Latren infuzion eritmasi 0,5 mg/ml, 200 ml (shisha)

Tarkib

1 ml eritma tarkibiga quyidagilar kiradi:

Faol moddasi: 0,5 mg pentoksifillin.

Yordamchi moddalar: natriy xlorid, kaliy xlorid, kalsiy xlorid, natriy laktat eritmasi, inyeksiya uchun suv.

Tavsif

Rangsiz yoki kuchsiz sarg‘ish tusli tiniq suyuqlik.

Dori shakli

Infuziya uchun eritma.

Farmakoterapevtik guruh

Periferik vazodilatatorlar. Purin hosilalari. ATX kodi: C04AD03.

Farmakologik xususiyatlari

Pentoksifillin metilksantinning hosilasidir. Pentoksifillinning ta’sir mexanizmi fosfodiesterazaning susayishi va tomirlarning silliq mushak hujayralarida, qon hujayralarida, shuningdek, boshqa to‘qima va organlarda 3,5-AMF to‘planishi bilan bog‘liq. Pentoksifillin trombotsitlar va eritrotsitlar agregatsiyasini tormozlaydi, ularning egiluvchanligini oshiradi, qon plazmasida fibrinogenning yuqori konsentratsiyasini kamaytiradi va fibrinolizni kuchaytiradi, bu esa qonning yopishqoqligini kamaytiradi va uning reologik xususiyatlarini yaxshilaydi. Bundan tashqari, pentoksifillin kuchsiz miotrop tomir kengaytiruvchi ta’sir ko‘rsatadi, umumiy periferik tomir qarshiligini biroz kamaytiradi va ijobiy inotrop ta’sirga ega. Pentoksifillinni qo‘llash natijasida mikrotsirkulyatsiya va to‘qimalarning kislorod bilan ta’minlanishi yaxshilanadi, ayniqsa qo‘l-oyoqlarda, markaziy asab tizimida, buyraklarda o‘rtacha darajada. Preparat koronar tomirlarni biroz kengaytiradi.

Farmakokinetika

Asosiy farmakologik faol metabolit 1- (5-gidroksigeksil) - 3,7-dimetilksantin (metabolit I) qon plazmasida o‘zgarmagan modda konsentratsiyasidan 2 baravar yuqori konsentratsiyada aniqlanadi va u bilan teskari biokimyoviy muvozanat holatida bo‘ladi. Shu munosabat bilan pentoksifillin va uning metabolitini faol butunlik sifatida ko‘rib chiqish kerak. Pentoksifillinning yarim chiqarilish davri 1,6 soatni tashkil etadi.

Pentoksifillin to‘liq metabolizmga uchraydi, 90% dan ortig‘i konyugatsiyalanmagan suvda eriydigan qutbli metabolitlar ko‘rinishida buyraklar orqali chiqariladi. Yuborilgan dozaning 4% dan kamrog‘i najas bilan chiqariladi. Buyrak funksiyasining og‘ir buzilishlari bo‘lgan bemorlarda metabolitlar ekskretsiyasi sekinlashadi. Jigar faoliyati buzilgan bemorlarda pentoksifillinning yarim chiqarilish davri uzayishi qayd etilgan.

Qo‘llanilishi

Aterosklerotik ensefalopatiya; ishemik serebral insult; dissirkulyator ensefalopatiya; ateroskleroz, qandli diabet (shu jumladan, diabetik angiopatiya), yallig‘lanish tufayli kelib chiqadigan periferik qon aylanishining buzilishi; venalarning shikastlanishi yoki mikrotsirkulyatsiyaning buzilishi bilan bog‘liq bo‘lgan to‘qimalardagi trofik buzilishlar (posttromboflebitik sindrom, trofik yaralar, gangrena, sovuq urishi); obliteratsiyalovchi endarteriit; angioneyropatiyalar (Reyno kasalligi), ko‘z qon aylanishining buzilishi (ko‘zning to‘r pardasi va qon tomir pardasida o‘tkir, o‘tkir osti, surunkali qon aylanish yetishmovchiligi), eshitish qobiliyatining pasayishi bilan kechadigan tomir genezli ichki quloq funksiyasining buzilishi.

