Диклофенак-Акос гель д/наруж. прим. по 100 г (туба)

Tarkib

100 g uchun:

Ta’sir etuvchi modda: diklofenak natriy - 5,0 g.

Yordamchi moddalar: etanol (96% li spirt), propilenglikol, gidroksietilsellyuloza (gietelloza, natrosol), lavanda moyi, tozalangan suv.

Tavsif

Bir xil, rangsiz yoki sarg‘ish tusli, o‘ziga xos hidli tiniq gel. Opalessensiya va havo pufakchalari bo‘lishiga ruxsat etiladi.

Chiqarish shakli

Sirtga qo‘llash uchun gel, 5%.

Farmakoterapevtik guruh

YAQNDV. Diklofenak. ATX kodi: M02AA15.

Farmakologik xususiyatlari

Farmakodinamika

Faol komponent diklofenak - yallig‘lanishga qarshi nosteroid preparat bo‘lib, kuchli og‘riq qoldiruvchi, yallig‘lanishga qarshi va isitmani tushiruvchi xususiyatlarga ega. 1 va 2-turdagi siklooksigenazani tanlamasdan so‘ndirib, araxidon kislotasi metabolizmini buzadi. Diklofenak travmatik yoki revmatik kelib chiqishga ega bo‘lgan bo‘g‘imlar, mushaklar va boylamlardagi og‘riq sindromi va yallig‘lanishni bartaraf etish uchun qo‘llaniladi, yallig‘lanish jarayoni bilan bog‘liq og‘riq va shishni kamaytirishga yordam beradi, bo‘g‘imlarning harakatchanligini oshiradi.

Diklofenak-AKOS o‘zining suv-spirtli asosi tufayli tinchlantiruvchi va sovituvchi ta’sir ko‘rsatadi.

Farmakokinetika

Absorbsiya

Teri orqali so‘riladigan diklofenak miqdori ishlov beriladigan yuza maydoniga mutanosib bo‘lib, surtiladigan preparatning umumiy dozasiga ham, terining gidratatsiya darajasiga ham bog‘liq bo‘ladi. Terining 500 sm2 maydoniga 2,5 g diklofenak surtilgandan so‘ng, diklofenak tabletkalariga nisbatan surtilgan diklofenak dozasining taxminan 6% i so‘riladi.

Taqsimlash

Zararlangan bo‘g‘im sohasiga diklofenak surtilganda uning plazma, sinovial parda va sinovial suyuqlikdagi konsentratsiyasi o‘lchandi. Plazmada maksimal konsentratsiyalar diklofenakning xuddi shu miqdorini og‘iz orqali yuborilgandan keyin taxminan 100 baravar past bo‘ldi. Diklofenakning 99,7% plazma oqsillari, asosan albuminlar bilan bog‘lanadi (99,4%).

Diklofenak faol moddaning to‘qimalarga chiqishini amalga oshiruvchi rezervuar rolini o‘ynaydigan teri qatlamlarida to‘planadi.

Diklofenak asosan qon oqimida emas, balki yallig‘lanishga moyil to‘qimalarda (masalan, bo‘g‘imlarda) chuqur taqsimlanadi va ushlanib qoladi. Diklofenakning to‘qimadagi konsentratsiyasi plazmadagiga qaraganda 20 martagacha yuqori.

Metabolizm

Diklofenakning metabolizmi qisman o‘zgarmagan molekulaning glyukuronizatsiyasi orqali, lekin asosan bir martalik va ko‘p martalik gidroksillanish orqali amalga oshadi, bu esa bir nechta fenol metabolitlarining hosil bo‘lishiga olib keladi, ularning aksariyati glyukuronid kon’yugatlariga aylanadi. Ikkita fenol metaboliti biologik faol, ammo diklofenakka qaraganda ancha past darajada.

Chiqarish

Diklofenakning umumiy tizimli plazma klirensi 263±56 ml/daqiqani tashkil etadi. Oxirgi yarim chiqarilish davri 1-2 soatni tashkil etadi.

Metabolitlarning, shu jumladan ikkita farmakologik faol metabolitning yarim chiqarilish davri ham qisqa bo‘lib, 1-3 soatni tashkil etadi. Metabolitlardan biri (3’-gidroksi-4’-metoksidiklofenak) uzoqroq yarim chiqarilish davriga ega, ammo bu metabolit butunlay faol emas. Diklofenak va uning metabolitlarining ko‘p qismi siydik bilan chiqariladi.

Buyrak va jigar yetishmovchiligi bo‘lgan bemorlar

Diklofenak va uning metabolitlarining to‘planishi buyrak yetishmovchiligidan aziyat chekayotgan bemorlarda kutilmaydi. Surunkali gepatit yoki kompensatsiyalanmagan jigar sirrozi bilan og‘rigan bemorlarda diklofenakning kinetikasi va metabolizmi jigar kasalliklari bo‘lmagan bemorlarniki bilan bir xil.

