Toniap

Tarkib

Bir ampula (1 ml eritma) quyidagilarni o‘z ichiga oladi:

faol modda: metilkobalamin - 500 mkg;

yordamchi moddalar - benzil spirti, natriy xlorid, inyeksiya uchun suv.

Dori shakli

1 ml inyeksiya uchun eritma kahrabo shishadan yasalgan ampulada. Qadoqda №10 ta (2x5), 5 tadan ampula konturli yacheykali qadoqning yuqori qismi folga bilan qoplanadi va qo‘llash bo‘yicha yo‘riqnoma ilova qilingan karton qutiga joylashtiriladi.

Farmakodinamika

Metilkobalamin - almashtirib bo‘lmaydigan suvda eriydigan B vitamini bo‘lib, u B12 vitamini sifatida ham tanilgan. B12 vitamini yadro oqsili va miyelin sintezi, hujayralarning ko‘payishi, normal o‘sishi va normal eritropoez uchun zarur. Vitamin B12 metilmalonatning suksinatga aylanishida va gomotsisteindan metionin sintezida almashtirib bo‘lmaydigan koferment B12 ga aylanadi. Vitamin B12 yog‘lar, uglevodlar metabolizmi va oqsil sintezida ishtirok etuvchi fermentlar uchun zarur bo‘lgan aminoglikozidlar, polimiksin, tetratsiklinlar, salitsilatlar, epilepsiyaga qarshi sulfgidril guruhlarini tiklangan shaklda saqlashda ishtirok etadi. B12 vitamini folat kislotasi sintezida ishtirok etadi, shuning uchun metilkobalaminning yetishmasligi uning yetishmovchiligiga olib keladi. B12 vitamini gomotsisteinning metioninga demetillanishida muhim rol o‘ynaydi. Gomotsisteinning yuqori darajasi har doim endoteliy hujayralarining shikastlanish xavfining oshishi, azot oksidi faolligining pasayishi hisobiga endoteliy-vazodilyatatsiyaning buzilishi, past zichlikdagi lipoproteinlar (PZLP) oksidlanishi va arterial to‘planishining kuchayishi, trombotsitlar adgeziyasining kuchayishi va qon ivish kaskadlarining faollashishi bilan bog‘liq. Vitamin va folat kislotasi bir vaqtning o‘zida qabul qilinganda, uning och qoringa gomotsistein darajasini pasaytirishga nisbatan kichik qo‘shimcha ta’siri kuzatiladi, ammo bu faqat B12 vitamini yetishmovchiligi bo‘lgan odamlarda kuzatilishi mumkin. Gomotsistein konsentratsiyasining oshishi boshqa sabablarga ham bog‘liq bo‘lishi mumkin, masalan, kognitiv funksiyaning pasayishi, xotiraning pasayishi, Alsgeymer kasalligi va qon tomir demensiyasi. B12 vitaminining metilkobalamin shakli ham melatonin darajasiga ta’sir qilishi mumkin. Ehtimol, melatoninga ta’siri tufayli metilkobalamin normal uyquga ega odamlarda diqqat-e’tiborni oshirishi va uyqu vaqtini qisqartirishi mumkin.

Farmakokinetika

Qonda B12 vitamini uni to‘qimalarga tashiydigan I va II transkobalaminlar bilan bog‘lanadi. Asosan jigarda to‘planadi. Plazma oqsillari bilan bog‘lanishi - 90%. Teri ostiga va mushak orasiga yuborilgandan keyin maksimal konsentratsiyasi - 1 soatdan keyin. Jigardan o‘t bilan ichakka chiqariladi va yana qonga so‘riladi. Yarim chiqarilish davri - 500 kun. Buyraklar funksiyasi normal bo‘lganda - 7-10% buyraklar orqali, taxminan 50% - najas massasi bilan; buyraklar funksiyasi pasayganda - 0-7% buyraklar orqali, 70-100% - najas massasi bilan chiqariladi. Yo‘ldosh to‘sig‘i, ko‘krak suti orqali o‘tadi.

Ko‘rsatmalar

Sianokobalamin yetishmovchiligi bilan kechuvchi surunkali kamqonliklar (Addison-Birmer kasalligi, alimentar makrotsitar kamqonlik), shuningdek, temir tanqisligi, postgemorragik va aplastik kamqonliklar, toksik moddalar va/yoki dori vositalari keltirib chiqargan kamqonliklarni kompleks davolashda.

Surunkali gepatit, jigar sirrozi, jigar yetishmovchiligi va o‘tkir nur kasalligini davolashda kompleks terapiyada.

Nerv tizimi kasalliklari: polinevritlar, radikulitlar, kauzalgiyalar va nevralgiyalar (shu jumladan, uch shoxli nerv nevriti), yon amiotrofik skleroz, periferik nervlar jarohatlari, funikulyar miyeloz, bolalar serebral falaji, Daun kasalligi.

