Rinazolin (Rinazolinum) burun tomchilari 0,25 mg / ml, 10 ml (shisha)

Tarkib

1 ml tomchi tarkibida:

Ta’sir etuvchi modda: oksimetazolin gidroxlorid 100% modda hisobida 0,25 mg yoki 0,5 mg.

Yordamchi moddalar: benzalkoniy xlorid, natriy xlorid, natriy digidrofosfat digidrat, dinatriy fosfat dodekagidrat, inyeksiya uchun suv.

Tavsif

Tiniq, rangsiz suyuqlik.

Dori shakli

Burun tomchilari.

Farmakoterapevtik guruh

LOR a’zolari kasalliklarini davolash uchun vosita (oksimetazolin). ATX kodi: R01AA05.

Farmakologik xususiyatlari

Rinazolin mahalliy tomir toraytiruvchi vositalar (dekongensantlar) guruhiga kiradi. Alfa-adrenomimetik ta’sir ko‘rsatadi.

Surtilgan joydagi tomirlarni toraytiradi, burun shilliq qavati va yuqori nafas yo‘llarining shishini kamaytiradi, burundan ajralmalarni kamaytiradi. Burun orqali nafas olishni tiklaydi. Qo‘shimcha bo‘shliqlar, o‘rta quloq bo‘shlig‘i aeratsiyasini tiklashga yordam beradi, bu esa bakterial asoratlar (gaymorit, sinusit, o‘rta otit) rivojlanishining oldini oladi.

Oksimetazolin virusga qarshi, yallig‘lanishga qarshi, immunomodulyator va antioksidant ta’sir ko‘rsatadi. Ushbu kombinatsiyalangan ta’sir mexanizmi tufayli klinik tadqiqotlar o‘tkazish paytida o‘tkir rinit belgilarini (burun bitishi, rinoreya, aksirish, o‘zini yomon his qilish) tezroq va samaraliroq bartaraf etish isbotlangan.

Mahalliy burun orqali qo‘llanilganda terapevtik konsentratsiyalarda burun shilliq qavatini ta’sirlamaydi, giperemiyani keltirib chiqarmaydi. Ta’sir davomiyligi - 12 soatgacha.

Qo‘llanilishi

Burun bitishi bilan kechadigan o‘tkir respirator kasalliklar.

Allergik rinit.

Vazomotor rinit.

Burun bo‘shlig‘ining qo‘shimcha bo‘shliqlari, yevstaxiit, o‘rta otit kasalliklarida drenaj va burun orqali nafas olishni tiklash uchun.

Burun yo‘llaridagi diagnostik muolajalardan oldin shishni bartaraf etish uchun.

Qo‘llash usuli va dozalari

Bevosita preparatni qo‘llashdan oldin flakonni kaftda ushlab, tana haroratigacha isitish kerak. Preparatni yuborishdan oldin burunni yaxshilab tozalash kerak. Qopqog‘i burab chiqariladi, olinadi va flakon korpusini yengil bosib turib, burunga 1-2 tomchi eritma tomiziladi.

Kattalar va 6 yoshdan katta bolalar.

0,05% li eritmasidan har bir burun yo‘liga 1-2 tomchidan sutkada 2-3 marta tomizing.

1 yoshdan 6 yoshgacha bo‘lgan bolalar.

0,025% li eritmasidan har bir burun yo‘liga 1-2 tomchidan sutkada 2-3 marta tomizing.

Preparatni ko‘pi bilan 5-7 kun qo‘llash kerak. Preparatni bir necha kundan keyingina qayta qo‘llash mumkin.

Nojo‘ya ta’sirlari

Nafas olish tizimi tomonidan: burundagi noqulaylik, burun shilliq qavatining achishishi yoki qurishi, aksirish, burundan qon ketishi.

Rinazolinni qo‘llashning ta’siri tugagandan so‘ng, burunda kuchli tiqilish hissi (reaktiv giperemiya) kuzatilishi mumkin. Chaqaloqlar va yosh bolalarda apnoe (ayniqsa, dozani oshirib yuborish holatida).

Asab tizimi tomonidan: bosh og‘rig‘i, uyquchanlik, charchoq, talvasalar, gallyutsinatsiyalar (ayniqsa bolalarda).

Yurak-qon tomir tizimi tomonidan: mahalliy burun orqali qo‘llash palpitatsiya, taxikardiya, arterial gipertenziya kabi tizimli ta’sirlarni keltirib chiqarishi mumkin.

Immun tizimi tomonidan: allergik reaksiyalar, shu jumladan toshmalar, qichishish, angionevrotik shish paydo bo‘lishi mumkin.

