Langena kapsulalari №30 (2 blister х 15 kapsula)

Tarkib

Har bir kapsulada quyidagilar mavjud:

faol moddalar: quruq ekstraktlar:

jenshen ildizi (Panax ginseng) - 40 mg; ikki bo‘lakli ginkgo (Ginkgo biloba) barglari - 40 mg; qora smorodina (Ribes nigrum) mevalari - 30 mg; Koenzim Q10 - 50 mg;

yordamchi moddalar: kalsiy karbonat, magniy stearat, suvsiz kolloid kremniy dioksidi, suvsiz kalsiy gidrofosfat;

kapsula qobig‘ining tarkibi: titan dioksidi, azorubin, indigotin, jelatin.

Tavsif

Qattiq jelatinli kapsulalar, o‘lchami No0, korpusi va qopqog‘i binafsha rangda, tarkibida jigarrang-sariq rangli kukunning oq rangli zarrachalar bilan aralashmasi mavjud.

Dori shakli

Qattiq jelatinli kapsulalar.

Farmakoterapevtik guruh

Asab tizimi kasalliklarini davolash uchun boshqa preparatlar. ATX kodi: N07XX.

Farmakologik xususiyatlari

Langen optimal hayotiy kuchni, shu jumladan keksa yoshda ham saqlashga yordam beradi. Jismoniy va aqliy faollikni qo‘llab-quvvatlaydi, yurak-qon tomir tizimi faoliyatini, qon aylanishini va venalar tonusini yaxshilaydi. Uzoq vaqt qo‘llanganda terining bo‘shashishi va organizmning erta qarishining oldini oladi.

Jenshen ildizining quruq ekstrakti tarkibida saponin glikozid-ginsenozidlar, efir moylari, stirol, peptidlar, vitaminlar va minerallar mavjud. Jenshen ekstrakti markaziy asab tizimiga rag‘batlantiruvchi ta’sir ko‘rsatadi, aqliy va jismoniy ish qobiliyatini oshiradi. Moddalar va energiya almashinuvini, hujayra faolligini rag‘batlantiradi, organizm hujayralari tomonidan kislorod o‘zlashtirilishini yaxshilaydi va shu tariqa insonning energetik imkoniyatlarini sezilarli darajada oshirishga yordam beradi. Jenshen ekstrakti ichki sekretsiya bezlari ishini tartibga soladi, qon bosimini biroz oshiradi, qon zardobidagi xolesterin va glyukoza miqdorini kamaytiradi (gipoglikemik ta’sir ko‘rsatadi). Tashqi muhitning noqulay omillariga va stressli vaziyatlarga chidamlilikni yaxshilaydi. Organizmning nospetsifik rezistentligini oshiradi.

Preparat tarkibiga kiruvchi ikki bo‘lakli ginkgo barglarining quruq ekstrakti tarkibida flavon glikozidlari va terpen laktonlari mavjud bo‘lib, qon tomir devorini mustahkamlaydi va elastikligini oshiradi, qonning reologik xususiyatlarini tiklaydi. Mikrotsirkulyatsiyani hamda miya va periferik to‘qimalarning kislorod va glyukoza bilan ta’minlanishini yaxshilaydi. Ikki pallali ginkgo ekstrakti hujayralarda modda almashinuvini me’yorlashtiradi, eritrotsitlar agregatsiyasiga to‘sqinlik qiladi, trombotsitlar agregatsiyasini ingibirlaydi, mayda arteriyalarni kengaytiradi, venalar tonusini oshiradi va tomirlarning qon bilan to‘lishini tartibga soladi.

Qora smorodina mevasining quruq ekstrakti flavonoidlar (antotsianlar), linolen kislotasi, C, A, B6, B12, E vitaminlari, minerallar va antioksidantlarga boy. Menopauza, teri kasalliklari (ekzema, psoriaz) va artrit belgilarini yengillashtiradi. Soch, tish va milk holatini yaxshilaydi. Katarakta rivojlanishining oldini oladi.

Koenzim Q10 (ubixinon) hujayradagi oksidlovchi fosforlanish jarayonlarini rag‘batlantiradi. Energiya almashinuvi va hujayralarning normal hayot faoliyati uchun zarur. Taxminan 30 yoshdan keyin odamda koenzim Q10 miqdori kamayadi. Koenzim Q10 muntazam ravishda qabul qilingan taqdirda, organizmning yetuk hujayralarining faol hayot faoliyatini uzaytiradi, qarigan hujayralar funksiyasini tiklaydi, hujayralarning immun javob kuchi va ularning ortiqcha yuklamalar, stresslar va boshqa noqulay ta’sirlarga chidamliligini oshiradi, yurak-qon tomir tizimi to‘qimalari va a’zolari, jigar, buyraklar faoliyatini, teri holatini yaxshilaydi; biologik qarish jarayonlarini sekinlashtiradi.

Farmakokinetika

Langen preparatining ta’siri uning tarkibiy qismlarining birgalikdagi xususiyatlariga bog‘liq, shuning uchun kinetik kuzatuvlar o‘tkazishning imkoni yo‘q.

