Distofen gel 25 g (naycha)

Tarkib

1 g gelda quyidagilar mavjud:

faol moddalar: diklofenak dietilamin - 50 mg, metilsalitsilat - 30 mg, levomentol - 50 mg, zig‘ir urug‘i moyi - 30 mg;

yordamchi moddalar: butilgidroksianizol, butilgidroksi-toluol, benzil spirti, dinatriy edetat, dietil amin, karbomer, limon kislotasi monogidrati, tozalangan suv.

Tavsif

Metilsalitsilatning o‘ziga xos hidi bilan oqdan och sariq ranggacha bo‘lgan yumshoq gel.

Farmakoterapevtik guruh

Nosteroid yallig‘lanishga qarshi va revmatizmga qarshi preparatlar.

Farmakologik ta’siri

DISTOFEN mahalliy og‘riq qoldiruvchi, yallig‘lanishga qarshi va shishga qarshi ta’sir ko‘rsatadi.

DISTOFENning farmakologik ta’siri uning tarkibiga kiruvchi komponentlarga bog‘liq. Diklofenak va metilsalitsilat nosteroid yallig‘lanishga qarshi vositalar (NYAQV) bo‘lib, ularning yallig‘lanishga qarshi ta’siri prostaglandinlar sintezini bostirish va shu bilan yallig‘lanish belgilarining namoyon bo‘lishini kamaytirish qobiliyatiga asoslangan. Zig‘ir moyining asosiy tarkibiy qismi alfa-linolen kislotasi (to‘yinmagan yog‘ kislotasining etil efiri) bo‘lib, u yallig‘lanishga qarshi ta’sir ko‘rsatadi.

Mentol nerv oxirlarini qitiqlaydi va shu bilan mahalliy chalg‘ituvchi hamda yengil og‘riqsizlantiruvchi ta’sir ko‘rsatadi. Diklofenakning so‘rilish darajasi ahamiyatsiz bo‘lib, ichga qabul qilingan diklofenakning ekvivalent dozasining 6% dan oshmaydi. Diklofenak va metilsalitsilat gel ko‘rinishida qo‘llanganda teri ostiga, mushak to‘qimasiga, bo‘g‘im kapsulasi va bo‘g‘im bo‘shlig‘iga o‘tib, teriga sekin so‘riladi. Uzoq vaqt davolanganda yoki katta jarohatlangan joylarga surtilganda, preparatning tarkibiy qismlari asta-sekin teri osti to‘qimalariga, sinovial suyuqlikka va plazmaga o‘tadi.

Diklofenakning plazmadagi maksimal konsentratsiyasi uning ekvivalent dozada og‘iz orqali yuborilgandan keyingi konsentratsiyasidan taxminan 100 baravar pastdir. Diklofenak jigarda glyukuron kislotasi bilan konyugatsiya yo‘li bilan metabolizmga uchraydi. Siydik bilan 65%, najas bilan 35% chiqariladi.

Ko‘rsatmalar

Quyidagi holatlarda og‘riq va yallig‘lanishni mahalliy simptomatik davolash uchun:

revmatoid artrit;

osteoartroz;

yumshoq to‘qimalarning revmatik shikastlanishlarida (tendovaginit, bursit);

og‘riqlarda: orqa, bo‘yin, mushaklar, yelka, belda;

umurtqa pog‘onasi osteoxondrozi;

radikulit;

travmatik lat yeyishlar;

boylamlarning cho‘zilishi;

mushaklar va paylarning cho‘zilishi;

yumshoq to‘qimalarning yallig‘lanishli shishlarida;

og‘ir jismoniy zo‘riqish natijasida kelib chiqadigan mushaklar va bo‘g‘imlar og‘rig‘i.

Qo‘llash usuli va dozalari

Tashqarida.

Kattalarga kuniga 3-4 mahal teriga surtiladi va yengilgina ishqalanadi. Preparatning kerakli miqdori og‘riqli sohaning o‘lchamiga bog‘liq. Preparatning bir martalik dozasi - 2-4 g (tubaning og‘zi to‘liq ochiq bo‘lganda 4-8 sm). Shifokor maslahatisiz davolanish muddati 10 kundan oshmasligi kerak. Dori vositasini surtgandan so‘ng, aynan shu soha davolanishi kerak bo‘lgan hollardan tashqari, qo‘llarni yuvish lozim. Davolash davomiyligini shifokor kasallikning xususiyati va davolash samaradorligiga qarab belgilaydi.

Preparatni yumshoq to‘qimalar shikastlanganda yoki yumshoq to‘qimalarning yallig‘lanish kasalliklarida ketma-ket 14 kundan ortiq yoki artrit tufayli yuzaga kelgan og‘riqda, agar shifokor tomonidan dori vositasini qo‘llashning boshqa tartibi tayinlanmagan bo‘lsa, 21 kundan ortiq qo‘llash mumkin emas. Keksa yoshdagi bemorlarda dozani tuzatish talab etilmaydi.

Nojo‘ya ta’sirlari

Diklofenakni mahalliy qo‘llashdan so‘ng tizimli nojo‘ya ta’sirlarning yuzaga kelish ehtimoli diklofenakni og‘iz orqali qo‘llash paytidagi nojo‘ya ta’sirlar chastotasiga nisbatan kam. Biroq, agar gel terining katta sohalariga uzoq vaqt davomida surtilsa, tizimli nojo‘ya ta’sirlar yuzaga kelishi ehtimolini istisno qilib bo‘lmaydi. Bunday holda diklofenakning boshqa ishlab chiqarish shakllari uchun qo‘llash bo‘yicha yo‘riqnomalarda bayon etilgan ma’lumotlarga amal qilish lozim. Bemorga preparatni qo‘llashni to‘xtatish va biron-bir nojo‘ya ta’sirlar yoki boshqa noodatiy reaksiyalar paydo bo‘lgan taqdirda shifokorga murojaat qilish zarurligi haqida ma’lumot berish lozim.

