Ларивикс порошок д/внут. прим. по 4,36 г №10 (саше)

Tarkib

1 ta paketda quyidagilar mavjud:

faol moddalar: paratsetamol - 325 mg, gvayfenezin - 200 mg, fenilefrin gidroxlorid - 10 mg;

yordamchi moddalar: vino kislotasi, suvsiz limon kislotasi, natriy sitrat, aspartam, suvsiz kolloid kremniy dioksidi, limon laym xushbo‘ylantiruvchisi, mentol xushbo‘ylantiruvchisi, shakar.

Tavsif

Limon va mentol hidli, sarg‘ish tusli oqdan oq ranggacha bo‘lgan kukun. Yumshoq kesaklar, oq va sariq rangli dog‘lar bo‘lishiga yo‘l qo‘yiladi.

Dori shakli

Ichish uchun eritma tayyorlash uchun kukun.

Farmakoterapevtik guruh

Analgetik-antipiretiklar. ATX kodi: N02BE51.

Farmakologik xususiyatlari

Ta’siri tarkibiga kiruvchi komponentlarga bog‘liq bo‘lgan kombinatsiyalangan preparat.

Farmakodinamika

Paratsetamol og‘riq qoldiruvchi, isitma tushiruvchi va kuchsiz yallig‘lanishga qarshi ta’sirga ega. Ta’sir mexanizmi prostaglandinlar sintezining ingibirlanishi va gipotalamusdagi termoregulyatsiya markaziga ta’siri bilan bog‘liq.

Gvayfenezin balg‘am ko‘chiruvchi ta’sirga ega. Gvayfenezin me’da shilliq qavatining retseptorlarini rag‘batlantiradi, ular o‘z navbatida nafas yo‘llari suyuqligining reflektor sekretsiyasini boshlaydi, bu esa bronxial sekret hajmining ko‘payishi va yopishqoqligining pasayishiga olib keladi va samarasiz yo‘talning samarali yo‘talga o‘tishiga yordam beradi.

Fenilefrin - simpatomimetik, kuchli alfa-adrenergik faollikka ega, burun bo‘shlig‘i shilliq qavati tomirlarini toraytiradi, burun bo‘shlig‘i shilliq qavatining shishishi va giperemiyasini bartaraf etadi.

Farmakokinetika

Paratsetamol oshqozon-ichak traktidan tez va deyarli to‘liq so‘riladi. Qon plazmasidagi maksimal konsentratsiyaga ichga qabul qilingandan 10‒60 daqiqa o‘tgach erishiladi. Yarim chiqarilish davri 1-3 soat. Paratsetamol asosan jigarda metabolizmga uchraydi, siydik bilan glyukuronidlar va sulfat kon’yugatlari ko‘rinishida chiqariladi.

Gvayfenezin oshqozon-ichak yo‘llaridan tez so‘riladi. Qon plazmasidagi maksimal konsentratsiyasi qabul qilingandan keyin 15 daqiqa ichida erishiladi, yarim chiqarilish davri 1 soatni tashkil etadi. Jigarda β- (2 metoksifenoksi) sut kislotasigacha oksidlanish yo‘li bilan metabolizmga uchraydi, u nofaol metabolitlar ko‘rinishida o‘pka (balg‘am bilan) va buyraklar orqali chiqariladi.

Fenilefrin oshqozon-ichak traktidan notekis so‘rilib, jigarda monoaminoksidaza ishtirokida metabolizmga uchraganligi sababli past biosinguvchanlikka ega. Qon plazmasidagi maksimal konsentratsiyasi 1‒2 soatdan keyin kuzatiladi, yarim chiqarilish davri taxminan 2‒3 soatni tashkil etadi, siydik bilan sulfat kon’yugatlari ko‘rinishida chiqariladi.

Ko‘rsatmalar

Qaltirash, yuqori harorat, bosh va mushak og‘rig‘i, burun bitishi va yopishqoq balg‘am ajralishi qiyinlashgan yo‘tal bilan kechadigan o‘tkir respirator kasalliklar belgilarini qisqa muddatli yengillashtirish.

Qo‘llash usuli va dozalari

1 yoki 2 ta paket ichidagilar bir stakan issiq, lekin qaynamaydigan suvda (250 ml) eritiladi. Ma’qul haroratgacha sovutiladi va ichiladi.

