Genium kukuni D/in. 40 mg (shisha)

Tarkib

Ta’sir etuvchi moddasi: 1 flakon 40 mg ezomeprazolga ekvivalent bo‘lgan natriy ezomeprazol saqlaydi.

Yordamchi moddalar: mannitol, natriy gidroksid (pH ni to‘g‘rilash uchun).

Tavsif

Infuziya/inyeksiya uchun eritmalar tayyorlash uchun steril kukun.

Qo‘llanilishi

oshqozon shirasining qizilo‘ngachga tushishi tufayli qizilo‘ngachning yallig‘lanishi va og‘rishi (eroziv reflyuks-ezofagitni davolashda);

kattalar, o‘smirlar va bolalarda oshqozon shirasining qizilo‘ngachga tushishi natijasida qayt qilish va jig‘ildon qaynashi kabi oshqozon kasalliklarining namoyon bo‘lishida (gastro-ezofageal reflyuks kasalligini simptomatik davolash);

yaralar: kattalarda yallig‘lanishga qarshi vositalarni qo‘llash natijasida hosil bo‘lgan yaralarni davolash va oldini olish uchun (oshqozon yarasini davolash bilan bog‘liq holda NYAQV (nosteroid yallig‘lanishga qarshi dorilar) dan foydalanish natijasida hosil bo‘lgan oshqozon va o‘n ikki barmoqli ichak yaralarining oldini olish);

o‘tkir qon ketishi bilan kechuvchi oshqozon va o‘n ikki barmoqli ichak yarasi bo‘lgan kattalarda davolash endoskopiyasidan so‘ng qon ketishini qisqa vaqt ichida to‘xtatish va takroriy qon ketishining oldini olish uchun.

Qo‘llash usuli va dozalari

Preparatdan to‘g‘ri foydalanish va dozani qo‘llash chastotasi bo‘yicha ko‘rsatmalar: agar siz tabletkalarni qabul qila olmasangiz, shifokor/hamshira 10 kungacha bo‘lgan davrda sizga Geniumni inyeksiya yoki infuziya ko‘rinishida yuboradi. Genium preparatini ichishga o‘tish imkoniyati paydo bo‘lganda, davolanishni tabletkalar bilan davom ettirish lozim. Preparat dozasini shifokor tayinlaydi. Kasallikka qarab, shifokoringiz siz qabul qiladigan dozani belgilaydi.

Qo‘llash usullari va yo‘llari:

qizilo‘ngach yallig‘lanishi va og‘rig‘ida (eroziv reflyuks-ezofagit) davolash uchun tavsiya etilgan doza kuniga 1 marta 40 mg Genium hisoblanadi. Kasallikning og‘irligiga, shuningdek, davolanishga bo‘lgan javobga qarab, davolash davomiyligi 4-8 haftani tashkil etadi. Kasallik qaytalanishining oldini olish uchun tavsiya etilgan doza kuniga 1 marta 20 mg;

qusish va jig‘ildon qaynashi kabi oshqozon kasalliklari belgilarini davolash uchun (gastro-ezofagal reflyuks kasalligini simptomatik davolash) Genium kuniga 1 marta 20 mg terapevtik dozada tavsiya etiladi;

kuchli qon ketishi bilan kechuvchi me’da va 12 barmoqli ichak yarasida terapevtik endoskopiyadan so‘ng qon ketishini qisqa muddatga to‘xtatish yoki qayta qon ketishining oldini olish maqsadida bemorlarga 80 mg miqdorida 30 daqiqa davomida bolyusli infuziya shaklida yuboriladi, keyingi 3 kun (72 soat) davomida esa preparat 8 mg/soat tezlikda uzluksiz vena ichiga infuziya shaklida qo‘llaniladi.

Turli yosh guruhlari:

Genium 1-18 yoshdagi bolalar va o‘smirlarda qo‘llanilishi mumkin.

1-18 yoshdagi bolalar: Preparat dozasi to‘g‘risidagi qarorni shifokor qabul qiladi.

1-11 yoshdagi bolalar uchun umumiy doza 10 mg yoki 20 mg kuniga 1 marta.

12-18 yoshdagi bolalar uchun umumiy doza kuniga 1 marta 20 mg yoki 40 mg ni tashkil etadi.

Preparat vena ichiga infuziya yoki inyeksiya ko‘rinishida yuboriladi. Ko‘pi bilan 30 daqiqa davomida yuborish kerak.

Keksa yoshdagi shaxslarda qo‘llanishi: Genium keksa yoshdagi shaxslarda qo‘llanilishi mumkin.

