Nebutamol ingalatsiya uchun eritmasi 1 mg/ml, 2 ml №10 (idishlar)

Tarkib

1 ta konteynerda quyidagilar mavjud:

Faol moddasi: 2,0 mg yoki 2,5 mg salbutamol sulfat salbutamolga qayta hisoblanganda.

Yordamchi moddalar: natriy xlorid, inyeksiya uchun suv.

Tavsif

Tiniq, rangsiz suyuqlik.

Dori shakli

Ingalyatsiya uchun eritma.

Farmakoterapevtik guruh

Astmaga qarshi preparatlar. Beta-2-adrenoretseptorlarning selektiv agonistlari. ATX kodi: R03AC02.

Farmakologik xususiyatlari

Farmakodinamika

Salbutamol beta-2-adrenoretseptorlarning selektiv agonisti hisoblanadi. Terapevtik dozalarda bronxial mushaklarning beta-2-adrenoretseptorlariga ta’sir qiladi, yurakning beta-1-adrenoretseptorlariga minimal yoki butunlay ta’sir qilmaydi.

Farmakokinetika

Ingalyatsion qo‘llanilgandan so‘ng, yuborilgan dozaning 10 dan 20% gacha qismi pastki nafas yo‘llariga yetib boradi. Qolgani yetkazib beruvchi tizimda yoki og‘iz-halqumda qolib, u yerdan yutiladi. Nafas yo‘llariga yetib borgan dozaning bir qismi o‘pka to‘qimalariga so‘riladi va qon aylanishiga o‘tadi, ammo o‘pkada metabolizmga uchramaydi.

Preparat ta’sirining boshlanishi ingalyatsiyadan keyin 4-5 daqiqaga to‘g‘ri keladi, ta’sir davomiyligi 4-6 soatni tashkil etadi.

Tizimli qon aylanishiga tushgandan so‘ng, preparat jigarda metabolizmga uchraydi, asosan buyraklar tomonidan o‘zgarmagan holda va fenolsulfat metaboliti ko‘rinishida chiqariladi.

Preparatning burun-halqumdan ovqat hazm qilish tizimiga o‘tgan dozasi oshqozon-ichak traktidan so‘riladi, jigarda fenolsulfatli birikmagacha metabolizmning birinchi bosqichidan o‘tadi, keyin buyraklar orqali chiqariladi.

Qo‘llanilishi

Preparat bronxial astma xurujlarini to‘xtatish, shuningdek, surunkali obstruktiv o‘pka kasalligi bilan og‘rigan bemorlarni davolash uchun ko‘rsatilgan.

Qo‘llash usuli va dozalari

Nebutamol preparati og‘iz orqali nebulayzer yordamida ingalyatsion qo‘llash uchun mo‘ljallangan bo‘lib, shifokor nazorati ostida qo‘llaniladi.

Eritmani inyeksiya qilish yoki yutish mumkin emas.

Kattalar (jumladan, keksa yoshdagi bemorlar)

Salbutamolning ingalyatsiya yo‘li bilan qabul qilinadigan odatdagi boshlang‘ich dozasi 2-2,5 mg ni tashkil etadi. U 4-5 mg gacha oshirilishi mumkin. Ingalyatsiyani kuniga 4 martagacha takrorlash mumkin.

Nafas yo‘llarining og‘ir obstruksiyasi bo‘lgan katta yoshli bemorlarni davolash uchun dozalar kuniga 40 mg gacha oshirilishi mumkin, biroq bunday davolash shifokorning sinchkov nazorati ostida statsionar sharoitda o‘tkazilishi lozim.

Bolalar

Salbutamolning ingalyatsiya yo‘li bilan qabul qilinadigan odatdagi boshlang‘ich dozasi 2-2,5 mg ni tashkil etadi. U 4-5 mg gacha oshirilishi mumkin. Ingalyatsiyani kuniga 4 martagacha takrorlash mumkin.

18 oygacha bo‘lgan bolalarda nebulizatsiya yo‘li bilan salbutamolni qo‘llashning klinik samaradorligi aniqlanmagan.

Tranzitor gipoksemiya bo‘lishi mumkinligi sababli, qo‘shimcha kislorod terapiyasi o‘tkazish zarurligini hisobga olish lozim.

Nebutamol odatda suyultirilmagan holda qo‘llaniladi. Biroq, agar ingalyatsiyalar uzoq vaqt (10 daqiqadan ortiq) davomida o‘tkazilishi kerak bo‘lsa, konteyner tarkibi steril fiziologik eritma bilan suyultirilishi mumkin.

