Mezakar SR (Mezacar SR) uzoq muddatli ta'sirga ega tabletkalar 400 mg №50 (5 blister х 10 tabletka)

Tarkib

1 ta tabletka tarkibida quyidagilar mavjud:

Faol moddasi: karbamazepin - 400 mg.

Yordamchi moddalar: mikrokristall sellyuloza, gipromeloza, natriy laurilsulfat, povidon (PVP K 30), suvsiz kolloid kremniy dioksidi, magniy stearati.

Dori shakli

Ta’siri uzaytirilgan tabletkalar.

Farmakoterapevtik guruh

Epilepsiyaga qarshi vositalar. ATX kodi: N03AF01.

Farmakologik xususiyatlari

Tritsiklik iminostilben hosilasi bo‘lgan tutqanoqqa qarshi vosita. O‘rtacha antidepressiv va normotimik ta’sir ko‘rsatadi. Terapevtik samara, birinchi navbatda, nerv impulslarining sinaptik uzatilishini tormozlash va shu bilan tutqanoq razryadlarining tarqalishini kamaytirish bilan bog‘liq. Bundan yuqori konsentratsiyalarda karbamazepin posttetanik potensiyalanishni pasaytiradi. Uch shoxli nerv nevralgiyasida og‘riq hissini kamaytiradi. Bu ta’sir uch shoxli nervning orqa miya yadrosida ta’sirotlarning sinaptik uzatilishi tormozlanishi bilan bog‘liq.

Farmakokinetika

Peroral qo‘llangandan so‘ng karbamazepin sekin va deyarli to‘liq so‘riladi. Yarim chiqarilish davri 8,5 soatni tashkil etadi va katta diapazonga ega (taxminan 1,72-12 soat). Muvozanat konsentratsiyasiga 2-8 kundan keyin erishiladi. Karbamazepinning 70-80% i qon plazmasi oqsillari bilan bog‘lanadi. Karbamazepin ichga bir marta qabul qilingandan so‘ng, dozaning 72 foizi metabolitlar ko‘rinishida buyraklar orqali organizmdan chiqariladi. Qolgan 28% qismi axlat bilan qisman o‘zgarmagan holda chiqariladi.

Qo‘llanilishi

Epilepsiya: oddiy parsial xurujlar (fokal xurujlar); murakkab parsial xurujlar (psixomotor xurujlar); asosan fokal genezli katta xurujlar (uyqu paytidagi katta xurujlar, diffuz katta xurujlar); epilepsiyaning aralash shakllari.

Uch shoxli nerv nevralgiyasi.

Genuin glossofaringeal nevralgiya.

Diabetik nevropatiyada og‘riq.

Tarqoq sklerozda epileptiform talvasalar.

Alkogol abstinent sindromida tutqanoq xurujlari rivojlanishining oldini olish.

Psixozlar (asosan maniakal-depressiv holatlarda, xavotirli-agitatsion va ipoxondrik depressiyalarda hamda katatonik qo‘zg‘alishda).

Qo‘llash usuli va dozalari

Mezakar® SR preparati bilan davolash kichik dozadan boshlanib, kasallikning xususiyati va og‘irlik darajasiga qarab har bir bemor uchun alohida tanlanadi. Keyin doza eng samarali qo‘llab-quvvatlovchi dozaga erishilgunga qadar asta-sekin oshiriladi. Bemor uchun preparatning optimal dozasi, ayniqsa kombinatsiyalangan terapiyada, uning qon plazmasidagi darajasiga qarab aniqlanadi. Karbamazepinning qon plazmasidagi terapevtik konsentratsiyasi, to‘plangan tajribaning guvohlik berishicha, 4-12 mkg/ml ni tashkil etadi.

Umumiy qabul qilingan dozalar diapazoni kuniga 400-1200 mg Mezakar® SR ni tashkil etadi, ular kuniga 1-2 marta bir martalik dozalarga bo‘linadi. Maksimal sutkalik doza 1600 mg dan oshmasligi kerak.

