Ideos

Tarkib

1 ta tabletka tarkibida quyidagilar mavjud:

Faol moddalar: kalsiy karbonat 1250 mg, bu 500 mg elementar kalsiyga to‘g‘ri keladi, kolekalsiferol (D3* vitamini) 400 XB (10 mkg).

Yordamchi moddalar: ksilitol, povidon, magniy stearat, limon** aromatizatori, sorbitol***.

*D3 vitaminining tarkibi: alfa-tokoferol, qisman gidrogenlangan soya moyi***, jelatina, saxaroza***, makkajo‘xori kraxmali.

Limonli xushbo‘ylantirgich tarkibi: limon va apelsin efir moylari, cubeda litseyi, maltodekstrin, akatsiya yelimi, natriy sitrat.

***Sezuvchanligi yuqori va ko‘tara olmaydigan bemorlarga ushbu yordamchi moddalarning mavjudligiga e’tibor qaratish - "Maxsus ko‘rsatmalar" bo‘limiga qarang.

Tavsif

Kvadrat shaklidagi tabletkalar, oqdan kulrang-oq ranggacha.

Dori shakli

Chaynov tabletkalari 500 mg/400 XB.

Farmakoterapevtik guruh

Metabolik jarayonlarni korreksiyalash vositasi (kalsiy va fosfor almashinuvini boshqaruvchi). ATX kodi: A12AX .

Farmakologik xususiyatlari

Organizmda (suyak, tish, tirnoq, soch, mushaklarda) kalsiy va fosfor almashinuvini tartibga soluvchi kombinatsiyalangan preparat. D3 vitamini oshqozon-ichak traktida kalsiyning so‘rilishini va suyak to‘qimasida birikishini oshiradi. Rezorbsiyani (so‘rilishni) kamaytiradi va suyak to‘qimasining zichligini oshiradi, organizmda kalsiy va D3 vitamini yetishmasligini to‘ldiradi, tishlar mineralizatsiyasi uchun zarur. Kalsiy nerv o‘tkazuvchanligini, mushak qisqarishlarini boshqarishda ishtirok etadi va qon ivish tizimining tarkibiy qismi hisoblanadi.

D3 vitamini kalsiyning ichakda so‘rilishini oshiradi. Kalsiy va D3 vitaminini qo‘llash paratireoid gormon (PTG) ishlab chiqarilishining ko‘payishiga to‘sqinlik qiladi, bu esa suyak rezorbsiyasining (suyaklardan kalsiyning yuvilishi) kuchayishini rag‘batlantiradi.

Farmakokinetika

Preparat tarkibiy qismlarining o‘zaro ta’siri tufayli yuzaga keladi. D3 vitamini ingichka ichakda so‘riladi. Kalsiy ichakning proksimal qismida faol D3 vitaminiga bog‘liq transport mexanizmi yordamida ionlashgan shaklda so‘riladi.

Qo‘llanilishi

Kalsiy yoki D3 vitamini yetishmovchiligining oldini olish va davolash.

Osteoporoz (menopauzal, senil, steroid, idiopatik va boshqalar) profilaktikasi va kompleks terapiyasi.

Terapiyasida kortikosteroidlar, sitostatiklar va talvasaga qarshi preparatlar qo‘llaniladigan revmatik kasalliklarga chalingan bemorlarda ikkilamchi osteoporozning oldini olish va davolash.

Qo‘llash usuli va dozalari

Faqat kattalar uchun!

Davolashni boshlashdan oldin shifokor bilan maslahatlashing. O‘rtacha sutkalik doza 2 tabletkadan (ertalab va kechqurun I tabletkadan), agar shifokorning boshqa ko‘rsatmalari bo‘lmasa. Tabletkalarni shimish yoki chaynash kerak.

Davolash kursining davomiyligini kasallikning kechishiga qarab shifokor belgilaydi.

