Kalizidsuspenziyasi 200 ml (shisha)

Tarkib

Har 5 ml suspenziya quyidagilarni o‘z ichiga oladi: organik manbadan (ustritsa chig‘anog‘i) olingan 625 mg kalsiy karbonat, elementar kalsiyga ekvivalent 250 mg, lizin gidroxlorid 50 mg, 38,33 mg rux glyukonat, elementar ruxga ekvivalent 5 mg, D3 vitamini 125 mg.

Dori shakli

Suspenziya.

Farmakoterapevtik guruh

Biologik faol qo‘shimcha.

Farmakologik ta’siri

D3 vitamini asosan quyosh nuri ta’sirida hosil bo‘ladi. Salomatlikni saqlash uchun quyosh nuriga ehtiyoj katta. D3 vitamini organizmda kalsiyni o‘zlashtirish uchun zarur. Kalsiy organizmda eng ko‘p tarqalgan mineral bo‘lib, ba’zi oziq-ovqat mahsulotlari va antatsidlarda uchraydi. Kalsiy mushaklarning qisqarishi, qon tomirlarining kengayishi va qisqarishi, gormonlar va fermentlar sekretsiyasi hamda nerv tizimi orqali impulslarni uzatish uchun zarur. Lizin bolalarda suyaklarning o‘sishi va rivojlanishi uchun zarur bo‘lib, kalsiyning o‘zlashtirilishiga, mushak massasini va organizmda azotning to‘g‘ri muvozanatini saqlashga yordam beradi.

Rux hujayra metabolizmining ko‘plab jarayonlarida ishtirok etadi. U immun funksiyasi, oqsil sintezi, yaralarning bitishi, DNK sintezi va hujayra bo‘linishida muhim rol o‘ynaydigan 100 ga yaqin fermentlarning katalitik faolligi uchun zarur. Rux homiladorlik, bolalik va o‘smirlik davrida ham normal o‘sish va rivojlanishni qo‘llab-quvvatlaydi. Kunlik rux iste’moli statsionar holatni saqlash uchun zarur, chunki organizm ruxni saqlash uchun maxsus tizimga ega emas.

Ko‘rsatmalar

Osteomalyatsiya va osteoporozning oldini olish uchun hamda osteoporoz va raxitni kompleks davolashda qo‘shimcha vosita sifatida.

Organizmning kalsiyga bo‘lgan talabi oshganida: bolalar va o‘smirlarda jadal o‘sish davrida; ayollarda homiladorlik va laktatsiya davrida.

Quyidagilar bilan bog‘liq bo‘lgan kalsiy tanqisligi holatlarida: ovqatlanishning buzilishi; tarkibida kalsiy va D vitamini yetarli bo‘lmagan parhez.

Qo‘llash usuli va dozasi

Ichga, bevosita ovqatdan oldin yoki ovqat vaqtida qabul qilinadi.

Kalsiy va D vitamini tanqisligi, osteoporoz va osteomalyatsiyaning oldini olish uchun: 1 oydan 6 oygacha bo‘lgan bolalarga: muddatida tug‘ilgan emizikli bolalarga 5 ml dan (1 choy qoshiq) kuniga 1-2 marta, chala tug‘ilgan va kam vaznli bolalarga 5-7,5 ml dan (1-1,5 choy qoshiq) kuniga 4 marta, oldindan sut yoki qaynatilgan suv bilan suyultirilgan holda; 6 oydan 12 oygacha bo‘lgan bolalarga: 5 ml dan (1 choy qoshiq) kuniga 2 marta; 1 yoshdan 3 yoshgacha bo‘lgan bolalarga: 5-10 ml dan (1-2 choy qoshiq) kuniga 1-2 marta; 3 yoshdan 6 yoshgacha bo‘lgan bolalarga: 5-10 ml dan (1-2 choy qoshiq) kuniga 2 marta; 6 yosh va undan katta bolalarga: 10 ml dan (2 choy qoshiq) kuniga 2 marta, homilador va emizikli ayollarga: 10 ml dan (2 choy qoshiq) kuniga 2 marta. Qabul qilish davomiyligi individual belgilanadi.

Qadoqda o‘lchov qalpoqchasi mavjud.

Ishlatishdan oldin flakonni yaxshilab chayqating.

Nojo‘ya ta’siri

Preparat yaxshi o‘zlashtiriladi, ba’zan ko‘ngil aynishi, qusish, qabziyat, ich ketishi mumkin.

Qarshi ko‘rsatmalar

Preparat komponentlariga yuqori sezuvchanlik. Birlamchi yoki ikkilamchi giperkalsiyemiya, giperkalsiuriya yoki buyrak-tosh kasalligi, dekalsinatsiyalanuvchi o‘smalar (miyeloma, suyak metastazlari, sarkoidoz), gipoparatireoidizm va buyrak yetishmovchiligi. Immobilizatsiya tufayli kelib chiqqan osteoporoz.

Dozani oshirib yuborish

D vitamini ko‘p miqdorda uzoq muddat buyurilganda D gipervitaminozi yuzaga kelishi mumkin. Preparatni ko‘p iste’mol qilish giperkalsiyemiyaga olib kelishi mumkin. Giperkalsiyemiya belgilari: ko‘ngil aynishi, qusish, anoreksiya, bosh og‘rig‘i, hushdan ketish, holsizlik. Bunday hollarda kalsiy va D3 vitamini bilan davolashni to‘xtatish kerak. Ko‘p miqdorda suyuqlik iste’mol qilish va tarkibida kalsiy miqdori cheklangan parhezga amal qilish lozim.

Maxsus ko‘rsatmalar

Homiladorlik va laktatsiya

Homiladorlik va laktatsiya davrida ayollar kalsiy va D3 vitaminini ehtiyotkorlik bilan qabul qilishlari kerak. Kalsiy va D3 vitamini ko‘krak sutiga o‘tganligi sababli, ona va bola organizmiga kalsiy va D3 vitaminining boshqa manbalardan tushishi hisobga olinishi kerak.

Preparatni nazoratsiz qo‘llash chaqaloqda giperkalsiyemiyaga olib kelishi mumkin.

Boshqa moddalar bilan o‘zaro ta’siri

Barbituratlar yoki tutqanoqqa qarshi dorilar qabul qilayotgan bemorlarda D vitaminining ta’siri kamayishi mumkin. Kalsiy digitalisning yurakka ta’sirini kuchaytiradi va digitalis bilan zaharlanishga olib kelishi mumkin. Kalsiy tuzlari tetratsiklinlar absorbsiyasini ingibirlaydi. Penitsillamin bilan parallel buyurish oxirgi moddaning ta’sirini kamaytirishi mumkin.

Kalsiy tuzlarini buyrak faoliyati buzilgan, yurak kasalligi yoki sarkoidoz bilan og‘rigan bemorlarga ehtiyotkorlik bilan buyurish kerak.

Chiqarish shakli

200 ml dan polietilen tereftalat (PET) flakonda. O‘lchov qopqog‘i bilan birga bitta flakon va karton qadoqda qo‘llash bo‘yicha yo‘riqnoma.

Saqlash shartlari

+25 °C dan yuqori bo‘lmagan haroratda, to‘g‘ridan-to‘g‘ri quyosh nurlari ta’siridan himoyalangan quruq joyda saqlanadi. Bolalar qo‘li yetmaydigan joyda saqlang. Muzlatmang.

Yaroqlilik muddati

2 yil. Yaroqlilik muddati tugagan bo‘lsa, ishlatilmasin.

Ishlab chiqaruvchi

"SKant Healthcare LTD."