Tabeks

Tarkib

Plyonkali qobiq bilan qoplangan har bir tabletka quyidagilarni o‘z ichiga oladi:

Faol moddasi: sitizin 1,5 mg.

Yordamchi moddalar: laktoza monogidrati (28,0 mg), mikrokristall sellyuloza (67,5 mg), talk (2,0 mg), magniy stearati (1,0 mg).

Plyonkali qoplama tarkibi: opadray II jigarrang 85F 26948 (3,0 mg): qisman gidrolizlangan polivinil spirti - 1,2 mg; titan dioksidi (Ye 171) - 0,654 mg; makrogol 3350 - 0,606 mg; talk - 0,444 mg; temir oksidi sariq (Ye 172) - 0,062 mg, temir oksidi qizil (Ye 172) - 0,018 mg, temir oksidi qora (Ye 172) - 0,016 mg.

Tavsif

Yumaloq, ikki tomoni qavariq, plyonkali qobiq bilan qoplangan, och jigarrang tabletkalar. Sinishdagi ko‘rinish - oqdan to‘q sariq ranggacha.

Chiqarish shakli

Plyonkali qobiq bilan qoplangan 1,5 mg li tabletkalar.

Farmakoterapevtik guruh

Nikotinga qaramlikni davolash uchun dori vositalari. Sitizin. ATX kodi: N07BA04.

Farmakologik xususiyatlari

Farmakodinamika

Sitizin alkaloidi preparatning faol moddasi bo‘lib, n-xolinomimetik ta’sirga ega. Uning ta’siri quyidagilarda ifodalanadi: vegetativ nerv sistemasi gangliyalarini qo‘zg‘atadi, nafasni reflektor ravishda qo‘zg‘atadi, buyrak usti bezlarining mag‘iz moddasidan adrenalin ajralib chiqishiga sabab bo‘ladi, qon bosimini oshiradi.

Nikotinning ta’sir mexanizmiga yaqin bo‘lsa-da, sitizin ancha past zaharlilikka va katta terapevtik ko‘rsatkichga ega. Sitizin nikotinning tegishli retseptorlar bilan o‘zaro ta’sirini raqobatli ravishda bostiradi, bu esa nikotinga (tamakiga) qaramlikning asta-sekin kamayishi va yo‘qolishiga olib keladi.

Farmakokinetika

Sitizinning farmakokinetik ko‘rsatkichlari 36 nafar sog‘lom ko‘ngillilarda 1,5 mg bir martalik dozani (1 tabletka Tabeks®) og‘iz orqali qabul qilgandan so‘ng o‘rganildi.

So‘rish

Sitizin ichga qabul qilingandan so‘ng oshqozon-ichak traktidan tez so‘riladi. Preparatning qon plazmasidagi maksimal konsentratsiyasi 15,55 ng/ml bo‘lib, 0,92 soat davomida erishiladi.

Taqsimlash

Preparatning odamlarda tarqalishi haqida klinik ma’lumotlar yo‘q.

Sichqonlarda sitizinning yuqori plazma konsentratsiyasi peroral va vena ichiga qo‘llangandan so‘ng jigar, buyrak va buyrak usti bezlarida aniqlanadi. Quyonlarda taqsimlanish hajmi (Vd) peroral va vena ichiga qo‘llangandan so‘ng mos ravishda 6,21 l/kg va 1,02 l/kg ni tashkil etdi.

Biotransformatsiya va chiqarish

Sitizin organizmda metabolizmga uchramaydi. Qo‘llanilgan dozaning 64% gacha qismi 24 soat ichida siydik bilan o‘zgarmagan holda chiqariladi. Yarim chiqarilish davri taxminan 4 soatni tashkil etadi. Sitizinning organizmda o‘rtacha ushlab turish vaqti (MRT) taxminan 6 soatni tashkil etadi.

Ko‘rsatmalar

Tamakiga qaramlikni davolash (chekishni tashlashni osonlashtirish uchun). Nikotinga jismoniy va psixologik qaramlik chekishning salbiy ta’sirini tushungan holda ham chekishdan o‘zini tiya olmaslikka olib keladigan kasallikning ma’lum bir turi hisoblanadi.

Qarshi ko‘rsatmalar

Preparatning faol yoki yordamchi moddalaridan biriga yuqori sezuvchanlik, o‘tkir miokard infarkti, nostabil stenokardiya, yurak aritmiyasi, yaqinda o‘tkazilgan insult (preparatni qo‘llash boshlanishidan oldin 1 oy davomida), ateroskleroz, og‘ir arterial gipertenziya, homiladorlik va emizish davri, 18 yoshgacha va 65 yoshdan oshgan bemorlar, laktaza yetishmovchiligi, galaktozemiya, glyukoza-galaktoza malabsorbsiyasi sindromi (preparat tarkibiga laktoza kiradi).

