Gaz Off

Tarkib

Har bir tabletka tarkibiga quyidagilar kiradi:

faol moddalar: Alyuminiy gidroksid (Aluminium hydroxide) - 100,0 mg; Vismut karbonikum (Bismuth carbonicum) - 75,0 mg; Karika papaya (Carica papaya) - 100,0 mg; To‘g‘nog‘ichsimon plaun (Lycopodium clavatum) - 40,0 mg; Magniy gidroksid (Magnesium hydroxide) - 100,0 mg; Natriy bikarbonikum (Natrium bicarbonicum) - 75,0 mg;

yordamchi moddalar: sut-shakar asosi (laktoza) yetarli miqdorda.

Tavsif

Tabletkalari krem rangli, dumaloq, ikki tomoni qavariq, silliq bo‘lmagan tabletkalar.

Dori shakli

Tabletkalar.

Farmakoterapevtik guruh

Gomeopatik vosita. ATX kodi: A02AX.

Farmakologik ta’siri

Alyuminiy gidroksidi: Antatsid vosita sifatida ta’sir etadi, sanchiq va meteorizmni, oshqozondagi og‘irlik hissini yo‘qotadi.

Vismut karbonikum: Yallig‘lanishga qarshi xususiyatga ega bo‘lib, me’da va ichak yallig‘lanishini (me’da yarasi) bartaraf etadi hamda meteorizmni bartaraf etadi.

Karika papayya: oqsil, yog‘ va uglevodlarni hazm qila oladigan papain va ximopapain proteolitik fermentlarini saqlaydi; ovqatning to‘g‘ri hazm bo‘lishiga yordam beradi.

To‘g‘nog‘ichsimon plaun: qorin dam bo‘lishi, meteorizm va ichak gazlari to‘planishidan kelib chiqadigan kekirishni bartaraf etadi.

Magniy gidroksid: Antatsid vosita sifatida ta’sir qiladi, kekirishni, ovqatdan keyin oshqozondagi og‘irlik hissini yo‘qotadi.

Natrum bikarbonikum: Antatsid vosita sifatida ta’sir qiladi, yuqori kislotalilik va reflyuks-ezofagit belgilarini bartaraf etadi.

Ko‘rsatmalar

Meteorizm, qorin dam bo‘lishi, kislotalilikning oshishi, oshqozon yara kasalligi, reflyuks-ezofagit.

Qo‘llash usuli va dozalari

Kattalar va 12 yoshdan oshgan bolalarga: 1 tabletkadan kuniga 2 mahal.

6 yoshdan 12 yoshgacha bo‘lgan bolalarga: 1⁄2 tabletkadan kuniga 2 mahal.

Dori vositasini qabul qilish davomiyligi 10 kundan oshmasligi kerak.

Nojo‘ya ta’sirlari

Immun tizimi tomonidan: juda kam hollarda allergik reaksiyalar - toshmalar, eshakemi, Kvinke shishi va anafilaksiya.

Oshqozon-ichak trakti tomonidan: ko‘ngil aynishi, qusish, oshqozon buzilishi va ich ketishi.

Moddalar almashinuvi va ovqatlanish nuqtai nazaridan: buyrak faoliyati buzilgan bemorlarda preparatning katta dozalarini uzoq vaqt davomida qabul qilish dozani oshirib yuborish bilan bog‘liq reaksiyalar - gipermagniyemiya, giperkalsiyemiya va alkalozning namoyon bo‘lishiga olib kelishi mumkin, bu esa oshqozon-ichak traktida alomatlar (ko‘ngil aynishi, qusish, qabziyat) va mushaklar zaifligini keltirib chiqarishi mumkin.

Skelet-mushak tizimi va biriktiruvchi to‘qima tomonidan: mushaklar kuchsizligi.

Asab tizimi tomonidan: ta’m bilishning yo‘qolishi, bosh og‘rig‘i.

Buyrak va siydik yo‘llari tomonidan: azotemiya.

Sut-ishqor sindromi bilan bog‘liq nojo‘ya reaksiyalar: asteniya va kalsinoz.

Nojo‘ya ta’sirlar, shu jumladan, ushbu yo‘riqnomada ko‘rsatilmagan nojo‘ya ta’sirlar yuzaga kelgan taqdirda, dori vositasini qabul qilishni to‘xtatish va shifokorga murojaat qilish lozim.

