Sertofen plyonka bilan qoplangan tabletkalar 25 mg №20 (2 blister х 10 tabletka)

Tarkib

Plyonkali qobiq bilan qoplangan 1 ta tabletka quyidagilarni o‘z ichiga oladi:

Faol moddasi: deksketoprofen (deksketoprofen trometamol shaklida) 25 mg.

Yordamchi moddalar: mikrokristall sellyuloza, makkajo‘xori kraxmali, natriy kraxmalglikolat, glitserin distearat.

Qobiq tarkibi: Oq opadri II: polivinil spirti, titan dioksidi, makrogol, talk.

Tavsif

Dumaloq, ikki tomoni qavariq, oq rangli plyonka qobig‘i bilan qoplangan, har ikki tomonida ajratish chizig‘i bo‘lgan tabletkalar.

Dori shakli

Plyonkali qobiq bilan qoplangan tabletkalar.

Farmakoterapevtik guruh

Nosteroid yallig‘lanishga qarshi vositalar. ATX kodi: M01AE17.

Farmakologik xususiyatlari

Deksketoprofen - propion kislotasining hosilasi bo‘lib, yallig‘lanishga qarshi, og‘riq qoldiruvchi va isitmani tushiruvchi ta’sir ko‘rsatadi. Preparatning ta’sir mexanizmi siklooksigenaza-1 va siklooksigenaza-2 ning susayishi natijasida og‘riq va yallig‘lanish patogenezida asosiy rol o‘ynaydigan prostaglandinlar sintezini susaytirishga asoslangan. Og‘riq qoldiruvchi ta’siri preparatni qabul qilgandan 30 daqiqa o‘tgach boshlanadi, uning davomiyligi 4 soatdan 6 soatgacha davom etadi.

Farmakokinetika

Preparat ichga qabul qilingandan so‘ng, deksketoprofenning plazmadagi maksimal konsentratsiyasiga o‘rtacha 30 daqiqadan so‘ng erishiladi. Bir vaqtning o‘zida ovqatlanish preparatning so‘rilishini sekinlashtiradi.

Deksketoprofen uchun qon plazmasi oqsillari bilan bog‘lanishning yuqori darajasi - 99% xosdir. Tarqalish hajmi o‘rtacha 0,25 l/kg ni tashkil etadi.

Yarim chiqarilish davri 1,65 soatni tashkil etadi. Preparatning asosiy qismi siydik bilan metabolitlar ko‘rinishida (glyukuronlashdan keyin) chiqariladi. Keksalarda yarim chiqarilish davrining o‘rtacha 48% gacha uzayishi va preparatning umumiy klirensining pasayishi kuzatiladi.

Qo‘llanilishi

tayanch-harakat apparatining o‘tkir va surunkali yallig‘lanish va yallig‘lanish-degenerativ kasalliklarini (shu jumladan revmatoid artrit, spondiloartrit, artroz, osteoxondroz) simptomatik davolash;

turli xil kelib chiqishga ega bo‘lgan og‘riq sindromini bartaraf etish (jumladan, jarohatlar yoki jarrohlik aralashuvlaridan keyingi og‘riq, suyak metastazlarida og‘riq, buyrak sanchig‘ida og‘riq, radikulit, nevralgiya, dismenoreya, tish og‘rig‘i).

Qo‘llash usuli va dozalari

Sertofen ovqat vaqtida, yetarli miqdorda suyuqlik bilan ichiladi.

Dozalash tartibi og‘riqning turi va intensivligiga qarab individual ravishda belgilanadi.

O‘rtacha tavsiya etilgan bir martalik doza 12,5 mg (1/2 tabletka) kuniga 1 martadan 6 martagacha, zaruratga qarab qabul qilishlar orasida 4-6 soatlik interval bilan yoki 25 mg (1 tabletka) kuniga 1 martadan 3 martagacha, qabul qilishlar orasida 8 soatlik interval bilan.

Maksimal sutkalik dozasi 75 mg (3 tabletka).