Ko‘rsatmalar

Umurtqa pog‘onasining yallig‘lanish va degenerativ kasalliklarida bel og‘rig‘i (radikulit, osteoartroz, lyumbago, ishias);

osteoartrozda bo‘g‘imlardagi og‘riqlar (qo‘l barmoqlari, tizza bo‘g‘imlari va boshqalar);

mushaklardagi og‘riqlar (cho‘zilish, zo‘riqish, lat yeyish, jarohatlar natijasida);

jarohatlar natijasida va revmatik kasalliklarda (tendovaginit, bursit, periartikulyar to‘qimalarning shikastlanishi, bilak-kaft sindromi) yumshoq to‘qimalar va bo‘g‘imlarning yallig‘lanishi hamda shishishi.

Qarshi ko‘rsatmalar

Diklofenak yoki preparatning boshqa tarkibiy qismlariga yuqori sezuvchanlik; atsetilsalitsil kislotasi yoki boshqa nosteroid yallig‘lanishga qarshi dorilar qo‘llanilganda bronxial astma xurujlari, Kvinke shishi, eshakemi yoki o‘tkir rinitlar paydo bo‘lishiga moyillik; 20 haftadan ortiq homiladorlik; emizikli davr; bolalik davri (12 yoshgacha); mo‘ljallangan surtish joyida teri butunligining buzilishi.

Ehtiyotkorlik bilan

Jigar porfiriyasi (zo‘rayishi), oshqozon-ichak traktining eroziv-yarali shikastlanishlari, jigar va buyrak faoliyatining og‘ir buzilishlari, qon ivishining buzilishi (shu jumladan, gemofiliya, qon ketish vaqtining uzayishi, qon ketishga moyillik), surunkali yurak yetishmovchiligi, bronxial astma, keksa yosh, 20-haftagacha bo‘lgan homiladorlik.

Qo‘llash usuli va dozalari

Tashqarida.

Faqat teriga surtish uchun.

Kattalar va 12 yoshdan oshgan bolalarga sutkada 2 marta (har 12 soatda: yaxshisi ertalab va kechqurun) teriga yengil ishqalab surtiladi.

Preparatning kerakli miqdori og‘riqli sohaning o‘lchamiga bog‘liq. Preparatning bir martalik dozasi - 2-4 g (bu hajmi bo‘yicha mos ravishda olcha yoki yong‘oq o‘lchamiga teng va 400-800 sm2 maydonga ishlov berish uchun yetarli). Agar qo‘llar og‘riq joyi bo‘lmasa, u holda preparat surtilgandan so‘ng qo‘llar yuvilishi kerak. Preparat to‘liq quriguncha dush yoki vanna qabul qilmaslik kerak.

Davolashning davomiyligi ko‘rsatmalarga va kuzatilayotgan samaraga bog‘liq. Gel posttravmatik yallig‘lanishlarda va yumshoq to‘qimalarning revmatik kasalliklarida shifokor tavsiyasisiz 14 kundan ortiq qo‘llanilmasligi kerak. Agar 7 kunlik qo‘llashdan so‘ng terapevtik samara kuzatilmasa yoki holat yomonlashsa, og‘riqning muqobil sababini istisno qilish uchun shifokorga murojaat qilish lozim.

Nojo‘ya ta’sirlari

Nojo‘ya ta’sirlarning paydo bo‘lish chastotasi tasnifi: juda tez-tez (≥1/10), tez-tez (≥1/100, <1/10), tez-tez emas (≥1/1000, <1/100), kamdan-kam (≥1/10000, <1/1000), juda kamdan-kam (<1/10000), shu jumladan alohida xabarlar.

Yuqumli va parazitar kasalliklar

Juda kam hollarda: yiringchali toshma.

Immun tizimi tomonidan buzilishlar

Juda kam hollarda: yuqori sezuvchanlik reaksiyalari (shu jumladan eshakem), angionevrotik shish.

Nafas olish tizimi, ko‘krak qafasi a’zolari va ko‘ks oralig‘i buzilishlari

Juda kam hollarda: astma.

Teri va teri osti to‘qimalarining buzilishlari

Ko‘pincha: dermatit (jumladan, kontakt dermatit), toshma, eritema, ekzema, qichishish.

Kamdan-kam: bullyoz dermatit.

Juda kam hollarda: fotosensibilizatsiya reaksiyalari.

Agar yo‘riqnomada ko‘rsatilgan nojo‘ya ta’sirlarning birortasi kuchaysa yoki yo‘riqnomada ko‘rsatilmagan boshqa nojo‘ya ta’sirlarni sezsangiz, bu haqda shifokorga xabar bering.

