Kaptopril Viva Farm (Captopril Viva Farm) tabletkalari 25 mg №30 (2 blister х 15 tabletka)

Tarkib

Bir tabletka quyidagilarni o‘z ichiga oladi:

faol modda - kaptopril 25 mg;

yordamchi moddalar: suvsiz laktoza, makkajo‘xori kraxmali, mikrokristallik sellyuloza, stearin kislotasi.

Tavsif

Tabletkalar deyarli oq rangda, to‘rtburchak shaklda, ikki tomoni qavariq, chetlari qiyshiq, bir tomonida xochsimon chizig‘i bor, biroz marmarsimon.

Dori shakli

Tabletkalar.

Farmakoterapevtik guruh

Yurak-qon tomir tizimi kasalliklarini davolash uchun preparatlar. Renin-angiotenzin tizimiga ta’sir etuvchi preparatlar. Angiotenzin Konvertirlovchi ferment ingibitorlari (AKF). Kaptopril. ATX kodi: C09AA01.

Farmakologik xususiyatlari

Farmakokinetika

Ichga qabul qilingandan so‘ng, preparatning kamida 75% oshqozon-ichak traktida tez so‘riladi. Kaptoprilning qon plazmasidagi maksimal konsentratsiyasiga 30-90 daqiqadan so‘ng erishiladi. Bir vaqtning o‘zida ovqatlanish preparatning so‘rilishini 30-40% ga sekinlashtiradi. Antigipertenziv ta’siri kaptoprilni peroral qabul qilgandan 20-30 daqiqa o‘tgach boshlanadi, maksimal ta’siriga 60-90 daqiqadan so‘ng erishiladi. Qon plazmasi oqsillari (asosan albuminlar) bilan bog‘lanishi 25-30% ni tashkil etadi. Gistogematik to‘siqlardan o‘tib, gematoensefalik to‘siqni istisno qiladi, yo‘ldosh orqali o‘tadi va ko‘krak sutiga o‘tadi. Jigarda metabolizmga uchraydi, taxminan 50% inaktiv disulfidlarga (kaptopril-disulfid va kaptopril-sistein-disulfid) aylanadi. O‘zgarmagan kaptoprilning yarim chiqarilish davri taxminan 2 soatni, bog‘langan kaptoprilniki esa 12 soatni tashkil etadi. 24 soat davomida kaptopril peshob bilan taxminan 95% ajraladi, ulardan: 40-50% - o‘zgarmagan modda ko‘rinishida, qolgan qismi - kaptopril-disulfid va kaptopril-sistein-disulfid ko‘rinishida. Buyrak yetishmovchiligida kaptoprilning ajralish darajasi kamayadi. Bunday holda dozani kamaytirish yoki shunga mos ravishda qabullar orasidagi vaqtni ko‘paytirish kerak.

Farmakodinamika

Kaptopril VIVA FARM antigipertenziv vosita, angiotenzinni o‘zgartiruvchi ferment (AKF) ingibitori hisoblanadi. Kaptoprilning antigipertenziv ta’sir mexanizmi AKF faolligining raqobatli ingibirlanishi bilan bog‘liq bo‘lib, bu to‘qimalarda va qon plazmasida angiotenzin I ning angiotenzin II ga aylanish tezligining pasayishiga olib keladi, natijada tomir kengaytiruvchi ta’sirga erishiladi va buyrak usti bezlarida aldosteron sekretsiyasining pasayishi sodir bo‘ladi. Natijada, kaptopril tomirlarning umumiy periferik tomir qarshiligini (yuklamadan keyingi), o‘pka kapillyarlaridagi tiqilish bosimini (yuklamadan oldingi) va o‘pka tomirlaridagi qarshilikni kamaytiradi; yurakning daqiqalik hajmini va yuklamaga chidamliligini oshiradi. Kaptopril uzoq vaqt qo‘llanganda chap qorincha miokardi gipertrofiyasining ifodalanganligini kamaytiradi, yurak yetishmovchiligi avj olishining oldini oladi va chap qorincha dilatatsiyasi rivojlanishini sekinlashtiradi. Arteriyalarni venalarga qaraganda ko‘proq kengaytiradi. Ishemiyaga uchragan miokardning qon bilan ta’minlanishini yaxshilaydi Trombotsitlar agregatsiyasini kamaytiradi. Buyrak koptokchalarining olib ketuvchi arteriolalari tonusini pasaytiradi, shu bilan koptokcha ichi gemodinamikasini yaxshilaydi va diabetik nefropatiya rivojlanishiga to‘sqinlik qiladi.

