Furosemid Dalhimfarm tomir ichiga va mushak ichiga yuborish uchun eritma 10 mg/ml, 2 ml №10 (ampulalar)

Tarkib

Ta’sir etuvchi moddasi: furosemid - 10,0 mg.

Yordamchi moddalar: natriy gidroksidning 1 M eritmasi - 0,032 ml, natriy xlorid - 7,5 mg, inyeksiya uchun suv - 1 ml gacha.

Tavsif

Tiniq, rangsiz yoki biroz rangli suyuqlik.

Chiqarish shakli

Vena ichiga va mushak ichiga yuborish uchun eritma 10 mg/ml.

Farmakoterapevtik guruh

Diuretik vosita. Furosemid. ATX kodi: C03CA01.

Farmakologik xususiyatlari

Farmakodinamika

Furosemid preparati sulfonamidning hosilasi bo‘lgan tez ta’sir qiluvchi diuretikdir. Furosemid Genle qovuzlog‘ining yuqoriga ko‘tariluvchi bo‘g‘imining qalin segmentida natriy, kaliy, xlor ionlarining transport tizimini bloklaydi, shu munosabat bilan uning saluretik ta’siri preparatning buyrak kanalchalari bo‘shlig‘iga kirishiga bog‘liq (anion transporti mexanizmi hisobiga). Furosemid preparatining diuretik ta’siri Genle qovuzlog‘ining shu qismida natriy xlorid reabsorbsiyasining susayishi bilan bog‘liq. Natriy chiqarilishining ko‘payishiga nisbatan ikkilamchi ta’sirlar quyidagilardir: ajraladigan siydik miqdorining ko‘payishi (osmotik bog‘langan suv hisobiga) va buyrak kanalchasining distal qismida kaliy sekretsiyasining ko‘payishi. Bir vaqtning o‘zida kalsiy va magniy ionlarining chiqarilishi ortadi. Furosemid preparati qayta yuborilganda uning diuretik faolligi pasaymaydi, chunki preparat Maculadensa (yukstaglomerulyar kompleks bilan chambarchas bog‘langan kanalcha strukturasi) dagi kanalcha-koptokcha teskari aloqasini uzadi. Furosemid preparati renin-angiotenzin-aldosteron tizimining dozaga bog‘liq stimulyatsiyasini chaqiradi.

Yurak yetishmovchiligida Furosemid preparati oldingi yuklamani tezda pasaytiradi (venalarning kengayishi hisobiga), o‘pka arteriyasidagi bosimni va chap qorinchaning to‘lish bosimini kamaytiradi. Bu tez rivojlanuvchi ta’sir, aftidan, prostaglandinlar ta’siri orqali yuzaga keladi va shuning uchun uning rivojlanishi uchun prostaglandinlar sintezida buzilishlarning yo‘qligi shart hisoblanadi, bundan tashqari, bu ta’sirni amalga oshirish uchun buyraklar funksiyasining yetarli darajada saqlanishi talab etiladi. Preparat gipotenziv ta’sirga ega bo‘lib, bu natriy ekskretsiyasining oshishi, aylanib yuruvchi qon hajmining kamayishi va tomirlar silliq mushaklarining vazokonstriktor ta’sirlarga reaksiyasining pasayishi bilan bog‘liq (natriuretik ta’siri tufayli furosemid arterial gipertenziyali bemorlarda konsentratsiyasi oshgan katexolaminlarga tomirlar reaksiyasini pasaytiradi).

Diurez va natriyurezning dozaga bog‘liq ravishda oshishi Furosemid preparatini 10 mg dan 100 mg gacha qabul qilganda kuzatiladi (sog‘lom ko‘ngillilar). Furosemid preparati 20 mg vena ichiga yuborilgandan so‘ng diuretik ta’sir 15 daqiqadan so‘ng rivojlanadi va taxminan 3 soat davom etadi.

Bog‘lanmagan (erkin) furosemidning kanal ichidagi konsentratsiyalari va uning natriyuretik ta’siri o‘rtasidagi bog‘liqlik furosemid ekskretsiyasining minimal samarali tezligi taxminan 10 mkg/min bo‘lgan sigmoidal egri chiziq shaklida namoyon bo‘ladi. Shuning uchun furosemidni uzoq vaqt infuzion yuborish takroriy bolyus yuborishga qaraganda samaraliroqdir. Bundan tashqari, ma’lum bir bolyus dozadan oshganda ta’sirning sezilarli darajada oshishi kuzatilmaydi. Furosemidning kanalchalar sekretsiyasi kamayganda yoki preparat kanalchalar bo‘shlig‘idagi albumin bilan bog‘langanda (masalan, nefrotik sindromda) furosemidning ta’siri pasayadi.

Farmakokinetika

Vena ichiga yuborilganda maksimal konsentratsiyaga erishish vaqti - 30 daqiqa. Furosemidning taqsimlanish hajmi tana vazniga nisbatan 0,1-0,2 l/kg ni tashkil etadi va asosiy kasallikka qarab sezilarli darajada o‘zgaradi. Furosemid qon plazmasi oqsillari (98% dan ortiq), asosan albuminlar bilan juda kuchli bog‘lanadi.

Jigarda 4-xlor-5-sulfamoil-antranil kislota hosil qilib metabolizmga uchraydi. Furosemid asosan o‘zgarmagan holda va asosan proksimal kanalchalarda sekretsiya yo‘li bilan chiqariladi. Furosemid vena ichiga yuborilgandan so‘ng, yuborilgan dozaning 60-70% shu yo‘l bilan chiqariladi.

Furosemidning glyukuronlangan metabolitlari buyraklar orqali chiqariladigan preparatning 10-20% ini tashkil qiladi. Qolgan dozasi ichak orqali, aftidan, biliar sekretsiya yo‘li bilan ajraladi. Klirens - 1.5-3 ml/daq/kg. Furosemidning vena ichiga yuborilgandan keyingi oxirgi yarim chiqarilish davri taxminan 1-1,5 soatni tashkil etadi.

Furosemid yo‘ldosh to‘sig‘idan o‘tib, ona sutiga ajraladi. Uning konsentratsiyasi homila va chaqaloqda onadagidek bo‘ladi.

