Dolgit

Tarkib

100 g krem tarkibida quyidagilar mavjud:

faol modda: ibuprofen 5 g;

yordamchi moddalar: o‘rta zanjirli triglitseridlar, glitserol monostearat, poli (oksietilen) -30-stearat, poli (oksietilen) -100-stearat, propilenglikol, natriy metilparagidroksibenzoat, ksantan yelimi, lavanda moyi, nerol moyi (apelsin daraxti guli moyi), tozalangan suv.

Tavsif

Krem bir xil, yumshoq konsistensiyali, oqish-krem rangli, lavanda va nerol moylari hidiga ega.

Dori shakli

Sirtga surtiladigan krem.

Farmakoterapevtik guruh

Mahalliy qo‘llaniladigan nosteroid yallig‘lanishga qarshi preparatlar. Ibuprofen. ATX kodi: M02AA13.

Farmakologik xususiyatlari

Farmakokinetika

Ibuprofen teriga surtilganda birmuncha vaqt depo holida saqlanadi va u yerdan sekinlik bilan ajralib, o‘zlashtiriladi. Teri orqali taxminan 5% ibuprofen o‘zlashtiriladi, bu o‘tkazilgan qiyosiy tadqiqotlar bilan tasdiqlangan. Qo‘llash zonasida terapevtik ta’sirga teri orqali nishon to‘qimalarga to‘g‘ridan to‘g‘ri tarqalish orqali erishiladi va ularda ekspozitsiya hamda ta’sir turiga qarab terapevtik konsentratsiyalarga erishiladi.

Farmakodinamika

Preparat mahalliy og‘riq qoldiruvchi, yallig‘lanishga va shishga qarshi ta’sir ko‘rsatadi. Ibuprofenning o‘ziga xos ta’sir mexanizmidagi asosiy bo‘g‘in prostaglandinlar biosintezini tormozlashdir. Og‘riq sindromini, shu jumladan tinch holatdagi va harakatdagi og‘riqlarni kamaytiradi yoki yo‘q qiladi; ertalabki qotib qolish va bo‘g‘imlarning shishishini kamaytiradi. Harakat hajmini oshirishga yordam beradi.

Yallig‘lanishga qarshi ta’sirdan tashqari, ibuprofen yallig‘lanish joyida trombotsitlar agregatsiyasini, shuningdek, leykotsitlar migratsiyasini va yallig‘lanish sohasida lizosomal fermentlarning chiqarilishini kamaytiradi.

Qo‘llanilishi

tayanch-harakat tizimining yallig‘lanish va degenerativ kasalliklari (revmatizm va podagra xurujidagi bo‘g‘im sindromi);

revmatoid artrit, psoriatik artrit, yelka-kurak periartriti, ankilozlovchi spondilit (Bexterev kasalligi), deformatsiyalovchi osteoartroz, ildiz sindromi bilan kechuvchi osteoxondroz, radikulit, tendinit, tendovaginit, bursit, lyumbago, ishias);

kelib chiqishi revmatik va revmatik bo‘lmagan mushak og‘riqlari (mialgiya);

teri qoplamining butunligi buzilmagan jarohatlar (sport, ishlab chiqarish, maishiy va boshqalar) (mushaklar va boylamlarning chiqishi, cho‘zilishi yoki uzilishi, lat yeyishlar, yumshoq to‘qimalarning jarohatdan keyingi shishishi va boshqalar).

Qo‘llash usuli va dozalari

Tashqariga!

Krem kuniga 3-4 marta og‘rigan joy terisiga surtiladi va preparat to‘liq so‘rilguncha yengil harakatlar bilan surtiladi. 2-5 g kremga (100-250 mg ibuprofen) mos keladigan 4-10 sm uzunlikdagi krem tasmasi ishlatiladi, krem miqdori zararlangan yuza maydoniga qarab surtiladi.

Davolash davomiyligini shifokor belgilaydi, u kasallikning og‘irlik darajasi va shikastlanish xususiyatiga bog‘liq bo‘lib, o‘rtacha 2-3 haftani tashkil etadi.

Ibuprofenning maksimal sutkalik dozasi 20 g ni tashkil etadi (1000 mg ibuprofenga to‘g‘ri keladi).

Faol moddaning teri orqali o‘tishi elektroforez yordamida kuchaytirilishi mumkin. Bunday holda Dolgit® kremi katodga surtiladi. Tok intensivligi elektrodning 5 sm2 yuzasiga 0,1-0,5 mA / bo‘lishi kerak, muolaja davomiyligi taxminan 10 daqiqa.