Talvasaga qarshi davolash.

Kattalarda kuniga 200-400 mg (1-2 tabletka) ni tashkil etadigan boshlang‘ich doza asta-sekin kuniga 800-1200 mg (4-6 tabletka) ga teng bo‘lgan qo‘llab-quvvatlovchi dozaga ko‘tariladi.

Tavsiya etilgan dozalash tartibi:

Boshlang‘ich doza har kuni: kattalarga 1 tabletkadan, sutkada 1 marta.

Qo‘llab-quvvatlovchi doza har kuni: kattalarga 1-2 tabletkadan sutkasiga 3 marta.

Alkogol abstinent sindromida statsionar sharoitda talvasa xurujlari rivojlanishining oldini olish.

O‘rtacha sutkalik doza 600 mg ni tashkil etadi, ular kuniga 3 marta bir martalik dozalarga taqsimlanadi. Og‘ir hollarda bu doza dastlabki kunlarda 1200 mg gacha oshirilishi mumkin (2 tabletkadan kuniga 3 mahal).

Mezakar® SRni oq isitmada sedativ-gipnotik vositalar bilan birga qo‘llash mumkin emas. Klinik talablarga muvofiq, zarurat tug‘ilganda, Mezakar® SR alkogol abstinensiyasini davolash uchun qo‘llaniladigan boshqa moddalar bilan kombinatsiyalanishi mumkin.

Davolashning butun davri davomida qon plazmasidagi Mezakar® SR 400 mg miqdorini muntazam ravishda nazorat qilib borish zarur.

Uch shoxli nerv nevralgiyasi, genuin glossofaringeal nevralgiya.

Dastlabki doza kuniga 200-400 mg ni tashkil etadi. Bu doza og‘riq butunlay yo‘qolguncha sutkasiga o‘rtacha 400-800 mg ga 2-4 marta ko‘paytiriladi. Qariyalar va yuqori sezuvchanlikka ega bemorlarga Mezakar® SR kuniga 200 mg bo‘lgan boshlang‘ich dozada buyuriladi. (1/2 tabletkadan sutkasiga 2 mahal).

Diabetik nevropatiyada og‘riq.

O‘rtacha sutkalik doza 3 mahal 600 mg ni tashkil etadi. Istisno hollarda Mezakar® SR dozasini 1200 mg gacha oshirish mumkin.

Tarqoq sklerozda epileptiform talvasalar.

O‘rtacha sutkalik dozasi 400-800 mg (1-2 tabletkadan kuniga 2-4 mahal).

Ko‘rsatma. Og‘ir yurak-qon tomir kasalliklari, jigar va buyrak zararlanishi bo‘lgan bemorlarga, shuningdek, keksalarga preparatning kamroq dozalari buyuriladi.

Tabletkalar ovqat vaqtida yoki ovqatdan keyin yetarli miqdorda suyuqlik bilan ichiladi.

Qo‘llash davomiyligi ko‘rsatma va bemorning preparatga bo‘lgan individual reaksiyasiga bog‘liq. Nevralgiyani davolashda Mezakar® SRni bir necha hafta davomida og‘riqni qoldirish uchun yetarli bo‘lgan qo‘llab-quvvatlovchi dozada buyurish foydali bo‘ldi. Dozani ehtiyotkorlik bilan pasaytirish orqali kasallik belgilarining o‘z-o‘zidan remissiyaga uchramaganligini aniqlash kerak. Og‘riq xurujlari qayta boshlanganida, davolash avvalgi qo‘llab-quvvatlovchi doza bilan davom ettiriladi.

Diabetik nevropatiyada va epileptiform talvasalarda, tarqoq sklerozda og‘riqni davolash davomiyligi nevralgiyalardagi kabi belgilangan.

Alkogolli abstinensiya sindromini Mezakar® SR preparati bilan davolash 7-10 kun davomida dozani asta-sekin kamaytirish orqali to‘xtatiladi.

