Pentalgin (Pentalginum) №24 plyonka bilan qoplangan planshetlar (2 blister х 12 tabletka)

Tarkib

Faol moddalar: paratsetamol - 325 mg, naproksen - 100 mg, suvsiz kofein - 50 mg, drotaverin gidroxlorid - 40 mg, feniramin maleat - 10 mg.

Yordamchi moddalar:

Mag‘iz: mikrokristallik sellyuloza, kartoshka kraxmali, natriy krosskarmelloza, giprolaza (gidroksipropilsellyuloza (klyutsel EF)), limon kislotasi monogidrati, butilgidroksitoluol (E 321), magniy stearati, talk, xinolin sariq bo‘yog‘i (E 104), indigokarmin (E 132).

Qobiq: gipromelloza (gidroksipropilmetilsellyuloza), povidon (polivinilpirro-lidon o‘rta molekulyar tibbiy), polisorbat-80 (tvin-80), titan dioksidi, talk, xinolin sariq bo‘yog‘i, indigokarmin (E 132).

Tavsif

Och yashildan yashil ranggacha bo‘lgan plyonkali qobiq bilan qoplangan, ikki tomoni qabariq, chetlari qiyshiq kapsula shaklida, bir tomonida chiziqcha va ikkinchi tomonida PENTALGIN tasviri tushirilgan tabletkalar. Kesmada tabletka och yashil rangda bo‘lib, unda oq dog‘lar bor.

Dori shakli

Plyonkali qobiq bilan qoplangan tabletkalar.

Farmakoterapevtik guruh

Og‘riq qoldiruvchi vosita (og‘riq qoldiruvchi narkotik bo‘lmagan vosita + nosteroid yallig‘lanishga qarshi vosita + psixostimullovchi vosita + spazmolitik vosita + N1-gistamin retseptorlari blokatori). ATX kodi: N02BE71.

Farmakologik xususiyatlari

Kombinatsiyalangan preparat og‘riq qoldiruvchi, yallig‘lanishga qarshi, spazmolitik, isitmani tushiruvchi ta’sir ko‘rsatadi.

Paratsetamol - narkotik bo‘lmagan analgetik bo‘lib, markaziy asab tizimidagi siklooksigenaza blokadasi hamda og‘riq va termoregulyatsiya markazlariga ta’siri tufayli isitma tushiruvchi va og‘riq qoldiruvchi ta’sir ko‘rsatadi.

Naproksen nosteroid yallig‘lanishga qarshi preparat bo‘lib, prostaglandinlar sintezini boshqaruvchi siklooksigenaza faolligini noselektiv bostirish bilan bog‘liq yallig‘lanishga qarshi, og‘riq qoldiruvchi va isitma tushiruvchi ta’sir ko‘rsatadi.

Kofein - skelet mushaklari, yurak, buyrak qon tomirlarining kengayishiga olib keladi; aqliy va jismoniy ish qobiliyatini oshiradi, charchoq va uyquchanlikni bartaraf etishga yordam beradi; gistogematik to‘siqlarning o‘tkazuvchanligini oshiradi va giyohvand bo‘lmagan analgetiklarning biosinguvchanligini oshiradi, shu bilan terapevtik ta’sirni kuchaytirishga yordam beradi. Bosh miya tomirlariga tonusni oshiruvchi ta’sir ko‘rsatadi.

Drotaverin - fosfodiesteraza IV ni ingibirlashi tufayli miotrop spazmolitik ta’sir ko‘rsatadi, oshqozon-ichak trakti, o‘t yo‘llari, siydik-tanosil va qon tomir tizimlarining silliq mushaklariga ta’sir qiladi.

Feniramin - H1-gistamin retseptorlari blokatori. Spazmolitik va yengil sedativ ta’sir ko‘rsatadi, ekssudatsiya hodisalarini kamaytiradi hamda paratsetamol va naproksenning analgetik ta’sirini kuchaytiradi.

Qo‘llanilishi

Turli xil kelib chiqishga ega bo‘lgan og‘riq sindromi, shu jumladan bo‘g‘imlar, mushaklar, radikulit, hayz og‘riqlari, nevralgiyalar, tish va bosh og‘riqlari (shu jumladan miya tomirlarining spazmi bilan bog‘liq bosh og‘rig‘i).

Silliq mushaklar spazmi bilan bog‘liq og‘riq sindromi, shu jumladan surunkali xoletsistit, o‘t-tosh kasalligi, xoletsistektomiyadan keyingi sindrom, buyrak sanchig‘i.

Posttravmatik va operatsiyadan keyingi og‘riq sindromi, shu jumladan yallig‘lanish bilan kechadigan.

Isitma sindromi bilan kechadigan shamollash kasalliklari (simptomatik terapiya sifatida).

Qo‘llash usuli va dozalari

Ichkariga.

Preparat 1 tabletkadan kuniga 1-3 mahal ichiladi. Maksimal sutkalik doza - 4 tabletka.

Davolashning davomiyligi isitma tushiruvchi vosita sifatida 3 kundan va og‘riq qoldiruvchi vosita sifatida 5 kundan oshmasligi kerak. Preparat bilan davolashni faqat shifokor bilan maslahatlashgan holda davom ettirish mumkin.

Ko‘rsatilgan dozadan oshirmang!

Nojo‘ya ta’sirlari

Allergik reaksiyalar: teri toshmasi, qichishish, eshakemi, angionevrotik shish.

