Pirogenal

Tarkib

Faol moddasi: bakterial lipopolisaxarid 10, 25, 50, 100 mkg.

Yordamchi moddalar: fosfat-tuzli bufer eritma (pH 6,7÷7,3).

Tavsif

Rangsiz tiniq suyuqlik.

Dori shakli

Mushak orasiga yuborish uchun eritma.

Farmakoterapevtik guruh

MIBP - immunomodulyator. ATX kodi: L03AX.

Farmakologik xususiyatlari

Pirogenal Salmonella typhi mikrob hujayralaridan ajratib olingan lipopolisaxariddir.

Pirogenal - keng ta’sir doirasiga ega bo‘lgan yuqori faol nospetsifik immunomodulyator. Pirogenal organizmda murakkab immunologik va fiziologik o‘zgarishlarning butun bir majmuasini keltirib chiqaradi, ularning asosiylari retikuloendotelial, gipotalamo-gipofizar va fibrinolitik tizimlarning faollashuvidir.

Pirogenal ad’yuvant, desensibilizatsiyalovchi va yallig‘lanishga qarshi xususiyatlarga ega bo‘lib, organizmning umumiy va maxsus chidamliligini oshiradi, gipotalamusning termoregulyatsiya markazlariga ta’sir ko‘rsatadi.

Pirogenal makrofaglarni faollashtiradi, fagotsitozni kuchaytiradi, organizmning bir qator hujayralari (fibroblastlar, endotelial hujayralar, qon yaratuvchi hujayralar va boshqalar) proliferatsiyasini keltirib chiqaradigan interleykin-1 (IL-1), limfotsitlar (birinchi navbatda T-hujayralar) o‘sishini qo‘llab-quvvatlash uchun zarur bo‘lgan interleykin-2 (IL-2), o‘sma nekrozi omili (O‘NO), endogen interferon (IF) induksiyasi, kislorodning faol shakllari ishlab chiqarilishini rag‘batlantiradi. Fagotsitlar funksional faolligining oshishi organizmning antimikrob rezistentligining o‘sishiga, antitelolar hosil bo‘lishining tezlashishiga olib keladi.

Shunday qilib, makrofagal-monotsitar qator hujayralari va ular ajratadigan sitokinlarning faollashishi natijasida ham hujayraviy, ham gumoral immun javobning funksional faolligi kuchayadi.

Biriktiruvchi to‘qimada pirogenal ta’sirida fibroblastlarning rivojlanish jarayoni va kollagen tolalarining shakllanishi bostiriladi, bu yumshoq biriktiruvchi to‘qima hujayra tarkibining yosharishiga, nerv to‘qimasida esa glial chandiqlar hosil bo‘lishining tormozlanishiga olib keladi. Yangi chandiqlar hosil bo‘lishiga to‘sqinlik qiladi va jarohatlangan joylarda avval hosil bo‘lgan zich chandiq va bitishmalarni tarqatadi, tomirlar obliteratsiyasining oldini oladi, to‘qimalar regeneratsiyasi va epitelizatsiyasini rag‘batlantiradi.

Gialuronidaza faolligini rag‘batlantiradi, qonning fibrinolitik xususiyatini yaxshilaydi, lizosomal fermentlar faolligini oshiradi, kinin tizimini rag‘batlantiradi, to‘qimalar o‘tkazuvchanligining ortishini va dori moddalarining zararlanish o‘chog‘iga tezroq o‘tishini ta’minlaydi. Yallig‘lanish o‘choqlarining so‘rilishi va qon aylanishining tiklanishiga yordam beradi.

Gipofiz tizimi - buyrak usti bezi po‘stlog‘i funksiyasini faollashtiradi, qonda gormonlar konsentratsiyasini oshiradi, yallig‘lanishga qarshi va og‘riq qoldiruvchi ta’sir ko‘rsatadi. U termoregulyatsiya markaziga ta’sir ko‘rsatib, boshqariladigan pirogen effekt hosil qiladi.

Farmakokinetika

Pirogenal organizmga yuborilganda lipopolisaxaridning 85-90% i aylanib yuruvchi leykotsitlar yuzasida fiksatsiyalanadi, 10% ga yaqini aylanib yuruvchi plazmada qoladi va 5% ga yaqini eritrotsitlar membranalarida adsorbsiyalanadi.