Qo‘llash usuli va dozalari

Vena ichiga infuziyalar preparatni parenteral yuborishning eng samarali shakllari bo‘lib, ular yaxshi o‘zlashtiriladi. Dozalash tartibi shifokor tomonidan belgilanadi va qon aylanishi buzilishlarining og‘irlik darajasiga, tana vazniga hamda davolashni ko‘tara olish darajasiga bog‘liq bo‘ladi. Eritma tiniq bo‘lgandagina infuziya qilish mumkin.

Kattalarga quyidagi davolash usullari tavsiya etiladi:

Vena ichiga 100-600 mg pentoksifillin sutkada 1-2 marta yuboriladi. Tomir ichiga tomchilab yuborish davomiyligi 60-360 daqiqani tashkil etadi, ya’ni 100 mg pentoksifillinni yuborish kamida 60 daqiqa davom etishi kerak.

Bemorning ahvoli og‘ir bo‘lganda (ayniqsa, doimiy og‘riq, gangrena yoki trofik yaralarda) 24 soat davomida pentoksifillin infuziyasini o‘tkazish mumkin. Bunday yuborish sxemasida doza 0,6 mg/kg/soat hisobidan aniqlanadi. Shu tarzda hisoblangan sutkalik doza tana vazni 70 kg bo‘lgan bemor uchun 1000 mg, tana vazni 80 kg bo‘lgan bemor uchun 1150 mg ni tashkil etadi. Bemorning tana vaznidan qat’i nazar, maksimal sutkalik doza 1200 mg ni tashkil etadi. Infuzion eritma hajmi hamroh kasalliklar, bemorning holatini hisobga olgan holda individual hisoblanadi va kuniga o‘rtacha 1-1,5 l ni tashkil etadi. Parenteral davolash kursining davomiyligi davolovchi shifokor tomonidan belgilanadi.

Nojo‘ya ta’sirlari

Laboratoriya ko‘rsatkichlari: transaminazalar miqdorining oshishi, ishqoriy fosfataza miqdorining oshishi.

Yurak faoliyatining buzilishi: aritmiya, taxikardiya, stenokardiya, kardialgiya, arterial bosimning tebranishi, to‘sh orqasida siqilish hissi.

Qon yaratish va limfa tizimi faoliyatining buzilishi: trombotsitopenik purpurali trombotsitopeniya va aplastik anemiya (barcha qon hujayralari hosil bo‘lishining qisman yoki to‘liq to‘xtashi, pansitopeniya), bu o‘limga olib kelishi mumkin, gipofibrinogenemiya.

Asab tizimi tomonidan: bosh aylanishi, bosh og‘rig‘i, aseptik meningit, tremor, paresteziyalar, talvasalar.

Teri va teri osti to‘qimalari tomonidan: qichishish, terining qizarishi va eshakemi, toksik epidermal nekroliz va Stivens-Jonson sindromi, tirnoqlarning yuqori darajada mo‘rtligi. Qon tomir tizimi funksiyasining buzilishi: issiqlik hissi, qon ketishi, periferik shish.

Immun tizimi tomonidan: anafilaktik reaksiyalar, anafilaktoid reaksiyalar, angionevrotik shish, bronxospazm va anafilaktik shok.

Ovqat hazm qilish tizimi tomonidan: ko‘ngil aynishi, qusish, anoreksiya, ichak atoniyasi, xoletsistitning kuchayishi, xolestatik gepatit.

Jigar va o‘t yo‘llari tomonidan: jigar ichi xolestaz.

Ruhiy buzilishlar: uyquning qo‘zg‘alishi va buzilishi, gallyutsinatsiyalar, xavotirlanish, uyqu buzilishi.