Aerozol ingalyatsiyasi maxsus yuz niqobi yoki mundshtuk yordamida amalga oshirilishi mumkin. Ingalyatsiya o‘tkazilayotgan xonani vaqti-vaqti bilan shamollatib turish lozim. Gipoventilyatsiya orqali gipoksiya rivojlanish xavfi yuzaga kelgan taqdirda, nafas olinadigan havoni kislorod bilan boyitish lozim.

Preparatning dozasini va qo‘llash chastotasini oshirishni faqat shifokor amalga oshirishi mumkin, chunki doza oshib ketganda nojo‘ya ta’sir yuzaga kelishi mumkin.

Nebutamol preparatini qo‘llash bo‘yicha yo‘riqnoma

Nebulayzerni ishlatishga tayyorlang.

Polimer paketni oching va u yerdan bir martalik konteynerni oling. Zarurat bo‘lmasa, konteynerni paketdan chiqarmang.

Olingan konteynerni silkiting. Boshqa konteynerlarni polimer paketda qoldiring va ularni karton qutiga joylashtiring.

Konteynerning yuqori chetidan ushlab, ikkinchi chetini burab, konteynerni oching.

Konteynerni nebulayzerga ochiq tomoni bilan pastga qaratib joylashtiring va biroz bosing. Preparatning hammasi nebulayzerga oqib ketganiga ishonch hosil qiling.

Nebulayzerni yig‘ing va undan belgilangan maqsadda foydalaning.

Ishlatgandan so‘ng nebulayzerni yuving, preparat qoldiqlarini zararsizlantiring.

Nojo‘ya ta’sirlari

Quyida keltirilgan nojo‘ya ta’sir a’zolar va tizimlar bo‘yicha hamda paydo bo‘lish chastotasiga ko‘ra tasniflangan. Yuzaga kelish chastotasi juda tez-tez (1/10), tez-tez (1/100 va (1/10), tez-tez emas (1/1000 va (1/100), kamdan-kam (1/10000 va (1/1000), juda kamdan-kam (1/10000), shu jumladan yakka holatlar sifatida tasniflanadi. Umuman olganda, juda tez-tez uchraydigan va tez-tez uchraydigan nojo‘ya ta’sirlar klinik tadqiqotlar ma’lumotlariga ko‘ra aniqlanadi, kamdan-kam uchraydigan va juda kam uchraydigan nojo‘ya ta’sirlar esa spontan xabarlar ma’lumotlariga ko‘ra aniqlanadi.

Immun tizimi tomonidan: juda kam hollarda - yuqori sezuvchanlik reaksiyalari, jumladan angionevrotik shish, eshakemi, bronxospazm, arterial gipotenziya va kollaps.

Metabolik buzilishlar: kamdan-kam hollarda - gipokaliyemiya. Potensial og‘ir gipokaliyemiya beta-2-agonistlar bilan davolash natijasi bo‘lishi mumkin; juda kam hollarda - laktoatsidoz. Vena ichiga yoki nebulayzer orqali yuboriladigan salbutamol bilan davolanayotgan, zo‘rayish bosqichidagi astma bilan og‘rigan bemorlarda juda kam hollarda laktoatsidoz yuzaga kelishi mumkin.

Asab tizimi tomonidan: ko‘pincha - titroq, bosh og‘rig‘i; juda kam hollarda - giperaktivlik.

Yurak-qon tomir tizimi tomonidan: ko‘pincha - taxikardiya; kamdan-kam hollarda - yurak urishining kuchayishi; juda kam hollarda - yurak ritmining buzilishi, shu jumladan qorinchalar fibrillyatsiyasi, supraventrikulyar taxikardiya va ekstrasistoliya, periferik vazodilatatsiya; chastotasi aniqlanmagan - miokard ishemiyasi.

Nafas olish tizimi tomonidan: juda kam hollarda - paradoksal bronxospazm.

Boshqa ingalyatsion dorilarni qo‘llashda bo‘lgani kabi, bo‘g‘ilishning kuchayishi bilan paradoksal bronxospazm sodir bo‘lishi mumkin. Bunday holda darhol preparatning muqobil shakllarini yoki boshqa tez ta’sir qiluvchi ingalyatsion bronxodilatatorlarni tayinlash kerak. Nebutamolni zudlik bilan bekor qilish, bemorning ahvolini baholash va zarur bo‘lsa, muqobil terapiyani boshlash kerak.

Ovqat hazm qilish trakti tomonidan: kam hollarda - og‘iz bo‘shlig‘i va halqum shilliq qavatlarining ta’sirlanishi.

Suyak-mushak tizimi tomonidan: kamdan-kam hollarda - mushak talvasalari.

Qarshi ko‘rsatmalar

Anamnezda preparatning har qanday komponentiga yuqori sezuvchanlik.

