Yod Pharmakom Medicine spirtli eritma. 5% 10 ml (shisha)

Tarkib

faol moddalar: yod - 50 g, kaliy yodid - 20 g;

yordamchi moddalar: tozalangan suv, 96% li tibbiy etil spirti - 1 litrgacha teng miqdorda.

Tavsif

O‘ziga xos hidli, qizil-qo‘ng‘ir rangli tiniq suyuqlik.

Dori shakli

Spirtli eritma.

Farmakoterapevtik guruh

Antiseptik vosita. ATX kodi: D08AG03.

Farmakologik xususiyatlari

Sirtga qo‘llanganda antiseptik, ta’sirlovchi va chalg‘ituvchi ta’sir ko‘rsatadi. Ichga qabul qilinganda qalqonsimon bez faoliyatiga ta’sir qiladi, dissimilyatsiya, fibrinoliz jarayonlarini kuchaytiradi, lipidlar almashinuviga ijobiy ta’sir ko‘rsatadi, qon ivish tezligini sekinlashtiradi, balg‘am ko‘chiruvchi ta’sir ko‘rsatadi. Zaxm gummalarida yodning to‘planishi ularning yumshashiga va so‘rilishiga yordam beradi. Biroq sil o‘choqlarida yodning to‘planishi yallig‘lanish jarayonini kuchaytiradi.

Farmakokinetika

Shikastlanmagan teri orqali oson so‘riladi. Qalqonsimon bezda to‘planadi. Yo‘ldosh to‘sig‘i orqali o‘tadi. Organizmdan asosan buyraklar, qisman me’da-ichak yo‘li, ter va sut bezlari orqali chiqariladi.

Ko‘rsatmalar

Sirtga: terining infeksion-yallig‘lanish jarohatlari, jarohatlar, yaralar, mialgiyalar, trofik va varikoz yaralar, infeksiyalangan kuyishlar, I va II darajali yangi termik va kimyoviy kuyishlar.

Mahalliy: tonzillitlar, laringitlar

Ichga: ateroskleroz, uchlamchi zaxm, nafas yo‘llarining surunkali yallig‘lanish kasalliklari.

Qo‘llash usuli va dozalari

Tashqi tomondan preparat eritmasi bilan ho‘llangan paxta tampon bilan terining shikastlangan sohalariga ishlov beriladi. Jarrohlik amaliyotida va kuyishlarda zararlangan yuzaga qo‘yilgan doka salfetkalar zaruratga qarab preparat bilan ho‘llanadi.

Mahalliy - 5-10 tomchi preparat 100-200 ml iliq qaynatilgan suvda eritiladi va tomoqni chayish uchun ishlatiladi.

Ichga aterosklerozning oldini olish uchun 5-10 tomchidan sutkada 1 marta 30 kungacha kurslar bilan, davolash yiliga 2-3 marta; ateroskleroz va nafas yo‘llarining yallig‘lanish kasalliklarini davolashda 10 tomchidan sutkada 3 marta; uchlamchi zaxmda 5 tomchidan 50 tomchigacha sutkada 2-3 marta o‘tkaziladi. Maksimal bir martalik doza - 20 tomchi, kunlik - 60 tomchi. Preparat sut bilan, ovqatdan keyin qabul qilinadi.

Nojo‘ya ta’sirlari

Sirtga qo‘llanganda: kam hollarda: terining ta’sirlanishi.

Ichga qabul qilinganda: teri allergik reaksiyalari, taxikardiya, asabiylashish, uyquning buzilishi, ko‘p terlash, ich ketishi (40 yoshdan oshgan bemorlarda), gipo- yoki gipertireoidizm hodisalari.

Qarshi ko‘rsatmalar

Yodga yuqori sezuvchanlik.

Ichga qabul qilish uchun: o‘pka sili, nefritlar, nefrozlar, yurak yetishmovchiligi, adenomalar (shu jumladan qalqonsimon bez), furunkulyoz, husnbuzar toshmasi, surunkali piodermiya, gemorragik diatezlar, eshakemi, homiladorlik, laktatsiya, 5 yoshgacha bo‘lgan bolalar.

Dozani oshirib yuborish

Doza oshirib yuborilganda yodizm, ta’sirlanish va kuyish hodisalari kuzatilishi mumkin.

Uzoq vaqt davomida katta dozalarda qo‘llanganda, yodizm belgilari bilan namoyon bo‘ladigan dozani oshirib yuborish mumkin: yaqqol rinit (tumov), so‘lak ajralishining kuchayishi, eshakemi, Kvinke shishi.

Davolash: oshqozonni 0,5% li natriy tiosulfat eritmasi bilan yuvish, vena ichiga 30% li natriy tiosulfat eritmasini 300 ml gacha yuborish. Yodga og‘ir teri reaksiyasida dori vositasi darhol 70% etil spirti bilan tozalanishi kerak. Shuningdek, terini ko‘p miqdordagi suv bilan 15 daqiqa davomida yuvish tavsiya etiladi. Tasodifan yutib yuborilganda - agar bemor hushida bo‘lsa - sut har 15 daqiqada ichiladi.

Ehtiyot choralari va qo‘llash xususiyatlari

Suyultirilmagan dori vositasining og‘iz, ko‘z, qin va to‘g‘ri ichak shilliq pardalariga tushishiga yo‘l qo‘ymaslik kerak.

Chuqur yoki sanchilgan jarohatlarda, jiddiy kuyishlarda qo‘llash tavsiya etilmaydi, chunki preparatni qo‘llash yodning ortiqcha yutilishiga va to‘qimalarning ta’sirlanishiga olib kelishi mumkin.

Dori vositasini o‘n kundan ortiq ishlatmaslik.

Homiladorlik va laktatsiya davri

Homiladorlik davrida ehtimoliy so‘rilishi va homilaga gipotireoz hamda buqoq kabi salbiy ta’sirlari tufayli ehtiyotkorlik bilan qo‘llash tavsiya etiladi.

Ko‘krak suti bilan emizish davrida emizikli bolalarda yod ortiqcha yuklamasi va tranzitor gipotireozning oldini olish uchun ehtiyotkorlik bilan qo‘llash tavsiya etiladi.

Bolalar

Bolalarda yodni qo‘llash terining yuqori sezuvchanligiga, yodizmga, tranzitor gipotireozga olib kelishi mumkin.

1 oygacha bo‘lgan bolalar. Yangi tug‘ilgan chaqaloqlarda tashqi qo‘llashda yodning tizimli so‘rilishi ehtimoli yuqori bo‘lganligi sababli qo‘llash tavsiya etilmaydi.

Boshqa dori vositalari bilan o‘zaro ta’siri

Sirtga qo‘llanganda vodorod peroksid, boshqa dezinfeksiyalovchi vositalar bilan birga qo‘llash mumkin emas.

Chiqarish shakli

Eritma 10 ml, 20 ml, 25 ml, 40 ml yoki 50 ml dan flakonlarda.

Saqlash shartlari

Yorug‘likdan himoyalangan joyda, 25 °C dan yuqori bo‘lmagan haroratda saqlang.

Bolalar qo‘li yetmaydigan joyda saqlang.

Yaroqlilik muddati

3 yil.

Yaroqlilik muddati tugaganidan keyin ishlatilmasin.

Ta’til shartlari

Retseptsiz.

Ishlab chiqaruvchi

"Pharmacom Medicine" MCHJ

111609, O‘zbekiston Respublikasi, Toshkent viloyati, Chinoz tumani, Qutarma-1 ko‘chasi, 85-uy. Tel.: (+998 93) 576 3330.