Nojo‘ya ta’sirlari

Nojo‘ya ta’sirlar monoterapiyaga qaraganda kombinatsiyalangan davolashda ko‘proq uchraydi.

Ko‘pincha ko‘ngil aynishi va uyquchanlik, bosh aylanishi, charchoq, yurishning buzilishi, miyacha ataksiyasi va bosh og‘rig‘i paydo bo‘lishi mumkin. Keksa yoshdagi bemorlarda es-hushning chalkashligi va bezovtalik rivojlanishi mumkin.

Mezakar® SR preparati bilan davolanganda yashirin psixozlar faollashishi mumkin.

Kamdan-kam hollarda ixtiyorsiz harakatlar, masalan, keng ko‘lamli tremor, mushaklar qisqarishi yoki nistagm paydo bo‘ladi. Bundan tashqari, keksa yoshdagi va bosh miyasi shikastlangan bemorlarda yuz-jag‘ sohasida tirishish (yuz-jag‘ diskineziyalari), aylanma harakatlar (xoreoatetoz) ko‘rinishidagi ixtiyorsiz harakatlar paydo bo‘lishi mumkin. Ayrim hollarda nutqning buzilishi, soxta sezgilar, mushaklar kuchsizligi, asablarning yallig‘lanishi (periferik nevrit), shuningdek, oyoqlarning falajlanishi (parezlar) va ta’m bilishning buzilishi holatlari qayd etilgan.

Ushbu hodisalarning aksariyati 8-14 kundan keyin yoki dozani vaqtincha kamaytirgandan so‘ng o‘z-o‘zidan yo‘qoladi.

Ayrim hollarda ko‘z shilliq pardasining yallig‘lanishi (kon’yunktivitlar) paydo bo‘lib, ba’zan ko‘rishning buzilishiga (ko‘z akkomodatsiyasining buzilishi, ko‘zning ikkilanishi, ko‘rishning noaniqligi) o‘tadi.

Isitma bilan yoki isitmasiz allergik teri reaksiyalari holatlari qayd etilgan.

Qon manzarasining quyidagi buzilishlari yuzaga kelishi mumkin: periferik qonda leykotsitlar yoki trombotsitlar sonining ko‘payishi (leykotsitoz, eozinofiliya) yoki kamayishi (leykopeniya) (trombotsitopeniya).

Leykopeniya (ko‘pincha neytropeniya), trombotsitopeniya, terida allergik toshmalar (ekzantemalar) va isitma paydo bo‘lganda Mezakar® SR bekor qilinadi.

Ba’zan ishtahaning pasayishi, og‘iz qurishi, ko‘ngil aynishi va qusish, kamdan-kam hollarda ich ketishi yoki qabziyat paydo bo‘ladi.

Jigar funksional sinamalari ko‘rsatkichlarida o‘zgarishlar yuzaga kelishi mumkin, ba’zi hollarda sariqlik paydo bo‘ladi, ayrim hollarda gepatitning turli shakllari (xolestatik, gepatotsellyulyar, granulyomatoz, aralash) paydo bo‘ladi.

Erkaklarda sut bezlarining kattalashishi (ginekomastiya) va ayollarda sut bezlaridan sutning o‘z-o‘zidan oqishi (galaktoreya) ning ayrim holatlari haqida xabar berilgan.

Mezakar® SR qalqonsimon bez funksiyasi ko‘rsatkichlariga ta’sir ko‘rsatishi mumkin.

Ba’zi hollarda shish paydo bo‘lishi va tana vaznining ortishi kuzatildi.

Mezakar® SR qon zardobidagi kalsiy miqdorini kamaytirishi mumkin. Ayrim hollarda bu suyaklarning yumshab qolishiga (osteomalyatsiyaga) olib keladi.

Preparatga nisbatan o‘pkaning yuqori sezuvchanligi reaksiyalarining isitma, hansirash (dispnoe), o‘pka yallig‘lanishi va o‘pka fibrozlari bilan kechadigan alohida holatlari tasvirlangan.