Kattalar va 12 yoshdan oshgan bolalar har 8-12 soatda 1-2 paketdan qabul qilishlari kerak. Kuniga 4 paketchadan ortiq qabul qilinmasin. Shifokor maslahatisiz davolanishning maksimal davomiyligi - 3 kun (isitmani tushiruvchi vosita sifatida qabul qilinganda) va 5 kundan oshmasligi kerak (og‘riq qoldiruvchi vosita sifatida).

Nojo‘ya ta’sirlari

Nojo‘ya reaksiyalarning rivojlanish chastotasi quyidagi gradatsiyada keltirilgan: juda tez-tez (≥1/10); tez-tez (≥1/100, <1/10); tez-tez emas (≥1/1000, <1/100); kamdan-kam (≥1/10000, <1/1000); juda kamdan-kam (<1/10000); chastotasi noma’lum (mavjud ma’lumotlar asosida baholash imkonsiz).

Paratsetamol

Bu reaksiyalarning chastotasi aniqlanmagan, lekin odatda ular kamdan kam uchraydi.

Qon va limfa tizimi tomonidan buzilishlar: trombotsitopeniya, agranulotsitoz.

Immun tizimi tomonidan buzilishlar: anafilaktik reaksiyalar, yuqori sezuvchanlik teri reaksiyalari, shu jumladan teri toshmasi, Kvinke shishi va Stivens-Jonson sindromi.

Nafas olish a’zolari, ko‘krak qafasi va ko‘ks oralig‘idagi buzilishlar: aspirin va boshqa nosteroid yallig‘lanishga qarshi dorilarga sezgir bemorlarda bronxospazm.

Oshqozon-ichak buzilishlari: o‘tkir pankreatit.

Jigar va o‘t yo‘llari tomonidan buzilishlar: jigar disfunksiyalari.

Gvayfenezin

Bu reaksiyalarning chastotasi aniqlanmagan, lekin odatda ular kamdan kam uchraydi.

Immun tizimi tomonidan buzilishlar: allergik reaksiyalar, angionevrotik shish, anafilaktik reaksiyalar.

Nafas olish a’zolari, ko‘krak qafasi va ko‘ks oralig‘idagi buzilishlar: hansirash (hansirashning boshqa yuqori sezuvchanlik belgilari bilan birga kelishi haqida xabar berilgan).

Oshqozon-ichak buzilishlari: ko‘ngil aynishi, qusish, oshqozon-ichak traktidagi noqulaylik.

Teri va teri osti kletchatkasi tomonidan buzilishlar: toshma, eshakemi.

Fenilefrin

Quyidagi nojo‘ya ta’sirlar fenilefrin bilan o‘tkazilgan klinik sinovlarda kuzatilgan va shuning uchun eng ko‘p uchraydi.

Ruhiyat tomonidan buzilishlar: asabiylik, jizzakilik, bezovtalik va qo‘zg‘aluvchanlik.

Asab tizimidagi buzilishlar: bosh og‘rig‘i, bosh aylanishi, uyqusizlik.

Tomirlar tomonidan buzilishlar: qon bosimining ko‘tarilishi.

Oshqozon-ichak buzilishlari: ko‘ngil aynishi, qusish, ich ketishi.

Marketingdan keyingi foydalanish davomida aniqlangan nomaqbul hodisalar quyida keltirilgan. Bu hodisalarning chastotasi noma’lum, lekin ehtimol, ular juda kam uchraydi.

Ko‘ruv a’zosi tomonidan buzilishlar: midriaz, o‘tkir yopiq burchakli glaukoma (yopiq burchakli glaukomasi bo‘lgan shaxslarda ko‘proq uchraydi).

Yurak tomonidan buzilishlar: taxikardiya, yurak urishi.

Teri va teri osti kletchatkasi tomonidan buzilishlar: allergik reaksiyalar (masalan, toshma, eshakemi, allergik dermatit, shu jumladan boshqa simpatomimetiklar bilan kesishgan sezuvchanlik).

Buyrak va siydik ajratish tizimi tomonidan buzilishlar: dizuriya, siydik tutilishi. Bu holat prostata bezining gipertrofiyasi kabi infravezikal obstruksiyasi bo‘lgan shaxslarda ko‘proq kuzatiladi.