Buyrak usti bezlarida aldosteron sekretsiyasi kamayishi tufayli diurez va natriyurez kuchayadi, qon zardobida kaliy miqdori ortadi, suv almashinuvi me’yorlashadi. Shunday qilib, kaptopril surunkali yurak yetishmovchiligi bo‘lgan bemorlarda natriy miqdorini kamaytirishga yordam beradi. Angiotenzin II ning renin sekretsiyasiga salbiy teskari ta’sirining yo‘qligi qon plazmasida renin faolligining oshishiga yordam beradi. AKFning ingibirlanishi bradikinin (vazodpressor peptid) parchalanishiga to‘sqinlik qiluvchi kallikrein-kinin mahalliy tizimlari faolligining oshishiga olib keladi, bu esa tizim prostaglandinlarining faollashuviga olib keladi. Bu mexanizm AKF ingibitorlarining gipotenziv ta’sirida ham ishtirok etadi.

Tavsiya etilgan sutkalik dozada kaptoprilning antigipertenziv ta’siri uzoq muddatli davolash jarayonida saqlanib qoladi. Kaptoprilni qabul qilishni qisqa muddatga to‘xtatish qon bosimining tez, haddan tashqari ko‘tarilishiga olib kelmaydi.

Qo‘llanilishi

arterial gipertenziya (shu jumladan renovaskulyar gipertenziya);

surunkali yurak yetishmovchiligi (kompleks terapiya tarkibida);

klinik jihatdan barqaror holatda miokard infarktidan so‘ng chap qorincha funksiyasining buzilishi;

insulinga bog‘liq qandli diabetda diabetik nefropatiya (albuminuriyada sutkasiga 30 mg dan ortiq).

Qo‘llash usuli va dozalari

Arterial gipertenziya

Kaptopril VIVA FARMni har bir bemor uchun individual ravishda tanlanadigan eng kam samarali dozada qabul qilish lozim. Kaptopril VIVA FARMning har bir tabletkasining bir tomonida tabletkani ajratish uchun xochsimon chiziq mavjud (1 tabletka 25 mg; 1⁄2 tabletka - 12,5 mg; 1⁄4 tabletka - 6,25 mg kaptopril).

Yengil/o‘rtacha arterial gipertenziyada boshlang‘ich doza 12,5 mg (1⁄2 tabletka) kuniga ikki marta. Qo‘llab-quvvatlovchi doza 25 mg (1 tabletka) kuniga ikki mahal. Zarurat tug‘ilganda doza har 2-4 haftada oshirib boriladi. Maksimal sutkalik doza 150 mg ni tashkil etadi.

Og‘ir arterial gipertenziyada Kaptopril VIVA FARM ko‘pincha boshqa gipotenziv preparatlar, ko‘pincha tiazidli diuretiklar (gidroxlortiazid - 25-50 mg/sutka) bilan kombinatsiyalanadi. Diuretikning dozasi har 1-2 haftada arterial gipertenziyani davolashda qo‘llaniladigan maksimal dozagacha oshirilishi mumkin.

Yurak yetishmovchiligi

Kaptopril VIVA FARM bilan davolashni shifokor nazorati ostida boshlash kerak. Boshlang‘ich dozasi 6,25 mg (Kaptopril VIVA FARM tabletkasining 1/4 qismi) kuniga uch mahal qo‘llanganda tranzitor gipotenziya ta’sirini maksimal darajada susaytirish mumkin. Zarurat bo‘lganda dozani asta-sekin (har ikki haftada) kuniga 2-3 marta maksimal 25 mg gacha oshirish mumkin. Ayrim hollarda maksimal sutkalik doza 150 mg bo‘lishi mumkin.

