Levomitsetin Borisov ZTP tashqi foydalanish uchun spirtli eritmasi 2,5 mg/ml, har biri 25 ml (shisha)

Tarkib

Har bir flakon (25 ml) tarkibida quyidagilar mavjud:

ta’sir etuvchi modda: xloramfenikol 62,5 mg;

yordamchi moddalar: 70% li etil spirti va tozalangan suv.

Tavsif

Tiniq, rangsiz yoki biroz sarg‘ish tusli, spirt hidli suyuqlik.

Farmakoterapevtik guruh

Mahalliy qo‘llash uchun antibiotiklar. Xloramfenikol. ATX kodi: D06AX02.

Farmakologik xususiyatlari

Farmakodinamika

Bakteriostatik antibiotik keng ta’sir doirasiga ega bo‘lib, mikrob hujayrasida oqsil sintezi jarayonini buzadi (yaxshi lipofillikka ega bo‘lib, bakteriyalarning hujayra membranasi orqali o‘tadi va bakteriya ribosomalarining 50S subbirligi bilan qaytar bog‘lanadi, ularda aminokislotalarning o‘sayotgan peptid zanjirlariga o‘tishi kechikadi, bu esa oqsil sintezining buzilishiga olib keladi).

Penitsillin, tetratsiklinlar, sulfanilamidlarga chidamli grammusbat va grammanfiy mikroorganizmlarning ko‘pchilik shtammlariga nisbatan faol.

Farmakokinetika

Dori vositasi sirtga qo‘llanganda shikastlanmagan teri va shilliq qavatlardan yaxshi o‘tmaydi, shuning uchun rezorbtiv ta’siri sust bo‘ladi. Sirtga surtilganda bakteriostatik ta’siri zararlangan joyning kattaligiga, yiring miqdoriga, mexanik to‘siqlarga bog‘liq. O‘rtacha mikroblarga qarshi ta’siri 6-12 soat davom etadi, shundan so‘ng preparatni surtishni takrorlash kerak.

Ko‘rsatmalar

Sezgir mikroorganizmlar keltirib chiqargan terining yengil darajadagi bakterial infeksiyalari (piodermiya, furunkulyoz, karbunkul); yuzaki jarohatlarga ishlov berish (chandiqlar, tirnalishlar, hasharotlar chaqishi).

Qo‘llash usuli va dozalari

Zararlangan yuzaga kuniga bir necha marta mahalliy surtiladi. Qo‘llash davomiyligi patologik jarayonning xususiyatiga, uning ifodalanganligiga, erishilgan samaraga bog‘liq.

Nojo‘ya ta’siri

Allergik reaksiyalar: teri toshmasi, qichishish, qizarish, to‘qimalarning shishishi. Etil spirti sirtga qo‘llanganda teri va shilliq pardalarga qisman so‘riladi va rezorbtiv umumtoksik ta’sir ko‘rsatishi mumkin (MNSni susaytiradi). Etil spirti bug‘laridan nafas olish uyquchanlik va bosh og‘rig‘ini keltirib chiqarishi mumkin. Uzoq vaqt qo‘llanganda qon, jigar va buyraklar faoliyati buzilishi, disbakterioz rivojlanishi mumkin.

Qarshi ko‘rsatmalar

Yuqori sezuvchanlik, suyak ko‘migida qon yaratilishining susayishi, o‘tkir intermittirlovchi porfiriya, glyukoza-6-fosfatdegidrogenaza yetishmovchiligi, jigar va/yoki buyrak yetishmovchiligi, teri kasalliklari (psoriaz, ekzema, zamburug‘li shikastlanishlar), teri butunligining buzilishi bilan kechuvchi o‘tkir yallig‘lanish jarayonlari; homiladorlik, emizish davri, 1 yoshgacha bo‘lgan bolalar.

Dozani oshirib yuborish

Ro‘yxatga olinmagan. Preparat dozasi oshirib yuborilganda teri va shilliq qavatlarning ta’sirlanishi, toshma, qichishish, to‘qimalarning qizarishi va shishishi ko‘rinishidagi mahalliy reaksiyalar kuzatilishi mumkin.

Ehtiyot choralari

Davolash jarayonida periferik qon manzarasini muntazam nazorat qilish zarur.

Katta yuzalarga surtilganda va bir vaqtning o‘zida etanol qabul qilinganda disulfiramsimon reaksiyalar rivojlanishi mumkin (teri qoplamlari giperemiyasi, taxikardiya, ko‘ngil aynishi, qusish, reflektor yo‘tal, talvasalar).

Etanol sirtga qo‘llanganda teri va shilliq qavatlar orqali qisman so‘riladi, buni bolalar, keksa bemorlar, jigar va buyrak faoliyati buzilgan bemorlarda qo‘llashda hisobga olish kerak.

Oson alangalanadi. Yong‘in manbalaridan uzoqda, zich yopilgan idishda saqlanadi. Chekmang.

Homiladorlik va emizish

Preparat homiladorlik va emizish davrida qo‘llash mumkin emas.

Bolalar

1 yoshgacha bo‘lgan bolalarda qo‘llanilmaydi.

Transport vositalari va boshqa mexanizmlarni boshqarish qobiliyatiga ta’siri

Transport yoki boshqa mexanizmlarni boshqarishga salbiy ta’sir ko‘rsatishi haqida ma’lumotlar yo‘q.

Boshqa dori vositalari bilan o‘zaro ta’siri

Tizimli so‘rilishning kamligi tufayli boshqa dori vositalari bilan klinik jihatdan ahamiyatli o‘zaro ta’sir ehtimoli kam. Qon yaratilishini susaytiruvchi preparatlar (sulfanilamidlar, sitostatiklar, pirazolin hosilalari) bilan bir vaqtda qo‘llash maqsadga muvofiq emas.

Chiqarish shakli

25 ml shisha idishda. Har bir flakon qog‘oz varag‘i bilan birga karton qutida.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda.

Bolalar qo‘li yetmaydigan joyda saqlang.

Yaroqlilik muddati

3 yil. Yaroqlilik muddati tugagandan keyin ishlatilmasin.

Dorixonalardan berish shartlari

Retsept bo‘yicha.

Ishlab chiqaruvchi

"Borisovskiy zavod meditsinskix preparatov" ochiq aksiyadorlik jamiyati, Belarus Respublikasi.