Salbutamol vena ichiga inyeksiya uchun eritma shaklida, ba’zan tabletka va shamchalar shaklida muddatidan oldin tug‘ruqni olib borishda qo‘llanilsa-da, salbutamol aerozol shaklida ingalyatsiya uchun bu ko‘rsatmalarda qo‘llanilmaydi. Salbutamol homila tushish xavfi bo‘lganda qo‘llanilmaydi.

Dorilarning o‘zaro ta’siri

Salbutamol propranolol kabi noselektiv beta-adrenoblokatorlar bilan birga tayinlanmaydi.

Salbutamolni MAO ingibitorlari bilan davolanayotgan bemorlarga buyurish mumkin.

Maxsus ko‘rsatmalar

Nebutamolni og‘iz orqali ingalyatsiya qilish kerak va inyeksiya qilish yoki yutish mumkin emas.

Bronxial astmani davolash bosqichma-bosqich dastur asosida amalga oshirilishi, bemorning holati klinik va funksional o‘pka testlari yordamida baholanishi lozim.

Qisqa ta’sir qiluvchi ingalyatsion beta-2-agonistlardan foydalanish chastotasining ortishi bronxial astma ustidan nazoratning yomonlashganidan dalolat beradi. Bunday holatda bemorni davolashni qayta ko‘rib chiqish kerak, chunki bronxial astma kechishining yomonlashuvi hayot uchun xavfli holat bo‘lib, kortikosteroidlarni qo‘llashni boshlash yoki ko‘paytirishni talab qiladi. Xavf guruhiga kiruvchi bemorlarga har kuni maksimal nafas chiqarish tezligini nazorat qilish tavsiya etiladi.

Nebutamol preparati bilan uyda davolanayotgan bemorlarni quyidagilar haqida ogohlantirish kerak: agar qachonlardir preparatning samarali dozasi davolanishdan yengillik keltirmasa yoki bu yengillikning davomiyligi kamaysa, preparatning dozasini yoki uni qo‘llash chastotasini mustaqil ravishda oshirmasdan, shifokorga murojaat qilish kerak.

Nebutamol boshqa simpatomimetiklarning katta dozalarini qabul qiladigan bemorlarni davolash uchun ehtiyotkorlik bilan qo‘llaniladi.

Simpatomimetiklarni, shu jumladan salbutamolni qo‘llash yurak-qon tomir tizimiga ta’sir ko‘rsatadi. Litsenziyadan keyingi foydalanish va nashr etilgan adabiyot ma’lumotlariga ko‘ra, salbutamolni qo‘llash bilan bog‘liq bo‘lgan miokard ishemiyasining kamdan-kam holatlari haqida dalillar mavjud. Yurak kasalliklari (masalan, yurak ishemik kasalligi, aritmiya yoki og‘ir yurak yetishmovchiligi) bilan og‘rigan va salbutamol bilan davolanayotgan bemorlar ko‘krak qafasida og‘riq yoki yurak xastaligi kuchayganidan dalolat beruvchi boshqa alomatlar paydo bo‘lsa, tibbiy yordamga murojaat qilishlari kerak. Diqqatni bo‘g‘ilish va ko‘krak qafasidagi og‘riq kabi alomatlarni baholashga qaratish lozim, bu ham yurak, ham nafas olish tizimi kasalliklarining oqibati bo‘lishi mumkin.

Tireotoksikoz bilan og‘rigan bemorlarga salbutamol ehtiyotkorlik bilan buyuriladi.

Bemorlarni salbutamol-nebula va ipratropiy bromid kombinatsiyasi bilan davolashda ba’zan o‘tkir yopiq burchakli glaukoma rivojlanish holatlari kuzatilgan. Shuning uchun salbutamolni nebullarda antixolinergik preparatlar bilan kombinatsiyasini ehtiyotkorlik bilan qo‘llash kerak, ular ham nebulizatsiya yo‘li bilan yuboriladi. Bemorlar preparatni to‘g‘ri qo‘llash bo‘yicha tegishli ko‘rsatmalar olishlari va purkaladigan aerozolning ko‘zga tushishidan saqlanishlari kerakligi haqida ogohlantirilishlari kerak.

Beta-2-agonistlar bilan davolash natijasi og‘ir gipokaliyemiya bo‘lishi mumkin; bu asosan parenteral shakllar yoki nebulayzer qo‘llanilganda kuzatiladi. O‘tkir og‘ir bronxial astma bilan og‘rigan bemorlarga alohida e’tibor qaratiladi, chunki gipokaliyemiya ksantin hosilasi, steroidlar, diuretiklar va gipoksiya bilan birga qo‘llanilishi mumkin. Bu holatda qon zardobidagi kaliy miqdorini tekshirish tavsiya etiladi.