Klinik barqaror holatda bo‘lgan bemorlarda miokard infarktidan keyin chap qorincha funksiyasining buzilishi

Kaptopril VIVA FARM preparatini miokard infarktidan 3 kun o‘tgach qo‘llash mumkin. Boshlang‘ich doza 6,25 mg/sutkani tashkil etadi (1⁄4 tabletka Kaptopril VIVA FARM), so‘ngra sutkalik dozani bir necha hafta davomida kuniga uch marta 25 mg darajasigacha oshirish mumkin (preparatni ko‘tara olish darajasiga qarab). Zarurat tug‘ilganda, doza asta-sekin kuniga uch marta 50 mg maksimal sutkalik dozagacha oshiriladi. Arterial gipotenziya rivojlanganda dozani kamaytirish talab etilishi mumkin. 150 mg maksimal sutkalik dozani qo‘llash bo‘yicha keyingi urinishlar bemorlarning preparatni ko‘tara olishiga asoslanishi kerak. Kaptoprilni boshqa preparatlar, masalan, trombolitiklar, atsetilsalitsil kislotasi va beta-adrenoblokatorlar bilan birga qo‘llash mumkin.

Insulinga bog‘liq qandli diabetda diabetik nefropatiya

Boshlang‘ich doza 6,25 mg/sutka (1⁄4 tabletka Kaptopril VIVA FARM). Zarurat bo‘lganda doza 75-100 mg/sutkagacha kuniga 2-3 marta oshiriladi. Mikroalbuminuriya bilan kechuvchi insulinga bog‘liq diabetda (kuniga 30-300 mg albumin ajralishi) preparat dozasi kuniga ikki mahal 50 mg ni tashkil etadi. Oqsilning umumiy klirensi kuniga 500 mg dan ortiq bo‘lganda, preparat kuniga uch marta 25 mg dozada samarali hisoblanadi.

Buyrak faoliyati buzilganda

Kaptoprilning eliminatsiyasi buyraklar orqali amalga oshirilgani sababli, buyrak faoliyati buzilgan bemorlarda doza kamaytirilishi yoki preparatni qabul qilish oraliqlari uzaytirilishi kerak.

Diuretiklar bilan yondosh davolashda, og‘ir buyrak yetishmovchiligi bo‘lgan bemorlarda tiazid qatoridagi diuretiklar emas, balki sirtmoqli diuretiklar (masalan, furosemid) tavsiya etiladi.

Kaptoprilning sutkalik dozasi kreatinin klirensi ko‘rsatkichlariga bog‘liq (jadvalga qarang).

Kreatinin klirensi (ml/daqiqa/1,73 m2) Boshlang‘ich doza (mg/kun) Maksimal doza (mg/kun)

> 40 25 mg- 50 mg 150 mg

21-40 25 mg 100 mg

10-20 12,5 mg 75 mg

< 10 6,25 mg 37,5 mg

Keksa bemorlar

Keksa yoshdagi bemorlarda boshlang‘ich doza 6,25 mg (1⁄4 tabletka Kaptopril VIVA FARM) sutkada ikki marta.

Keksa bemorlarga preparat dozasi buyrak yoki boshqa a’zolar faoliyati buzilishi mumkinligini hisobga olgan holda individual ravishda tanlanadi.

Nojo‘ya ta’sirlari

Tez-tez:

bosh aylanishi, uyqu buzilishi;

og‘iz qurishi, ta’m bilishning buzilishi (davolash boshlanganidan 2-3 oy o‘tgach, o‘z-o‘zidan yo‘qoladigan metall yoki sho‘r ta’m), ko‘ngil aynishi, qusish, qorin og‘rig‘i, ich ketishi, qabziyat;

giponatriyemiya;

quruq yo‘tal;

teri toshmasi, qichima.

Tez-tez emas:

taxikardiya, yurak urishi, ko‘krak qafasidagi og‘riqlar;

arterial gipotenziya;

charchoq hissi, asteniya.

Kamdan-kam:

anoreksiya;

qon zardobida kreatinin, qoldiq azot va mochevina miqdorining oshishi;

buyrak yetishmovchiligi, poliuriya, oliguriya, proteinuriya, tez-tez siyish;

bosh og‘rig‘i, uyquchanlik, paresteziyalar;

stomatit, og‘iz shilliq qavatining aftoz yaralari.