Qarshi ko‘rsatmalar

dori vositasining ayrim tarkibiy qismlariga yuqori sezuvchanlik;

jigar faoliyatining buzilishi va og‘ir surunkali buyrak yetishmovchiligi;

arterial gipertenziya;

yurak ishemik kasalligi (o‘tkir miokard infarkti, koronar arteriyalar aterosklerozi);

aorta stenozi;

taxikardiya;

gipertireoz;

alkogolizm;

qandli diabet;

bir vaqtning o‘zida beta-adrenoblokatorlar, tritsiklik antidepressantlar, monoaminoksidaza ingibitorlari (shu jumladan ular bekor qilinganidan keyin 14 kun davomida), paratsetamol saqlovchi vositalar va simpatomimetik qon dimlanishiga qarshi vositalarni qabul qilish;

me’da va o‘n ikki barmoqli ichak yara kasalligi qo‘zish bosqichida;

prostata bezining giperplaziyasi;

yopiq burchakli glaukoma; feoxromotsitoma;

12 yoshgacha bo‘lgan bolalar;

65 yoshdan oshgan;

homiladorlik va laktatsiya davri.

Ehtiyotkorlik bilan: glyukoza-6-fosfatdegidrogenaza yetishmovchiligi, qon kasalliklari, tug‘ma giperbilirubinemiyalar (Jilber, Dubin-Jonson, Rotor sindromlari), vazospastik kasalliklar (Reyno sindromi), giperoksaluriya, bronxial astma, O‘SOK (o‘pkaning surunkali obstruktiv kasalligi).

Dozani oshirib yuborish

Paratsetamol

10 g va undan ortiq paratsetamol qabul qilgan kattalarda jigar shikastlanishi mumkin. Agar quyidagi xavf omillari mavjud bo‘lsa, 5 g yoki undan ortiq paratsetamol qabul qilish jigar shikastlanishiga olib kelishi mumkin: karbamazepin, fenobarbital, fenitoin, primidon, rifampitsin yoki jigar fermentlarini faollashtiruvchi boshqa dorilar bilan uzoq vaqt davolanish; spirtli ichimliklarni suiiste’mol qilish; glutation yetishmasligi (masalan, noto‘g‘ri ovqatlanish, mukovissidoz, OIV infeksiyasi, ochlik, kaxeksiya).

Paratsetamol dozasini oshirib yuborishning dastlabki 24 soatdagi belgilari: teri rangining oqarishi, ko‘ngil aynishi, qusish, anoreksiya va qorin sohasidagi og‘riq. Jigar shikastlanishi paratsetamol qabul qilingandan keyin 12-48 soat ichida namoyon bo‘lishi mumkin. Glyukoza metabolizmining buzilishi va metabolik atsidoz yuzaga kelishi mumkin. Og‘ir zaharlanishlarda jigar yetishmovchiligi ensefalopatiya, qon ketishi, gipoglikemiya, miya shishi va o‘limgacha rivojlanishi mumkin. O‘tkir nekroz bilan kechuvchi o‘tkir buyrak yetishmovchiligi, bel og‘rig‘i, gematuriya va proteinuriya jigarning jiddiy shikastlanishi bo‘lmasa ham rivojlanishi mumkin. Yurak aritmiyalari va pankreatitlar haqida xabarlar kelib tushdi.

Davolash

Paratsetamol dozasini oshirib yuborishni davolashda shoshilinch chora-tadbirlar katta ahamiyatga ega. Dozani oshirib yuborishning sezilarli erta belgilari bo‘lmasa-da, bemor zudlik bilan statsionarga yetkazilishi kerak. Simptomlar qusish bilan cheklanishi mumkin va dozani oshirib yuborishning og‘irligi yoki a’zolarga zarar yetkazish xavfiga mos kelmasligi mumkin. Yordam ko‘rsatish belgilangan davolash standartlariga muvofiq amalga oshirilishi kerak. Agar paratsetamol qabul qilingandan keyin 1 soat ichida dozaning oshirib yuborilishi aniqlansa, faollashtirilgan ko‘mir bilan davolashni ko‘rib chiqish lozim. Paratsetamolning plazma konsentratsiyasini dori vositasini qabul qilgandan keyin har 4 soatda o‘lchash kerak. N-atsetiltsistein bilan davolash paratsetamol qabul qilingandan keyin 24 soat davomida qo‘llanilishi mumkin, ammo maksimal himoya ta’siri dori vositasi qabul qilingandan keyin 8 soat ichida erishiladi. Bu vaqtdan keyin antidotning samaradorligi keskin pasayadi. Zarurat tug‘ilganda N-atsetiltsistein vena ichiga yuborilishi mumkin. Agar bemorda metionga nisbatan yuqori sezuvchanlik kuzatilmasa, metionin shoshilinch tibbiy yordam ko‘rsatish uchun maqbul muqobil bo‘lishi mumkin.