Preparat yuborilgandan so‘ng latent davrda (45-90 min) leykopeniya rivojlanadi, u 24-48 soat davomida saqlanib turadigan leykotsitoz bilan almashadi. Organizmdan siydik bilan chiqariladi.

Qo‘llanilishi

Pirogenalning keng qamrovli davolash-profilaktik ta’siri xirurgiya, neyroxirurgiya, urologiya, ginekologiya, teri-tanosil, terapevtik, psixiatriya amaliyoti, oftalmologiya, pediatriya, narkologiya va boshqalarda turli kasalliklarni davolashda nospetsifik vosita sifatida foydalanish samaradorligini belgilaydi.

Preparat nospetsifik terapiya uchun mo‘ljallangan: jarrohlik amaliyotida (bitishma kasalligi, kuyishdan keyingi keloid chandiqlar va kontrakturalar, jarohatlar, qon tomir kasalliklari, qon tomirlar obliteratsiyasining oldini olish va boshqalar); markaziy va periferik asab tizimining travmatik shikastlanishlari, orqa miya churralari, serebral araxnoiditlar; so‘rilish bosqichidagi silning torpid-joriy shakli; surunkali jigar kasalliklari; uretra va siydik yo‘llarining torayishi, surunkali prostatitlar va uretritlar; ko‘zning og‘ir kuyishi, uveitlar, iridotsiklitlar, ko‘zning gerpesvirusli infeksiyasi, shox pardaning xiralashishi, ko‘rish va eshitish nervi nevralgiyasi, virusli keratitlar va konyunktivitlar; bachadon ortiqlarining yallig‘lanish jarayonlari, bepushtlik; qorin bo‘shlig‘ining bitishmali kasalligi; tanosil kasalliklari, psoriaz va boshqa surunkali teri kasalliklari; shuningdek, mikroorganizmlarning kimyoviy va antibiotik terapiyaga yuqori chidamliligi holatlarida.

Pirogen preparat sifatida u piroterapiyaga ko‘rsatma bo‘lgan hollarda (dermatovenerologiya, narkologiya, psixiatriya) qo‘llaniladi.

Qo‘llash usuli va dozalari

Pirogenal, mushak orasiga yuborish uchun eritma, mushak orasiga sutkada bir marta qo‘llaniladi. Inyeksiyalar kunora qilinadi. Zarurat bo‘lganda 0,9% li inyeksiya uchun natriy xlorid eritmasi bilan suyultiriladi. Ochiq ampuladagi preparat saqlanmaydi.

Pirogenalning terapevtik dozalari individual bo‘ladi.

Kattalar uchun boshlang‘ich bir martalik doza 2,5 mkg. Inyeksiyaning keyingi kunlarida doza asta-sekin 2,5-5,0 mkg ga oshiriladi. Maksimal bir martalik doza - 100 mkg. Davolash kursi kasallikka qarab 10 tadan 30 tagacha inyeksiya qilinadi.

Bolalar uchun boshlang‘ich bir martalik doza 0,5-1,5 mkg. Inyeksiyaning keyingi kunlarida doza asta-sekin bolalarning yoshiga qarab 0,5-1,5 mkg yoki 2,5 mkg ga oshiriladi. Maksimal bir martalik dozasi 25-30 mkg. Davolash kursi kasallikka qarab 10 dan 15 gacha inyeksiya qilinadi.

Zarurat tug‘ilganda, inyeksiya kurslari 2-3 oydan keyin takrorlanadi.

Pirogenal piroterapiya maqsadida buyurilganda, preparat mushak orasiga sutkada bir marta 5-10 mkg dan boshlab yuboriladi, dozasi asta-sekin 100-150 mkg gacha oshiriladi. Inyeksiyalar shifokor ko‘rsatmasi bo‘yicha bir yoki ikki kundan keyin qilinadi.

Yuborishga reaksiya

Preparat yuborilganda odatda hech qanday reaksiya yuzaga kelmaydi. Bemorlarning bir qismida tana harorati 37,5 °C gacha ko‘tarilib, kuchsiz qaltirash va yengil lohaslik kuzatilishi mumkin. Bunday holat 3 soatdan 8 soatgacha davom etishi mumkin.

