Nazivin Merck burun spreyi 0,05% 10 ml (flakon)

Tarkib

1 ml preparat tarkibida quyidagilar mavjud:

Faol moddasi: oksimetazolin gidroxlorid - 0,500 mg.

Yordamchi moddalar: limon kislotasi monogidrati - 0,6093 mg, natriy sitrat digidrati - 3,823 mg, glitserol (85%) - 24,348 mg; benzalkoniy xlorid (50% li eritma) - 0,100 mg; tozalangan suv - 978,600 mg (0,05% uchun).

Tavsif

Deyarli tiniq, rangsizdan biroz sarg‘ish ranggacha bo‘lgan eritma.

Chiqarish shakli

Burun spreyi 0,05%. 10 ml dan oq polietilendan yasalgan, burab yopiladigan qopqoq bilan berkitilgan, purkagichli oq polietilen flakonga. 1 flakon qo‘llash bo‘yicha yo‘riqnoma bilan birga karton qutiga solinadi.

Farmakoterapevtik guruh

Kongestivga qarshi vosita - vazokonstriktor (alfa-adrenomimetik). ATX kodi: R01AA05.

Farmakologik xususiyatlari

Nazivin® (oksimetazolin) tomirlarni toraytiruvchi ta’sir ko‘rsatadi. Burunning yallig‘langan shilliq pardasiga mahalliy surtilsa, uning shishini va burundan ajralma kelishini kamaytiradi. Burun orqali nafas olishni tiklaydi. Shilliq qavat shishini bartaraf etish burun yondosh bo‘shliqlari, o‘rta quloq bo‘shlig‘i aeratsiyasini tiklashga yordam beradi, bu esa bakterial asoratlar (gaymorit, sinusit, o‘rta otit) rivojlanishining oldini oladi.

Terapevtik konsentratsiyalarda mahalliy intranazal qo‘llanganda shilliq qavatni ta’sirlamaydi, giperemiya chaqirmaydi.

Mahalliy intranazal qo‘llanganda preparat tizimli ta’sirga ega emas.

Preparat tez (bir necha daqiqa ichida) ta’sir qila boshlaydi. Nazivin ta’sirining davomiyligi 12 soatgacha.

Qo‘llanilishi

tumov bilan kechadigan o‘tkir respirator kasalliklarni davolash;

allergik rinit;

vazomotor rinit;

burun bo‘shlig‘ining qo‘shimcha bo‘shliqlari yallig‘lanishi, yevstaxiit, o‘rta otitda drenajni tiklash uchun;

burun yo‘llaridagi diagnostik muolajalardan oldin shishni bartaraf etish uchun.

Qo‘llash usuli va dozalari

Kattalar va 6 yoshdan oshgan bolalarga: har bir burun yo‘liga 1 tadan sutkada 2-3 marta. Preparat 5-7 kun qo‘llaniladi.

Tavsiya etilganidan yuqori dozalarni faqat shifokor nazorati ostida qo‘llash mumkin.

Nojo‘ya ta’sirlari

Ba’zan: burun pardalarining achishishi yoki qurishi, aksirish. Kamdan-kam hollarda: Nazivin® qo‘llanilishining ta’siri o‘tib ketgandan so‘ng, burunning kuchli "tiqilib qolish" hissi (reaktiv giperemiya). Mahalliy burun orqali qo‘llanganda dozaning ko‘p marta oshirib yuborilishi ba’zan pulsning tezlashishi (taxikardiya) va arterial bosimning ko‘tarilishi kabi tizimli simpatomimetik ta’sirlarga olib keladi. Juda kam hollarda bezovtalik, uyqusizlik, charchoq, bosh og‘rig‘i va ko‘ngil aynishi kuzatilgan.

Tomirlarni toraytiruvchi dorilarni uzoq vaqt uzluksiz qo‘llash taxifilaksiyaga, burun bo‘shlig‘i shilliq qavatining atrofiyasiga va burun shilliq qavatining qayta shishishiga (medikamentoz rinit) olib kelishi mumkin.

Qarshi ko‘rsatmalar

Atrofik rinit, yopiq burchakli glaukoma, preparat komponentlariga yuqori sezuvchanlik. 6 yoshgacha bo‘lgan bolalar yoshi.

Ehtiyotkorlik bilan

Monoaminoksidaza ingibitorlari va qon bosimini ko‘tarishga yordam beradigan boshqa dorilarni qabul qilgandan keyin 10 kungacha bo‘lgan davrda qabul qiladigan bemorlarda; ko‘z ichi bosimi ko‘tarilganda, yaqqol namoyon bo‘lgan ateroskleroz, taxikardiya, feoxromotsitoma, homiladorlik va laktatsiya davrida, yurak-qon tomir kasalliklarining og‘ir shakllarida (gipertoniya, stenokardiya); tireotoksikoz va qandli diabetda.

Dorilarning o‘zaro ta’siri

MAO blokatorlari va tritsiklik antidepressantlar bir vaqtning o‘zida buyurilganda - arterial bosimning ko‘tarilishi.

Tomirlarni toraytiruvchi boshqa dori vositalarini birgalikda qo‘llash nojo‘ya ta’sirlar rivojlanish xavfini oshiradi.

Maxsus ko‘rsatmalar

Preparatni uzoq muddat qo‘llash va dozasini oshirib yuborishdan saqlanish kerak, ayniqsa bolalarda.

Homiladorlik va laktatsiya

Homiladorlik yoki emizish davrida qo‘llanganda tavsiya etilgan dozadan oshirmaslik kerak. Preparat ona va homila uchun xavf va foyda nisbati sinchkovlik bilan baholangandan keyingina qo‘llanilishi kerak.

Transport vositalari va uskunalarni boshqarish qobiliyatiga ta’siri

Tarkibida oksimetazolin bo‘lgan tumovga qarshi vositalarni tavsiya etilgan dozadan ortiq miqdorda uzoq vaqt qo‘llagandan yoki qabul qilgandan so‘ng, yurak-qon tomir tizimi va markaziy asab tizimiga umumiy ta’sirini istisno qilib bo‘lmaydi. Bunday hollarda transport vositasi yoki uskunani boshqarish qobiliyati pasayishi mumkin.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Doza sezilarli darajada oshirib yuborilganda yoki tasodifan ichilganda quyidagi alomatlar paydo bo‘lishi mumkin: ko‘z qorachiqlarining torayishi, ko‘ngil aynishi, qusish, sianoz, isitma, taxikardiya, aritmiya, kollaps, yurak faoliyatining susayishi, arterial gipertenziya, o‘pka shishi, nafas olishning buzilishi. Bundan tashqari, ruhiy buzilishlar, shuningdek, uyquchanlik, tana haroratining pasayishi, bradikardiya, arterial gipotenziya, nafas olishning to‘xtashi bilan kechadigan markaziy asab tizimi funksiyalarining susayishi paydo bo‘lishi mumkin.

Preparatni ichga qabul qilish bilan bog‘liq dozani oshirib yuborishda oshqozonni yuvish, faollashtirilgan ko‘mir buyuriladi.

Saqlash shartlari

25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

"Merk KAA" firmasi, Germaniya

Frankfurt ko‘chasi, 250, 64293 Darmshtadt

Frankfurter str., 250, 64293 Darmstadt

Iste’molchilarning e’tirozlari quyidagi manzilga yuborilsin: "Nikomed"

100066, Toshkent shahri, Beshyog‘och ko‘chasi, 1-uy, "NBU" biznes markazi

tel: (99871) 232-65-24

faks: (99871) 239-15-18

internetdagi manzili: www.nycomed.ru