Nojo‘ya ta’sirlar quyidagi gradatsiyalardan foydalangan holda chastota bo‘yicha darajalanadi: tez-tez (1/100 <1/10); tez-tez emas (1/1,000 <1/100); kamdan-kam (1/10,000 <1/1,000); juda kamdan-kam (<1/10,000), shu jumladan alohida xabarlar.

Infeksiyalar va invaziyalar: Juda kam uchraydi: yiringli toshma;

Immun tizimi tomonidan: Juda kam uchraydigan holatlar: yuqori sezuvchanlik, angionevrotik shish;

Nafas olish a’zolari, ko‘krak qafasi va ko‘ks oralig‘i tomonidan: Juda kam hollarda: astma;

Teri va teri osti kletchatkasi tomonidan: Ko‘pincha: toshma, ekzema, eritema, dermatit (shu jumladan kontakt dermatit), qichishish; Kamdan kam: bullyoz dermatit; Juda kam uchraydigan holatlar: fotosezgirlik reaksiyalari (bemorlar fotosezgirlik reaksiyalari rivojlanish ehtimolini kamaytirish maqsadida quyosh nurlarining haddan tashqari ta’siri nomaqbul ekanligi haqida ogohlantirilishi kerak). Har qanday nojo‘ya ta’sirlar yoki boshqa noodatiy reaksiyalar paydo bo‘lgan taqdirda, preparatni qo‘llashni to‘xtatish va shifokorga murojaat qilish lozim. Nojo‘ya ta’sirlar paydo bo‘lganda, bu haqda davolovchi shifokorga xabar bering.

Preparatning ko‘zga va shilliq qavatlarga tushishiga yo‘l qo‘ymaslik kerak.

Qarshi ko‘rsatmalar

Preparatning tarkibiy qismlariga yuqori sezuvchanlik, homiladorlik va emizish davri, shuningdek, atsetilsalitsil kislotasi, ibuprofen yoki nosteroid yallig‘lanishga qarshi vositalarga yuqori sezuvchanlik, ayniqsa anamnezda bronxial astma mavjud bo‘lsa. 12 yoshgacha bo‘lgan bolalarda qo‘llanilmaydi. Teri qoplamlari butunligining buzilishi.

Dozani oshirib yuborish

Dori vositasini tashqi qo‘llashda uning faol tarkibiy qismlarining juda past tizimli so‘rilishi dozani oshirib yuborishni deyarli imkonsiz qiladi. Tasodifan ichilganda davolash NYAQV bilan zaharlangandagidek bo‘ladi. Bemor shifokorga murojaat qilishi kerak. Simptomatik davolash asoratlar rivojlanishi belgilari paydo bo‘lganda o‘tkaziladi.

Maxsus shartlar

DISTOFENni faqat shikastlanmagan teriga surtish, ochiq jarohatlarga tegishdan saqlanish kerak. Qo‘llagandan so‘ng okklyuzion bog‘lam qo‘yilmaydi.

Homiladorlik va emizish davrida

Agar siz homilador bo‘lsangiz yoki emizikli bo‘lsangiz, agar siz homilador ekanligingizni taxmin qilsangiz yoki homilador bo‘lish ehtimolini istisno qilmasangiz, bu haqda davolovchi shifokoringizga xabar bering. Preparatni homiladorlik va emizikli davrda qo‘llash mumkin emas.

Dorilarning o‘zaro ta’siri

Agar hozirda yoki yaqin o‘tmishda boshqa dori vositalarini qabul qilgan bo‘lsangiz, bu haqda shifokorga xabar bering. Diklofenak fotosensibilizatsiyani chaqiruvchi dorilarning ta’sirini kuchaytirishi mumkin. Boshqa dori vositalari bilan klinik jihatdan ahamiyatli o‘zaro ta’siri tavsiflanmagan.

Metilsalitsilat antikoagulyantlar, metotreksatning absorbsiya ta’sirini kuchaytiradi, buni preparatning katta dozalarini uzoq vaqt davomida qo‘llashda hisobga olish kerak. Diklofenak natriy o‘ziga xos ta’sirlarni, xususan, kortikosteroidlarning ulserogen ta’sirini kuchaytirishi, qonda litiy konsentratsiyasini oshirishi, siydik haydovchi vositalar hamda tiazid va furosemid guruhidagi saluretiklarning ta’sirini susaytirishi mumkinligini hisobga olish zarur. Antikoagulyantlar bilan bir vaqtda qo‘llanganda qon ivish tizimining holatini nazorat qilish lozim.

Og‘iz orqali qabul qilish uchun NPVC bilan gelni bir vaqtning o‘zida qo‘llashda ehtiyot bo‘lish kerak, chunki toksik ta’sirlarning, ayniqsa tizimli nojo‘ya ta’sirlarning o‘zaro kuchayishi xavfi mavjud.

Saqlash shartlari

Quruq, yorug‘likdan himoyalangan joyda +25 °S dan yuqori bo‘lmagan haroratda saqlanadi. Bolalar qo‘li yetmaydigan joyda saqlanadi!

Saqlash muddati

Ishlab chiqarilgan sanadan boshlab 3 yil. Yaroqlilik muddati tugagandan keyin ishlatilmasin.

Chiqarish shakli

Sirtga qo‘llash uchun gel. Ishlatish bo‘yicha yo‘riqnoma bilan birga karton qutida 25 grammlik plastik laminatlangan tubalar.

Ishlab chiqaruvchi

SR Medicare, Hindiston.