Ehtiyotkorlik bilan

Tabeks® preparatini yurak ishemik kasalligining boshqa shakllarida (barqaror stenokardiya, miokardning asimptomatik (sokin) ishemiyasi, vazospastik stenokardiya, "X" sindromi (mikrotomirlar stenokardiyasi)), yurak yetishmovchiligida, qon bosimining oshishida, bosh miya qon tomirlari kasalliklarida, obliteratsiyalovchi arterial kasalliklarda, gipertireoidizmda, oshqozon yara kasalligida, qandli diabetda, buyrak yoki jigar yetishmovchiligida, shizofreniyaning ayrim shakllarida, buyrak usti bezlarining xromaffin o‘smalari mavjudligida, gastroezofageal reflyuks kasalligida, uzoq vaqt chekish tajribasiga ega bo‘lgan shaxslarda va 40-45 yoshdan oshgan shaxslarda qo‘llash lozim ("Maxsus ko‘rsatmalar" bo‘limiga qarang). "Ehtiyotkorlik bilan" bo‘limida ko‘rsatilgan kasalliklar bilan og‘rigan bemorlarda preparatni faqat shifokor maslahatidan so‘ng qo‘llash mumkin.

Qo‘llash usuli va dozalari

Tabletkalar butunligicha, yetarli miqdorda suyuqlik bilan ichiladi. Tavsiya etilgan dozalardan oshirmaslik kerak.

Preparatni qabul qilishni bemor tamaki chekishdan butunlay voz kechganidan so‘ng boshlagan ma’qul.

Preparatni quyidagi sxema bo‘yicha qo‘llash kerak: 1-kundan 3-kungacha - 1 tabletkadan kuniga 6 marta, har 2 soatda, chekilgan sigaretalar sonini asta-sekin kamaytirib borish. Tabletkani chekish epizodlari orasida, sigaretalarni chekish oralig‘ini uzaytirish uchun qabul qilish kerak, bu ularning iste’molini iloji boricha kamaytiradi. Har 2 soatda qabul qilish oralig‘iga rioya qilinishi kerak.

Agar kunlik sigaret iste’molini kamaytirishga erishilmasa, davolanishni to‘xtatish kerak va 2-3 oydan keyin uni qaytadan boshlash mumkin.

Yaxshi samara bo‘lganda davolash quyidagi sxema bo‘yicha davom ettiriladi: 4-kundan 12-kungacha - 1 tabletkadan kuniga 5 marta, har 2,5 soatda; 13-kundan 16-kungacha - 1 tabletkadan kuniga 4 marta, har 3 soatda;

17-kundan 20-kungacha - 1 tabletkadan kuniga 3 marta, har 5 soatda;

21-kundan 25-kungacha - kuniga 1-2 tabletkadan.

Davolash boshlanganidan keyin 5 kundan kechiktirmay chekishni to‘xtatish qat’iy tavsiya etiladi.

Dori-darmon terapiyasini maslahatlar, shu jumladan bemorni psixologik qo‘llab-quvvatlash choralari bilan uyg‘unlashtirish davolash samaradorligini sezilarli darajada oshiradi.

Nojo‘ya ta’sirlari

O‘tkazilgan klinik tadqiqotlar va marketingdan keyingi kuzatuvlar preparatning yaxshi o‘zlashtirilishini ko‘rsatadi. Kuzatilgan nojo‘ya ta’sirlar kuchsiz yoki o‘rtacha ifodalangan. Ularning aksariyati davolashning boshida paydo bo‘ladi va o‘z-o‘zidan o‘tib ketadi. Ko‘pincha ular tamaki chekishdan voz kechish bilan bog‘liq bo‘lib, bosh aylanishi, bosh og‘rig‘i va uyqusizlik bilan namoyon bo‘ladi.

Tavsiya etilgan dozalarda Tabeks® preparati jiddiy salbiy ta’sirlarni keltirib chiqarmaydi.

Quyidagi nojo‘ya ta’sirlar kuzatilishi mumkin:

yurak-qon tomir tizimi tomonidan: taxikardiya, qon bosimining biroz ko‘tarilishi, yurak urishi hissi;

markaziy asab tizimi tomonidan: bosh og‘rig‘i, bosh aylanishi, uyqusizlik yoki uyquchanlik, yuqori ta’sirchanlik;

nafas olish tizimi tomonidan: hansirash;

oshqozon-ichak trakti tomonidan: og‘iz qurishi, ko‘ngil aynishi, qorin og‘rig‘i, qabziyat, ich ketishi, ta’m va ishtahaning o‘zgarishi;

skelet-mushak va biriktiruvchi to‘qima tomonidan: mushaklardagi og‘riqlar;

moddalar almashinuvi va ovqatlanish nuqtai nazaridan: tana vaznining kamayishi, ko‘p terlash;

qolganlari - ko‘krak qafasidagi og‘riqlar.

Dozani oshirib yuborish

Dozani oshirib yuborish belgilari: ko‘ngil aynishi, qusish, ko‘z qorachiqlarining kengayishi, umumiy holsizlik, taxikardiya, klonik talvasalar, nafas falaji.