Bemorlarning alohida guruhlari farmakokinetikasining xususiyatlari

Buyrak yetishmovchiligida furosemidning chiqarilishi sekinlashadi, yarim chiqarilish davri esa uzayadi; yaqqol ifodalangan buyrak yetishmovchiligida oxirgi yarim chiqarilish davri 24 soatgacha uzayishi mumkin.

Nefrotik sindromda plazmadagi oqsillar konsentratsiyasining pasayishi bog‘lanmagan furosemid (uning erkin fraksiyasi) konsentratsiyasining oshishiga olib keladi, shu sababli ototoksik ta’sir rivojlanish xavfi ortadi. Boshqa tomondan, bu bemorlarda furosemidning diuretik ta’siri furosemidning kanalchalarda joylashgan albumin bilan bog‘lanishi va furosemidning kanalcha sekretsiyasining pasayishi tufayli kamayishi mumkin.

Gemodializ va peritoneal dializda hamda doimiy ambulator peritoneal dializda furosemid kam miqdorda chiqariladi.

Jigar yetishmovchiligida furosemidning yarim chiqarilish davri 30-90% ga uzayadi, bu asosan taqsimlanish hajmining oshishi bilan bog‘liq. Bu toifadagi bemorlarda farmakokinetik ko‘rsatkichlar kuchli o‘zgarishi mumkin.

Yurak yetishmovchiligida, arterial gipertenziyaning og‘ir darajasida va keksalarda buyrak faoliyatining pasayishi tufayli furosemidning chiqarilishi sekinlashadi.

Chala va muddatida tug‘ilgan bolalarda furosemidning chiqarilishi sekinlashishi mumkin, bu buyraklarning yetuklik darajasiga bog‘liq, emizikli bolalarda preparatning metabolizmi ham sekinlashishi mumkin, chunki ularda jigarning glyukuronlash qobiliyati to‘liq emas. Homiladorlikdan keyingi yoshi 33 haftadan oshgan bolalarda yarim chiqarilishning oxirgi davri 12 soatdan oshmaydi. Ikki oylik va undan katta yoshdagi emizikli bolalarda furosemidning chiqarilishi kattalarnikidan farq qilmaydi.

Kam vaznli chaqaloqlarga furosemidni vena ichiga yuborilgandan so‘ng, diuretik ta’sir 15-20 daqiqadan keyin rivojlana boshlaydi, 1-2 soatdan keyin maksimal darajaga yetadi va siydik hajmining dastlabki holatiga qaytishi 6-16 soatdan keyin kuzatiladi. Erta yoshdagi bolalarga furosemidni to‘liq dozada takroran yuborish 24 soatdan oldin tavsiya etilmaydi, chala tug‘ilgan bolalarda esa intervalni 48 soatgacha uzaytirish ma’qul.

Ko‘rsatmalar

Surunkali yurak yetishmovchiligida shish sindromi.

O‘tkir yurak yetishmovchiligida shish sindromi.

Surunkali buyrak yetishmovchiligida shish sindromi.

O‘tkir buyrak yetishmovchiligi, shu jumladan homiladorlik va kuyish paytida (suyuqlik chiqarilishini qo‘llab-quvvatlash uchun).

Nefrotik sindromda shish sindromi (nefrotik sindromda asosiy kasallikni davolash birinchi o‘rinda turadi).

Jigar kasalliklarida shish sindromi (portal gipertenziya sindromi) (zarurat bo‘lganda aldosteron antagonistlari bilan davolashga qo‘shimcha ravishda).

Bosh miya shishi.

Gipertonik kriz.

Buyraklar orqali o‘zgarmagan holda chiqariladigan kimyoviy birikmalar bilan zaharlanganda kuchaytirilgan diurezni saqlab turish.

Qarshi ko‘rsatmalar

Faol moddaga yoki preparatning har qanday yordamchi moddalariga yuqori sezuvchanlik; sulfonamidlarga (sulfanilamid mikroblarga qarshi vositalar yoki sulfonilmochevina preparatlari) allergiyasi bo‘lgan bemorlarda furosemidga "kesishgan" allergiya rivojlanishi mumkin.

Anuriya bilan kechuvchi buyrak yetishmovchiligi, (furosemid yuborilishiga reaksiya bo‘lmaganda).

Jigar prekomasi va komasi.

Kuchli gipokaliyemiya ("Nojo‘ya ta’sir" bo‘limiga qarang).

Yaqqol giponatriyemiya.

Gipovolemiya (arterial gipotenziya bilan yoki usiz) yoki degidratatsiya.

Har qanday etiologiyali siydik oqimining keskin ifodalangan buzilishlari (shu jumladan siydik yo‘llarining bir tomonlama shikastlanishi).

Homiladorlik ("Homiladorlik va emizish davri" bo‘limiga qarang).

Emizish davri ("Homiladorlik va emizish davri" bo‘limiga qarang).

Ehtiyotkorlik bilan

Arterial gipotenziyada.

Qon bosimining haddan tashqari pasayishi ayniqsa xavfli bo‘lgan holatlarda (koronar va/yoki miya arteriyalarining yaqqol stenozlari).

O‘tkir miokard infarktida (kardiogen shok rivojlanish xavfining ortishi).

Latent yoki manifest qandli diabetda.

Podagra kasalligida.

Gepatorenal sindromda (ya’ni jigar kasalliklari bilan bog‘liq bo‘lgan funksional buyrak yetishmovchiligida).

Gipoproteinemiyada (masalan, nefrotik sindromda, diuretik ta’sirni kamaytirish va furosemidning ototoksik ta’siri rivojlanish xavfini oshirish mumkin bo‘lganda, bunday bemorlarda dozani tanlash juda ehtiyotkorlik bilan amalga oshirilishi kerak).

Siydik yo‘llarining qisman obstruksiyasida (prostata bezining giperplaziyasi, siydik chiqarish kanalining torayishi);

Suv-elektrolit muvozanati va kislota-asos holati buzilishlari rivojlanish xavfi yuqori bo‘lganda yoki sezilarli qo‘shimcha suyuqlik yo‘qotilganda (qusish, diareya, ko‘p terlash) (suv-elektrolit muvozanati va kislota-asos holati holatini monitoring qilish va zarur bo‘lsa, furosemid qo‘llashni boshlashdan oldin ularning buzilishlarini tuzatish talab etiladi).

