Kardiovit (Kardiovit) 3-sonli in'ektsiya uchun eritma uchun liyofillangan kukun (ampulalar) + erituvchi 2 ml №3 (ampulalar)

Tarkib

Preparatning har bir ampulasi (200 mg) quyidagilarni o‘z ichiga oladi:

Faol moddalar: Adenozin trifosfat dinatriyli tuzi (ATF) - 10 mg, kokarboksilaza g/x - 50 mg, nikotinamid - 20 mg, sianokobalamin - 0,5 mg.

Yordamchi moddalar: Glitsin, metilparagidroksibenzoat.

Erituvchining har bir ampulasi (2 ml) quyidagilarni o‘z ichiga oladi:

Faol moddasi: Lidokain g/x - 10 mg.

Yordamchi moddalar: Inyeksiya uchun suv.

Chiqarish shakli

Preparatning liofillangan kukuni inyeksiya uchun eritma tayyorlash uchun erituvchi ampulasi bilan birgalikda ampulada.

3 ta ampula preparat va 3 ta ampula erituvchi PVX taglikda, qadoqdagi qo‘llash bo‘yicha yo‘riqnoma bilan birga.

Farmakoterapevtik guruh

Vitaminlar (uglevod almashinuvini boshqaruvchi). ATX kodi: A11JC.

Farmakologik xususiyatlari

Preparat metabolik moddalar va vitaminlar majmuasidir.

Adenozin trifosfat dinatriyli tuzi (ATF) - adenozin hosilasi bo‘lib, metabolik jarayonlarni rag‘batlantiradi. Gipotenziv va antiaritmik, tomir kengaytiruvchi, shu jumladan koronar tomirlarga ta’sir ko‘rsatadi.

Kokarboksilaza - organizmda tashqaridan keladigan tiamin (vitamin B1) dan hosil bo‘ladigan koferment. Uglevod almashinuvida muhim rol o‘ynaydi, α-ketokislotalarning karboksillanishi va dekarboksillanishini katalizlovchi karboksilaza fermenti tarkibiga kiradi. Nuklein kislotalar, oqsillar va lipidlar sinteziga bilvosita yordam beradi. Organizmda sut va pirouzum kislotalari miqdorini pasaytiradi, glyukozaning o‘zlashtirilishiga yordam beradi. Nerv to‘qimasi trofikasini yaxshilaydi.

Sianokobalamin (vitamin B12) - organizmda faol shaklga - adenozilkobalamin yoki kobamidga aylanadi, u yuqori biologik faollikka ega. Organizmda oqsil sintezini oshiradi va uning to‘planishiga yordam beradi. Uglevod va lipidlar almashinuvini faollashtiradi. Qondagi XS miqdorini kamaytiradi, jigarning yog‘li infiltratsiyasining oldini oladi. Qon yaratuvchi a’zolarning normal faoliyati uchun zarur bo‘lib, eritrotsitlarda sulfgidril guruhlarini o‘z ichiga olgan birikmalarning to‘planishiga yordam beradi va ularning gemolizga chidamliligini oshiradi. To‘qimalarning regeneratsiya qobiliyatini oshiradi. Jigar va asab tizimi, arteriya faoliyatiga ijobiy ta’sir ko‘rsatadi.

Nikotinamid PP vitaminining shakllaridan biri bo‘lib, hujayradagi oksidlanish-qaytarilish jarayonlarida ishtirok etadi, uglevod va azot almashinuvini yaxshilaydi, lipid almashinuvini me’yorlashtiradi, qondagi aterogen lipoproteinlar miqdorini kamaytiradi.

Farmakokinetika

Preparatning farmakokinetikasi o‘rganilmagan.

Qo‘llanilishi

Turli xil kelib chiqishga ega nevritlar va nevralgiyalar; neyropatiyalar (shu jumladan qandli diabet, pernitsioz anemiya) va angiopatiyalar; lyumbago va radikulit; mialgiya va ishialgiya; bursitlar va tendinitlar; yurak ishemik kasalligi, miokarditlar va miokardiopatiyalar; homiladorlar toksikozi va homila gipoksiyasi; yurak-qon tomir tizimining surunkali kasalliklarini kompleks davolash.

Qo‘llash usuli va dozalari

Preparat eritmasi yuborishdan oldin tayyorlanadi. Mushak orasiga yuboriladi. Preparatning 1-2 ampulasidan har kuni yoki kunora qabul qilinadi. Dozalash, davolash davomiyligi va shifokor ko‘rsatmasi bo‘yicha kasallikning kechishi hamda og‘irligiga qarab takroriy kurslarni o‘tkazish.

Qarshi ko‘rsatmalar

Preparat komponentlariga yuqori sezuvchanlik. Giperkoagulyatsiya (shu jumladan o‘tkir trombozlarda), eritremiya, eritrotsitoz, arterial gipertenziyaning og‘ir shakllari, arterial gipotenziya, o‘tkir miokard infarkti, o‘pkaning yallig‘lanish kasalliklari.

Nojo‘ya ta’sirlari

Bosh og‘rig‘i, bosh aylanishi, taxikardiya, allergik reaksiyalar. Giperemiya, qichishish, yuborilgan joyda shish. Yaqqol nojo‘ya ta’sirlar rivojlanganda preparat bekor qilinadi.

Dorilarning o‘zaro ta’siri

Kokarboksilaza yurak glikozidlarining kardiotonik ta’sirini kuchaytiradi, nikotinamid va ATF esa vazodilatatorlar ta’sirini kuchaytiradi.

Maxsus ko‘rsatmalar

Preparat eritmasi tayyorlangandan so‘ng darhol qo‘llaniladi! Preparat eritmasi rangi o‘zgargan bo‘lsa, uni qo‘llamang (yangi tayyorlangan eritmaning rangi qip-qizil bo‘lishi kerak).

Homiladorlik va laktatsiya davrida qo‘llash

Homiladorlik davrida preparat faqat ona uchun kutilayotgan foyda homila uchun potensial xavfdan yuqori bo‘lgandagina qo‘llaniladi. Preparat bilan davolash vaqtida emizishni to‘xtatish tavsiya etiladi.

Transport yoki boshqa mexanizmlarni boshqarish

Cheklovlar yo‘q.

Preparatni bolalar qo‘li yetmaydigan joyda saqlang va yaroqlilik muddati tugaganidan keyin ishlatmang.

Dozani oshirib yuborish

Dozani oshirib yuborish haqida ma’lumotlar yo‘q.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlanadi.

Yaroqlilik muddati

5 yil.

Dorixonalardan berish shartlari

Retsept bo‘yicha.

Ishlab chiqaruvchi

"Biofarm" AJ, Gruziya, Tbilisi, 0160, Gotuya ko‘chasi 3. E-mail: [email protected].