Nojo‘ya ta’sirlari

Allergik reaksiyalar (Kvinke shishi, qichishish, teri toshmasi, eshakemi) va oshqozon-ichak trakti tomonidan noxush holatlar (qabziyat yoki ich ketishi, qorin dam bo‘lishi, epigastral sohada og‘riq, ko‘ngil aynishi) kuzatilishi mumkin.

Kamdan-kam hollarda uzoq vaqt davolanganda qon yoki siydikda kalsiy miqdori ko‘payishi mumkin (giperkalsiemiya va giperkalsiuriya).

Agar yo‘riqnomada ko‘rsatilgan nojo‘ya ta’sirlarning birortasi kuchaysa yoki yo‘riqnomada ko‘rsatilmagan boshqa nojo‘ya ta’sirlarni sezsangiz, bu haqda shifokorga xabar bering.

Qarshi ko‘rsatmalar

Preparat komponentlariga yuqori sezuvchanlik.

Giperkalsiyemiya (qonda kalsiy konsentratsiyasining oshishi).

Giperkalsiuriya (siydik bilan kalsiy ajralishining ko‘payishi) va giperkalsiyemiya yoki giperkalsiuriyaga olib keladigan kasalliklar (masalan, miyeloma kasalligi, suyak metastazlari, birlamchi giperparatireoz).

Buyrak-tosh kasalligi (kalsiyli toshlar hosil bo‘lishi).

Uzoq muddatli immobilizatsiya tufayli kelib chiqqan osteoporoz.

D gipervitaminozi

Buyrak yetishmovchiligi.

Sarkoidozda preparatni ehtiyotkorlik bilan qabul qilish kerak.

Dorilarning o‘zaro ta’siri

Shifokorga qanday dori-darmonlarni qabul qilayotganingizni aytishingiz kerak.

Dozani oshirib yubormaslik uchun D3 vitaminining boshqa manbalardan qo‘shimcha kelib tushishini hisobga olish zarur. Tarkibida kalsiy va D3 vitamini bo‘lgan vitamin komplekslari bilan bir vaqtda qo‘llash mumkin emas. Fenitoin, barbituratlar, glyukokortikosteroidlar vitamin D3 ta’sirini pasaytiradi. Glyukokortikoidlar kalsiy absorbsiyasini kamaytiradi.

Xolesteramin, orlistat. surgi vositalari (parafin moyi) vitamin D3 so‘rilishini kamaytiradi. Ideos bifosfonatlar, natriy ftorid so‘rilishining pasayishiga olib keladi, shuning uchun bu preparatlarni qabul qilish oralig‘i kamida 2 soat bo‘lishi kerak.

Ideos tetratsiklin guruhidagi antibiotiklarning so‘rilishini pasayishiga olib keladi, shuning uchun bu preparatlarni qabul qilish oralig‘i kamida 3 soat bo‘lishi kerak. Yurak glikozidlari Ideos preparati bilan bir vaqtda qabul qilinganda ularning zaharliligi ortadi. EKG va klinik holatni vaqti-vaqti bilan nazorat qilib turish zarur. Tarkibida estramustin, tireoid gormonlar, stronsiy, temir tuzlari, rux bo‘lgan preparatlarni - biomavjudligi 60-70% ga kamayishi xavfi tufayli Ideos preparati bilan 2 soatlik interval bilan qabul qilish tavsiya etiladi.

Ideos preparati tiazidli diuretiklar bilan qabul qilinganda giperkalsiyemiya rivojlanish xavfi ortadi. Furosemid va boshqa "halqa" diuretiklar kalsiyning buyraklar orqali chiqarilishini oshiradi.

Soyaga yuqori sezuvchanlik, sorbitol va saxarozaga ko‘tara olmaslik holatlarida preparatni ehtiyotkorlik bilan qabul qilish lozim. Agar sizda shakarni ko‘tara olmaslik yoki soya yoki yeryong‘oqqa allergiya bo‘lsa, Ideos preparatini qabul qilish imkoniyati haqida maslahat olish uchun shifokorga murojaat qiling.