Pankreatitda.

Anamnezida yurak ritmining qorincha buzilishlarida.

Tizimli qizil yugurikda.

Chala tug‘ilgan bolalarda (buyrakda kalsiyli toshlar hosil bo‘lishi mumkinligi (nefrolitiaz) va buyrak parenximasida kalsiy tuzlari to‘planishi (nefrokalsinoz); shuning uchun bunday bolalarda buyrak faoliyatini muntazam nazorat qilish va buyraklarni ultratovush tekshiruvidan o‘tkazish talab etiladi.

Keksa yoshdagi demensiya bilan og‘rigan bemorlarda risperidonni bir vaqtning o‘zida qo‘llash (o‘lim xavfini oshirish)

Qo‘llash usuli va dozalari

Umumiy tavsiyalar

Furosemid preparatini qo‘llashda uni kerakli terapevtik samaraga erishish uchun yetarli bo‘lgan eng kichik dozalarda yuborish tavsiya etiladi. Doza individual tanlanadi.

Furosemid preparati vena ichiga (sekin oqim bilan), iloji bo‘lmaganda mushak orasiga (samaradorligi ancha past) 7-10 kun va undan ko‘proq vaqt davomida yuboriladi. Preparatni mushak orasiga yuborish o‘pka shishi kabi o‘tkir holatlarni davolash uchun mos kelmaydi. Furosemid preparatini vena ichiga yuborish faqat preparatni ichga qabul qilishning iloji bo‘lmaganda yoki ingichka ichakda preparat so‘rilishining buzilishi mavjud bo‘lganda, shuningdek, iloji boricha tezroq ta’sir ko‘rsatish zarur bo‘lganda amalga oshiriladi. Furosemid preparatini vena ichiga yuborishda har doim iloji boricha ertaroq Furosemid preparatini ichishga o‘tish tavsiya etiladi.

Vena ichiga yuborilganda Furosemid preparatini sekin yuborish kerak. Vena ichiga yuborish tezligi 4 mg/min dan oshmasligi kerak. Og‘ir buyrak yetishmovchiligi bo‘lgan bemorlarda (zardobdagi kreatinin konsentratsiyasi ≥ 5 mg/dl) Furosemid preparatini vena ichiga yuborish tezligi 2,5 mg/minutdan oshmasligi tavsiya etiladi. Optimal samaradorlikka erishish va kontrregulyatsiyani bostirish (renin-angiotenzin va antinatriuretik neyrogumoral regulyatsiya bo‘g‘inlarini faollashtirish) uchun Furosemid preparatini takroriy vena ichiga bolyusli yuborishdan ko‘ra uzoq muddatli infuzion vena ichiga yuborish afzalroqdir. Agar o‘tkir holatlarda bir yoki bir nechta bolyusli vena ichiga yuborishlardan so‘ng doimiy vena ichiga infuziya o‘tkazish imkoniyati bo‘lmasa, u holda yuborish oralig‘ida katta vaqt oralig‘i bilan yuqori dozalarni vena ichiga bolyusli yuborishdan ko‘ra, yuborish oralig‘ida kichik vaqt oralig‘i bilan past dozalarni yuborish (taxminan 4 soatdan keyin) afzalroqdir.

Parenteral yuborish uchun mo‘ljallangan eritma pH 9 atrofida bo‘lib, buferlik xususiyatiga ega emas. PH 7 dan past bo‘lganda ta’sir etuvchi moddaning cho‘kmaga tushishi mumkin, shuning uchun Furosemid preparatini suyultirishda olingan eritmaning pH qiymati neytraldan kuchsiz ishqoriygacha bo‘lishiga intilish kerak. Suyultirish uchun 0,9% li natriy xlorid eritmasidan foydalanish mumkin. Furosemid preparatining suyultirilgan eritmasi, iloji boricha, tayyorlangandan so‘ng darhol qo‘llanilishi kerak.

Preparat 20-60 mg dozada sutkasiga 1-2 marta yuboriladi; diuretik javob bo‘lmaganda, har 2 soatda 50% ga oshirilgan dozada adekvat diurezga erishilgunga qadar yuboriladi.

Kattalarda vena ichiga yuborish uchun tavsiya etilgan maksimal sutkalik doza 1500 mg va bolalarda 20 mg ni tashkil etadi.

Bolalar va kattalarda davolash davomiyligi ko‘rsatmalarga qarab shifokor tomonidan individual ravishda belgilanadi.

Dozalash tartibi bo‘yicha maxsus tavsiyalar

Bolalar

Bolalarda dozani tana vazniga mos ravishda kamaytirish kerak. Bolalarda parenteral yuborish uchun tavsiya etilgan doza kuniga tana vazniga 1 mg/kg ni tashkil etadi, ammo kuniga 20 mg dan oshmasligi kerak.

Kattalar

Jigar kasalliklarida shish sindromi

Furosemid preparati aldosteron antagonistlari yetarli darajada samara bermagan taqdirda, ularni davolashga qo‘shimcha ravishda qo‘llaniladi. Qon aylanishining ortostatik boshqarilishi buzilishi, suv-elektrolit muvozanati yoki kislota-asos holatining buzilishi kabi asoratlar rivojlanishining oldini olish uchun suyuqlik yo‘qotilishi asta-sekin sodir bo‘lishi uchun dozani sinchkovlik bilan tanlash talab etiladi (davolashning boshida sutkasiga taxminan 0,5 kg tana vaznigacha suyuqlik yo‘qotilishi mumkin). Agar vena ichiga yuborish mutlaqo zarur bo‘lsa, u holda vena ichiga yuborish uchun boshlang‘ich doza 20-40 mg ni tashkil etadi.