Dozani oshirib yuborish alomatlari bemor dozalash tartibiga rioya qilmaganda va preparatni terapevtik dozadan bir necha barobar ortiq qabul qilganda yuzaga keladi.

Doza oshirib yuborilganda darhol shifokorga murojaat qilish kerak!

Davolash: faollashtirilgan ko‘mir qabul qilish, oshqozonni yuvish, suv-tuz eritmalarini hamda 5% yoki 10% li glyukoza eritmasini infuzion yuborish, talvasaga qarshi vositalar, kardiotoniklar, nafas analeptiklari va boshqa simptomatik vositalar. Nafas olish a’zolari ishini, qon bosimini va yurak urish tezligini kuzatib borish kerak.

O‘zaro aloqa

Tamaki chekishni to‘xtatgandan so‘ng teofillin, ropinirol, klozapin vaolanzapinning nojo‘ya ta’sirlari kuchayishi mumkin.

Tabeks® preparatini atsetilxolin, karbaxol, galantamin, piridostigmin, revastigmin, distigmin bilan bir vaqtda qo‘llashda

xolinomimetik nojo‘ya ta’sirlarning kuchayishi mumkin (so‘lak oqishi, ko‘z yoshi oqishi, yo‘tal bilan bronx sekretsiyasi va astma xuruji xavfi, ko‘z qorachig‘ining torayishi, sanchiq, ko‘ngil aynishi, qusish, tez-tez siyish, mushaklar tonusining oshishi yoki mushaklarning to‘satdan qisqarishi)

Tabeks® preparatini lovastatin, simvastatin, fluvastatin, pravastatin va boshqalar bilan bir vaqtda qo‘llash mushaklarda og‘riq paydo bo‘lish xavfini oshiradi.

Tabeks® preparatini gipotenziv vositalar (propranolol va boshqalar) bilan bir vaqtda qo‘llash ularning ta’sirini susaytirishi mumkin.

Maxsus ko‘rsatmalar

Preparatni qabul qilishni faqat bemor chekishni tashlash uchun jiddiy niyat qilgandagina boshlash kerak.

Uzoq muddatli chekish tajribasiga ega bo‘lgan shaxslar va 40-45 yoshdan oshgan shaxslar Tabex® preparatini faqat shifokor bilan maslahatlashgandan so‘ng qo‘llashlari lozim.

Agar bitta dozani o‘tkazib yuborgan bo‘lsangiz, uni iloji boricha tezroq qabul qiling. Agar keyingi dozani qabul qilish vaqti kelgan bo‘lsa, odatdagidek qabul qiling. O‘tkazib yuborilgan dozani qoplash uchun ikki marta qabul qilmang.

Preparatni ushbu yo‘riqnomada ko‘rsatilgan sxema bo‘yicha qabul qilishni davom ettiring.

Preparatni qo‘llashda tavsiya etilgan dozalardan oshirmaslik kerak.

Preparat bilan davolash va chekishni davom ettirish nikotinning nojo‘ya ta’sirlari kuchayishiga (nikotin intoksikatsiyasi) olib kelishi mumkin.

Dori preparati tarkibida laktoza yordamchi moddasi mavjud. Galaktozani ko‘tara olmaslikning kam uchraydigan irsiy muammolari, laktaza yetishmovchiligi (Lapp turi) yoki glyukoza-galaktoza malabsorbsiyasi bo‘lgan bemorlarga dori vositasini qo‘llash tavsiya etilmaydi.

Homiladorlik va laktatsiya

Tabex® homilador va emizikli ayollarda qo‘llanilmasligi kerak.

Transport vositalari va mexanizmlarini boshqarish qobiliyatiga ta’siri

Preparatni qo‘llash fonida avtotransportni boshqarish va mexanizmlar bilan ishlash qobiliyatiga hech qanday salbiy ta’sir kuzatilmagan bo‘lsa-da, uyquchanlik va boshqa nojo‘ya ta’sirlar yuzaga kelishi mumkinligi sababli, sanab o‘tilgan vaziyatlarda ehtiyot bo‘lish kerak.

Qadoq

Plyonkali qobiq bilan qoplangan 50 ta tabletka PVX plyonka/alyuminiy folga blisterga solinadi.

Qabul qilish taqvimi bo‘lgan karton vkladishdagi 2 tadan blister qo‘llash bo‘yicha yo‘riqnoma bilan birga karton qutiga joylashtiriladi.

Saqlash shartlari

Namlikdan himoya qilish uchun asl qadoqda (qadoqdagi blister) 25 °C dan yuqori bo‘lmagan haroratda saqlanadi.

Bolalar qo‘li yetmaydigan joyda saqlang!

Yaroqlilik muddati

2 yil.

Qadoqda ko‘rsatilgan yaroqlilik muddati tugagandan keyin qo‘llanilmasin!

Dorixonalardan berish shartlari

Retseptsiz.

Ro‘yxatga olish guvohnomasi egasi

SOFARMA AJ Bolgariya.

Ishlab chiqaruvchi

SOFARMA AJ Bolgariya.