Kamdan kam hollarda buyrak funksiyasining buzilishi kuzatiladi, bu siydikda oqsil miqdorining ko‘payishi (proteinuriya), siydikda qon paydo bo‘lishi (gematuriya), siydik ajralishining kamayishi (oliguriya) bilan ifodalanadi.

Kamdan-kam hollarda preparatga nisbatan yuqori sezuvchanlikning sekinlashgan reaksiyalari rivojlanadi.

Keksa yoshdagi bemorlarga Mezakar® SR pastroq dozalarda buyuriladi.

Qarshi ko‘rsatmalar

Mezakar® SR suyak ko‘migi shikastlanganda, yurakda qo‘zg‘alish o‘tkazilishining buzilishida (atrioventrikulyar blokada), ta’sir etuvchi moddaga, uch siklli antidepressantlarga yoki preparatning yordamchi komponentlariga yuqori sezuvchanlikda, shuningdek, o‘tkir almashinuvchi porfiriyada qo‘llash mumkin emas.

Dorilarning o‘zaro ta’siri

Markaziy asab tizimi tomonidan nojo‘ya ta’sirlar rivojlanishi sababli, Mezakar® SRni MAO ingibitorlari bilan birgalikda qo‘llashdan saqlanish lozim. Bir dori vositasidan ikkinchisiga o‘tganda, davolanishda 14 kunlik tanaffus qilinadi!

Mezakar® SR bir vaqtning o‘zida qo‘llanilganda, zarurat tug‘ilganda, klinik talablarga muvofiq quyidagi ta’sir etuvchi moddalarning dozalari o‘zgartiriladi: klonazepam, etosuksimid, primidon, valproat kislotasi, lamotrijin (epilepsiyani davolash uchun boshqa vositalar), alprazolam, klobaz, kortikosteroidlar (masalan, prednizolon, deksametazon), siklosporin, digoksin, tetratsiklinlar, masalan, doksitsiklin, felodipin, galoperidol, imipramin, metadon, teofillin, antikoagulyantlar, masalan, varfarin, fenprokoumon, dikumarol.

Boshqa tutqanoqqa qarshi vositalar singari, Mezakar® SR ham gormonal kontratseptivlarning ta’sirini susaytirishi mumkin.

Mezakar® SR qon plazmasida fenitoin konsentratsiyasini ham oshirishi, ham kamaytirishi mumkin, natijada, istisno hollarda, hushning chalkashishi va hatto koma rivojlanishi holatlari kuzatilishi mumkin.

Qon plazmasidagi Mezakar® SR darajasini fenobarbital, primidon, valproat kislotasi, teofillin pasaytirishi mumkin. Boshqa tomondan, valproat kislotasi va primidon qon zardobida farmakologik faol metabolit (Mezakar® SR metabolizmi mahsuloti) karbamazepin-10,11-epoksid darajasini oshirishi mumkin.

O‘zaro ta’sir tufayli, ayniqsa bir nechta tutqanoqqa qarshi dori vositalarini bir vaqtning o‘zida qo‘llashda, ularning qon plazmasidagi miqdorini nazorat qilish va zarur hollarda Mezakar® SR dozasini o‘zgartirish tavsiya etiladi.

Quyidagi faol moddalar qon plazmasida Mezakar® SR konsentratsiyasini oshirishi mumkin: antibiotik-makrolidlar (eritromitsin, jozamitsin), izoniazid, kalsiy antagonistlari (verapamil, diltiazem), atsetazolamid, dekstropropoksifen/propoksifen, viloksazin, danazol, nikotinamid kattalarda yuqori dozalarda (B guruhi vitamini), ehtimol simetidin va dezipramin ham.

Mezakar® SR bilan davolanish paytida spirtli ichimliklarni iste’mol qilishdan voz kechish kerak, chunki u Mezakar® SR ta’sirini kutilmagan tarzda o‘zgartirishi va kuchaytirishi mumkin.