Surunkali buyrak yetishmovchiligida shish sindromi

Furosemid preparatiga natriyuretik reaksiya bir nechta omillarga, jumladan, buyrak yetishmovchiligining og‘irligi va qondagi natriy miqdoriga bog‘liq, shuning uchun dozaning ta’sirini aniq bashorat qilib bo‘lmaydi. Surunkali buyrak yetishmovchiligi bo‘lgan bemorlarda suyuqlik yo‘qotilishi asta-sekin sodir bo‘lishi uchun dozani asta-sekin oshirish orqali ehtiyotkorlik bilan tanlash talab etiladi (davolashning boshida sutkasiga taxminan 2 l gacha suyuqlik yo‘qotilishi mumkin, bu sutkasiga 280 mmol Na+ gacha bo‘lishi mumkin). Gemodializda bo‘lgan bemorlarda odatda qo‘llab-quvvatlovchi doza ichishga 250-1500 mg/sutkani tashkil etadi.

Vena ichiga yuborilganda Furosemid preparatining dozasi quyidagicha belgilanishi mumkin: davolash vena ichiga tomchilab, daqiqasiga 0,1 mg tezlikda yuborishdan boshlanadi, so‘ngra terapevtik samaraga qarab yuborish tezligi har 30 daqiqada asta-sekin oshirib boriladi.

O‘tkir buyrak yetishmovchiligi (suyuqlik chiqarilishini qo‘llab-quvvatlash uchun)

Furosemid preparati bilan davolashni boshlashdan oldin gipovolemiya, arterial gipotenziya va suv-elektrolit muvozanati va/yoki kislota-asos holatining sezilarli buzilishlari bartaraf etilishi kerak. Bemor Furosemid preparatini vena ichiga yuborishdan Furosemid tabletkalarini qabul qilishga iloji boricha ertaroq o‘tkazilishi tavsiya etiladi (Furosemid tabletkalarining dozasi vena ichiga yuborish uchun tanlangan dozaga bog‘liq).

Vena ichiga yuborish uchun tavsiya etilgan boshlang‘ich doza 40 mg ni tashkil etadi. Agar uni yuborgandan so‘ng kerakli diuretik ta’sirga erishilmasa, Furosemid preparatini uzluksiz vena ichiga infuziya ko‘rinishida, soatiga 50-100 mg yuborish tezligidan boshlab yuborish mumkin.

Nefrotik sindromdagi shishlar

Tavsiya etilgan boshlang‘ich doza kuniga 20-40 mg ni tashkil etadi. Kerakli doza diuretik samaraga qarab tanlanadi. Sutkalik doza bir marta yoki bir necha marta yuborilishi mumkin ("Farmakokinetika" va "Maxsus ko‘rsatmalar" bo‘limlariga qarang).

Surunkali yurak yetishmovchiligida shish sindromi

Tavsiya etilgan boshlang‘ich doza kuniga 20-80 mg ni tashkil etadi. Zarur doza diuretik javobga qarab tanlanadi. Sutkalik doza 2-3 marta yuborishga bo‘linishi tavsiya etiladi.

O‘tkir yurak yetishmovchiligida shish sindromi

Furosemid preparatining tavsiya etilgan boshlang‘ich dozasi vena ichiga bolyusli yuborish ko‘rinishida 20-40 mg ni tashkil etadi. Zarurat bo‘lganda Furosemid preparatining dozasi terapevtik samaraga qarab o‘zgartirilishi mumkin.

Gipertonik kriz, bosh miya shishi

Tavsiya etilgan boshlang‘ich doza vena ichiga bolyus yuborish yo‘li bilan 20-40 mg ni tashkil etadi. Ta’sirga qarab doza o‘zgartirilishi mumkin.

Zaharlanishlarda tezlashtirilgan diurezni qo‘llab-quvvatlash

Furosemid preparati elektrolit eritmalarining vena ichiga yuborilishiga qo‘shimcha ravishda qo‘llaniladi. Vena ichiga yuborish uchun tavsiya etilgan boshlang‘ich doza 20-40 mg ni tashkil etadi. Doza Furosemid preparatiga bo‘lgan reaksiyaga bog‘liq. Furosemid bilan davolashdan oldin va davolash paytida suyuqlik va elektrolitlar yo‘qotilishini nazorat qilish va tiklash lozim. Kislotali yoki ishqoriy reaksiyaga ega bo‘lgan moddalar bilan zaharlanganda, ularning chiqarilishini qo‘shimcha ishqorlash yoki siydikning kislotaliligini oshirish orqali tezlashtirish mumkin.

Nojo‘ya ta’sirlari

Noxush reaksiyalar (NR) MedDRA lug‘ati va JSST HP rivojlanish chastotasi tasnifiga muvofiq tizimlar va a’zolar bo‘yicha guruhlangan: juda tez-tez (≥1/10), tez-tez (≥1/100 dan <1/10 gacha), tez-tez emas (≥1/1000 dan <1/100 gacha), kamdan-kam (≥1/10000 dan <1/1000 gacha), juda kamdan-kam (<1/10000), chastotasi noma’lum (mavjud ma’lumotlar asosida chastotani aniqlash mumkin emas).

Moddalar almashinuvi va ovqatlanishning buzilishi

Juda tez-tez: suv-elektrolit muvozanatining buzilishi, shu jumladan, klinik belgilar bilan kechadigan suv-elektrolit muvozanatining buzilishi. Suv-elektrolit muvozanati buzilishining rivojlanishini ko‘rsatuvchi alomatlar bosh og‘rig‘i, talvasalar, tetaniya, mushaklar kuchsizligi, yurak ritmining buzilishi va dispeptik buzilishlar bo‘lishi mumkin. Bunday buzilishlar asta-sekin (uzoq vaqt davomida) yoki tez (juda qisqa vaqt ichida, masalan, buyrak faoliyati normal bo‘lgan bemorlar tomonidan furosemidning yuqori dozalari qo‘llanilganda) rivojlanishi mumkin. Suv-elektrolit muvozanati buzilishlarining rivojlanishiga asosiy kasalliklar (masalan, jigar sirrozi yoki yurak yetishmovchiligi); suv-elektrolit muvozanatini o‘zgartiruvchi vositalar bilan birgalikdagi davolash; noto‘g‘ri ovqatlanish va ichish tartibi; qusish, diareya, ko‘p terlash; degidratatsiya va gipovolemiya (aylanib yuruvchi qon hajmining kamayishi), ayniqsa keksa yoshdagi bemorlarda, trombozlar rivojlanish xavfining oshishi bilan gemokonsentratsiyaga olib kelishi mumkin (quyida "Tomirlar tomonidan buzilishlar" kichik bo‘limiga qarang); qonda kreatinin konsentratsiyasining oshishi; qon zardobida triglitseridlar konsentratsiyasining oshishi kiradi.

