘t pufagi tonusi normal holatgacha ko‘tariladi. Bachadon, qovuq va siydik yo‘llarining silliq mushaklarini bo‘shashtiradi; spazmolitik ta’sir ko‘rsatib, og‘riq sindromini bartaraf etadi. N.vagus tonusining oshishi yoki xolinstimulyatorlar tufayli yuzaga kelgan bronxlarning silliq mushaklarini bo‘shashtiradi, nafas hajmini oshiradi, bronxial bezlar sekretsiyasini susaytiradi; sfinkterlar tonusini pasaytiradi.

Ko‘zning konyunktiva xaltasiga tomizilganda va parenteral yuborilganda rangdor pardaning doiraviy mushagi bo‘shashishi natijasida qorachiqning kengayishiga sabab bo‘ladi. Bir vaqtning o‘zida ko‘z ichi bosimi ko‘tariladi va akkomodatsiya falaji (kiprikli tana kiprikli mushagining bo‘shashishi) yuzaga keladi. Atropinga nisbatan akkomodatsiyaga ta’siri kamroq va qisqaroq bo‘ladi. Bosh miya va nafas olish markazini, ko‘proq orqa miyani qo‘zg‘atadi (yuqori dozalarda tutqanoqlar, markaziy asab tizimi, qon tomir va nafas olish markazlarining susayishi mumkin). GEB orqali kiradi.

Farmakokinetika

Ichga qabul qilingandan so‘ng MIYdan yaxshi so‘riladi. Gidrolizga uchrab, platinetsin va platinetsin kislotasini hosil qiladi.

Ko‘rsatmalar

Oshqozon va o‘n ikki barmoqli ichak yara kasalligi, pilorospazm, xoletsistit, xolelitiaz, ichak sanchig‘i, buyrak sanchig‘i, o‘t sanchig‘i; bronxial astma (bronxo- va laringospazmning oldini olish uchun), bronxoreya; algodismenoreya; serebral arteriyalar spazmi; angiotrofonovroz; arterial gipertenziya, stenokardiya (kombinatsiyalangan terapiya tarkibida).

Diagnostika maqsadida ko‘z qorachig‘ining kengayishi (shu jumladan ko‘z tubini tekshirish, ko‘zning haqiqiy refraksiyasini aniqlash); ko‘zning o‘tkir yallig‘lanish kasalliklari (shu jumladan irit, iridotsiklit, keratit), ko‘z jarohatlari.

Qo‘llash usuli va dozalari

Teri ostiga yuboriladi. 0,002-0,004 g dan (1-2 ml 0,2% li eritmasi) o‘tkir yara og‘riqlarini hamda ichak, jigar va buyrak og‘riqlarini qoldirish uchun teri ostiga yuboriladi. Davolash kursiga (10-20 kun) teri ostiga 1-2 ml 0,2% li eritma yuboriladi.

Yangi tug‘ilgan chaqaloqlar va ko‘krak yoshidagi bolalarga 0,035 mg/kg (0,0175 ml/kg).

15 yoshli bolalarga 0,03 mg/kg (0,015 ml/kg).

6-10 yoshli bolalarga 0,025 mg/kg (0,0125 ml/kg).

11-14 yoshli bolalarga 0,02 mg/kg (0,01 ml/kg).

Nojo‘ya ta’sirlari

Ovqat hazm qilish tizimi tomonidan: og‘iz qurishi, chanqash, ichak atoniyasi.

Yurak-qon tomir tizimi tomonidan: AB pasayishi, taxikardiya.

MNT va periferik nerv tizimi tomonidan: MNT qo‘zg‘alishi, bosh aylanishi, qorachiqlarning kengayishi, akkomodatsiya falaji, bosh og‘rig‘i, fotofobiya, talvasalar, o‘tkir psixoz.

Siydik ajratish tizimi tomonidan: siydik ajralishining qiyinlashishi, siydik tutilishi.

Boshqalar: o‘pka atelektazi.

Nojo‘ya ta’sirlar platifillinning yuqori dozalarida ko‘proq uchraydi.