Jigar yoki buyrak faoliyati buzilgan bemorlarda, keksa yoshdagi shaxslarda Sertofenni qabul qilishni pastroq dozalarda boshlash kerak - kuniga 50 mg dan oshmasligi kerak.

Preparat uzoq muddat qo‘llash uchun mo‘ljallanmagan: qabul qilish davomiyligi 7 kundan oshmasligi kerak.

Nojo‘ya ta’sirlari

MAT va periferik asab tizimi tomonidan: kamdan kam hollarda - bosh og‘rig‘i, bosh aylanishi, uyqusizlik, uyquchanlik; kamdan kam hollarda - paresteziyalar.

Yurak-qon tomir tizimi tomonidan: kamdan-kam hollarda - ekstrasistoliya, qon bosimining ko‘tarilishi; juda kam hollarda - taxikardiya, qon bosimining pasayishi.

Qon yaratish organlari tomonidan: juda kam hollarda - neytropeniya, trombotsitopeniya.

Nafas olish tizimi tomonidan: kamdan-kam hollarda - bradipnoe; juda kam hollarda - bronxospazm, hansirash.

Sezgi a’zolari tomonidan: kamdan-kam hollarda - quloqlarda shovqin, juda kam hollarda - ko‘rishning noaniqligi.

Ovqat hazm qilish tizimi tomonidan: ko‘pincha - ko‘ngil aynishi, qusish, qorinda og‘riq, dispepsiya; kamdan-kam hollarda - oshqozon-ichak traktining eroziv-yarali shikastlanishlari, anoreksiya.

Siydik ajratish tizimi tomonidan: kamdan-kam hollarda - poliuriya; juda kam hollarda - nefrit yoki nefrotik sindrom.

Moddalar almashinuvi tomonidan: kamdan kam hollarda - giperglikemiya, gipoglikemiya, gipertriglitseridemiya.

Dermatologik reaksiyalar: kamdan kam hollarda - eshakem, husnbuzar toshmasi, terlash; juda kam hollarda - og‘ir teri reaksiyalari (Stivens-Jonson sindromi, Layell sindromi), angionevrotik shish, allergik dermatit, fotosensibilizatsiya.

Umumiy buzilishlar: kam hollarda - isitma, charchash, asosan tizimli qizil yuguruk yoki biriktiruvchi to‘qimaning aralash kasalliklari bilan og‘rigan bemorlarda yuzaga keladigan aseptik meningit, gematologik buzilishlar; kamdan kam hollarda - anafilaktik shok.

Qarshi ko‘rsatmalar

deksketoprofen yoki boshqa nosteroid yallig‘lanishga qarshi dori vositalariga yoki preparat tarkibiga kiruvchi har qanday yordamchi moddalarga yuqori sezuvchanlik;

ta’sir mexanizmi o‘xshash bo‘lgan moddalarni (atsetilsalitsil kislotasi va boshqa NYAQV) qo‘llash natijasida yuzaga kelgan astma, bronxospazm, o‘tkir rinit, eshakyemi yoki angionevrotik shish xurujlari anamnezida mavjudligi;

bemorlarda oshqozon va o‘n ikki barmoqli ichakning faol yara kasalligi mavjudligi yoki yara kasalligining takroriy epizodlari (ikki va undan ortiq epizodlar) mavjudligi;

oshqozon-ichakdan qon ketishi (shu jumladan, oldingi YAQNDV qabul qilish bilan bog‘liq), boshqa faol qon ketishlar;

Kron kasalligi, nospetsifik yarali kolit;

jigar faoliyatining og‘ir buzilishlari (Chayld-Pyu shkalasi bo‘yicha 10-15 ball);

buyrak faoliyatining og‘ir buzilishlari (kreatinin klirensi < 50 ml/daqiqa);

bronxial astma (shu jumladan anamnezda);

og‘ir yurak yetishmovchiligi;

gemorragik diatez yoki boshqa koagulopatiyalar;

homiladorlikning uchinchi trimestri va laktatsiya davri;

18 yoshgacha bo‘lgan bolalar va o‘smirlar.