Ko‘pincha: giponatriyemiya, gipoxloremiya, gipokaliyemiya, qonda xolesterin konsentratsiyasining oshishi, qonda siydik kislotasi konsentratsiyasining oshishi va podagra xurujining rivojlanishi.

Kam hollarda: glyukozaga tolerantlikning pasayishi. Yashirin qandli diabet manifest bo‘lishi mumkin ("Maxsus ko‘rsatmalar" bo‘limiga qarang).

Chastotasi noma’lum: gipokalsiyemiya, gipomagniyemiya, qonda mochevina konsentratsiyasining oshishi, metabolik alkaloz, furosemidni noto‘g‘ri va/yoki uzoq vaqt davomida qo‘llashda Barter psevdosindromi.

Tomirlar tomonidan buzilganda

Juda tez-tez (vena ichiga infuziya uchun): arterial bosim (AB) pasayishi, shu jumladan ortostatik gipotenziya.

Kamdan-kam: vaskulit.

Chastotasi noma’lum: tromboz.

Buyrak va siydik yo‘llarining buzilishi

Ko‘pincha: siydik miqdorining ko‘payishi.

Kamdan-kam: tubulointerstitsial nefrit.

Chastotasi noma’lum: siydikda natriy va xloridlar miqdorining oshishi; siydik tutilishi (siydik chiqarish yo‘llarining qisman obstruksiyasi bo‘lgan bemorlarda "Maxsus ko‘rsatmalar" bo‘limiga qarang); chala tug‘ilgan chaqaloqlarda nefrokalsinoz/nefrolitiaz ("Maxsus ko‘rsatmalar" bo‘limiga qarang); buyrak yetishmovchiligi ("Boshqa dori vositalari bilan o‘zaro ta’siri" bo‘limiga qarang).

Ovqat hazm qilish tizimi buzilishlari

Kamdan-kam: ko‘ngil aynishi.

Kamdan-kam hollarda: qusish, ich ketishi.

Juda kam: o‘tkir pankreatit.

Jigar va o‘t yo‘llarining buzilishi

Juda kam hollarda: xolestaz, "jigar" transaminazalari faolligining oshishi.

Eshitish a’zosining buzilishi va labirint buzilishlari

Kamdan-kam hollarda: eshitish qobiliyatining buzilishi, odatda vaqtinchalik, ayniqsa buyrak yetishmovchiligi, gipoproteinemiya (masalan, nefrotik sindromda) va/yoki furosemidni vena ichiga tez yuborish bilan og‘rigan bemorlarda kuzatiladi. Furosemid ichga qabul qilingandan yoki vena ichiga yuborilgandan keyin ba’zan qaytmas karlik rivojlanishi holatlari qayd etilgan.

Kamdan-kam: quloq shang‘illashi.

Teri va teri osti to‘qimalarining buzilishi

Kamdan-kam: teri qichishi, eshakem, toshma, bullyoz dermatit, ko‘p shaklli eritema, pemfigoid, eksfoliativ dermatit, purpura, fotosensibilizatsiya reaksiyalari.

Chastotasi noma’lum: Stivens-Jonson sindromi, toksik epidermal nekroliz, o‘tkir tarqalgan ekzantematoz pustulyoz, DRESS sindromi: eozinofiliya va tizimli simptomlar bilan kechuvchi dori toshmalari.

Asab tizimi buzilishlari

Ko‘pincha: gepatotsellyulyar yetishmovchiligi bo‘lgan bemorlarda jigar ensefalopatiyasi ("Qarshi ko‘rsatmalar" bo‘limiga qarang),

Kamdan-kam hollarda: paresteziyalar.

Chastotasi noma’lum: bosh aylanishi, sinkopal holat (hushdan ketish) yoki hushdan ketish, bosh og‘rig‘i.

Immun tizimi tomonidan buzilishlar

Kamdan-kam hollarda: og‘ir anafilaktik yoki anafilaktoid reaksiyalar, hatto anafilaktik shok rivojlanishigacha.

Chastotasi noma’lum: tizimli qizil yugurikning og‘irlashuvi yoki xuruji.

Qon va limfa tizimi buzilishlari

Ko‘pincha: gemokonsentratsiya.

Kam hollarda: trombotsitopeniya.

Kam hollarda: leykopeniya, eozinofiliya.

Juda kam hollarda: agranulotsitoz, aplastik anemiya yoki gemolitik anemiya. Skelet-mushak tizimi va biriktiruvchi to‘qima buzilishlari

Chastotasi noma’lum: ko‘pincha og‘ir gipokaliyemiya bilan bog‘liq rabdomioliz holatlari qayd etilgan ("Qarshi ko‘rsatmalar" bo‘limiga qarang).

Tug‘ma, irsiy va genetik kasalliklar

Chastotasi noma’lum: hayotning birinchi haftalarida chala tug‘ilgan chaqaloqlarga furosemid yuborilganda arterial yo‘lning bitmay qolish xavfi ortadi.

Yuborish joyidagi umumiy buzilishlar va buzilishlar

Kamdan-kam: isitma.

Chastotasi noma’lum: mushak orasiga yuborilgandan so‘ng og‘riq ko‘rinishidagi mahalliy reaksiya kuzatilishi mumkin.

Ba’zi nojo‘ya reaksiyalar (qon manzarasining o‘zgarishi, og‘ir anafilaktik yoki anafilaktoid reaksiyalar, og‘ir teri allergik reaksiyalari kabi) ma’lum sharoitlarda bemorlar hayotiga xavf solishi mumkinligi sababli, har qanday nojo‘ya ta’sirlar paydo bo‘lganda darhol shifokorga xabar berish zarur. Laboratoriya va instrumental tadqiqotlar natijalariga ta’siri

Chastotasi noma’lum: giperglikemiya, giperxolesterinemiya, giperurikemiya, glyukozuriya, giperkalsiuriya.