Ko‘ruv a’zolari tomonidan: ko‘rishning buzilishi, konyunktivit, to‘r pardaga qon quyilishi, to‘r pardaning ko‘chishi, skotoma.

Boshqalar: gipoglikemiya, ko‘p terlash, tana haroratining ko‘tarilishi, qaltirash holatlari qayd etilgan.

Qarshi ko‘rsatmalar

Preparat komponentlariga va ksantin hosilalariga yuqori sezuvchanlik. O‘tkir miokard infarkti. Porfiriya, preparatni buyurish paytida yoki uni buyurish arafasida yuz bergan massiv qon ketishlar, gemorragik diatez, ko‘z to‘r pardasiga keng ko‘lamli qon quyilishlar (preparatni qo‘llashni darhol to‘xtatish kerak). Aritmiyalar, koronar yoki miya arteriyalarining og‘ir aterosklerozi, nazorat qilib bo‘lmaydigan arterial gipotenziya. Jigar va/yoki buyrak yetishmovchiligi. Oshqozon va/yoki ichak yaralari. Miyaga qon quyilishi (qon ketishining kuchayishi xavfi). Homiladorlik va laktatsiya davri. 14 yoshgacha bo‘lgan bolalar yoshi.

Dorilarning o‘zaro ta’siri

Insulinga yoki peroral diabetga qarshi vositalarga xos bo‘lgan qondagi qand miqdorini pasaytirish samarasi kuchayishi mumkin. Shuning uchun qandli diabetda dori-darmonlar bilan davolanayotgan bemorlar sinchkovlik bilan nazorat qilinishi kerak.

Marketingdan keyingi davrda pentoksifillin va K vitaminlari bilan bir vaqtda davolangan bemorlarda antikoagulyant faollikning oshishi holatlari qayd etilgan. Pentoksifillin dozasi tayinlanganda yoki o‘zgartirilganda, ushbu guruh bemorlarida antikoagulyant faollikni nazorat qilish tavsiya etiladi. Pentoksifillin antigipertenziv vositalar va qon bosimining pasayishiga olib kelishi mumkin bo‘lgan boshqa preparatlarning gipotenziv ta’sirini kuchaytirishi mumkin. Pentoksifillin va teofillinni bir vaqtda qo‘llash ba’zi bemorlarda qonda teofillin miqdorining oshishiga olib kelishi mumkin. Shuning uchun teofillinning nojo‘ya ta’sirlari chastotasining oshishi va namoyon bo‘lishining kuchayishi mumkin.

Nomuvofiqlik. Preparatni bir idishda boshqa dori vositalari bilan aralashtirmaslik kerak.

Maxsus ko‘rsatmalar

Anafilaktik/anafilaktoid reaksiya rivojlanishining birinchi belgilarida preparat bilan davolashni darhol to‘xtatish va shifokor yordamiga murojaat qilish lozim. Preparat surunkali yurak yetishmovchiligi bo‘lgan bemorlarga qo‘llanilganda, avval qon aylanishining kompensatsiya bosqichiga erishish lozim.

Qandli diabet bilan og‘rigan va insulin yoki peroral antidiabetik vositalar bilan davolanayotgan bemorlarda preparatning yuqori dozalari qo‘llanilganda, ushbu preparatlarning qondagi qand miqdoriga ta’siri kuchayishi mumkin ("Dorilarning o‘zaro ta’siri" bo‘limiga qarang). Bunday hollarda insulin yoki peroral diabetga qarshi dorilar dozasini kamaytirish va bemorni ayniqsa sinchkovlik bilan parvarish qilish lozim. Tizimli qizil bo‘richa (TQB) yoki biriktiruvchi to‘qimaning boshqa kasalliklari bilan og‘rigan bemorlarga pentoksifillin faqat ehtimoliy xavf va foydalarni sinchiklab tahlil qilgandan so‘ng tayinlanishi mumkin. Pentoksifillin bilan davolash vaqtida aplastik kamqonlik rivojlanish xavfi borligi sababli, umumiy qon tahlilini muntazam nazorat qilib borish zarur.