Qarshi ko‘rsatmalar

Platifillinga yuqori sezuvchanlik.

Maxsus shartlar

Yurak-qon tomir tizimi kasalliklari bilan og‘rigan bemorlarda ehtiyotkorlik bilan qo‘llaniladi, bunda yurak urish tezligining oshishi nomaqbul bo‘lishi mumkin: hilpillovchi aritmiya, taxikardiya, surunkali yurak yetishmovchiligi, YUIK, mitral stenoz, arterial gipertenziya, o‘tkir qon ketish; tireotoksikozda (taxikardiyaning kuchayishi mumkin); yuqori haroratda (ter bezlari faolligining pasayishi natijasida yana ko‘tarilishi mumkin); reflyuks-ezofagitda, reflyuks-ezofagit bilan birga keladigan diafragmaning qizilo‘ngach teshigi churrasida (qizilo‘ngach va me’da motorikasining pasayishi va pastki qizilo‘ngach sfinkterining bo‘shashishi me’daning bo‘shashishini sekinlashtirishi va funksiyasi buzilgan sfinkter orqali gastroezofageal reflyuksning kuchayishiga olib kelishi mumkin); ichak tutilishi bilan kechuvchi oshqozon-ichak trakti kasalliklarida - qizilo‘ngach axalaziyasi, darvoza stenozi (me’daning tutilishi va me’da tarkibining ushlanib qolishiga olib keladigan motorika va tonusning pasayishi

Bolalarda qo‘llanilishi

Kichik yoshdagi bolalarda o‘pkaning surunkali kasalliklarida (bronxial sekretsiyaning kamayishi sekretning quyuqlashishiga va bronxlarda tiqinlar hosil bo‘lishiga olib kelishi mumkin); bolalarda miya shikastlanishida (MNS tomonidan ta’sirlar kuchayishi mumkin); Daun kasalligida (ko‘z qorachiqlarining g‘ayritabiiy kengayishi va yurak urish tezligining oshishi mumkin), bolalar serebral falajida (antixolinergik vositalarga reaksiya eng kuchli bo‘lishi mumkin).

Homiladorlik va emizish davrida

Homiladorlik va emizish davrida platifillinni qo‘llashning xavfsizligi to‘g‘risida ma’lumotlar yo‘q.

Avtotransport va mexanizmlarni boshqarish qobiliyatiga ta’siri

Yuqori diqqat va psixomotor reaksiyalar tezligini talab qiladigan potensial xavfli faoliyat turlaridan tiyilish zarur.

Dorilarning o‘zaro ta’siri

Shizofreniya bilan og‘rigan bemorlarda galoperidol bilan bir vaqtda qo‘llanganda, antipsixotik ta’sir pasayishi mumkin.

Platifillin prozerin antagonistidir.

Bir vaqtning o‘zida qo‘llanilganda fenobarbital, etaminal natriy, magniy sulfatning uxlatuvchi ta’siri davomiyligi uzayadi.

Boshqa m-xolinoblokatorlar, shuningdek, m-xolinobloklovchi faollikka ega bo‘lgan preparatlar (shu jumladan, amantadin, galoperidol, fenotiazin, MAO ingibitorlari, tritsiklik antidepressantlar, ba’zi antigistamin vositalar) bilan bir vaqtda qo‘llanilganda nojo‘ya ta’sirlar rivojlanish xavfi ortadi.

Morfin platifillinning yurak-qon tomir tizimiga susaytiruvchi ta’sirini kuchaytiradi.

MAO ingibitorlari bilan bir vaqtda qo‘llanilganda ijobiy xrono- va batmotrop ta’sir; yurak glikozidlari bilan - ijobiy batmotrop ta’sir kuzatiladi.

Silliq mushaklar spazmi bilan bog‘liq og‘riqlarda platifillinning ta’sirini analgetiklar, sedativ va anksiolitik vositalar, tomir spazmlarida esa gipotenziv va sedativ vositalar kuchaytiradi.

Chiqarish shakli

P/k yuborish uchun eritma 0,2%.

Ishlab chiqaruvchi

Biopharm, Gruziya