Soda bufer

Tarkib

1 ml eritma tarkibiga quyidagilar kiradi:

Faol modda: 42 mg natriy karbonat.

Yordamchi moddalar: dinatriy edetat; uglerod dioksidi; inyeksiya uchun suv.

Tavsif

Tiniq, rangsiz suyuqlik.

1 l preparatdagi ion tarkibi: natriy ioni - 0,5 mol, gidrokarbonat ioni - 0,5 mol. Nazariy osmolyarlik - 1000 mOsm/l. pH 7,0-8,5.

Dori shakli

Infuziya uchun eritma.

Farmakoterapevtik guruh

Vena ichiga yuborish uchun eritmalar. Natriy bikarbonat. ATX kodi: B05XA02.

Farmakologik xususiyatlari

Qonning ishqoriy holatini tiklash va metabolik atsidozni korreksiyalash uchun vosita. Natriy gidrokarbonat dissotsilanganda bikarbonat anioni ajralib chiqadi, u vodorod ionlarini biriktirib karbonat kislota hosil qiladi, so‘ngra karbonat kislota suvga va nafas olishda ajralib chiqadigan karbonat angidridga parchalanadi. RN ko‘rsatkichi 7,3-7,8 gacha yetkazilgan eritma sakrab ishqorlanishning oldini oladi va qondagi ishqoriy zaxiralarni ko‘paytirish bilan bir vaqtda atsidozning ravon korreksiyasini ta’minlaydi. Preparat, shuningdek, organizmdan natriy va xlor ionlarining ajralishini ko‘paytiradi, osmotik diurezni oshiradi, siydikni ishqorlaydi, siydik chiqarish tizimida siydik kislotasi cho‘kishining oldini oladi. Bikarbonat anioni hujayra ichiga kirmaydi.

Farmakokinetika

Tekshirilmagan.

Qo‘llanilishi

Turli xil etiologiyali intoksikatsiyalar, shu jumladan kuchsiz organik kislotalar (barbituratlar, atsetilsalitsil kislotasi) bilan zaharlanish kabi turli kasalliklarda kompensatsiyalanmagan metabolik atsidoz; operatsiyadan keyingi davrning og‘ir kechishi, keng tarqalgan chuqur kuyishlar, shok, diabetik koma, uzoq muddatli diareya, to‘xtovsiz qusish, o‘tkir massiv qon yo‘qotish, jigar va buyraklarning og‘ir shikastlanishi, uzoq muddatli isitma holatlari, chaqaloqlarning og‘ir gipoksiyasi. Qonning pH ko‘rsatkichi 7,2 dan pasayishi mutlaq ko‘rsatkich hisoblanadi.

Qo‘llash usuli va dozalari

Kattalar va 1 yoshdan oshgan bolalarga soatiga 1,5 mmol/kg tezlikda (soatiga 3 ml 4,2% Soda-bufer®/kg) vena ichiga tomchilab, qonning pH ko‘rsatkichi va kislota-ishqor hamda suv-elektrolit muvozanati ko‘rsatkichlari nazorat ostida buyuriladi.

Yangi tug‘ilgan chaqaloqlarga qonning rN va kislota-ishqor hamda suv-elektrolit muvozanati ko‘rsatkichlari nazorati ostida 1 kg tana vazniga bir marta 1-2 ml dozada vena ichiga yuboriladi.

Metabolik atsidoz tuzatilgan taqdirda, kislota va asoslar muvozanatining buzilish darajasini hisobga olgan holda dozalash belgilanadi. Doza qon gazlari ko‘rsatkichlariga qarab quyidagi formula bo‘yicha hisoblanadi:

0,5 molyarli buferlangan natriy gidrokarbonatning 4,2% hajmi ml da =bazalar tanqisligi (-BE) x kg tana vazni x 0,3 x 2 (faktor 0,3 umumiy suyuqlikka nisbatan hujayra tashqarisidagi suyuqlik ulushiga mos keladi).

Preparatning maksimal dozasi kattalar uchun kuniga 300 ml (tana vazni yuqori bo‘lganda - 400 ml); bolalar uchun tana vazniga qarab, 100 dan 200 ml gacha.

Nojo‘ya ta’sirlari

Ko‘ngil aynishi, qusish, anoreksiya, oshqozon og‘rig‘i, bosh og‘rig‘i, bezovtalik. Arterial gipertenziya.

Qarshi ko‘rsatmalar

Metabolik yoki respirator alkaloz, gipokaliyemiya, gipernatriyemiya.

