Follikulin in'ektsiya uchun moydagi eritmasi 0,05%, 1 ml №10 (ampulalar)

Tarkib

1 ml eritma tarkibiga quyidagilar kiradi:

faol modda - estron 100% moddaga qayta hisoblaganda 1 mg;

yordamchi modda - shaftoli moyi.

Dori shakli

Inyeksiya uchun moyli eritma 0,1%.

Farmakologik xususiyatlari

Farmakodinamika

Estron - tabiiy follikulyar gormon bo‘lib, ayol reproduktiv tizimining normal rivojlanishini boshqaradi, jinsiy balog‘atga yetish boshlanishi bilan klimakterik davr boshlanishidan oldin tuxumdonlarda ishlab chiqariladi. Ta’siri jinsiy a’zolar, sut bezlari, gipotalamus va gipofizning estrogen sezuvchi retseptorlari orqali amalga oshiriladi. O‘ziga xos estrogen ta’sir ko‘rsatadi - endometriy proliferatsiyasini (bachadon naylari, bachadon bo‘yni, qin, tashqi jinsiy a’zolar, sut bezlarining chiqarish yo‘llarida), bachadon va ikkilamchi ayol jinsiy belgilarining to‘liq rivojlanmagan holda rivojlanishini rag‘batlantiradi, klimakterik davrda yoki ginekologik operatsiyalardan keyin jinsiy bezlar funksiyasining yetarli emasligi tufayli ayol organizmida yuzaga keladigan buzilishlarning ifodalanishini bartaraf etadi yoki kamaytiradi. Progesteron bilan birgalikda hayz siklini va bola tug‘ish funksiyasini boshqarishda ishtirok etadi. Kichik dozalarda follikulani stimullovchi gormon sekretsiyasini faollashtiradi, katta dozalarda - uni tormozlaydi, shuningdek, organizmda suv va natriy ionlarini ushlab qoladi, eritropoezni susaytiradi. Gipoxolesterinemik ta’sir ko‘rsatadi, glyukoza utilizatsiyasini yaxshilaydi, periferik to‘qimalarning insulinga sezuvchanligini oshiradi.

Farmakokinetika

Preparatning ta’sir etuvchi moddasi estron inyeksiya joyidan yaxshi so‘riladi. Qon plazmasidagi yuqori miqdori 4-5 kun davomida saqlanib turadi. Asosan jigarda (qisman o‘pkada, yog‘ to‘qimasida) metabolizmga uchraydi, o‘t bilan chiqariladi, ichakda reabsorbsiyalanadi va portal tizim orqali qaytadan jigarga tushadi. Kon’yugat holida asosan buyraklar orqali chiqariladi. Chiqarilish tezligi fiziologik holat (homiladorlik, ovarial-menstrual sikl fazalari), yosh va boshqa omillarga bog‘liq.

Qo‘llanilishi

tuxumdonlar funksiyasining yetishmovchiligi bilan bog‘liq holatlar: birlamchi va ikkilamchi amenoreya, jinsiy a’zolar gipoplaziyasi va ikkilamchi jinsiy belgilarning yetarli darajada rivojlanmaganligi;

klimakterik va kastratsiyadan keyingi buzilishlar;

tuxumdonlarning estrogen funksiyasi pasayishi natijasida kelib chiqadigan bepushtlik;

tug‘ruq faoliyatining sustligi.

Qo‘llash usuli va dozalari

Preparat mushak orasiga buyuriladi. Doza individual belgilanadi. Jinsiy a’zolar va ikkilamchi jinsiy belgilar rivojlanmagan birlamchi amenoreya. 1-2 oy va undan ko‘proq vaqt davomida (bachadon sezilarli darajada kattalashguncha) har kuni yoki kunora 1-2 ml dan buyuriladi. So‘ngra progesteron buyuriladi (mushak orasiga, 5 mg dan har kuni 6-8 kun davomida). Zarurat tug‘ilganda gormonoterapiya kurslari takrorlanadi. Ikkilamchi amenoreya. 15-16 kun davomida har kuni 1 ml dan buyuriladi, keyin 6-8 kun davomida progesteron buyuriladi. Doimiy samara bo‘lmasa, davolash kursi takrorlanadi. Gipo- va oligomenoreya, algodismenoreya, tuxumdonlar gipofunksiyasi yoki bachadonning to‘liq rivojlanmaganligi bilan bog‘liq bepushtlik. Hayz tugagandan keyin har kuni 0,5-1 ml dan 15-16 kun davomida buyuriladi, keyin ko‘rsatmalar bo‘lsa, 6-8 kun davomida progesteron buyuriladi. Davolash kursini hayz tugagandan so‘ng xuddi shu muddatlarda takrorlash mumkin. Klimakterik davrning boshlanishi va ovariektomiya bilan bog‘liq funksional buzilishlar (depressiya, angionevrotik buzilishlar va boshqalar). Har kuni 0,5-1 ml dan yoki 1-2 kundan keyin 10-15 inyeksiya kurslarida buyuriladi. Simptomlar qaytalanishi bilan davolash kursi takrorlanadi. Bunda dozalar klimakterik davrning bosqichiga, simptomatikaning yaqqolligiga qarab qat’iy individual tanlanishi kerak (minimal samarali dozalarni tanlash zarur). Tug‘ruq faoliyatining sustligi va muddatidan o‘tgan homiladorlik. Tug‘ruqni stimullovchi vositalarni qo‘llashdan 2-3 soat oldin 4-5 ml dan buyuriladi.