Maxsus ko‘rsatmalar

Nojo‘ya ta’sirlar, shuningdek, preparatga yuqori sezuvchanlik reaksiyalari yuzaga kelishi mumkinligi sababli, vaqti-vaqti bilan qon manzarasi tahlillarini o‘tkazish hamda jigar va buyrak faoliyatini tekshirish tavsiya etiladi. Bu muolaja boshlanishidan oldin, keyin muolajaning birinchi oyida haftasiga 1 marta, keyin esa oyiga 1 marta amalga oshiriladi. Keyin, 6 oylik davolanishdan so‘ng, bu nazoratlar yiliga 2-4 marta amalga oshiriladi.

Epilepsiya bilan og‘rigan bemorlarda Mezakar® SR bilan davolashni to‘xtatish va ularni boshqa epilepsiyaga qarshi vositaga o‘tkazish asta-sekin, uning dozasini kamaytirgan holda amalga oshiriladi.

Glaukoma bilan og‘rigan bemorlarda ko‘z ichki bosimi muntazam nazorat qilib turiladi.

Homiladorlik yoki emizish davrida qo‘llash

Homiladorlik davrida karbamazepinni tayinlash masalasini hal qilishda, ayniqsa homiladorlikning dastlabki 3 oyida, terapiyaning kutilayotgan afzalliklari va uning mumkin bo‘lgan asoratlarini sinchiklab taqqoslash lozim.

Homiladorlik davrida, ayniqsa homiladorlikning 20 va 40-kunlari oralig‘ida, Mezakar® SR xurujlarni nazorat qiluvchi eng past dozada buyuriladi.

Karbamazepinning ta’sir etuvchi moddasini qo‘llash bilan bog‘liq ayrim hollarda homilaning rivojlanish nuqsonlari, shu jumladan spina bifidaning ayrim holatlari haqida xabar berilgan. Iloji bo‘lsa, Mezakar® SRni boshqa tutqanoqqa qarshi vositalar yoki boshqa dori vositalari bilan birlashtirishdan saqlanish kerak.

Chaqaloqda gemorragik asoratlarning oldini olish uchun homiladorlikning so‘nggi haftalarida ayolga K1 vitaminini profilaktik yuborish tavsiya etiladi.

Mezakar® SR ona sutiga o‘tadi, ammo juda oz miqdorda, terapevtik dozalarda qo‘llanilganda bola uchun umuman xavf tug‘dirmaydi. Faqat emizikli bolada vaznning yetarli darajada qo‘shilmasligi yoki uyqusirashning kuchayishi kuzatilsa, emizish to‘xtatiladi.

Avtotransport yoki boshqa mexanizmlarni boshqarishda reaksiya tezligiga ta’sir qilish qobiliyati

Davolash vaqtida avtotransportni boshqarishda va diqqatning yuqori konsentratsiyasini va psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishda ehtiyot bo‘lish kerak.

Dozani oshirib yuborish

Dozaning oshirib yuborilishi, masalan, qaltirash (tremor), bosh miya qo‘zg‘alganda yuzaga keladigan tutqanoq xurujlari (tonik-klonik tutqanoqlar), qo‘zg‘alish, shuningdek, nafas olishning buzilishi va kollaps, taxikardiya va atrioventrikulyar blokada, nafas olish va yurak faoliyatining to‘xtashigacha ongning buzilishi kabi nojo‘ya ta’sirlarning kuchayishi bilan tavsiflanadi.

Mezakar® SR o‘tkir zaharlanishini davolash uchun maxsus antidot mavjud emas. Davolash simptomatik. Preparat dozasini oshirib yuborish preparatni zudlik bilan to‘xtatishni talab qiladi.

Chiqarish shakli

Blisterda 10 tadan tabletka, o‘ramda 5 tadan blister.

Saqlash shartlari

Quruq, yorug‘likdan himoyalangan, bolalar qo‘li yetmaydigan joyda, 25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

KUSUM XELTXKER PVT. LTD.

SP 289 (A), RIICO INDL. AREA, CHOPANKI, BHIWADI (Raj.), Hindiston.