Dozani oshirib yuborish

Gel surtilganda tizimli so‘rilish past bo‘lganligi sababli, dozani oshirib yuborish ehtimoli kam. Biroq, 2,5 g diklofenak natriyga teng bo‘lgan 50 g gel tasodifan ichilganda, tizimli nojo‘ya ta’sirlar rivojlanishi mumkin.

Sezilarli tizimli nojo‘ya ta’sirlarga olib keladigan tasodifiy yutishda, odatda nosteroid yallig‘lanishga qarshi dorilar bilan zaharlanishda qo‘llaniladigan umumiy terapevtik choralardan foydalanish kerak.

Tasodifan ichilganda dozani oshirib yuborishni davolash: oshqozonni yuvish, qusishni qo‘zg‘atish, faollashtirilgan ko‘mir, simptomatik terapiya. Dializ va tezlashtirilgan diurez diklofenakning qon plazmasi oqsillari bilan yuqori darajada bog‘lanishi (taxminan 99%) tufayli samarali emas.

O‘zaro aloqa

Preparatni boshqa YAQNDVlar bilan qo‘llash tavsiya etilmaydi.

Diklofenak fotosensibilizatsiyani chaqiruvchi dorilarning ta’sirini kuchaytirishi mumkin.

Boshqa dori vositalari bilan klinik ahamiyatga ega o‘zaro ta’siri tavsiflanmagan.

Maxsus ko‘rsatmalar

Diklofenak-AKOSni faqat shikastlanmagan teriga surtish kerak, ochiq jarohatlarga tegishdan saqlanish kerak. Preparatning og‘iz, ko‘z va shilliq pardalarga tushishiga yo‘l qo‘ymaslik, yutmaslik kerak.

Preparat surtilgandan so‘ng bintli bog‘lam qo‘yish mumkin, lekin havo o‘tkazmaydigan okklyuzion bog‘lamlar qo‘ymaslik kerak.

Preparat surtilgandan keyin teri toshmasi paydo bo‘lgan taqdirda, uni qo‘llashni to‘xtatish lozim.

Preparat tarkibida propilenglikol mavjud bo‘lib, u ba’zi odamlarda yengil mahalliy ta’sirlanishni keltirib chiqarishi mumkin.

Agar tashqi qo‘llash uchun diklofenak tavsiya etilganidan yuqori dozada yoki uzoqroq vaqt davomida qo‘llanilsa, tizimli nojo‘ya ta’sirlar (diklofenakning tizimli shakllaridan foydalanish bilan bog‘liq) yuzaga kelishi mumkinligini hisobga olish lozim.

Homiladorlik va laktatsiya

Homiladorlik

Homilador ayollarda Diklofenak-AKOS preparatini qo‘llash bo‘yicha ma’lumotlar yo‘qligi sababli, preparatni homiladorlik davrida qo‘llash mumkin emas.

Homiladorlikning 20-haftasidan boshlab ayollarga yangi tug‘ilgan chaqaloqlarda kamsuvlik va/yoki buyrak patologiyasi (neonatal buyrak disfunksiyasi) rivojlanishi mumkinligi sababli YAQNDV qo‘llanilmasligi kerak.

Hayvonlarda o‘tkazilgan tadqiqotlar homiladorlik, embrion va homilaning rivojlanishi, tug‘ruq yoki postnatal rivojlanishga bevosita yoki bilvosita salbiy ta’sir ko‘rsatmadi.

Emizish davri

Diklofenak tashqaridan qo‘llangandan keyin ona sutiga o‘tishi noma’lum, shuning uchun Diklofenak-AKOS preparatini emizish davrida qo‘llash tavsiya etilmaydi.

Agar preparatni qo‘llash zarur bo‘lsa, u holda uni sut bezlari sohasiga, tana yuzasining keng sohalariga surtish yoki uzoq vaqt davomida qo‘llash mumkin emas.

Transport vositalari va mexanizmlarini boshqarish qobiliyatiga ta’siri

Preparat transport vositalari va boshqa mexanizmlarni boshqarish qobiliyatiga ta’sir ko‘rsatmaydi.

Qadoq

30 g, 50 g, 100 g dan burab mahkamlangan polimer bushonli alyuminiy tubalarga solinadi.

Tibbiyotda qo‘llash bo‘yicha yo‘riqnoma yozilgan har bir tuba karton qutiga solinadi.

Saqlash shartlari

15 dan 25 °S gacha bo‘lgan haroratda.

Muzlatish mumkin emas.

Bolalar qo‘li yetmaydigan joyda saqlang.

Yaroqlilik muddati

3 yil.

Yaroqlilik muddati o‘tgandan keyin qo‘llanilmaydi.

Dorixonalardan berish shartlari

Retseptsiz

Ro‘yxatga olish guvohnomasi egasi

SINTEZ OAJ Rossiya

Ishlab chiqaruvchi

SINTEZ OAJ Rossiya