Teri kasalliklari: psoriaz, fotodermatoz, gerpetiform dermatit, atopik dermatit

Profilaktika maqsadida - biguanidlar, paraaminosalitsil kislotasi, yuqori dozalarda askorbin kislotasi buyurilganda, sianokobalamin so‘rilishi buzilgan oshqozon va ichak patologiyalarida (oshqozon, ingichka ichak qismining rezeksiyasi, Kron kasalligi, seliakiya, malabsorbsiya sindromi, spru).

Nojo‘ya ta’sirlari

Gematologik buzilishlar: giperkoagulyatsiya.

Markaziy asab tizimi tomonidan: kamdan-kam hollarda - qo‘zg‘alish holati, bosh og‘rig‘i, bosh aylanishi.

Yurak-qon tomir tizimi tomonidan: kamdan-kam hollarda - kardialgiya, taxikardiya.

Allergik reaksiyalar: kamdan-kam hollarda - eshakem, toshma, qichishish, anafilaktik shok, Kvinke shishi.

Mahalliy reaksiyalar: og‘riq, kamdan-kam hollarda inyeksiya joyida zichlashish va nekroz.

Boshqalar: akne, bullyoz toshma, ekzema, shishlar, ko‘ngil aynishi, terlash, holsizlik, isitma, diareya, siydikning qizil rangga kirishi (vitamin B12 ekskretsiyasi hisobiga), yuqori dozalarda qo‘llanilganda - giperkoagulyatsiya, purin almashinuvining buzilishi.

Maxsus shartlar

V12 vitamini tanqisligi dori vositasini tayinlashdan oldin diagnostik jihatdan tasdiqlanishi kerak, chunki u folat kislotasi yetishmovchiligini yashirishi mumkin. Mekobalamin bilan davolashda hujayra tarkibi va qon ivishini muntazam ravishda nazorat qilish kerak: davolashning 5-8-kunida retikulotsitlar soni, temir konsentratsiyasi aniqlanadi. Eritrotsitlar soni, gemoglobin va rang ko‘rsatkichi 1 oy davomida haftasiga 1-2 marta, keyin esa oyiga 2-4 marta nazorat qilinishi kerak. Remissiyaga eritrotsitlar soni 4-4,5 mln/mkl gacha oshganda, eritrotsitlar normal o‘lchamga kelganda, anizo- va poykilotsitoz yo‘qolganda, retikulotsitar krizdan keyin retikulotsitlar soni normallashganda erishiladi. Gematologik remissiyaga erishilgandan so‘ng periferik qon nazorati 4-6 oyda kamida 1 marta o‘tkaziladi.

Tromb hosil bo‘lishiga moyil, stenokardiya bilan og‘rigan shaxslarda ehtiyotkorlikka rioya qilish lozim (dozalar kamaytirilishi kerak, har bir inyeksiya uchun 100 mkg dan oshmasligi kerak).

Tavsiya etilgan dozalarda qariyalarda qo‘llanilganda, yuqorida sanab o‘tilganlardan tashqari, nojo‘ya ta’sirlar kuzatilmadi.

Yurak-qon tomir kasalliklari bilan og‘rigan bemorlarda ehtiyotkorlik bilan qo‘llash zarur. Koronar stentlashdan so‘ng, folat kislotasi, B6 vitamini va B12 vitaminining vena ichiga yuklama dozalari va keyinchalik har kuni og‘iz orqali qo‘llash restenoz (qon tomirlarining qayta torayishi) xavfini oshirishi aniqlandi. Shuning uchun, potensial zarar tufayli, ushbu vitaminlar kombinatsiyasi koronar stentlari bo‘lgan bemorlarga tavsiya etilishi mumkin emas.

Qarshi ko‘rsatmalar

Preparat komponentlariga yuqori sezuvchanlik, tromboemboliya, eritremiya, eritrotsitoz, homiladorlik (yuqori dozalarda B guruhi vitaminlarining mumkin bo‘lgan teratogen ta’siri haqida alohida ko‘rsatmalar mavjud), laktatsiya davri, ushbu dori shakli uchun 3 yoshgacha bo‘lgan bolalar.

Leber kasalligi, nikotin ambliopiyasi (ko‘ruv nervining neyrodegenerativ zararlanishi xavfini oshiradi).

Zo‘riqish stenokardiyasi III FS, xavfsiz va xavfli o‘smalar (megaloblastik kamqonlik va B12 vitamini tanqisligi bilan kechadigan holatlardan tashqari), tromb hosil bo‘lishiga moyillik.