Dorilarning o‘zaro ta’siri

Tavsiya etilmaydigan kombinatsiyalar

Deksketoprofenni boshqa YAQNDVlar, jumladan, salitsilatlar bilan bir vaqtda qo‘llash oshqozon-ichakdan qon ketish xavfini oshiradi.

Peroral antikoagulyantlar, geparin bilan bir vaqtda qo‘llanganda qon ketish xavfi ortadi.

NYAQV qondagi litiy konsentratsiyasini oshiradi, ushbu ko‘rsatkichni qo‘llashda, dozani o‘zgartirishda va NYAQVni bekor qilgandan so‘ng nazorat qilish zarur.

YAQNDV va metotreksatni yuqori dozalarda (haftasiga 15 mg dan ortiq) bir vaqtda qo‘llash ikkinchisining gematologik toksikligini oshiradi.

Gidantoinlar va sulfonamidlar bilan birga qo‘llanganda, bu moddalarning toksik xususiyatlari kuchayishi mumkin.

Foydalanishda ehtiyotkorlikni talab qiladigan kombinatsiyalar

Deksketoprofen diuretiklarning, angiotenzin aylantiruvchi ferment ingibitorlarining antigipertenziv ta’sirini susaytiradi.

Metotreksat bilan bir vaqtning o‘zida past dozalarda (haftasiga 15 mg dan kam) qo‘llash NYAQVni qo‘llash fonida uning buyrak klirensining pasayishi tufayli metotreksatning gematologik zaharliligining oshishiga olib keladi.

Serotoninni qayta qamrab olish ingibitorlari, peroral glyukokortikoidlar bilan bir vaqtda qo‘llash oshqozon-ichakdan qon ketish xavfini oshiradi.

NYAQVlar sulfonilmochevinani qon plazmasi oqsillari bilan bog‘lanish joyidan siqib chiqarishi natijasida uning gipoglikemik ta’sirini kuchaytiradi.

Pentoksifillin bilan kombinatsiyalanganda qon ketish xavfi ortadi.

Zidovudin bilan bir vaqtda qo‘llanganda, retikulotsitlarga ta’siri tufayli eritrotsitlarga toksik ta’sirning kuchayishi xavfi mavjud bo‘lib, YAQNDV tayinlangandan bir hafta o‘tgach, og‘ir kamqonlik rivojlanishi mumkin. NYAQV terapiyasi boshlanganidan 1-2 hafta o‘tgach, qonning barcha hujayra elementlarini, shu jumladan retikulotsitlarni nazorat qilish zarur.

Alohida e’tibor talab qiladigan kombinatsiyalar

YAQNDV beta-adrenoblokatorlarning gipotenziv ta’sirini kamaytirishi mumkin, bu prostaglandinlar sintezini ingibirlashi bilan bog‘liq.

Siklosporin va takrolimus bilan bir vaqtda qo‘llanilganda, YAQNDV buyrak prostaglandinlari ta’sirida nefrotoksiklikni kuchaytirishi mumkin. Kombinatsiyalangan terapiya o‘tkazilayotgan vaqtda buyraklar funksiyasini nazorat qilish zarur.

Trombolitiklar bilan bir vaqtda buyurilganda qon ketish xavfi ortadi.

Probenetsid bilan bir vaqtda qo‘llanilganda, plazmadagi YAQNDV konsentratsiyasining oshishi mumkin, bu buyrak sekretsiyasining ingibirlanishi va/yoki glyukuron kislotasi bilan konyugatsiyasi bilan bog‘liq bo‘lishi mumkin. Bu esa YAQNDV dozasini korreksiyalashni talab qiladi.

YAQNDV qon plazmasida yurak glikozidlari konsentratsiyasining oshishiga olib kelishi mumkin.

Prostaglandinlar sintezi ingibitorlari ta’sirida mifepriston samaradorligining nazariy o‘zgarish xavfi tufayli, NYAQVni mifepriston bekor qilinganidan keyin 8-12 kundan oldin buyurmaslik kerak.

