Koldrilif tabletkalari №100 (10 blister х 10 tabletka)

Tarkib

1 ta tabletka tarkibida quyidagilar mavjud:

faol moddalar: paratsetamol 500 mg, kofein - 30 mg, fenilefrin gidroxlorid - 10 mg, xlorfenamin maleat - 2 mg;

yordamchi moddalar: makkajo‘xori kraxmali, povidon, jelatin, natriy propilparaben, natriy laurilsulfat, mikrokristall sellyuloza (PH102), magniy stearati, tozalangan suv.

Dori shakli

Tabletkalar.

Farmakoterapevtik guruh

Boshqa analgetiklar va antipiretiklar.

Farmakologik ta’siri

Kombinatsiyalangan preparat.

Paratsetamol og‘riq qoldiruvchi va isitma tushiruvchi ta’sir ko‘rsatadi. Shamollash kasalliklarida kuzatiladigan og‘riq sindromini - tomoq og‘rig‘i, bosh og‘rig‘i, mushak va bo‘g‘im og‘riqlarini kamaytiradi, yuqori haroratni pasaytiradi.

Fenilefrin - alfa 1-adrenomimetik. Tomirlarni toraytiruvchi ta’sir ko‘rsatadi, nafas yo‘llari yuqori bo‘limlari va burun yondosh bo‘shliqlari shilliq qavatlarining shishi va giperemiyasini kamaytiradi.

Xlorfenamin maleat - gistamin H1-retseptorlari blokatori, allergiyaga qarshi ta’sir ko‘rsatadi, burun bo‘shlig‘i, burun-halqum va burun yondosh bo‘shliqlari shilliq qavatlarining shishishi va giperemiyasini kamaytiradi, ko‘z va burun qichishishini bartaraf etadi, ekssudativ ko‘rinishlarni kamaytiradi.

Kofein markaziy asab tizimiga rag‘batlantiruvchi ta’sir ko‘rsatadi, bu esa charchoq va uyquchanlikning kamayishiga, aqliy va jismoniy ish qobiliyatining oshishiga olib keladi.

Ko‘rsatmalar

Tana harorati ko‘tarilishi (titroq), burun bitishi (tumov), rinoreya, ko‘zdan yosh oqishi, aksirish, bosh og‘rig‘i, bo‘g‘im va mushaklarda og‘riq bilan kechadigan shamollash, gripp va boshqa O‘RVI belgilarini davolash.

Qo‘llash usuli va dozalari

Ichkariga.

Kattalar va 12 yoshdan oshgan bolalar: 1 tabletkadan kuniga 3-4 mahal. Maksimal sutkalik doza 4 tabletka. Davolash kursining davomiyligi 5 kundan oshmasligi kerak.

Nojo‘ya ta’siri

Paratsetamol pankreatit, toshma ko‘rinishidagi allergik reaksiyalar yoki qon kasalliklarini (shu jumladan neytropeniya, pansitopeniya, leykopeniya, agranulotsitoz va trombotsitopeniya) keltirib chiqarishi mumkin.

Simptomlar preparatni qabul qilish to‘xtatilgandan so‘ng yo‘qoladi. Toshma odatda qizil dog‘lar yoki allergik pufakchalar ko‘rinishida paydo bo‘ladi va harorat ko‘tarilishi hamda shilliq qavatlarning zararlanishi bilan kechishi mumkin.

Xlorfenaminning eng keng tarqalgan nojo‘ya ta’siri sedativ ta’sir bo‘lib, u yengil uyqudan chuqur uyqugacha, jumladan charchoq, bosh aylanishi va koordinatsiyani yo‘qotishni o‘z ichiga oladi.

Ayniqsa bolalarda markaziy asab tizimining paradoksal stimulyatsiyasi yuzaga kelishi mumkin, bu asabiylik, asabiylashish, eyforiya hissi, tremor va kamroq hollarda tungi qo‘rqinchli tushlar, gallyutsinatsiyalar va talvasalar bilan kechadi.

Keksa yoshdagi bemorlar dori vositasining qon bosimini pasaytirish va markaziy asab tizimi faoliyatini pasaytirish ta’siriga, hatto davolash uchun samarali dozalarda ham, ko‘proq moyil bo‘ladilar.

