Fosfokard infuzion eritma uchun kukun, 1,0 g (flakon)

Tarkib

1 ta flakonda quyidagilar mavjud:

Faol modda: kreatin natriy fosfat - 1,0 g.

Tavsif

Oq rangli kukun.

Dori shakli

Inyeksiya uchun eritma tayyorlash uchun kukun.

Farmakoterapevtik guruh

Metabolik jarayonlarni korreksiyalash uchun vosita. ATX kodi: S01EV06.

Farmakologik xususiyatlari

Kardioprotektor, membranani barqarorlashtiruvchi, antiaritmik, metabolik vosita.

Kreatin fosfat organizmning turli to‘qimalarida, ayniqsa miokardda keng tarqalgan endogen fiziologik faol substansiyadir. Kreatin fosfat molekulasidagi fosfat kislotaning yuqori energiyali bog‘i miokardni energiya bilan ta’minlashi mumkin. Ekzogen kreatin fosfat hujayrada energiya manbai bo‘lgan fosforillovchi birikmalarning hujayra ichidagi miqdorini me’yorda ushlab turadi. Ushbu preparat 5’-nukleotidaza faolligini bostirish orqali ATF sintezini oshirishi va fosfolipidazani ingibirlash orqali hujayra membranasini barqarorlashtirishi mumkin, shu tariqa hujayralarni erkin radikallar keltirib chiqaradigan shikastlanishlardan himoya qiladi. Ishemik reperfuziya paytida kreatin fosfat energiyaga bog‘liq bo‘lgan sekin kalsiy kanalini faollashtiradi va kalsiyning sekin oqimini oshiradi, depolyarizatsiyaning maksimal tezligini pasaytiradi, bu esa uning antiaritmik ta’siriga vositachilik qiladi.

Kreatin fosfat yuqori samarali va kam zaharli yurakni himoya qiluvchi vosita bo‘lib, u miokard infarktida nekroz zonasini sezilarli darajada qisqartirishi, o‘tkir qorincha aritmiyasini kamaytirishi va miokard hujayralariga membrana barqarorlashtiruvchi ta’sir ko‘rsatib, ularning ishemiyasini oldini olishi mumkin.

Fosfokard odatdagi terapiya bilan birgalikda yurak funksiyasi ko‘rsatkichini oshiradi va surunkali yurak yetishmovchiligi bo‘lgan bemorlarda nojo‘ya ta’sirlarsiz klinik holatni yaxshilaydi. Yurakdagi jarrohlik aralashuvlari paytida miokard ishemiyasidan samarali himoyaga kardioplegik eritmaga kreatin fosfat qo‘shish orqali erishish mumkin. Bunda yurak faoliyatining tiklanishi tezlashadi, yurak aritmiyasi va boshqa asoratlar rivojlanishining oldi olinadi.

Bundan tashqari, kardioplegik eritmalarga 10 mmol/l konsentratsiyada Fosfokard qo‘shilishi kardioprotektiv ta’sirni yaxshilaydi:

Kardiopulmonal aylanma shuntlashda miokard ishemiyasi rivojlanish xavfi kamayadi;

Chap koronar arteriyaning oldingi pastga tushuvchi tarmog‘iga 15 daqiqaga ligatura qo‘yish natijasida eksperimental regionar ishemiya rivojlanishidan oldin infuzion kiritishda reperfuzion aritmiya rivojlanish xavfi kamayadi;

Miokard hujayralarida ATF va fosfokreatin degradatsiyasini pasaytiradi, mitoxondriya va sarkolemma tuzilishini saqlaydi, yuqori dozada kaliy yuborilishi natijasida yuzaga kelgan yurak to‘xtashidan keyin miokardning funksional tiklanish jarayonini yaxshilaydi va reperfuzion aritmiya chastotasini kamaytiradi.

Farmakokinetika

Bir martalik vena ichiga yuborilgandan so‘ng, qon plazmasidagi Cmax 1-3 daqiqa davomida aniqlanadi. Skelet muskullari, miokard va miyada eng ko‘p, jigar va o‘pka to‘qimalarida esa juda oz miqdorda to‘planadi. T1/2 tez fazada 30-35 minut; sekin fazada bir necha soatni tashkil etadi.

Buyraklar orqali chiqariladi.

Qo‘llanilishi

Kompleks terapiya tarkibida:

O‘tkir miokard infarkti.

Surunkali yurak yetishmovchiligi.

Yurak operatsiyalari.

Skelet mushaklarining zo‘riqish holati.

Sport tibbiyotida - o‘tkir va surunkali jismoniy zo‘riqish sindromi rivojlanishining oldini olish va sportchilarning ekstremal jismoniy yuklamalarga moslashuvini yaxshilash uchun qo‘llaniladi.