Nojo‘ya ta’sirlari

ko‘ngil aynishi, qusish, bosh og‘rig‘i, bosh aylanishi;

allergik reaksiyalar, qovoqlarning shishishi, eritropeniya;

uzoq vaqt qo‘llanilganda bachadondan qon ketishi, tuxumdonlar sklerozi kuzatilishi mumkin;

natriy, kalsiy va suv almashinuvining buzilishi;

dimlangan sariqlik

Qarshi ko‘rsatmalar

yuqori sezuvchanlik;

60 yoshgacha bo‘lgan ayollarda jinsiy a’zolar va sut bezlarining (xavfli va xavfsiz) o‘smalari;

mastopatiya;

ayollar jinsiy a’zolarining yallig‘lanish kasalliklari;

noaniq etiologiyali qin va bachadondan qon ketishi;

bachadondan qon ketishiga moyillik;

klimakterik davrning giperestrogen fazasi;

jigar va/yoki buyrak yetishmovchiligi;

anamnezdagi tromboflebit va qaytalanuvchi tromboemboliyalar;

homiladorlik va tug‘ruqdan keyingi erta davr.

Dozani oshirib yuborish

Belgilari: bosh og‘rig‘ining kuchayishi, ko‘ngil aynishi. Uzoq muddat qo‘llanilganda bachadondan qon ketishi mumkin. Davolash: simptomatik.

Maxsus ko‘rsatmalar

Preparat arterial gipertoniya, boshdan kechirilgan tromboembolik kasalliklar, epilepsiya, depressiya (shu jumladan anamnezda), o‘t pufagi kasalliklari, otosklerozda ehtiyotkorlik bilan buyuriladi. Preparat bilan davolash shifokor nazorati ostida olib borilishi kerak. Preparatni qabul qilishni boshlashdan oldin sinchkovlik bilan umumtibbiy va ginekologik tekshiruvdan, shu jumladan sut bezlarini tekshirishdan o‘tish lozim. Bunday tekshirishlarni davolashning har 6 oyida o‘tkazish kerak. Ko‘rish va eshitishning o‘tkir buzilishlarida, o‘tkir trombozda, flebit, o‘t dimlanishi yoki gepatit belgilari paydo bo‘lganda preparatni qo‘llashni to‘xtatish kerak. Pediatriyada qo‘llanilishi 14 yoshgacha bo‘lgan bolalarda qo‘llanilmaydi. Agar kristallar tushib qolsa, inyeksiyadan oldin ampula ichidagi modda suv hammomida 15-20 daqiqa davomida qizdirilishi kerak. Agar kristallar yo‘qolib, eritma tiniq bo‘lib qolsa va (37±1) °S gacha sovutilganda kristallar qaytadan tushib ketmasa, preparat ishlatishga yaroqli bo‘ladi.

Dorilarning o‘zaro ta’siri

Gipoxolesterinemik, antiaritmik, gipotenziv vositalar, diuretiklar, antikoagulyantlar, tritsiklik antidepressantlar, glyukokortikoidlar, qalqonsimon bez gormonlari ta’sirini kuchaytiradi. Estron ta’sirini folat kislotasi va qalqonsimon bez preparatlari kuchaytiradi, bepushtlikni davolash uchun qo‘llaniladigan antiestrogen dori vositalari (klomifen va boshqalar), fenobarbital, rifampitsin va boshqa monooksigenaza induktorlari susaytiradi. Preparatning qondagi konsentratsiyasini ampitsillin, levomitsetin, tetratsiklin, neomitsin, sulfanilamidlar pasaytiradi; askorbin kislotasi oshiradi.

Chiqarish shakli

Inyeksiya uchun moyli eritma 0,1% 1 ml dan ampulalarda No10. Qadoqdagi qo‘llash bo‘yicha yo‘riqnoma bilan birga 10 ampuladan.

Saqlash shartlari

Yorug‘likdan himoyalangan joyda 8 °C dan 15 °C gacha bo‘lgan haroratda saqlang. Tashish paytida muzlab qolishiga yo‘l qo‘ymang. Bolalar qo‘li yetmaydigan joyda saqlang!

Yaroqlilik muddati

5 yil. Qadoqda ko‘rsatilgan yaroqlilik muddati tugagandan so‘ng preparatni ishlatmang.

Dorixonalardan berish shartlari

Retsept bo‘yicha.

Ishlab chiqaruvchi

Biofarm AJ, Gruziya.