Dozani oshirib yuborish

Preparatning o‘tkir yoki surunkali dozasini oshirib yuborishning klinik ko‘rinishi asosan suyuqlik va elektrolitlar yo‘qotilishi darajasi va oqibatlariga bog‘liq; dozani oshirib yuborish gipovolemiya, degidratatsiya, gemokonsentratsiya, yurak ritmi va o‘tkazuvchanligining buzilishi (shu jumladan atrioventrikulyar blokada va qorinchalar fibrillyatsiyasi) bilan namoyon bo‘lishi mumkin.

Belgilari: qon bosimining sezilarli darajada pasayib, shok rivojlanishigacha borishi, kollaps, anuriya bilan kechuvchi o‘tkir buyrak yetishmovchiligi, tromboz, delirioz holat, bo‘shashgan falajlik, apatiya va ongning chalkashishi.

Davolash: qon zardobidagi elektrolitlar miqdori, kislota-asos holati ko‘rsatkichlari, gematokrit nazorati ostida suv-elektrolit muvozanati va kislota-asos holatining klinik ahamiyatga ega buzilishlarini tuzatish, shuningdek, ushbu buzilishlar fonida yuzaga kelishi mumkin bo‘lgan jiddiy asoratlarning oldini olish yoki davolash. Maxsus antidot yo‘q.

O‘zaro aloqa

Tavsiya etilmagan kombinatsiyalar

Aminoglikozidlar - furosemid bilan bir vaqtda qo‘llanilganda aminoglikozidlarning buyraklar orqali chiqarilishini sekinlashtiradi va aminoglikozidlarning ototoksik va nefrotoksik ta’siri rivojlanish xavfini oshiradi. Shu sababli, hayotiy ko‘rsatmalar bo‘yicha zarur bo‘lgan hollardan tashqari, preparatlarning ushbu kombinatsiyasini qo‘llashdan saqlanish kerak, bunda aminoglikozidlarning qo‘llab-quvvatlovchi dozalarini tuzatish (kamaytirish) talab etiladi.

Xloralgidrat - furosemidning vena ichiga infuziyasi xloralgidrat qo‘llanilgandan keyin 24 soat davomida teri qoplamlarining giperemiyasiga, ko‘p terlash, bezovtalik, ko‘ngil aynishi, qon bosimining ko‘tarilishi va taxikardiyaga olib kelishi mumkin. Shuning uchun furosemidni xloralgidrat bilan bir vaqtda qo‘llash tavsiya etilmaydi.

Foydalanishda ehtiyotkorlik talab etiladigan kombinatsiyalar

Ototoksik dori vositalari - furosemid ularning ototoksikligini kuchaytiradi. Bu eshitish a’zosining qaytmas shikastlanishiga olib kelishi mumkinligi sababli, bunday vositalar furosemid bilan bir vaqtda faqat qat’iy tibbiy ko‘rsatmalar bo‘yicha qo‘llanilishi kerak.

Sisplatin - furosemid bilan bir vaqtda qo‘llanganda, ototoksik ta’sir ko‘rsatish xavfi mavjud. Bundan tashqari, agar furosemid past dozada qo‘llanilmasa (masalan, buyrak faoliyati normal bo‘lgan bemorlarda 40 mg kabi) va bemorni yetarli darajada gidratatsiya qilish bilan birga qo‘llanilmasa, sisplatin bilan davolash paytida tezlashtirilgan diurezni o‘tkazish uchun furosemid qo‘llanilganda, sisplatinning nefrotoksik ta’siri kuchayishi mumkin. Litiy tuzlari - furosemid ta’sirida litiyning chiqarilishi kamayadi, buning hisobiga qon zardobida litiy miqdori ortadi, bu esa uning toksik ta’siri, shu jumladan kardiotoksik va neyrotoksik ta’siri rivojlanish xavfini oshiradi. Shuning uchun ushbu kombinatsiyani qo‘llashda qon zardobidagi litiy miqdorini nazorat qilish talab etiladi.

Angiotenzinni o‘zgartiruvchi ferment (AO‘F) ingibitorlari va angiotenzin II retseptorlari antagonistlari - ilgari furosemid bilan davolangan bemorlarda AO‘F ingibitorlari yoki angiotenzin II retseptorlari antagonistlarini qo‘llash qon bosimining haddan tashqari pasayishiga va buyrak faoliyatining yomonlashishiga, ayrim hollarda esa o‘tkir buyrak yetishmovchiligi rivojlanishiga olib kelishi mumkin. Shuning uchun davolash boshlanishidan yoki AAF ingibitorlari yoki angiotenzin II retseptorlari antagonistlari dozasini oshirishdan uch kun oldin furosemidni bekor qilish yoki uning dozasini kamaytirish tavsiya etiladi.

Risperidon - risperidonni furosemid yoki boshqa kuchli diuretiklar bilan birgalikda qo‘llash to‘g‘risida qaror qabul qilishdan oldin xavf va foyda nisbatini sinchkovlik bilan o‘lchab, ehtiyotkorlikka rioya qilish kerak, chunki bir vaqtning o‘zida risperidon va furosemid bilan davolangan demensiya bilan og‘rigan keksa yoshli bemorlarda o‘limning ko‘payishi kuzatilgan.

Levotiroksin-furosemid yuqori dozalarda qalqonsimon bez gormonlarining tashuvchi oqsillar bilan bog‘lanishini ingibirlashi mumkin va shu tariqa dastlab qalqonsimon bezning erkin gormonlari konsentratsiyasining vaqtinchalik oshishiga, keyin esa, umuman olganda, qalqonsimon bez gormonlarining umumiy konsentratsiyasining pasayishiga olib keladi. Ushbu kombinatsiyani qo‘llashda qalqonsimon bez gormonlari konsentratsiyasini nazorat qilish lozim.

E’tiborga olinadigan o‘zaro ta’sirlar

Nosteroid yallig‘lanishga qarshi preparatlar (NYAQV), shu jumladan atsetilsalitsil kislotasi, furosemidning diuretik ta’sirini kamaytirishi mumkin. Gipovolemiya va degidratatsiya bilan og‘rigan bemorlarda (shu jumladan furosemid qabul qilish fonida ham) YAQNDV o‘tkir buyrak yetishmovchiligi rivojlanishiga sabab bo‘lishi mumkin. Furosemid salitsilatlarning zaharliligini oshirishi mumkin.

Fenitoin furosemidning diuretik ta’sirini kamaytiradi.