Juda kam uchraydi:

nefrotik sindrom;

neytropeniya, agranulotsitoz, pansitopeniya, anemiya, trombotsitopeniya, eozinofiliya, antinuklear antitanalarning musbat titri, ECHTning oshishi;

giperkaliyemiya, gipoglikemiya;

bronxospazm, rinit, allergik alveolit/eozinofilli pnevmoniya;

glossit, oshqozon yarasi, pankreatit;

jigar faoliyatining buzilishi, xolestaz, sariqlik, gepatit, jigar hujayralari nekrozi, jigar transaminazalari va bilirubin darajasining oshishi;

angionevrotik shish, Stivens-Jonson sindromi, ko‘p shaklli eritema, fotosensibilizatsiya, eksfoliativ dermatit;

mialgiya, artralgiya;

impotensiya, ginekomastiya.

Qarshi ko‘rsatmalar

preparatning biror komponentiga va boshqa ingibitorlarga (AKF) yuqori sezuvchanlik;

anamnezda angionevrotik shish yoki boshqa qon tomir shishlari (masalan, oldingi AKF ingibitorlari bilan davolash natijasida);

buyraklar (kreatinin klirensi 30 ml/daqiqadan kam) yoki jigar faoliyatining yaqqol buzilishlari;

giperkaliyemiya;

leykopeniya, trombotsitopeniya;

hasharot zaharlariga qarshi desensibilizatsiyalovchi terapiya (hayot uchun xavfli anafilaktoid reaksiyalar rivojlanishi mumkin - qon bosimining pasayishi, bo‘g‘ilish, qusish, allergik teri reaksiyalari);

yuqori o‘tkazuvchanlikka ega poliakrilonitril-metall-sulfonat membranalar (masalan, "AN69") yordamida dializ o‘tkazish, chunki anafilaktoid reaksiyalar (o‘ta sezuvchanlik reaksiyalari) rivojlanishi xavfi bor, hatto shok holatigacha;

buyrak arteriyalarining ikki tomonlama stenozi yoki yagona buyrak arteriyasining stenozi kuchayib boruvchi azotemiya bilan;

buyrak transplantatsiyasidan keyingi holat;

aorta og‘zining stenozi va qon oqishini qiyinlashtiradigan shunga o‘xshash o‘zgarishlar;

birlamchi giperaldosteronizm;

homiladorlik va laktatsiya davri;

18 yoshgacha bo‘lgan bolalar va o‘smirlar.

Dorilarning o‘zaro ta’siri

Diuretiklar, vazodilatatorlar, ganglioblokatorlar, adrenoblokatorlar kaptoprilning gipotenziv ta’sirini kuchaytiradi.

Indometatsin va boshqa nosteroid yallig‘lanishga qarshi vositalar, shuningdek, klonidin kaptoprilning antigipertenziv ta’sirini kamaytirishi mumkin.

Kaliyni tejaydigan diuretiklar (masalan, triamteren, spironolakton, amilorid), kaliy preparatlari, siklosporin, kam tuzli sut (tarkibida K+ 60 mmol/l gacha bo‘lishi mumkin), kaliy qo‘shimchalari, tuz o‘rnini bosuvchilar (tarkibida sezilarli miqdorda K+ bo‘ladi) bilan bir vaqtda qo‘llash giperkaliyemiya rivojlanish xavfini oshiradi.

Allopurinol va prokanainamid yoki immunodepressantlarni (masalan, azatioprin va siklofosfamid) kaptopril bilan birgalikda qabul qilayotgan bemorlarda gematologik buzilishlar, neytropeniya va/yoki Stivens-Jonson sindromi rivojlanish xavfi ortadi.

Kaptoprilning buyraklar orqali chiqarilishi Probenesid buyurilganda kamayadi.

Litiy tuzlari va angiotenzinni o‘zgartiruvchi ferment (AKF) ingibitorlarini bir vaqtda qo‘llash qon zardobida litiy konsentratsiyasining oshishiga olib kelishi mumkin. Bunda litiy preparatlarining nojo‘ya va toksik ta’sirlari xavfi ortadi.

Kaptopril diabetga qarshi dorilarning (insulin, sulfonilmochevina hosilalari) gipoglikemik ta’sirini pasaytiradi, giperglikemiya chaqiradi.

