Farmazolin N (Farmazolinum) burun spreyi 1 mg/ml, 15 ml (shisha)

Tarkib

1 ml preparat tarkibida quyidagilar mavjud:

Ta’sir etuvchi modda: ksilometazolin gidroxlorid 100% moddaga hisoblaganda 1 mg.

Yordamchi moddalar: benzalkoniy xlorid; natriy xlorid; natriy digidrofosfat, digidrat; natriy gidrofosfat, dodekagidrat; inyeksiya uchun suv.

Tavsif

Tiniq, rangsiz suyuqlik.

Chiqarish shakli

Burun spreyi. Flakonda 15 yoki 20 ml dan. Qutida 1 flakon.

Farmakoterapevtik guruh

LOR a’zolari kasalliklarini davolash uchun vosita. ATX kodi: R01AA07.

Farmakologik xususiyatlari

Ksilometazolin simpatomimetik agent bo‘lib, α-adrenergik retseptorlarga ta’sir ko‘rsatadi.

Farmazolin N burun shilliq qavati, uning yondosh bo‘shliqlari shishini kamaytirib, burun qon tomirlarining torayishiga olib keladi va shu tariqa burun va yondosh bo‘shliqlar bitib qolganida burun orqali nafas olishni yaxshilaydi.

Preparatning ta’siri qo‘llanilgandan bir necha daqiqa o‘tgach boshlanadi va 12 soatgacha davom etadi.

Preparat yaxshi o‘zlashtiriladi, shu jumladan sezgir shilliq qavati bo‘lgan bemorlarda ham. Preparat mukotsiliar funksiyani pasaytirmaydi. Farmazolin N burun bo‘shlig‘iga xos bo‘lgan chegaralarda muvozanatli pH qiymatiga ega.

Mahalliy qo‘llanilganda ksilometazolinning qon plazmasidagi konsentratsiyasi shunchalik kichikki, ularni zamonaviy analitik usullar bilan aniqlab bo‘lmaydi.

Qo‘llanilishi

Shamollash, pichan isitmasi, allergik rinitlar, sinusitlarda burun bitishini simptomatik davolash.

Burun yondosh bo‘shliqlari kasalliklarida sekret oqishini yengillashtirish uchun.

O‘rta otit holatlarida yordamchi terapiya (shilliq qavat shishini yo‘qotish uchun).

Rinoskopiya o‘tkazishni osonlashtirish uchun.

Qo‘llash usuli va dozalari

Kattalar va 6 yoshdan oshgan bolalarga har bir burun teshigiga sutkasiga 3-4 marta 1 tadan inyeksiya qilish buyuriladi. Maksimal sutkalik doza - 4 ta inyeksiya. Davolash davomiyligi kasallikning kechishiga bog‘liq bo‘lib, ketma-ket 10 kundan oshmasligi kerak.

Bevosita qo‘llashdan oldin preparat solingan flakonni kaftda ushlab, tana haroratigacha isitish kerak. Preparatni qo‘llash vaqtida flakonni vertikal holatda, purkagichni yuqoriga qaratib ushlang. Qo‘llashdan oldin flakonning himoya qopqog‘ini yechib, uchini burun yo‘liga joylashtirib, qisqa keskin harakat bilan flakonni siqish va uchini burundan chiqarib, ochish kerak. Inyeksiya vaqtida burun orqali yengil nafas olish tavsiya etiladi. Preparatni ishlatgandan so‘ng, flakonni himoya qopqog‘i bilan yoping va yo‘riqnomada ko‘rsatilgan tavsiyalarga muvofiq saqlang.

Nojo‘ya ta’sirlari

Burun yoki tomoqda achishish hissi, burunda og‘riq, sanchish, mahalliy ta’sirlanish, burun shilliq qavatining qichishi yoki qurishi, aksirish, ko‘zning qichishi kuzatilishi mumkin. Uzoq vaqt qo‘llanilganda yoki yuqori konsentratsiyalardan tez-tez foydalanilganda burun shilliq qavatining shishishi, hid bilishning buzilishi, hatto burun shilliq qavatining atrofiyasi kuzatilishi mumkin (ko‘pincha uzoq vaqt qo‘llanilganda). Rezorbtiv nojo‘ya ta’sirlarning namoyon bo‘lishi mumkin: bosh aylanishi, bosh og‘rig‘i, uyqusizlik, ko‘ngil aynishi, qusish, qon bosimining ko‘tarilishi, yurak urishining tezlashishi yoki notekisligi, nafas qisilishi, yurak ritmining buzilishi, ko‘rishning qisqa muddatli buzilishi, ko‘z ichi bosimining ko‘tarilishi mumkin. Ba’zi hollarda allergik reaksiyalar, xususan, angionevrotik shish, tizimli allergik reaksiyalar (shu jumladan, anafilatik shok, tarqalgan eshakemi ko‘rinishida) kuzatilishi mumkin. Preparat uzoq vaqt davomida yuqori dozalarda qo‘llanganda depressiv holat rivojlanishi mumkin.