Glyukokortikosteroidlar, karbenoksolon, qizilmiya preparatlari ko‘p miqdorda va surgi dorilarni furosemid bilan birgalikda uzoq vaqt qo‘llash gipokaliyemiya rivojlanish xavfini oshiradi.

Yurak glikozidlari, QT intervalini uzaytiradigan dorilar - furosemid yuborish fonida suv-elektrolit muvozanati buzilishlari (gipokaliyemiya yoki gipomagniyemiya) rivojlanganda, yurak glikozidlari va QT intervalini uzaytiradigan dorilarning toksik ta’siri ortadi (yurak ritmi buzilishlari rivojlanish xavfi ortadi).

Gipotenziv vositalar, diuretiklar yoki qon bosimini pasaytirishga qodir boshqa vositalar - furosemid bilan birgalikda qo‘llanilganda qon bosimining sezilarli darajada pasayishi mumkin.

Probenetsid, metotreksat yoki furosemid kabi buyrak kanalchalarida ekskretsiya qilinadigan boshqa dorilar furosemidning ta’sirini kamaytirishi mumkin (buyrak ekskretsiyasining bir xil yo‘li); boshqa tomondan, furosemid bu dori vositalarining buyraklar orqali chiqarilishini kamaytirishi mumkin. Bularning barchasi furosemidning ham, u bilan bir vaqtda qabul qilinadigan yuqoridagi dori vositalarining ham nojo‘ya ta’sirlari rivojlanish xavfini oshiradi.

Gipoglikemik vositalar (ichish uchun ham, insulin ham), pressor aminlar (epinefrin, norepinefrin) - furosemid bilan birgalikda ta’sirni susaytiradi.

Teofillin, diazoksid, kuraresimon miorelaksantlar - furosemid bilan birgalikda ta’sirni kuchaytiradi.

Nefrotoksik ta’sirga ega dori vositalari - furosemid bilan birgalikda qo‘llanilganda ularning nefrotoksik ta’siri rivojlanish xavfi ortadi.

Ba’zi sefalosporinlarning yuqori dozalari (asosan buyraklar orqali chiqariladi) - furosemid bilan birgalikda sefalosporinlarning nefrotoksik ta’siri xavfini oshiradi.

Siklosporin A - furosemid bilan birgalikda qo‘llanilganda, furosemid keltirib chiqaradigan giperurikemiya va siklosporin ta’sirida buyraklar tomonidan uratlar ekskretsiyasining buzilishi tufayli podagra artriti rivojlanish xavfi ortadi.

Rentgenokontrast moddalar - furosemid qabul qilgan rentgenokontrast preparatlarni yuborish natijasida nefropatiya rivojlanish xavfi yuqori bo‘lgan bemorlarda rentgenokontrast preparatlarni yuborishdan oldin faqat vena ichiga suyuqlik yuborish (gidratatsiya) o‘tkazilgan rentgenokontrast-indutsirlangan nefropatiya rivojlanish xavfi yuqori bo‘lgan bemorlarga nisbatan rentgenokontrast preparatlarni yuborishdan keyin buyrak faoliyati buzilishining yuqori chastotasi kuzatildi.

Vena ichiga yuboriladigan Furosemid preparati biroz ishqoriy reaksiyaga ega, shuning uchun uni pH ko‘rsatkichi 5,5 dan past bo‘lgan dori vositalari bilan aralashtirish mumkin emas.

Maxsus ko‘rsatmalar

Furosemid preparati bilan davolashni boshlashdan oldin siydik chiqishining keskin ifodalangan buzilishlari, shu jumladan bir tomonlama buzilishlar mavjudligini istisno qilish kerak.

Siydik ajralishi qisman buzilgan bemorlar, ayniqsa Furosemid preparati bilan davolashni boshlashda sinchkovlik bilan kuzatishga muhtoj bo‘ladilar.

Davolash kursi fonida vaqti-vaqti bilan qon bosimi, qoldiq azot, siydik kislotasi miqdori va jigar faoliyatini nazorat qilish zarur.

Furosemid preparati bilan davolash paytida qon zardobidagi natriy, kaliy va kreatinin konsentratsiyasini muntazam nazorat qilish talab etiladi; ayniqsa, suv-elektrolit muvozanati buzilishining rivojlanish xavfi yuqori bo‘lgan bemorlarda qo‘shimcha suyuqlik va elektrolitlar yo‘qotilishi holatlarida (masalan, qusish, diareya yoki kuchli terlash natijasida) sinchkovlik bilan nazorat qilinishi va zarurat tug‘ilganda davolashda tegishli tuzatishlar kiritilishi lozim.

Furosemidning yuqori dozalarini qabul qilayotgan bemorlarda giponatriyemiya va metabolik alkaloz rivojlanishining oldini olish uchun osh tuzi iste’molini cheklash maqsadga muvofiq emas.

Furosemid preparati bilan davolashda doimo kaliyga boy ovqatlar (yog‘siz go‘sht, kartoshka, banan, pomidor, gulkaram, ismaloq, quruq mevalar va hokazolar) iste’mol qilish maqsadga muvofiqdir. Ba’zi hollarda kaliy preparatlarini qabul qilish yoki kaliyni tejaydigan preparatlarni qabul qilish ko‘rsatilishi mumkin.

Gipoproteinemiya, masalan, nefrotik sindrom bilan bog‘liq bo‘lgan bemorlarda Furosemid preparatining dozasini ehtiyotkorlik bilan o‘zgartirish talab etiladi (furosemid samaradorligining susayishi va uning ototoksikligining ortishi mumkin). Buyrakning og‘ir progressiv kasalliklari bilan og‘rigan bemorlarda azotemiya va oliguriya paydo bo‘lganda yoki kuchayganda davolashni to‘xtatish tavsiya etiladi.

Chala tug‘ilgan bolalarda buyrak faoliyatini muntazam nazorat qilish va buyraklarni ultratovush tekshiruvidan o‘tkazish talab etiladi (nefrolitiaz va nefrokalsipoz ehtimoli).