Boshqa beta-adrenoretseptor agonistlari singari, Nebutamol ham teskari metabolik o‘zgarishlarga, masalan, qondagi qand miqdorining oshishiga olib kelishi mumkin.

Qandli diabet bilan og‘rigan bemorlarda bunday o‘zgarishlarni kompensatsiya qilish har doim ham mumkin emas, shuning uchun bunday bemorlarda ketoatsidoz rivojlanishi haqida alohida ma’lumotlar mavjud. Kortikosteroidlarni bir vaqtda qo‘llash bu holatni kuchaytirishi mumkin.

Juda kamdan kam hollarda bronxial astmaning zo‘rayish bosqichidagi bemorlarda, vena ichiga yoki nebulayzer orqali qo‘llaniladigan salbutamolning yuqori dozalari bilan davolangan bemorlarda laktoatsidoz rivojlanishi holatlari qayd etilgan. Qondagi laktat darajasining oshishi bo‘g‘ilish va o‘pkaning kompensator giperventilyatsiyasi rivojlanishiga olib kelishi mumkin, bu esa astmaga qarshi davolashning yetarli darajada samarali emasligi deb noto‘g‘ri baholanishi va o‘z navbatida qisqa ta’sir etuvchi beta-agonistlar bilan davolashni noo‘rin kuchaytirishga olib kelishi mumkin. Shuning uchun bunday bemorlarning qon zardobidagi laktat miqdorini va shunga mos ravishda ularda metabolik atsidoz bor-yo‘qligini nazorat qilish tavsiya etiladi.

Homiladorlik yoki emizish davrida qo‘llash

Salbutamol homiladorlik davrida faqat ona uchun kutilayotgan foyda homila uchun ehtimoliy xavfdan ko‘proq bo‘lgandagina buyuriladi.

Salbutamol ko‘krak sutiga o‘tishi mumkinligi sababli, uni laktatsiya davrida buyurish tavsiya etilmaydi, ona uchun kutilayotgan foyda bola uchun ehtimoliy xavfdan yuqori bo‘lgan holatlar bundan mustasno.

Bolalar

Salbutamolni 18 oygacha bo‘lgan bolalarda nebulizatsiya yo‘li bilan qo‘llashning klinik samaradorligi aniqlanmagan, shuning uchun preparatni qo‘llash tavsiya etilmaydi.

Avtotransportni boshqarishda yoki boshqa mexanizmlar bilan ishlashda reaksiya tezligiga ta’sir qilish qobiliyati

Ta’siri haqida ma’lumotlar yo‘q, agar asab tizimi tomonidan nojo‘ya ta’sir (tremor) paydo bo‘lsa, avtotransportni boshqarish yoki boshqa mexanizmlar bilan ishlashni cheklash kerak.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Nebutamol dozasini oshirib yuborishning eng keng tarqalgan belgilari va alomatlari farmakologik jihatdan beta-agonistlar tomonidan chaqirilgan vaqtinchalik o‘zgarishlardir (masalan, taxikardiya, tremor, bosh og‘rig‘i).

Salbutamol dozasini oshirib yuborish natijasida gipokaliyemiya yuzaga kelishi mumkin, shuning uchun qon zardobidagi kaliy miqdorini tekshirish zarur.

Davolash salbutamolni qo‘llashni to‘xtatish va yurak simptomlari (masalan, taxikardiya, tez yurak urishi) bo‘lgan bemorlarni davolash uchun kardioselektiv beta-blokatorlarni tayinlash kabi tegishli simptomatik terapiyani boshlashdan iborat. Beta-blokatorlar guruhiga kiruvchi preparatlarni anamnezida bronxospazm bo‘lgan bemorlarga ehtiyotkorlik bilan buyurish lozim.

Chiqarish shakli

Bir martalik idishlarda 2 ml yoki 2,5 ml dan. Polimer plyonkali paketda 10 ta bir martalik konteyner, karton paketda 1 ta paket yoki 4 ta paket.

Saqlash shartlari

25 °C dan yuqori bo‘lmagan haroratda saqlanadi.

Muzlash va to‘g‘ridan-to‘g‘ri quyosh nuri ta’siriga yo‘l qo‘ymaslik.

Yaroqlilik muddati

3 yil.

Polimer plyonkali paket ochilgandan keyin - 3 oy.

Dorixonalardan berish shartlari

Retsept bo‘yicha.

Ishlab chiqaruvchi

"Yuriya-Farm" MCHJ.

Ukraina, 18030, Cherkassi shahri, Verbovetskiy ko‘chasi, 108.

Tel./faks: (044) 281-01-01.