Maxsus ko‘rsatmalar

Preparatni keksa yoshdagi (65 yoshdan katta) bemorlarga, allergik reaksiyalari bor bemorlarga, biriktiruvchi to‘qimaning tizimli kasalliklari bor bemorlarga va qon yaratilishi buzilgan bemorlarga buyurishda ehtiyot bo‘lish kerak.

Oshqozon-ichak tizimi tomonidan buzilishlar yoki anamnezida oshqozon-ichak kasalliklari bo‘lgan bemorlarni sinchkovlik bilan kuzatish zarur. Oshqozon-ichakdan qon ketishi yoki yara paydo bo‘lgan taqdirda, preparat bilan davolashni bekor qilish kerak.

Boshqa nosteroid yallig‘lanishga qarshi vositalar singari, Sertofen ham qon plazmasida kreatinin va azot konsentratsiyasining oshishiga olib kelishi mumkin. Deksketoprofen bilan davolash fonida ba’zi jigar sinamalari ko‘rsatkichlarining biroz o‘tkinchi oshishi, shuningdek, AST va ALT darajasining yaqqol oshishi kuzatilishi mumkin.

Keksa yoshdagi shaxslarda jigar va buyrak faoliyatini vaqti-vaqti bilan nazorat qilib turish zarur.

Sertofenni qon ivish qobiliyatiga ta’sir etuvchi preparatlar bilan bir vaqtda qo‘llanganda qon ivish tizimini nazorat qilish lozim.

Deksketoprofen yuqumli kasalliklar alomatlarini yashirishi mumkin.

Bemorlarga nojo‘ya ta’sirlar paydo bo‘lganda, shuningdek, davolanishning 3-5 kuni davomida klinik samara bo‘lmaganda, bu haqda davolovchi shifokorga xabar berish kerakligi haqida ma’lumot berish lozim.

Homiladorlik va laktatsiyada qo‘llash

Sertofen preparati homiladorlikning uchinchi trimestrida va laktatsiya davrida qo‘llash mumkin emas. Birinchi va ikkinchi trimestrda Sertofen faqat zarurat tug‘ilganda, shifokor tavsiyasiga ko‘ra, minimal dozalarda va eng qisqa vaqt davomida qo‘llanilishi mumkin.

Pediatriyada qo‘llanishi

Preparatni 18 yoshgacha bo‘lgan bolalar va o‘smirlarda qo‘llash mumkin emas.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik lozim.

Avtotransport va mexanizmlarni boshqarish qobiliyatiga ta’siri

Davolash davrida avtotransportni boshqarishda va diqqatning yuqori konsentratsiyasini hamda psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishda ehtiyot bo‘lish zarur.

Dozani oshirib yuborish

Belgilari: ko‘ngil aynishi, anoreksiya, qorin og‘rig‘i, bosh og‘rig‘i, bosh aylanishi, mo‘ljalni yo‘qotish, uyqusizlik.

Davolash: oshqozonni yuvish, gemodializ, simptomatik terapiya.

Chiqarish shakli

Plyonkali qobiq bilan qoplangan tabletkalar. Blisterda 10 ta tabletka. Karton qutida qo‘llanilishi bo‘yicha yo‘riqnoma bilan birga 1 yoki 2 ta blister.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retsept bo‘yicha.

Ishlab chiqaruvchi

Ro‘yxatdan o‘tish sertifikatining egasi kompaniya hisoblanadi

"Dr Sertus Ilach Sanayi ve Tijaret Limited Shirketi," Turkiya

("Dr Sertus İlaç Sanayi ve Ticaret Limited Şirketi," Turkey).

Ishlab chiqarilgan

Abdi Ibrohim Iloch San. ve Tij. A.Sh.," Turkiya

(Sanoyi mahallasi, Tunch Jaddesi No: 3 Esenyurt 34555/Istanbul).

"Abdi Ibrahim İlaç San. ve Tic. A.Ş.," Turkey

(Sanayi Mahallesi, Tunç Caddesi No: 3 Esenyurt 34555/İstanbul).