Qo‘llanilishi

diqqat va/yoki xotiraning pasayishi, intellektual qobiliyatlarning buzilishi, xavotir, qo‘rquv hissi, uyqu buzilishlari bilan kechadigan turli etiologiyali dissirkulyator ensefalopatiya;

vegetativ distoniya sindromi;

turli etiologiyali astenik holatlar, astenik sindrom;

periferik qon aylanishi va mikrotsirkulyatsiyaning buzilishi;

neyrosensor buzilishlar (bosh aylanishi, quloq shang‘illashi, gipoakuziya, sariq dog‘ning qarilik degeneratsiyasi, diabetik polineyropatiya);

ko‘rishning yomonlashuvi (katarakta, retinopatiya);

organizmning chidamliligini oshirish, immunitetni mustahkamlash maqsadida, ayniqsa og‘ir kasalliklardan so‘ng va yuqori jismoniy, aqliy va hissiy zo‘riqishlarda (shu jumladan stress holatida);

erkaklar va ayollar bepushtligini kompleks davolashda; erektil disfunksiya (impotensiya) da;

klimakterik va hayz oldi sindromini kompleks davolashda;

organizm qarishining oldini olish, erta qarishning oldini olish uchun;

teri hujayralarini tiklash va yoshartirish, ajinlar paydo bo‘lishi va terining bo‘shashishining oldini olish uchun;

vazn yo‘qotish dasturlarida;

milk kasalliklari (parodontit).

Qo‘llash usuli va dozalari

Langen preparati ichga, 1-2 kapsuladan ovqat vaqtida yoki ovqatdan keyin kunning birinchi yarmida, yetarli miqdorda suyuqlik bilan ichiladi. Davolashning davomiyligi 2 haftadan 2 oygacha bo‘lib, shundan so‘ng ikki haftalik tanaffus qilish kerak.

Nojo‘ya ta’sirlari

Preparat yaxshi o‘zlashtiriladi, nojo‘ya ta’sirlari kam uchraydi.

Hazm tizimi tomonidan: dispeptik buzilishlar, ko‘ngil aynishi.

Markaziy asab tizimi tomonidan: bosh og‘rig‘i, bosh aylanishi.

Allergik reaksiyalar: teri toshmasi, qichishish.

Boshqalar: qon ivishining pasayishi (uzoq muddat qo‘llangandan so‘ng).

Qarshi ko‘rsatmalar

preparat komponentlariga yuqori sezuvchanlik;

qon ivishining pasayishi;

me’da va o‘n ikki barmoqli ichak yara kasalligi qo‘zish bosqichida;

miya qon aylanishining o‘tkir buzilishlari;

yurak-qon tomir tizimining og‘ir kasalliklari (o‘tkir koronar sindrom, yurak ritmining buzilishi);

epilepsiya, tutqanoq holatlari;

homiladorlik va laktatsiya davri;

12 yoshgacha bo‘lgan bolalar yoshi.

Dorilarning o‘zaro ta’siri

Preparat uyqu va og‘riq qoldiruvchi dori vositalari hamda spazmolitiklarning ta’sirini kuchaytiradi.

Maxsus ko‘rsatmalar

Preparatni qabul qilish davrida (ayniqsa, oq tanli bemorlar) quyosh nurida uzoq vaqt qolishdan va solyariylarga borishdan saqlanish kerak.

Fotosensibilizatsiyani chaqiruvchi boshqa vositalarni bir vaqtda qo‘llashdan saqlanish kerak.

Rejalashtirilgan jarrohlik amaliyotidan 2 hafta oldin preparatni qabul qilishni to‘xtatish kerak.

Langenni MAO ingibitorlari bilan bir vaqtda qo‘llash tavsiya etilmaydi.

Pediatriyada qo‘llanishi

Langen preparati 12 yoshgacha bo‘lgan bolalarda qo‘llanilmaydi.

Preparatni bolalar qo‘li yetmaydigan joyda saqlash va qadoqda ko‘rsatilgan yaroqlilik muddati tugagandan so‘ng ishlatmaslik lozim.

Homiladorlik va laktatsiyada qo‘llash

Preparatni homiladorlik va laktatsiya davrida qo‘llash mumkin emas.

Avtotransport va mexanizmlarni boshqarish qobiliyatiga ta’siri

Davolash davrida avtotransportni boshqarishda va diqqatning yuqori konsentratsiyasini hamda psixomotor reaksiyalarning tezligini talab qiladigan boshqa potensial xavfli faoliyat turlari bilan shug‘ullanishda ehtiyot bo‘lish lozim.

Dozani oshirib yuborish

Doza oshirib yuborilganda markaziy asab tizimining susayishi, uyquchanlik kuzatilishi mumkin.

Davolash: simptomatik.

Chiqarish shakli

Qattiq jelatinli kapsulalar. Blisterda 15 ta kapsula. 2 ta blister qo‘llanmasi bilan birga karton qutida.

Saqlash shartlari

Namlik va yorug‘likdan himoyalangan joyda, 25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retseptsiz.

Ishlab chiqaruvchi

Savdo belgisi va ro‘yxatdan o‘tkazish guvohnomasining egasi kompaniya hisoblanadi

"Dr Sertus Ilach Sanayi ve Tijaret Limited Shirketi," Turkiya

("Dr Sertus İlaç Sanayi ve Ticaret Limited Şirketi," Turkey).

Ishlab chiqarilgan

"Adifarm Ltd," Bolgariya (130 Simeonovskiy shossesi bulvari, 1700 Sofiya)

"Adipharm Ltd," Bulgaria (130 Simeonovskoshosseblvd., 1700 Sofia).