Dorilarning o‘zaro ta’siri

Soda-bufer® eritmasida nordon moddalar (askorbin, nikotin va boshqa kislotalar), alkaloidlar (atropin, apomorfin, kofein, teobromin, papaverin va boshqalar), yurak glikozidlari, kalsiy, magniy, og‘ir metallar (temir, mis, rux) tuzlarini eritish mumkin emas, chunki cho‘kma tushishi yoki organik birikmalarning gidrolizlanishi sodir bo‘ladi. Tarkibida fosfat bo‘lgan eritmalar bilan aralashtirmang. Rezerpinning antigipertenziv ta’sirini kuchaytirishi mumkin.

Preparat askorbin kislotasi, amiodaron, sisplatin, karboplatin, siprofloksatsin, kodein fosfat, dobutamin, katexolaminlar (dofamin, dopamin, epinefrin, norepinefrin), meropenem, magniy sulfat, penitsillin G ning kaliy tuzi, streptomitsin sulfat, tetratsiklin eritmalari bilan mos kelmaydi. Natriy gidrokarbonatni kislotali reaksiyaga ega bo‘lgan dori vositalari va alkaloid tuzlari bilan qo‘llash tavsiya etilmaydi.

Maxsus ko‘rsatmalar

Qonning pH va kislota-ishqor holatini nazorat qilish zarur. Yurak yoki buyrak kasalliklari hamroh bo‘lgan bemorlarda yurak yetishmovchiligi va shishlar rivojlanishi mumkin. Atsidoz juda tez muvozanatlashgan taqdirda, xususan, o‘pka ventilyatsiyasi buzilgan taqdirda, CO2 ning tez ajralib chiqishi serebral atsidozni kuchaytirishi mumkin. Kislotali pH ga ega bo‘lgan boshqa infuzion eritmalar bilan birga yuboriladigan oz miqdordagi Soda-bufer® neytrallovchi vosita bo‘lib xizmat qiladi va infuziyadan keyingi flebitlarning oldini oladi (turli konsentratsiyali glyukoza eritmalari, Ringer eritmasi, natriy xlorid eritmasi, siprofloksatsin va boshqa ba’zi ftorxinolonlar).

Avtotransportni boshqarishda yoki boshqa mexanizmlar bilan ishlashda reaksiya tezligiga ta’sir qilish qobiliyati

Preparat statsionar sharoitda qo‘llanilganligi sababli, bunday ta’sirlar haqida ma’lumotlar yo‘q.

Homiladorlik yoki emizish davrida qo‘llash

Preparat homilador ayollarga buyurilganda

Preparat homilador ayollarga buyurilganda natriy bikarbonat homilaga zararli ta’sir ko‘rsatishi yoki ko‘rsatmasligi, shuningdek, preparatning reproduktiv funksiyaga ta’sir qilishi mumkinligi noma’lum. Shuning uchun homilador ayollarga buyurish faqat ona uchun kutilayotgan foyda homila uchun potensial xavfdan yuqori bo‘lgandagina amalga oshiriladi.

Preparatni emizish davrida faqat hayotiy ko‘rsatmalar bo‘yicha qo‘llash mumkin.

Bolalar

1 yoshdan katta bolalarda qo‘llaniladi.

Preparatni bolalar qo‘li yetmaydigan joyda saqlang va yaroqlilik muddati tugaganidan keyin ishlatmang.

Dozani oshirib yuborish

Preparatning buferlik xususiyatlari tufayli, dozani oshirib yuborishda alkaloz rivojlanish ehtimoli sezilarli darajada kamayadi. Preparat dozasi oshirib yuborilganda alkaloz, gipernatriyemiya va giperosmiya, tetanik talvasalar rivojlanishi mumkin. Alkalozning klinik belgilari paydo bo‘lganda (talvasa, shu jumladan tetaniya belgilari bilan, qo‘zg‘alish, qonda kaliy va kalsiy darajasining pasayishi va natriy darajasining oshishi, pH darajasining ko‘tarilishi) preparatni yuborish to‘xtatiladi; zarurat tug‘ilganda natriy xloridning izotonik eritmasi yoki 5% li glyukoza eritmasi yuboriladi. Tetaniya boshlanishi xavfi bo‘lganda kattalarga vena ichiga 1-3 g kalsiy glyukonat yuboriladi.

Chiqarish shakli

Butilkalarda 20 ml yoki 50 ml yoki 100 ml yoki 200 ml yoki 400 ml dan. Qutidagi bir martalik No10 konteynerlarda 2 ml yoki 5 ml dan.

Saqlash shartlari

25 °C dan yuqori bo‘lmagan haroratda saqlanadi.

Muzlatmang.

Yaroqlilik muddati

2 yil.

Dorixonalardan berish shartlari

Retsept bo‘yicha.

Ishlab chiqaruvchi

"Yuriya-Farm" MCHJ.

Joylashgan joyi. Ukraina, 18030, Cherkassi shahri, Verbovetskiy ko‘chasi, 108. Tel./faks: (0472) 43-63-16, 43-23-75.