Maxsus ko‘rsatmalar

Simptomatik arterial gipotenziya diuretiklar bilan davolash, maxsus parhezlarni qo‘llash yoki boshqa sabablarga ko‘ra organizmning suvsizlanishi (profuz terlash, takroriy qusish, ich ketishi, dializ) va yurak yetishmovchiligi natijasida giponatriyemiya va/yoki aylanib yuruvchi qon hajmi kamaygan bemorlarda rivojlanishi mumkin. Gipotenziyani davolash yotoq rejimini ta’minlash va zarurat tug‘ilganda infuzion terapiyadan iborat. Arterial bosimning vaqtinchalik pasayishi kaptopril bilan davolashga qarshi ko‘rsatma hisoblanmaydi, biroq preparatni vaqtincha to‘xtatish yoki dozani kamaytirish talab etilishi mumkin. Kaptopril bilan davolashdan oldin, albatta, suv-elektrolit disbalansi me’yorlashishi va aylanib yuruvchi qon hajmi tanqisligi bartaraf etilishi kerak, bundan tashqari, boshlang‘ich dozani qabul qilgandan so‘ng arterial bosimning o‘zgarishini kuzatish zarur.

Serebrovaskulyar va yurak ishemik kasalliklarida arterial bosimning sezilarli darajada pasayishi insult yoki miokard infarkti rivojlanishiga olib kelishi mumkinligini nazarda tutish kerak.

Renovaskulyar gipertenziya, buyrak arteriyalari stenozi (bir buyrak bilan ikki tomonlama yoki bir tomonlama)

Renovaskulyar gipertenziyasi bo‘lgan, buyrak arteriyalarining ikki tomonlama stenozi yoki yagona buyrak arteriyasi stenozi bo‘lgan ayrim bemorlarda kaptopril buyurilganda og‘ir arterial gipotenziya va buyrak yetishmovchiligi rivojlanish xavfi yuqori bo‘ladi (qon zardobida mochevina va kreatinin konsentratsiyasi ortadi). Ushbu bemorlarda kaptopril bilan davolashni qat’iy shifokor nazorati ostida kichik dozalardan boshlab, keyinchalik titrlash, buyrak faoliyatini muntazam nazorat qilish zarur.

Aorta, mitral klapan stenozi, gipertrofik kardiomiopatiya

AKF ingibitorlarini aorta, mitral klapanlar stenozi yoki gipertrofik kardiomiopatiyasi bo‘lgan bemorlarda ehtiyotkorlik bilan qo‘llash lozim.

Yo‘tal

AKF ingibitorlari buyurilganda yo‘tal samarasiz, turg‘un bo‘lib, terapiya to‘xtatilgandan keyin o‘tib ketadi.

Angionevrotik shish

Yuz, qo‘l-oyoqlar, lablar, til, ovoz yorig‘i va/yoki hiqildoqning angionevrotik shishi AKF ingibitorlarini qabul qilayotgan bemorlarda kamdan-kam kuzatiladi. Bu asorat kaptopril bilan davolash paytida istalgan vaqtda yuzaga kelishi mumkin. Bunday hollarda preparatni qabul qilishni darhol to‘xtatish va shishning klinik belgilari to‘liq yo‘qolguncha tegishli davolashni tayinlash lozim.

Agranulotsitoz, neytropeniya

Neytropeniya, agranulotsitoz, trombotsitopeniya va kamqonlik juda kam hollarda AKF ingibitorlarini qabul qilayotgan bemorlarda kuzatiladi. Bu hodisalar kaptoprilni qabul qilish to‘xtatilgandan keyin qaytariladi. Preparatni immunodepressantlar, allopurinol yoki prokainamid qabul qilayotgan autoimmun kasalliklari bo‘lgan bemorlarda alohida ehtiyotkorlik bilan qo‘llash lozim. Ushbu bemorlarning ba’zilarida jiddiy infeksiyalar rivojlanishi mumkin, ular ba’zi hollarda intensiv antibakterial terapiyaga javob bermaydi. Bunday bemorlarda kaptoprilni qo‘llashda davolash boshlanishidan oldin qondagi leykotsitlar miqdorini nazorat qilish, so‘ngra preparatni qabul qilishning dastlabki 3 oyi davomida har 2 haftada va keyinchalik vaqti-vaqti bilan nazorat qilish tavsiya etiladi.