Gvayfenezin

Gvayfenezinning juda katta dozalari oshqozon-ichak tizimining buzilishiga (ko‘ngil aynishi va qusish) olib kelishi mumkin.

Davolash

Qusish vaqtida organizmdagi suyuqlikni to‘ldirish tadbirlarini o‘tkazish va elektrolitlar miqdorini kuzatib borish lozim.

Fenilefrin

Fenilefrinning dozasini oshirib yuborish "Nojo‘ya ta’sirlar" bo‘limida sanab o‘tilgan ta’sirlarga o‘xshash ta’sirlarga olib kelishi mumkin. Qo‘shimcha alomatlar qo‘zg‘aluvchanlik, bezovtalik, gipertoniya va ehtimol reflektor bradikardiyani o‘z ichiga olishi mumkin. Og‘ir hollarda es-hushning buzilishi, gallyutsinatsiyalar, talvasalar va aritmiyalar yuzaga kelishi mumkin.

Davolash

Yuqori qon bosimini alfa-retseptorlar antagonisti bilan, masalan, vena ichiga fentolamin yuborish bilan to‘xtatish kerak.

Ehtiyot choralari va qo‘llash xususiyatlari

Quyidagi alomatlarga e’tibor qaratish lozim:

5 kun davomida yaxshilanmasa;

3 kundan ortiq davom etadigan isitma bilan kechsa;

3 kundan ortiq davom etadigan, isitma, bosh og‘rig‘i, toshmalar, ko‘ngil aynishi yoki qusish bilan kechadigan tomoq og‘rig‘ini o‘z ichiga oladi;

Surunkali yo‘tal yoki astma bilan og‘rigan bemorlar preparatni qabul qilishdan oldin shifokor bilan maslahatlashishlari lozim.

Yo‘tal 5 kundan ortiq davom etsa yoki qaytsa, isitma, toshma yoki doimiy bosh og‘rig‘i bilan kechsa, bemorlar preparatni qo‘llashni to‘xtatishlari va shifokor bilan maslahatlashishlari kerak.

Yo‘tal refleksini susaytiruvchi vositalar bilan bir vaqtda qabul qilish mumkin emas.

Stenokardiya bilan og‘rigan bemorlarda juda ehtiyot bo‘lish kerak.

Simpatomimetik preparatlar miya stimulyatorlari sifatida ta’sir ko‘rsatib, uyqusizlik, asabiylik, giperpireksiya, tremor va epileptiform talvasalarni keltirib chiqarishi mumkin.

Boshqa simpatomimetik preparatlar (dekongestantlar, ishtaha so‘ndiruvchilar, amfetamin qatoridagi psixostimulyatorlar) bilan bir vaqtda buyurishdan saqlanish kerak.

Tarkibida paratsetamol bo‘lgan boshqa dori vositalarini bir vaqtda buyurishdan saqlanish kerak.

Lariviks qon plazmasidagi glyukoza va siydik kislotasi miqdorini laborator tekshirish natijalarini buzib ko‘rsatadi.

Bitta paketda 117,3 mg natriy mavjud bo‘lib, buni natriy miqdori past bo‘lgan parhezdagi bemorlarda hisobga olish lozim.

Larivix tarkibida fenilalanin manbai bo‘lgan aspartam mavjud bo‘lib, u fenilketonuriya bilan og‘rigan bemorlar uchun zaharli hisoblanadi.

Tarkibida shakar mavjudligi sababli, kam uchraydigan tug‘ma fruktozani ko‘tara olmaslik, glyukoza-galaktoza malabsorbsiyasi va saxaraza/izomaltaza yetishmovchiligi bo‘lgan bemorlarga tavsiya etilmaydi.

Bolalar

12 yoshgacha bo‘lgan bolalarga ushbu dori vositasini qo‘llash mumkin emas.

Homiladorlik va laktatsiya davri

Dori vositasi homiladorlik va emizish davrida qo‘llanilishi mumkin emas.

Avtotransport va boshqa potensial xavfli mexanizmlarni boshqarish qobiliyatiga ta’siri

Lariviks bosh aylanishi, ongning chalkashishiga olib kelishi mumkin, shuning uchun davolanish paytida avtomobil haydash va boshqa potentsial xavfli faoliyat turlari bilan shug‘ullanish tavsiya etilmaydi.