Qarshi ko‘rsatmalar

Preparatning tarkibiy qismlariga yuqori sezuvchanlik; o‘tkir koronar kasalliklar, koronar astma, gipertireoz, yopiq burchakli glaukoma, atrofik rinit, transfenoidal gipofizektomiya yoki anamnezda qattiq miya pardasini yalang‘ochlash bilan o‘tkazilgan transnazal/transoral jarrohlik amaliyotlari. MAO ingibitorlarini qo‘llash to‘xtatilgandan so‘ng 2 hafta davomida yo‘ldosh davolash. 6 yoshgacha bo‘lgan bolalar. Homiladorlik.

Dorilarning o‘zaro ta’siri

Ksilometazolin β-adrenoblokatorlar kabi ba’zi antigipertenziv vositalarning va tritsiklik yoki tetratsiklik antidepressantlar kabi ba’zi antidepressantlarning ta’siriga ta’sir qilishi mumkin.

Maxsus ko‘rsatmalar

Preparatni ketma-ket 10 kundan ortiq qo‘llash mumkin emas. Preparat bilan uzoqroq davolanish teskari ta’sir ko‘rsatishi mumkin.

Preparatni adrenergik preparatlarni qo‘llashda uyqusizlik, bosh aylanishi, qaltirash, yurak aritmiyasi, qon bosimining ko‘tarilishi bilan namoyon bo‘ladigan kuchli reaksiyalarga ega bo‘lgan bemorlarga ehtiyotkorlik bilan buyurish lozim.

Preparatning tavsiya etilgan dozasini, ayniqsa, bolalar va keksalarni davolashda oshirmaslik kerak.

Preparatni yurak-qon tomir kasalliklari, arterial gipertenziya, qandli diabet, qalqonsimon bez kasalliklari, siydik ajralishi qiyinlashgan bemorlarga ehtiyotkorlik bilan buyurish lozim.

Musobaqa vaqtida sportchilarga α-adrenomimetiklarni alohida ehtiyotkorlik bilan qo‘llash lozim.

Infeksiyaning oldini olish uchun har bir qadoqdan faqat bir kishi foydalanishi kerak.

Homiladorlik yoki emizish davrida qo‘llash

Preparatni homiladorlik davrida tomirlarni toraytiruvchi ta’siri tufayli qo‘llash mumkin emas. Emizikli ayollarga preparatni faqat ona uchun kutilayotgan foyda bola uchun potensial xavfdan yuqori bo‘lgandagina qo‘llash mumkin.

Avtotransportni boshqarish yoki boshqa mexanizmlar bilan ishlashda reaksiya tezligiga ta’sir qilish qobiliyati

Odatda preparat tavsiya etilgan dozalarda qo‘llanilganda transport vositalari va murakkab mexanizmlarni boshqarish qobiliyatiga ta’sir ko‘rsatmaydi, biroq ko‘rish qobiliyatining vaqtinchalik buzilishi, bosh aylanishi ehtimolini hisobga olish lozim.

Bolalar

Preparat 6 yoshgacha bo‘lgan bolalarga qo‘llanilmaydi.

Preparat yaroqlilik muddati tugagandan so‘ng qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Preparat juda tez-tez qo‘llanganda, dozani oshirib yuborish belgilari bosh og‘rig‘i, burun qurishi, ko‘ngil aynishi, depressiya, qon bosimining ko‘tarilishi, ko‘rishning qisqa muddatli buzilishi, tezlashgan va tartibsiz puls, uyquchanlik, nafas olishning pasayishi, hushni yo‘qotish ko‘rinishida namoyon bo‘lishi mumkin. Preparatni qo‘llashni to‘xtatish va antagonist preparatlar: simpatolitiklar va α-adrenoblokatorlar (fentolamin, tropafen), simptomatik terapiya buyurish lozim. Agar preparat tasodifan ichilgan bo‘lsa, oshqozonni yuvish, surgi va enterosorbentlar qabul qilish, α-adrenoblokatorlar bilan davolash, simptomatik terapiya o‘tkazish kerak. Uzoq muddat qo‘llanganda tolerantlik tez rivojlanadi (samarasi kamayadi yoki umuman bo‘lmaydi). Dozaning oshirib yuborilishi burun shilliq qavatining atrofiyasiga olib kelishi mumkin.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retseptsiz.

Ishlab chiqaruvchi

"Farmak" OAJ.

Ukraina, 04080, Kiyev sh., Frunze ko‘chasi, 63.