Jigar yetishmovchiligi

AKF ingibitorlari juda kam hollarda xolestatik sariqlik yoki gepatitni, hatto gepatotsellyulyar nekrozgacha chaqiradi. Bu asoratlarning mexanizmi noma’lum. Sariqlik yoki jigar fermentlari darajasining oshishi rivojlangan bemorlar kaptoprilni qabul qilishni to‘xtatishlari va tegishli terapiyani olishlari kerak.

Gemodializ / PZLP-lipid-aferezi / Desensibilizatsiya terapiyasi

Kaptopril va poliakril-nitril membranali dializ yoki dekstran sulfat yordamida PZLP (past zichlikdagi lipoprotein) -aferezi yoki hasharot zaharlariga (asalari, ari) qarshi desensibilizatsiya bir vaqtda buyurilganda anafilaktik shok rivojlanishi mumkin. Dializ uchun boshqa membranadan foydalanish tavsiya etiladi yoki kaptoprilni vaqtincha boshqa antigipertenziv dorilar (AKF ingibitorlari emas) bilan almashtirish lozim. Desensibilizatsiyani o‘tkazishdan oldin kaptoprilni bekor qilish kerak.

Jarrohlik amaliyoti/anesteziya

Keng ko‘lamli jarrohlik operatsiyalarida yoki gipotenziv ta’sirga ega bo‘lgan narkotik vositalar qo‘llanilganda arterial gipotenziya kuzatilishi mumkin. Gipotoniyani aylanib yuruvchi qon hajmini to‘ldirish orqali bartaraf etish mumkin.

Qandli diabet bilan kasallangan bemorlar

Ilgari peroral antidiabetik dorilar yoki insulin qabul qilgan qandli diabet bilan og‘rigan bemorlarda, ya’ni kaptopril bilan davolanishning birinchi oyi davomida glikemiya darajasini diqqat bilan nazorat qilish zarur.

Galaktozani irsiy ko‘tara olmaslik, Lapp laktaza tanqisligi, glyukoza so‘rilishining buzilishi sindromi - galaktoza

Kaptoprilni kamdan-kam kuzatiladigan irsiy galaktozani ko‘tara olmaslik, Lapp laktaza tanqisligi yoki glyukoza so‘rilishining buzilishi sindromi bo‘lgan bemorlarga buyurmaslik kerak.

Dori vositasining transport vositasi yoki potensial xavfli mexanizmlarni boshqarish qobiliyatiga ta’sirining o‘ziga xos xususiyatlari

Transport vositalarini boshqarishda yoki yuqori e’tiborni talab qiladigan boshqa ishlarni bajarishda ehtiyot bo‘lish zarur, chunki bosh aylanishi, ayniqsa kaptoprilning boshlang‘ich dozasidan keyin kuzatilishi mumkin.

Dozani oshirib yuborish

Simptomlari: yaqqol gipotenziya, miokard infarkti rivojlanishi, arterial bosimning keskin pasayishi fonida miya qon aylanishining o‘tkir buzilishi va tromboembolik asoratlar kuzatilishi mumkin.

Davolash: bemor gorizontal holatni egallashi (oyoqlari ko‘tarilgan bo‘lishi kerak) va unga tomir ichiga izotonik natriy xlorid eritmasi yoki boshqa plazma o‘rnini bosuvchi suyuqliklar yuborib, aylanib yuruvchi qon hajmini (AQH) korreksiyalash lozim. Kaptopril gemodializ yordamida organizmdan chiqariladi.

Chiqarish shakli va qadoqlash

15 ta tabletka polivinilxlorid plyonkasi va alyuminiy bosma folgasidan tayyorlangan konturli yacheykali o‘ramga joylashtiriladi.

2 tadan konturli yacheykali o‘ramlar davlat va rus tillarida tibbiy qo‘llash bo‘yicha yo‘riqnoma bilan birga karton qutiga joylashtiriladi.

Saqlash shartlari

25 °C dan yuqori bo‘lmagan haroratda saqlang. Bolalar qo‘li yetmaydigan joyda saqlang.

Saqlash muddati

3 yil.

Qadoqda ko‘rsatilgan yaroqlilik muddati tugagandan so‘ng preparatni ishlatmaslik

Dorixonalardan berish shartlari

Retsept bo‘yicha.

Ishlab chiqaruvchi

"VIVA FARM" MCHJ, Qozog‘iston Respublikasi,

2-Ostroumov ko‘chasi, 33, Almati shahri, 050030