Maxsus ko‘rsatmalar

Davolash davrida kalsiyning siydik bilan chiqarilishi va plazmadagi kalsiy hamda kreatinin konsentratsiyasini doimiy nazorat qilib borish zarur. Kaltsiuriya 7,5 mmol/sut (300 mg/sut) dan oshgan taqdirda dozani kamaytirish yoki qabul qilishni to‘xtatish kerak.

Keksa odamlarda kalsiyga bo‘lgan ehtiyoj 1,5 g/sutka, D3 vitaminiga bo‘lgan ehtiyoj 500-1000 XB/sutkani tashkil etadi.

Anamnezida sarkoidoz, buyrak yetishmovchiligi yoki qandni ko‘tara olmaslik bo‘lsa, Ideos preparatini qo‘llashdan oldin shifokorga murojaat qiling.

Dozaning oshib ketishining oldini olish uchun D3 vitaminining boshqa manbalardan qo‘shimcha kelib tushishini hisobga olish zarur. Tarkibida oksalat kislotasi (oksalat, ismaloq), fosfatlar (kolbasa mahsulotlari, sosiskalar, eritilgan pishloqlar) va fitin kislotasi (yormalar) bo‘lgan oziq-ovqat mahsulotlari kalsiyning so‘rilishini pasaytiradi, shuning uchun sanab o‘tilgan mahsulotlarni iste’mol qilgandan keyin ikki soat ichida Ideosni qabul qilmaslik kerak.

Homiladorlik va emizish

Homiladorlik davrida sutkalik doza kuniga 1500 mg kalsiy va 600 XB D3 vitaminidan oshmasligi kerak. Homiladorlik davrida vitamin D3 dozasini oshirib yuborish bolaning ruhiy va jismoniy rivojlanishi buzilishiga olib kelishi mumkin. Kalsiy va vitamin D3 ona sutiga o‘tadi.

Transport vositalarini boshqarish qobiliyatiga ta’siri

Preparatning transport vositalari va boshqa mexanizmlarni boshqarish qobiliyatiga salbiy ta’siri haqida ma’lumotlar yo‘q.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Dozani oshirib yuborish belgilari: ko‘ngil aynishi, qusish, chanqash, qabziyat, bosh aylanishi, hushdan ketish holatlari, holsizlik, giperkalsiuriya, giperkalsiyemiya, buyrak yetishmovchiligi, giperkreatinemiya, yurak ritmining buzilishi.

Ortiqcha dozalar uzoq vaqt qo‘llanganda tomirlar va to‘qimalarning kalsinozi yuzaga kelishi mumkin. Davolash: organizmga ko‘p miqdorda suyuqlik yuborish, qovuzloqli diuretiklar (masalan, Furosemid), glyukokortikosteroidlar, kalsitonin, bifosfonatlar qo‘llash.

Dozani oshirib yuborish alomatlari aniqlangan taqdirda, shifokor yordamiga murojaat qiling. Dozani oshirib yuborishning klinik belgilari rivojlangan taqdirda, qondagi kalsiy va kreatinin konsentratsiyasini aniqlash lozim. Qon zardobida kalsiy yoki kreatinin konsentratsiyasi oshgan taqdirda, davolashni to‘xtatish va shifokorga murojaat qilish lozim.

Chiqarish shakli

Tubada 10 yoki 15 tabletkadan.

Bir qutida 2, 4, 5, 6, 10, 12 tadan.

Saqlash shartlari

25 °C dan yuqori bo‘lmagan haroratda saqlanadi.

Yaroqlilik muddati

2,5 yil.

Dorixonalardan berish shartlari

Retseptsiz.

Ishlab chiqarilgan

Innota Shuzi

Ryu Rene Shantero, L’Isl Ver, 41150 Shuzi-Syursis.

Innotsk International laboratoriyasi

22 Aristid Brian avenyu, 94110 Arkey, Fransiya.