Nojo‘ya ta’sirlari

Genium bilan davolash davomida juda kam hollarda: jiddiy teri kasalliklari, qon kasalliklari (agranulotsitoz va pansitopeniya), ta’sirchanlik, alahsirash (gallyutsinatsiya), jigarning funksional yetishmovchiligi, jigar kasalliklari bilan og‘rigan bemorlarda miya to‘qimalarining shikastlanishi, diqqatning pasayishi, mushaklar kuchsizligi, buyraklar yallig‘lanishi, erkaklarda ko‘krak bezlarining kattalashishi va qonda magniy miqdorining kamayishi mumkin.

Preparat qo‘llaniladigan sohada to‘qimalarning kuchsiz yallig‘lanishi ko‘rinishidagi reaksiya kuzatilishi mumkin.

Agar quyidagi alomatlardan birini sezsangiz, shifokorga xabar bering:

Bosh og‘rig‘i, diareya, meteorizm, qorin og‘rig‘i, ko‘ngil aynishi / qusish, qabziyat, teri reaksiyalari (qizarish, teri shikastlanishlari, qichishish, asalari chaqishidek shish), achishish / sanchish / uvishish hissi, uxlash qiyinlashishi, uyquchanlik, bosh aylanishi, og‘iz qurishi yoki qo‘l va oyoqlarning shishishi.

Bularning barchasi Geniumning yengil nojo‘ya ta’sirlari.

Geniumning qo‘shimcha nojo‘ya ta’sirlari yuzaga kelishi mumkin. Ularni qon tahlili paytida aniqlash mumkin: jigar fermentlari darajasining oshishi.

Agar sizda ushbu yo‘riqnomada ko‘rsatilmagan nojo‘ya ta’sirlar kuzatilsa, bu haqda shifokoringiz yoki farmatsevtingizga xabar bering.

Qarshi ko‘rsatmalar

Genium-u yoki preparatning biror komponentiga yuqori sezuvchanlik;

proton nasosining boshqa ingibitorlariga nisbatan allergiya mavjudligi;

boshqa proton nasosi ingibitorlari kabi, ezomeprazol ham atazanavir yoki nelfinavir (OIV (OITS) ni davolash uchun ishlatiladigan dorilar) bilan birgalikda qo‘llanilmaydi.

Ehtiyot choralari va qo‘llash xususiyatlari

Quyidagi ma’lumotlar ushbu dori vositasidan foydalanadigan tibbiyot xodimlari uchun mo‘ljallangan.

Qo‘llashdan oldin preparatni begona zarrachalar bor-yo‘qligini va rangining o‘zgarganligini ko‘zdan kechirish lozim. Faqat tiniq eritmalardan foydalanish lozim. Preparat bir marta ishlatish uchun mo‘ljallangan. 20 mg dozani olish uchun eritmaning yarmini ishlatish kerak. Ishlatilmagan eritmani tashlab yuborish kerak.

Inyeksion eritmani tayyorlash

Inyeksion eritma tayyorlash uchun ezomeprozol solingan flakonga 5 ml 0,9% li natriy xlorid eritmasi (vena ichiga yuborish uchun) qo‘shiladi. Tayyor inyeksion eritma tiniq, rangsiz yoki biroz sarg‘ish rangda bo‘lishi kerak.

Infuziya uchun eritma tayyorlash.

Infuziya uchun eritma tayyorlash uchun flakon ichidagini eritib, ezomeprozol solingan flakonga 100 ml gacha 0,9% li natriy xlorid eritmasini (vena ichiga yuborish uchun) qo‘shish kerak. Tayyor infuziya eritmasi tiniq, rangsiz yoki biroz sarg‘ish rangda bo‘lishi kerak.

Chiqarilish shakli, o‘rami

Flakonda steril kukun bo‘lib, uning tarkibida 1 doza infuziya/inyeksiya tayyorlash uchun 40 mg ezomeprozol mavjud. Karton qutiga flakon bilan birga preparatni qo‘llash bo‘yicha yo‘riqnoma solingan.

Saqlash shartlari

Bolalar qo‘li yetmaydigan joyda, o‘z qadog‘ida saqlang.

Genium infuziyalari / inyeksiyalari shifokor yoki shifoxona tomonidan saqlanadi.

Tibbiyot xodimlari Geniumning to‘g‘ri saqlanishi, tayyorlanishi va ishlatilishi uchun javobgardirlar.

Yaroqlilik muddati

Yaroqlilik muddati qadoqda ko‘rsatilgan.

Yaroqlilik muddati tugagach, preparatni ishlatib bo‘lmaydi.

Dorixonadan berish shartlari

Retsept asosida beriladi.

Ishlab chiqaruvchi

Gen Ilach ve Sag‘lık Urunleri San.ve Tij. A.Sh / Turkiya, ASO 2. ve 3. OSB Olchi OSB Max. 2013, Jud. N24 Sinjan/Ankara.

GEN İLACH VE SAG‘LIK ÜRÜNLERİ SAN.VE TİC. A.Sh.