Fenilefrin gidroxlorid bosh aylanishi, bosh og‘rig‘i, ko‘ngil aynishi, qusish, terlash, chanqash, yurak urishining tezlashishi yoki notekisligi (taxikardiya, qorincha aritmiyasi), qon bosimining ko‘tarilishi (gipertoniya), siydik chiqarishning qiyinlashishi, mushaklar kuchsizligi, tremor, xavotirlanish, bezovtalik va uyqusizlik, qo‘rquv, ongning chalkashishi, ishtahaning pasayishi, nafas qisilishi, terlash, so‘lak ajralishining ko‘payishi, moddalar almashinuvining buzilishini keltirib chiqarishi mumkin.

Dozani oshirib yuborish

Odatda, paratsetamol tufayli dozaning oshirib yuborilishi uning 10-15 g dan ortiq qabul qilingandan keyin namoyon bo‘ladi.

Belgilari: teri rangining oqarishi, anoreksiya, ko‘ngil aynishi, qusish, gepatonekroz, jigar transaminazalari faolligining oshishi, protrombin vaqtining uzayishi.

Davolash: oshqozonni yuvish va keyinchalik faollashtirilgan ko‘mir buyurish, simptomatik terapiya, dozani oshirib yuborgandan keyin 8-9 soat o‘tgach metionin va 12 soatdan keyin atsetilsistein yuborish.

Qarshi ko‘rsatmalar

preparatni og‘ir jigar kasalliklari bilan og‘rigan bemorlarga qo‘llash tavsiya etilmaydi;

koronar arteriyalarning yaqqol aterosklerozi;

arterial gipertenziya;

qandli diabet;

tritsiklik antidepressantlar, beta-adrenoblokatorlarni bir vaqtning o‘zida qabul qilish;

preparat tarkibiga kiruvchi komponentlarni o‘z ichiga olgan preparatlarni bir vaqtda qabul qilish;

homiladorlik;

laktatsiya davri;

preparat komponentlariga yuqori sezuvchanlik.

Maxsus ko‘rsatmalar

Shifokor ko‘rsatmasi bo‘yicha qo‘llansin.

Preparatni qo‘llash davrida alkogol, uxlatuvchi va anksiolitik dorilar (trankvilizatorlar) iste’mol qilishdan tiyilish kerak.

Paratsetamol saqlovchi boshqa preparatlar bilan bir vaqtda qabul qilinmaydi.

Homiladorlik va emizish davrida

Preparatni homiladorlik va laktatsiya davrida buyurish mumkin emas.

Avtotransportni boshqarish qobiliyatiga ta’siri

Davolash davrida avtotransportni boshqarishdan va diqqatning yuqori konsentratsiyasini hamda psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishdan tiyilish kerak.

Dorilarning o‘zaro ta’siri

Preparat MAO ingibitorlari, sedativ preparatlar, etanol ta’sirini kuchaytiradi.

Preparat antidepressantlar, parkinsonizmga qarshi vositalar, antipsixotik vositalar, fenotiazin hosilalari bilan bir vaqtda qo‘llanganda siydik tutilishi, og‘iz qurishi, qabziyat rivojlanish xavfi ortadi.

Paratsetamol diuretik preparatlarning samaradorligini pasaytiradi.

Etanol antigistamin dori vositalarining sedativ ta’sirini kuchaytiradi.

Xlorfenaminning MAO ingibitorlari, furazolidon bilan bir vaqtda qo‘llanilishi gipertoniya kriziga, qo‘zg‘alishga, giperpireksiyaga olib kelishi mumkin.

Tritsiklik antidepressantlar fenilefrinning adrenomimetik ta’sirini kuchaytiradi, bir vaqtning o‘zida galotanning tayinlanishi qorincha aritmiyasi rivojlanish xavfini oshiradi.

Fenilefrin guanetidinning gipotenziv ta’sirini pasaytiradi, u esa fenilefrinning alfa-adrenostimullovchi faolligini kuchaytiradi.

Preparat barbituratlar, difenin, karbamazepin, rifampitsin va jigar mikrosomal fermentlarining boshqa induktorlari bilan bir vaqtda qo‘llanganda, paratsetamolning gepatotoksik ta’siri rivojlanish xavfi ortadi.

Saqlash shartlari

Yorug‘likdan himoyalangan joyda, 30 °C dan yuqori bo‘lmagan haroratda saqlang.

Yaroqlilik muddati

3 yil.

Ishlab chiqaruvchi

Triumph Lifesciences Pvt. Ltd, Hindiston.

Ishlab chiqarilgan: Artura Pharmaceuticals Pvt. Ltd, Hindiston.