Bir vaqtning o‘zida risperidon va furosemid bilan davolangan demensiya bilan og‘rigan keksa bemorlarda faqat furosemid yoki faqat risperidonni qabul qilgan bemorlarga nisbatan o‘lim holatlari ko‘proq kuzatilgan. Bu effektning patofiziologik mexanizmi aniqlanmagan. Risperidonni boshqa diuretiklar bilan bir vaqtda qo‘llash (asosan, tiazidli diuretiklarning past dozalari bilan) demensiya bilan og‘rigan keksa bemorlarda o‘lim ko‘rsatkichining oshishi bilan bog‘liq emas. Keksa yoshdagi demensiya bilan og‘rigan bemorlarda ehtiyotkorlik bilan, foyda va xavf nisbatini sinchkovlik bilan taroziga solib, furosemid va risperidonni bir vaqtda qo‘llash lozim. Degidratatsiya o‘limni ko‘paytirishning umumiy xavf omili bo‘lganligi sababli, demensiya bilan og‘rigan keksa bemorlarda ushbu kombinatsiyani qo‘llash to‘g‘risida qaror qabul qilishda bemorning degidratatsiyasidan qochish kerak.

Tizimli qizil yugurukning kechishi og‘irlashishi yoki xuruj qilishi mumkin. Jigar sirrozi fonida assit bilan og‘rigan bemorlarga dozalash tartibini tanlashni statsionarda o‘tkazish kerak (suv-elektrolit muvozanatining buzilishi jigar komasi rivojlanishiga olib kelishi mumkin). Ushbu toifadagi bemorlarda qon plazmasidagi elektrolitlar miqdorini muntazam nazorat qilish ko‘rsatilgan.

Qandli diabet yoki glyukozaga tolerantligi past bo‘lgan bemorlarda qondagi va siydikdagi glyukoza miqdorini vaqti-vaqti bilan nazorat qilib turish talab etiladi.

Hushsiz holatda, prostata bezining adenomasi, siydik yo‘llarining torayishi yoki gidronefroz bilan og‘rigan bemorlarda o‘tkir siydik tutilishi ehtimoli tufayli siydik ajralishini nazorat qilish zarur.

Muvofiqlik ko‘rsatmalari

Furosemid preparati boshqa dori vositalari bilan bir shprisda aralashmasligi kerak.

Anafilaktik shok rivojlanganda shoshilinch choralar

Odatda, quyidagi tadbirlar tavsiya etiladi:

Dastlabki belgilarda (keskin holsizlik, sovuq ter, ko‘ngil aynishi, sianoz) inyeksiyani to‘xtatish va ignani venada qoldirish kerak. Boshqa odatiy shoshilinch chora-tadbirlar bilan bir qatorda, bosh va tananing past holatini ta’minlash hamda nafas yo‘llarining o‘tkazuvchanligini saqlash zarur.

Kechiktirib bo‘lmaydigan medikamentoz tadbirlar (dozalash bo‘yicha tavsiyalar tana vazni normal bo‘lgan katta yoshli bemorga mo‘ljallangan; bolalarni davolashda dozani tana vazniga mutanosib ravishda kamaytirish lozim).

Epinefrin (adrenalin) ni zudlik bilan vena ichiga yuborish: 1 ml standart adrenalin 1:1000 eritmasi 10 ml gacha suyultirilgandan so‘ng, dastlab olingan eritmadan 1 ml (=0,1 mg adrenalin) yurak urishi, qon bosimi va yurak ritmi nazorati ostida sekinlik bilan yuboriladi. Zarurat tug‘ilganda, epinefrinni vena ichiga yuborish yo‘li bilan davom ettirish mumkin. Epinefrin yuborish bilan bir vaqtda vena ichiga glyukokortikosteroidlar (250-1000 mg metilprednizolon yoki prednizolon) yuboriladi, zarurat tug‘ilganda uni takrorlash mumkin. Ushbu tadbirlardan tashqari, aylanib yuruvchi qon hajmini to‘ldirish uchun plazma o‘rnini bosuvchilar va/yoki elektrolit eritmalarni vena ichiga infuzion yuborish amalga oshiriladi. Zarur bo‘lganda: sun’iy nafas oldirish, kislorod ingalyatsiyasi, antigistamin vositalar.

Homiladorlik va laktatsiya

Furosemid yo‘ldosh to‘sig‘i orqali o‘tadi, shuning uchun u qat’iy tibbiy ko‘rsatmalarsiz homiladorlikda qo‘llanilmasligi kerak. Agar hayotiy ko‘rsatmalarga ko‘ra Furosemid preparati homiladorlarda qo‘llanilsa, u holda homilaning holati va rivojlanishini sinchkovlik bilan kuzatib borish zarur.

Emizish davrida Furosemid preparatini qo‘llash mumkin emas, chunki u laktatsiyani to‘xtatib qo‘yishi mumkin. Ayollar Furosemid preparatini qabul qilayotgan bo‘lsalar, emizishni to‘xtatishlari kerak.

Transport vositalari va mexanizmlarini boshqarish qobiliyatiga ta’siri

Davolanish davrida transport vositalarini boshqarishdan va diqqatning yuqori konsentratsiyasini hamda psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishdan tiyilish kerak.

Qadoq

2 ml dan neytral shisha yoki sinish nuqtalari yoki halqalari bo‘lgan birinchi gidrolitik sinfdagi rangsiz shisha ampulalarga.

10 ta ampula qo‘llash bo‘yicha yo‘riqnoma bilan birga karton qutiga solinadi.

5 ta ampula polivinilxlorid plyonkasidan yasalgan konturli yacheykali o‘ramga joylashtiriladi.

2 tadan konturli yacheykali o‘ramlar qo‘llash bo‘yicha yo‘riqnoma bilan birga karton qutiga joylanadi.

Saqlash shartlari

Yorug‘lik tushmaydigan joyda, 25 °C dan yuqori bo‘lmagan haroratda.

Bolalar qo‘li yetmaydigan joyda saqlang.

Yaroqlilik muddati

2 yil.

Yaroqlilik muddati o‘tgandan keyin qo‘llanilmaydi.

Dorixonalardan berish shartlari

Retsept bo‘yicha.

Ro‘yxatdan o‘tish guvohnomasi egasi

DALXIMFARM OAJ Rossiya.

Ishlab chiqaruvchi

DALXIMFARM OAJ Rossiya.