Nojo‘ya ta’sirlari

Odatda preparat yaxshi o‘zlashtiriladi.

Nojo‘ya ta’sirlarni baholash quyidagi namoyon bo‘lish chastotasiga asoslanadi:

Juda tez-tez (≥ 1/10), Tez-tez (≥ 1/100 dan < 1/10 gacha), tez-tez emas (≥ 1/1,000 dan < 1/100 gacha), kamdan-kam (≥ 1/10,000 dan < 1/1,000 gacha), juda kam (< 1/10,000), noma’lum (mavjud ma’lumotlar asosida baholash imkonsiz).

Tez-tez emas.

Terining vaqtinchalik mahalliy reaksiyalari, masalan, qizarish, qichishish, achishish, toshma, shuningdek, pustulalar va qichishadigan pufakchalar paydo bo‘lishi.

Kamdan kam.

Yuqori sezuvchanlik reaksiyalari va/yoki mahalliy allergik reaksiyalar (kontakt dermatit).

Juda kam.

Bronxospatik sindrom.

Natriy metil-4-gidroksibenzoat yuqori sezuvchanlik reaksiyasini, shuningdek, uzoq muddatli reaksiyani keltirib chiqarishi mumkin.

Preparat uzoq vaqt va haddan tashqari ko‘p qo‘llanganda, o‘ta sezgir bemorlarda tizimli nojo‘ya ta’sirlar rivojlanishi mumkin.

Qarshi ko‘rsatmalar

ibuprofen va preparatning boshqa tarkibiy qismlariga yuqori sezuvchanlik;

anamnezda bronxial astma xurujlari yoki atsetilsalitsil kislotasi yoki boshqa nosteroid yallig‘lanishga qarshi vositalarni qo‘llash bilan bog‘liq boshqa allergik belgilarning mavjudligi;

homiladorlik va laktatsiya davri;

14 yoshgacha bo‘lgan bolalar.

Dorilarning o‘zaro ta’siri

Aniqlanmagan.

Agar siz boshqa dori vositalarini qo‘llayotgan bo‘lsangiz, preparatni qo‘llashdan oldin shifokor bilan maslahatlashing.

Maxsus ko‘rsatmalar

Preparatni ochiq jarohat yuzasiga, shikastlangan teri qatlamlariga (shu jumladan, infeksiyalangan shilinmalar va yaralarga) surtish mumkin emas; kremning ko‘zga va boshqa shilliq qavatlarga tushishidan saqlanish kerak. Preparatni 14 yoshgacha bo‘lgan bolalarda shifokor maslahatisiz qo‘llash mumkin emas.

Preparatning transport vositalari va potensial xavfli mexanizmlarni boshqarish qobiliyatiga ta’sirining o‘ziga xos xususiyatlari

Ta’sir qilmaydi.

Preparatni bolalar qo‘li yetmaydigan joyda saqlash va yaroqlilik muddati tugagandan so‘ng qo‘llamaslik lozim.

Dozani oshirib yuborish

Krem dozasini oshirib yuborish holatlari qayd etilmagan.

Preparat tasodifan ichilganda oshqozonni tozalash (qusish, faollashtirilgan ko‘mir qabul qilish) va shifokorga murojaat qilish kerak. Keyingi davolash, zarurat tug‘ilganda, simptomatik tarzda olib boriladi.

Chiqarilish shakli va qadoqlash

Sirtga qo‘llash uchun 5% li krem 20 g, 50 g va 100 g li alyuminiy tubalarda, membrana va burab qo‘yiladigan plastik qalpoqcha bilan berkitilgan.

Karton qutiga joylangan, davlat va rus tillarida foydalanish bo‘yicha yo‘riqnoma bilan birga bittadan tuba.

Saqlash shartlari

25 °C dan yuqori bo‘lmagan haroratda saqlanadi.

Muzlatmang!

Saqlash muddati

3 yil. Tyubik birinchi marta ochilgandan keyin saqlash muddati 3 oyni tashkil etadi.

Dorixonalardan berish shartlari

Retseptsiz.

Ishlab chiqaruvchi

"Dolorgit GmbX va Ko. NG," Germaniya

Otto-fon-Gürike-Strasse 1, 53754 Avgustin, Bonn, Germaniya

Ekskluziv distribyutor

PRO.MED.CS Praha a.s.

Telcska 1, 14000 Praha 4

Chexiya Respublikasi.