Qo‘llash usuli va dozalari

Miokard infarkti:

Dastlabki doza birinchi kuni - 2 g, vena ichiga oqimli yuborish shaklida yuboriladi (inyeksiya 4 daqiqadan ortiq davom etishi kerak). 2 soatdan so‘ng 5 g preparat tomchilab quyiladi, uning har bir grammi 30 ml 5% li glyukoza eritmasida suyultiriladi (tomchilab quyish 1 soat davomida amalga oshiriladi). Ikkinchi kundan beshinchi kungacha har kuni 5 g dan vena ichiga tomchilab yuborilishi mumkin. Agar bemor og‘ir ahvolda bo‘lsa yoki terapevtik samara yetarli bo‘lmasa, doza 10 g gacha oshirilishi mumkin.

Yurak yetishmovchiligi:

Dastlabki 14 kun davomida 1 g dan kuniga 2 marta vena ichiga inyeksiya qilinadi. Preparatni sekin (2 daqiqadan ortiq) yuborish kerak. 15-kundan 44-kungacha doza kuniga 0,5-1 g gacha vena ichiga yoki 0,5 g mushak ichiga kamaytirilishi mumkin. Mushak orasiga inyeksiya qilish uchun preparatni inyeksiya joyidagi og‘riqning oldini olish uchun 40 mg lidokain saqlagan 4 ml erituvchida eritish kerak.

Yurak jarrohligi:

Operatsiyadan ikki kun oldin har kuni 2 g preparatni inyeksiya uchun 12 ml steril suvda eritib, vena ichiga sekin (kamida 4 daqiqa) yuborish tavsiya etiladi. So‘ngra aortani siqishdan oldin va to‘liq og‘riqsizlantirishgacha kardioplegik eritmani ishlatishdan oldin 1 g/soat dozada vena ichiga yuboriladi. Operatsiya paytida bu preparat kardioplegik eritmaga 2,5 g/l (10 mmol/l) konsentratsiya olish uchun qo‘shiladi va so‘ngra 4°S haroratda koronar arteriyaga tana vaznining dastlabki 15 mmol/kg dozasida, keyingi 10 mmol/kg doza bilan aortaning siqilishi tugaguniga qadar 30 daqiqa davomida quyiladi. Operatsiya tugagandan va aorta qisqichi olib tashlangandan so‘ng, preparat 48 soat davomida kunlik 8 g dozada (4 g 500 ml 5% li glyukozada, quyish tezligi 40 ml/soat) uzluksiz quyiladi.

Nojo‘ya ta’sirlari

Allergik reaksiyalar: preparatga yuqori sezuvchanlik namoyon bo‘lishi.

Yurak-qon tomir tizimi tomonidan: AB pasayishi (v/i tez yuborilganda).

Qarshi ko‘rsatmalar

preparat komponentlariga yuqori sezuvchanlik;

surunkali buyrak yetishmovchiligi (kuniga 5-10 g dozada qo‘llash uchun);

18 yoshgacha bo‘lgan bolalar va o‘smirlar uchun (samaradorligi va xavfsizligi aniqlanmagan).

Dozani oshirib yuborish

Hozirgi vaqtda preparatning dozasini oshirish holatlari haqida xabar berilmagan.

Maxsus shartlar

Preparat inyeksiya uchun suvda 1 g: 6 ml nisbatda eritilishi mumkin, vena ichiga yuborish vaqti 2 daqiqadan kam emas.

Preparat 5% li glyukoza eritmasida, inyeksiya uchun suvda, fiziologik va kardioplegik eritmada kamida 16 soat davomida barqaror bo‘ladi.

Preparat yurakni himoya qiluvchi vosita hisoblanadi, ammo u kardiokinetik terapiyaning o‘rnini bosa olmaydi.

Diabet bilan og‘rigan bemorlar uchun preparat 5% li glyukoza eritmasi bilan suyultirilishi mumkin emas, lekin inyeksiya uchun suvda yoki fiziologik eritmada eritilishi mumkin.

Homiladorlik va laktatsiya davri

Hozirgi vaqtgacha fetal toksiklik yoki homiladorlikka ta’siri haqida hech qanday ma’lumot topilmagan.

Boshqa dorilar bilan o‘zaro ta’siri, boshqa o‘zaro ta’sirlar

Kreatin fosfat digoksin, furosemid, dopamin, maksilitin, karnitin, verapamil, gidrokortizon, sitikolin, oksitotsin, propafenon bilan birgalikda 3-5 soat davomida qo‘llanilganda barqaror bo‘ladi.

Chiqarilish shakli va qadoqlash

1 flakon uchun qadoq:

1,0 g kukun flakonda. Tibbiyotda qo‘llash bo‘yicha yo‘riqnoma bilan birga karton qutida 1 flakon.

10 flakonlik qadoq:

1,0 g kukun flakonda. Tibbiy qo‘llash bo‘yicha yo‘riqnoma bilan birga karton qutida 10 tadan flakon.

Saqlash shartlari

Harorati 30 °C dan yuqori bo‘lmagan quruq, yorug‘likdan himoyalangan joyda saqlang.

Bolalar qo‘li yetmaydigan joyda saqlang.

Yaroqlilik muddati

2 yil.

Yaroqlilik muddati tugaganidan keyin qo‘llash mumkin emas.

Dorixonalardan berish shartlari

Retsept bo‘yicha.

Ishlab chiqaruvchi

China Meheco Corporation, Xitoy.