Permikson

Tarkib

Bir kapsula quyidagilarni o‘z ichiga oladi:

faol modda: Serenoa repens mevasining lipidosterol ekstrakti 160 mg;

yordamchi moddalar: makrogol 10000, titan dioksidi, indigotin, sariq temir oksidi, jelatin.

Tavsif

Kapsulalari och yashil rangda.

Chiqarish shakli

No15 160 mg li kapsulalar kontur-yacheykali o‘ramda. Karton qutida tibbiy qo‘llash bo‘yicha yo‘riqnoma bilan birga 2 yoki 4 ta kontur-yacheykali qadoq.

Farmakoterapevtik guruh

Prostata bezining xavfsiz giperplaziyasini davolash uchun boshqa preparatlar. ATX kodi: G04CX02.

Farmakologik xususiyatlari

Hayvonlarda o‘tkazilgan tadqiqotlar va in vitro sharoitida o‘tkazilgan tajribalar quyidagilarni ko‘rsatdi:

Serenoa repens lipidosterol ekstraktining mahalliy antiandrogen ta’sir mexanizmi digidrotestosteron sintezini raqobatsiz ingibirlashi bilan bog‘liq (I va II turdagi 5-reduktaza fermentini bostirish hisobiga).

Mahalliy yallig‘lanishga qarshi ta’sir mexanizmi Serenoa repens lipidosterol ekstraktining yallig‘lanish mediatorlari bo‘lgan prostaglandinlar va leykotrienlar sintezini ingibirlashi bilan bog‘liq.

Preparatning antiproliferativ ta’siri prostata hujayralari proliferatsiyasiga ta’sir qiluvchi o‘sish omillari faolligining pasayishi bilan bog‘liq.

Farmakokinetika

O‘rmalovchi palma mevasi ekstraktining ta’siri uning tarkibiy qismlarining birgalikdagi ta’siri hisoblanadi, shuning uchun farmakokinetik tadqiqotlar o‘tkazish imkoniyati mavjud emas.

Qo‘llanilishi

Prostata bezining I va II bosqichdagi xavfsiz giperplaziyasi (adenomasi).

Qo‘llash usuli va dozalari

Davolash dozasi va davomiyligi kasallikning bosqichiga qarab belgilanadi.

Ichga, ovqat bilan birga, bir stakan suv bilan, sutkada 2 mahal 160 mg (1 kapsula) yoki bir mahal 320 mg (2 kapsula) dan ichiladi.

Maksimal sutkalik doza 320 mg ni tashkil etadi.

Davolashning davomiyligi 3 oydan kam emas. Zarurat tug‘ilganda, takroriy davolash kurslari o‘tkazilishi mumkin.

Nojo‘ya ta’sirlari

oshqozon-ichak trakti tomonidan ko‘ngil aynishi va ichak sanchiqlari kuzatilishi mumkin;

kamdan-kam hollarda teri toshmasi va shish kuzatilgan;

istisno hollarda qaytar ginekomastiya kuzatilgan bo‘lib, uning alomatlari preparatni qabul qilish to‘xtatilgandan so‘ng butunlay yo‘qolgan.

Qarshi ko‘rsatmalar

preparatga yuqori sezuvchanlik.

Dorilarning o‘zaro ta’siri

Nomuvofiqlik holatlari tavsiflanmagan. Preparatlarni birga qo‘llash davolovchi shifokor bilan kelishilgan bo‘lishi kerak.

Maxsus ko‘rsatmalar

Permikson® ni ovqatlanish vaqtida bir stakan suv bilan ichish tavsiya etiladi.

Homiladorlik va laktatsiya

Bemorlarning ushbu guruhida tadqiqotlar o‘tkazilmagan.

Pediatriyada qo‘llanishi

Dori preparati pediatriyada qo‘llash uchun mo‘ljallanmagan.

Dori vositasining transport vositasini yoki potensial xavfli mexanizmlarni boshqarish qobiliyatiga ta’sirining o‘ziga xos xususiyatlari

Ta’sir qilmaydi.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Hozirgi vaqtda Permikson® dori vositasining dozasini oshirib yuborish holatlari haqida xabar berilmagan.

Saqlash shartlari

30 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

Pyer Fabr Medikament Prodakshn,

Abel Gans maydoni 45, 92100 Bulon, Fransiya.