Buyrak yetishmovchiligi (kreatinin klirensi 30 ml/daqiqadan kam) yoki og‘ir jigar disfunksiyasi bo‘lgan bemorlarda pentoksifillinning chiqarilishi sekinlashishi mumkin. Tegishli monitoring zarur.

Ayniqsa, quyidagilar uchun diqqat bilan kuzatish zarur:

og‘ir yurak aritmiyalari bilan og‘rigan bemorlar;

miokard infarkti bilan og‘rigan bemorlar;

arterial gipotenziyasi bo‘lgan bemorlar;

miya va koronar tomirlarning yaqqol aterosklerozi bilan og‘rigan bemorlarda, ayniqsa arterial gipertenziya va yurak ritmi buzilishlari hamroh bo‘lganda. Ushbu bemorlarda preparatni qabul qilishda stenokardiya, aritmiya va arterial gipertenziya xurujlari kuzatilishi mumkin;

buyrak yetishmovchiligi bo‘lgan bemorlar (kreatinin klirensi 30 ml/daqiqadan past);

og‘ir jigar yetishmovchiligi bo‘lgan bemorlar;

masalan, antikoagulyantlar bilan davolash yoki qon ivishining buzilishi tufayli qon ketishiga moyilligi yuqori bo‘lgan bemorlar. Qon ketishi haqida "Qarshi ko‘rsatmalar" bo‘limiga qarang;

qon bosimining pasayishi yuqori xavf tug‘diradigan bemorlar (masalan, og‘ir yurak ishemik kasalligi yoki miyaga qon yetkazib beradigan tomirlar stenozi bilan og‘rigan bemorlar);

bir vaqtning o‘zida pentoksifillin va K antivitaminlari bilan davolanayotgan bemorlar ("Dorilarning o‘zaro ta’siri" bo‘limiga qarang);

pentoksifillin va diabetga qarshi vositalar bilan bir vaqtning o‘zida davolanayotgan bemorlar ("Dorilarning o‘zaro ta’siri" bo‘limiga qarang).

Homiladorlik va laktatsiya davrida qo‘llash

Homiladorlik va emizish davrida preparatni qo‘llash mumkin emas.

Bolalar

Preparatni bolalarda qo‘llash tajribasi yo‘q.

Avtomobil va murakkab mexanizmlarni boshqarish qobiliyatiga ta’siri

Preparat statsionar sharoitda qo‘llanilganligi sababli, bunday ta’sirlar haqida ma’lumotlar yo‘q.

Preparat yaroqlilik muddati tugaganidan keyin qo‘llanilmasligi va bolalar qo‘li yetmaydigan joyda saqlanishi lozim.

Dozani oshirib yuborish

Belgilari: holsizlik, bosh aylanishi, qon bosimining pasayishi, hushdan ketish, taxikardiya, uyquchanlik yoki qo‘zg‘alish, hushdan ketish, gipertermiya, arefleksiya, talvasalar, oshqozon-ichakdan qon ketishi, ko‘ngil aynishi, toshmalar.

Davolash: simptomatik. Qon ketishining oldini olish uchun maxsus shoshilinch choralar ko‘rish talab etilishi mumkin.

Chiqarish shakli

Shisha butilkalarda 100 ml yoki 200 ml yoki 400 ml eritma.

Saqlash shartlari

25 °C dan yuqori bo‘lmagan haroratda saqlansin. Muzlatilmasin.

Yaroqlilik muddati

2 yil.

Dorixonalardan berish shartlari

Retsept bo‘yicha.

Ishlab chiqaruvchi

"Yuriya-Farm" MCHJ.

Ukraina, 18030, Cherkassi shahri, Verbovetskiy ko‘chasi, 108.

Tel./faks: (0472) 43-63-16, 43-23-75.