Qarshi ko‘rsatmalar

Preparat komponentlariga yuqori sezuvchanlik, atrofik rinit. Monoaminoksidaza ingibitorlari qo‘llanganda va MAO ingibitorlari, shuningdek, qon bosimini ko‘tarishga yordam beradigan boshqa dorilar bilan davolash to‘xtatilgandan keyin 2 hafta davomida. Ko‘z ichi bosimi ko‘tarilganda, ayniqsa yopiq burchakli glaukomada. Yurak-qon tomir kasalliklarining og‘ir shakllarida (masalan, yurak ishemik kasalligi, arterial gipertenziya). Feoxromotsitoma. Metabolik buzilishlar (gipertireoz, qandli diabet, porfiriya). Prostata bezi gipertrofiyasi.

1 yoshgacha bo‘lgan bolalar (0,025% uchun), 6 yoshgacha bo‘lgan bolalar (0,05% uchun).

Dorilarning o‘zaro ta’siri

MAO ingibitorlari va qon bosimining ko‘tarilishi xavfi tufayli qon bosimining ko‘tarilishiga olib keladigan boshqa dorilarni qo‘llamaslik. Tomirlarni toraytiruvchi boshqa dori vositalarini birgalikda qo‘llash nojo‘ya ta’sirlar rivojlanish xavfini oshiradi.

Maxsus ko‘rsatmalar

Preparatni uzoq muddat qo‘llash va dozasini oshirib yuborishdan saqlanish kerak. Burun shishiga qarshi vositani uzoq vaqt qo‘llash preparat ta’sirining susayishiga olib kelishi mumkin. Ushbu vositani suiiste’mol qilish shilliq qavatning atrofiyasiga va dori-darmonli rinit bilan reaktiv giperemiyaga olib kelishi mumkin.

Preparat qo‘llangandan so‘ng surunkali rinit bilan og‘rigan bemorlarni alohida kuzatib borish zarur. Tavsiya etilganidan yuqori dozalarda, faqat shifokor nazorati ostida qo‘llash lozim.

Homiladorlik yoki emizish davrida qo‘llash

Homiladorlik va emizish davrida preparat juda ehtiyotkorlik bilan qo‘llaniladi. Tavsiya etilgan dozani oshirib yuborishga yo‘l qo‘yilmaydi.

Bolalar

Rinazolinni 0,025% 1 yoshgacha bo‘lgan bolalarga qo‘llash mumkin emas; Rinazolin 0,05% - 6 yoshgacha bo‘lgan bolalarga.

Avtotransportni boshqarishda yoki boshqa mexanizmlar bilan ishlashda reaksiya tezligiga ta’sir qilish qobiliyati

Preparat tavsiya etilgan dozadan ortiq miqdorda uzoq muddat qo‘llangandan so‘ng, yurak-qon tomir tizimiga umumiy ta’sirini istisno qilib bo‘lmaydi. Bunday hollarda transport vositasini boshqarish qobiliyati pasayishi mumkin.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Dozaning sezilarli darajada oshirib yuborilishi yoki tasodifan ichga qabul qilingandan so‘ng quyidagi belgilar paydo bo‘lishi mumkin: midriaz, ko‘ngil aynishi, qusish, sianoz, tana haroratining ko‘tarilishi, spazmlar, taxikardiya, palpitatsiya, aritmiya, yurak-qon tomir yetishmovchiligi, yurak to‘xtashi, ko‘p terlash, hayajonlanish, konvulsiyalar, arterial gipertenziya, o‘pka shishi, nafas olishning buzilishi, rangparlik, mioz, giposmiya, ruhiy buzilishlar.

Bundan tashqari, markaziy asab tizimi faoliyatining susayishi yuzaga kelishi mumkin, bu uyquchanlik, tana haroratining pasayishi, bradikardiya, arterial gipotenziya, apnoe va koma rivojlanishi bilan namoyon bo‘ladi.

Doza oshib ketganda terapevtik choralar: oshqozonni yuvish, faollashtirilgan ko‘mir qabul qilish, o‘pkani ventilyatsiya qilish. Qon bosimi pasayganda fentolaminni qo‘llash. Vazopressor dorilarni qabul qilmaslik kerak. Zarurat tug‘ilganda, tutqanoqqa qarshi davolash ko‘rsatilgan.

Chiqarish shakli

10 ml dan polietilen flakonda. Qadoqda 1 flakon.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retseptsiz.

Ishlab chiqaruvchi

"Farmak" OAJ.

Ukraina, 04080, Kiyev sh., Frunze ko‘chasi, 63.