Qarshi ko‘rsatmalar

Nefrokalsinoz, og‘ir buyrak yetishmovchiligi, giperkalsiemiya, giperkalsiuriya, gipofosfatemiya; fruktozani ko‘tara olmaslik, glyukoza-galaktoza so‘rilishining buzilishi yoki saxaraza-izomaltaza yetishmovchiligi bilan bog‘liq irsiy kasalliklar; preparat tarkibiy qismlariga yuqori sezuvchanlik, miasteniya, ichak tutilishi.

Dozani oshirib yuborish

Asosan buyrak faoliyati buzilgan bemorlarda preparatning katta dozalarini uzoq vaqt qabul qilish buyrak yetishmovchiligi, gipermagniyemiya, giperkalsiyemiya va alkalozga olib kelishi mumkin. Bunday holda preparatni qabul qilishni to‘xtatish va yetarli miqdorda suyuqlik ichish kerak. Dozani oshirib yuborishning og‘ir holatlarida (masalan, sut-ishqor sindromi) shifokor bilan maslahatlashish lozim, chunki suv muvozanatini tiklash uchun qo‘shimcha choralar ko‘rish talab etilishi mumkin.

Davolash simptomatik.

Maxsus shartlar

Bemorlarda quyidagi alomatlardan biri yoki bir nechtasi mavjud bo‘lsa, shifokorga murojaat qilish tavsiya etiladi: vazn yo‘qotish; yutish qiyinligi yoki oshqozon sohasida doimiy noqulaylik; birinchi marta paydo bo‘lgan yoki o‘zgargan ovqat hazm qilish buzilishlari; buyrak kasalligi mavjudligi (bu ma’lumot qon zardobidagi kalsiy darajasini kuzatish uchun zarur).

Laktoza mavjudligi sababli, preparat fruktozani ko‘tara olmaslik, glyukoza va galaktoza so‘rilishining buzilishi, saxaraza-izomaltaza yetishmovchiligi bo‘lgan bemorlarga qo‘llash mumkin emas.

Agar preparatni qabul qilish paytida alomatlar saqlanib qolsa yoki ahvol yomonlashsa, u holda tekshiruv o‘tkazish va davolanishni tayinlash uchun shifokor bilan maslahatlashish zarur.

Nojo‘ya ta’sirlar ko‘pincha tiazidli diuretiklar bilan birgalikda qabul qilinganda yoki ko‘p miqdorda sut yoki sut mahsulotlarini qabul qiluvchi bemorlarda, ayniqsa uzoq muddat qo‘llanganda kuzatilgan.

Kuniga 4 tadan 8 tagacha tabletka qabul qilingan taqdirda, davolash davomiyligini imkon qadar cheklash kerak, alomatlar yo‘qolganidan so‘ng dori vositasini qabul qilishni to‘xtatish lozim.

Dorilarning o‘zaro ta’siri

Bir vaqtning o‘zida qabul qilinganda, ichga qabul qilinadigan boshqa dori vositalarining oshqozon-ichak traktiga so‘rilishi kamayadi. Ehtiyot chorasi sifatida antatsidlarni boshqa dori vositalaridan alohida qabul qilish maqsadga muvofiqdir.

Boshqa dori vositalarini qabul qilishdan 2 soat oldin yoki keyin qabul qilish tavsiya etiladi: antigistamin N2; atenenolol, metoprolol, propranolol; xloroxin; siklinlar; diflunizal; digoksin; difosfonatlar; feksofenadin; temir (tuzlari); ftorxinolonlar; natriy ftorid; glyukokortikoidlar (prednizolon va deksametazon uchun tavsiflangan); indometatsin; kayeksalat; ketokonazol; fenotiazin qatori neyroleptiklari; penitsillamin; fosfatlar; tiroksin.

Tiazidli diuretiklar bilan ehtiyotkorlik bilan qabul qiling.

Siydikning ishqorlanishi hisobiga salitsilatlarning buyrak orqali ekskretsiyasi ko‘payadi.

Bir vaqtning o‘zida boshqa dori vositalarini qabul qilish holatida shifokor bilan maslahatlashish zarur.

Saqlash shartlari

Salqin, quruq va yorug‘likdan himoyalangan joyda, 25 °C dan yuqori bo‘lmagan haroratda saqlang. Bolalardan saqlang.

Yaroqlilik muddati

Ishlab chiqarilgan sanadan boshlab 5 yil. Yaroqlilik muddati tugaganidan keyin ishlatilmasin.

Chiqarish shakli

10 ta tabletkadan iborat 1 ta blister qo‘llash bo‘yicha yo‘riqnoma bilan birga individual karton qadoqqa joylangan.

Ishlab chiqaruvchi

Bhargava Phytolab Pvt. Ltd, Hindiston.