Bunday holda, bunday reaksiyani keltirib chiqargan doza keyingi kunlarda uni yuborishga reaksiya to‘xtamaguncha takrorlanadi (odatda 1-3 inyeksiya), so‘ngra doza ketma-ket oshiriladi.

Kamdan-kam hollarda ayrim shaxslarda kuchli titroq, haroratning 39,5 °C gacha ko‘tarilishi, bosh og‘rig‘i, bel og‘rig‘i kuzatilishi mumkin. Bu reaksiyalar odatda 6 soatdan 8 soatgacha davom etadi, so‘ngra harorat pasayadi va nojo‘ya ta’sirlar yo‘qoladi. Bunday hollarda preparat dozasini kamaytirish tavsiya etiladi.

Preparat piroterapiya uchun qo‘llanilganda, yuqorida tavsiflangan reaksiyalar ruxsat etiladi.

Qarshi ko‘rsatmalar

o‘tkir isitma kasalliklari;

xuruj va dekompensatsiya bosqichidagi surunkali kasalliklar, pirogenalni buyurishga ko‘rsatma bo‘lgan kasalliklar bundan mustasno;

qon kasalliklari;

homiladorlik va laktatsiya davri.

Surunkali yurak-qon tomir tizimi, buyrak kasalliklari va qandli diabet bilan og‘rigan odamlarga shifokor nazorati ostida davolanish kerak.

Anamnezda tutqanoq tayyorgarligi yoki febril tutqanoqlar mavjud bo‘lsa, preparat yo buyurilmaydi, yoki tutqanoqqa qarshi terapiya fonida yuboriladi.

Dorilarning o‘zaro ta’siri

Preparat ko‘rsatilgan kasalliklarni davolashda qo‘llaniladigan barcha dori vositalari bilan mos keladi va yaxshi uyg‘unlashadi. Kompleks terapiyada maxsus kimyoterapevtik preparatlarning samaradorligini oshiradi.

Maxsus ko‘rsatmalar

5 yoshgacha bo‘lgan bolalarga va 60 yoshdan oshgan shaxslarga preparatni kamaytirilgan dozalarda buyurish va ularni faqat shifokor nazorati ostida preparatni yaxshi o‘zlashtirgandagina oshirish lozim.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Pirogenal dozasi oshirib yuborilganda ayrim bemorlarda qaltirash, tana haroratining ko‘tarilishi, bosh og‘rig‘i, qusish, belda og‘riq paydo bo‘lishi mumkin. Bu reaksiyalar odatda 6-8 soat davom etadi, shundan so‘ng tana harorati pasayadi va nojo‘ya ta’sirlar yo‘qoladi. Bunday hollarda davolovchi shifokorga murojaat qilish zarur.

Chiqarish shakli

Ampulalarda tarkibida 10, 25, 50, 100 mkg lipopolisaxarid bo‘lgan 1 ml pirogenal eritmasi.

Qadoqda qo‘llash bo‘yicha yo‘riqnoma bilan birga bir xil konsentratsiyali 10 ta ampula mavjud. Halqasiz yoki sinish nuqtasi bo‘lmagan ampulalardan foydalanilganda, qo‘shimcha ravishda ampula pichog‘i qo‘yiladi.

Saqlash shartlari

SP 3.3.2.1248-03 ga muvofiq, yorug‘likdan himoyalangan joyda 2 dan 10 °C gacha bo‘lgan haroratda.

Tashish. SP 3.3.2.1248-03 ga muvofiq, 2 dan 20 °C gacha bo‘lgan haroratda.

Yaroqlilik muddati

2 yil.

Dorixonalardan berish shartlari

Retsept bo‘yicha.

Ishlab chiqaruvchi

Rossiya Sog‘liqni saqlash vazirligining "N.F. Gamaleya nomidagi NIIEM" Federal davlat byudjet muassasasi (Rossiya Sog‘liqni saqlash vazirligining "N.F. Gamaleya nomidagi NIIEM" Federal davlat byudjet muassasasining "Medgamal" filiali); Rossiya, 123098, Moskva shahri, Gamaleya ko‘chasi, 18-uy; tel. (499) 193-30-50, (499) 190-44-59; faks (499) 190-66-71.