Boshqa dori vositalari bilan o‘zaro ta’siri

Paratsetamol

Paratsetamolning so‘rilish tezligi oshqozon bo‘shashini ko‘paytiradigan preparatlar (masalan, metoklopramid yoki domperidon) bilan bir vaqtda qabul qilinganda ortadi.

Kolestiramin paratsetamolni qabul qilishdan 1 soat oldin yoki keyin buyurilsa, paratsetamolning so‘rilishini pasaytiradi.

Kumarinlarning (shu jumladan varfarinning) antikoagulyant ta’siri paratsetamolni o‘z ichiga olgan preparatlarni har kuni uzoq vaqt qo‘llash natijasida kuchayishi mumkin, bu esa qon ketish xavfini oshirishi mumkin. Tarkibida paratsetamol bo‘lgan preparatlar bilan davolash zarur bo‘lsa, antikoagulyantlar dozasini kamaytirish talab etilishi mumkin. Potensial gepatotoksik dorilar yoki jigar mikrosomal fermentlarining induksiyasini keltirib chiqaradigan vositalar (masalan, alkogol, barbituratlar, monoaminoksidaza ingibitorlari va uch halqali antidepressantlar) paratsetamolning gepatotoksikligini kuchaytirishi mumkin, ayniqsa uning dozasi oshirib yuborilganda.

Zidovudin va paratsetamolni bir vaqtda qo‘llash neytropeniya xavfini oshiradi.

Atsetilsalitsil kislotasi paratsetamolning yarim chiqarilish davrini oshiradi. Paratsetamolni YAQNDV bilan bir vaqtda qo‘llash ularning nefrotoksikligini oshirishi mumkin.

Gvayfenezin

Dori vositasini qabul qilgandan keyingi birinchi sutka davomida siydikda 5-gidroksiindoluksuksus kislotasi va vanil-bodom kislotasini kolorimetrik usulda aniqlash natijalari buzilishi mumkin.

Gvayfenezin sedativ vositalar va miorelaksantlarning ta’sirini kuchaytiradi.

Fenilefrin

Fenilefrinni monoaminoksidaza ingibitorlari bilan bir vaqtda qabul qilish gipertoniya krizi rivojlanishiga olib kelishi mumkin.

Fenilefrinni boshqa simpatomimetik aminlar bilan bir vaqtda qo‘llash yurak-qon tomir tizimi tomonidan nojo‘ya ta’sirlar xavfini oshirishi mumkin.

Fenilefrin beta-blokatorlar va boshqa antigipertenziv dorilarning (masalan, debrizoxin, guanetidin, rezerpin, metildopa) samaradorligini pasaytirishi mumkin, bu esa gipertoniya va yurak-qon tomir tizimidagi boshqa noxush hodisalarning rivojlanish xavfini oshiradi.

Tritsiklik antidepressantlar (masalan, amitriptilin) fenilefrinning yurak-qon tomir tizimi tomonidan nojo‘ya ta’sirlari xavfini oshiradi.

Sedativ vosita sifatida ishlatiladigan fenotiazinlar markaziy asab tizimidagi noxush hodisalarni kuchaytiradi.

Qashqarbeda alkaloidlari (ergotamin va metilserid) ergotizm xavfini oshiradi.

Digoksin va yurak glikozidlari yurakning notekis urishi va yurak xuruji xavfini oshiradi.

Ingalyatsion anestetiklar (shu jumladan, xloroform, enfluran, galotan, izofluran) og‘ir bo‘lmacha va qorincha aritmiyasi xavfini oshiradi.

Chiqarish shakli

4,36 g kukun ko‘p qatlamli qadoqlash materialidan tayyorlangan paketlarga joylanadi (polietilentereftalat plyonka/polipropilen plyonka/alyuminiy folga/polietilen plyonka). Tibbiy qo‘llash bo‘yicha yo‘riqnoma bilan birga karton qutida 10 tadan paket.

Saqlash shartlari

Namlik va yorug‘likdan himoyalangan joyda, 25 oC dan yuqori bo‘lmagan haroratda.

Bolalar qo‘li yetmaydigan joyda saqlang.

Yaroqlilik muddati

2 yil.

Qadoqda ko‘rsatilgan yaroqlilik muddati tugagandan keyin ishlatilmasin.

Ta’til shartlari

Retseptsiz.

Ishlab chiqaruvchi

"AmantisMed" MCHJ

Belarus Respublikasi, 223141, Logoysk shahri, Minskaya ko‘chasi, 2i.

Tel./faks: (+375 1774) 25 286.