Dorilarning o‘zaro ta’siri

Askorbin kislota, og‘ir metallar tuzlari (sianokobalamin inaktivatsiyasi), tiamin bromid, piridoksin, riboflavin bilan mos kelmaydi (chunki sianokobalamin molekulasidagi kobalt ioni boshqa vitaminlarni parchalaydi).

Aminoglikozidlar, polimiksin, tetratsiklinlar, salitsilatlar, tutqanoqqa qarshi dori vositalari, kolxitsin, kaliy preparatlari so‘rilishni kamaytiradi. Mekobalamin tiamin chaqirgan allergik reaksiyalar rivojlanishini kuchaytiradi.

Qon ivishini kuchaytiruvchi dorilar bilan birga qo‘llash mumkin emas. Peroral kontratseptivlar - qonda sianokobalamin konsentratsiyasini pasaytiradi.

Qo‘llash usuli va dozalari

Sianokobalamin teri ostiga, muskullar orasiga, venaga, funikulyar miyelozda, yon amiotrofik sklerozda esa intralyumbal yuboriladi.

Kattalar

Teri ostiga Addison-Birmer kamqonligida - kunora 100-200 mkg/sut; funikulyar miyelozda, asab tizimi faoliyati buzilgan makrositar kamqonliklarda - 400-500 mkg/sut birinchi haftada - har kuni, keyin 5-7 kungacha yuborish oralig‘ida (bir vaqtning o‘zida folat kislotasi buyuriladi); remissiya davrida qo‘llab-quvvatlovchi doza 100 mkg/sut oyiga 2 marta, nevrologik hodisalar mavjud bo‘lganda - 200-400 mkg 2-4 marta.

O‘tkir postgemorragik va temir tanqisligi kamqonligida - 30‒100 mkg dan haftasiga 2-3 marta, aplastik kamqonlikda - 100 mkg dan klinik-gematologik yaxshilanishgacha.

Markaziy va periferik asab tizimi kasalliklarida og‘riq sindromi bartaraf etilgunga qadar 200-500 mkg/sut, so‘ngra 2 hafta davomida 100 mkg/sut.

Periferik asab tizimining travmatik shikastlanishlarida - 40-45 kun davomida kunora 200-400 mkg.

Gepatit va jigar sirrozida - kuniga 30-60 mkg yoki kunora 100 mkg dan 25-40 kun davomida.

O‘tkir nur kasalligida, diabetik nevropatiyada - 60-100 mkg kuniga 20-30 kun davomida.

Funikulyar miyelozda, yon amiotrofik sklerozda, tarqoq sklerozda - intralyumbal 15-30 mkg dan va har bir keyingi inyeksiyada doza oshiriladi (50 mkg, 100 mkg, 150 mkg, 200 mkg). Intralyumbal inyeksiyalar har 3 kunda qilinadi, bir kurs uchun jami 8-10 ta inyeksiya zarur.

Mekobalamin tanqisligini bartaraf etish uchun mushak orasiga yoki vena ichiga yuboriladi: davolash uchun 1-2 hafta davomida har kuni 1 mg dan, qo‘llab-quvvatlovchi doza 1-2 mg haftasiga 1 martadan oyiga 1 martagacha; profilaktika uchun - 1 mg oyiga 1 marta. Davolashning davomiyligi individual belgilanadi.

Bolalar

Teri ostiga 1 mkg/kg dozada yuboriladi, maksimal sutkalik doza - 100 mkg.

Alimentar kamqonlik va chala tug‘ilgan chaqaloqlardagi kamqonliklarda - 15 kun davomida har kuni teri ostiga 30 mkg, aplastik kamqonlikda - klinik-gematologik yaxshilanish boshlangunga qadar 100 mkg.

Kasalliklardan keyingi distrofik holatlarda, Daun kasalligi va bolalar serebral falajida - kunora teri ostiga 15-30 mkg. Dozalar va qo‘llash tartibi patologiyaga bog‘liq bo‘lib, kuniga 30 mkg dan 100 mkg gacha o‘zgarib turadi.

Dozani oshirib yuborish

Terapevtik dozalarda sianokobalamin qo‘llanilganda dozaning oshirib yuborilishi haqida xabar berilmagan. Doza oshirib yuborilganda quyidagilar yuz berishi mumkin:

Simptomlari: o‘pka shishi, dimlangan yurak yetishmovchiligi, periferik tomirlar trombozi; kamroq hollarda - anafilaktik shok.

Davolash: simptomatik.

Homiladorlik va emizish davrida

Mekobalaminni homiladorlik davrida (V12 vitaminining yuqori dozalarida mumkin bo‘lgan teratogen ta’siri haqida alohida ma’lumotlar mavjud) va emizish davrida qo‘llash mumkin emas.

Ishlab chiqaruvchi

NovaMed Pharmaceuticals Pvt. Ltd., Pokiston.