Qon yaratish a’zolari tomonidan: trombotsitopeniya, leykopeniya, agranulotsitoz, anemiya, metgemoglobinemiya.

Asab tizimi tomonidan: qo‘zg‘alish, xavotirlanish, reflekslarning kuchayishi, tremor, bosh og‘rig‘i, uyquning buzilishi, bosh aylanishi, diqqatning pasayishi.

Yurak-qon tomir tizimi tomonidan: yurak urishi, aritmiyalar, qon bosimining ko‘tarilishi.

Ovqat hazm qilish tizimi tomonidan: oshqozon-ichak traktining eroziv-yarali shikastlanishi, ko‘ngil aynishi, qusish, epigastral sohada noqulaylik, qorin og‘rig‘i, qabziyat, jigar faoliyatining buzilishi.

Siydik ajratish tizimi tomonidan: buyrak funksiyasining buzilishi.

Sezgi a’zolari tomonidan: yopiq burchakli glaukoma bilan og‘rigan bemorlarda eshitish qobiliyatining pasayishi, quloqlarda shovqin, ko‘z ichki bosimining oshishi.

Boshqalar: dermatit, taxipnoe (nafas tezlashishi).

Agar yo‘riqnomada ko‘rsatilgan nojo‘ya ta’sirlarning birortasi kuchaysa yoki yo‘riqnomada ko‘rsatilmagan boshqa nojo‘ya ta’sirlarni sezsangiz, bu haqda shifokorga xabar bering.

Qarshi ko‘rsatmalar

Preparat komponentlariga yuqori sezuvchanlik, oshqozon-ichak traktining eroziv-yarali shikastlanishlari (zo‘rayish fazasida), oshqozon-ichakdan qon ketishi, bronxial astmaning to‘liq yoki to‘liq bo‘lmagan kombinatsiyasi, burun va burun yondosh bo‘shliqlarining qaytalanuvchi polipozi hamda atsetilsalitsil kislotasi yoki boshqa nosteroid yallig‘lanishga qarshi dorilarni ko‘tara olmaslik, shu jumladan anamnezda, og‘ir jigar va/yoki buyrak yetishmovchiligi, suyak-ko‘mik qon yaratilishining susayishi, aorta-koronar shuntlash o‘tkazilganidan keyingi holat; yurak-qon tomir tizimining og‘ir organik kasalliklari (shu jumladan o‘tkir miokard infarkti), paroksizmal taxikardiya, tez-tez qorincha ekstrasistoliyasi, og‘ir arterial gipertenziya, giperkaliyemiya, 18 yoshgacha bo‘lgan bolalar, homiladorlik va laktatsiya davri.

Ehtiyotkorlik bilan - serebrovaskulyar kasalliklar, qandli diabet, periferik arteriyalar kasalliklari, anamnezda oshqozon-ichak traktining yarali shikastlanishlari, yengil yoki o‘rta darajadagi buyrak va jigar yetishmovchiligi, virusli gepatit, jigarning alkogolli shikastlanishi, xavfsiz giperbilirubinemiyalar (Jilber, Dubin-Jonson va Rotor sindromi), epilepsiya va tutqanoq xurujlariga moyillik, glyukoza-6-fosfatdegidrogenaza yetishmovchiligi, keksa yosh.

Agar sizda sanab o‘tilgan kasallik/holatlardan biri bo‘lsa, preparatni qabul qilishdan oldin albatta shifokor bilan maslahatlashing.

Dorilarning o‘zaro ta’siri

Preparatni barbituratlar, tritsiklik antidepressantlar, rifampitsin va alkogolli ichimliklar bilan bir vaqtda qabul qilishdan saqlanish kerak (gepatotoksik ta’sir xavfi ortadi).

Paratsetamol bilvosita ta’sir qiluvchi antikoagulyantlarning ta’sirini kuchaytiradi va urikozurik preparatlarning samaradorligini pasaytiradi.

Barbituratlarni uzoq vaqt qo‘llash paratsetamolning samaradorligini pasaytiradi.

Paratsetamolni etanol bilan bir vaqtda qo‘llash o‘tkir pankreatit xavfini oshiradi.

Mikrosomal oksidlanish ingibitorlari (jumladan, simetidin) paratsetamolning gepatotoksik ta’siri xavfini kamaytiradi.

Diflunisal paratsetamolning plazma konsentratsiyasini 50% ga oshiradi, bu esa gepatotoksiklik rivojlanish xavfini oshiradi.

Naproksen furosemidning diuretik ta’sirini kamaytirishi, bilvosita antikoagulyantlar ta’sirini kuchaytirishi mumkin, sulfanilamidlar va metotreksatning zaharliligini oshiradi, litiyning chiqarilishini kamaytiradi va uning qon plazmasidagi konsentratsiyasini oshiradi.

Kofein va barbituratlar, primidon, tutqanoqqa qarshi vositalar (gidantoin hosilalari, ayniqsa fenitoin) birgalikda qo‘llanganda kofein metabolizmining kuchayishi va klirensining oshishi mumkin; kofein va simetidin, peroral kontratseptiv vositalar, disulfiram, siprofloksatsin, norfloksatsin bir vaqtning o‘zida qabul qilinganda - jigarda kofein metabolizmining pasayishi (uning chiqarilishi sekinlashishi va qondagi konsentratsiyasining oshishi).

Kofeinli ichimliklar va markaziy asab tizimini rag‘batlantiruvchi boshqa vositalarni bir vaqtda iste’mol qilish markaziy asab tizimining haddan tashqari qo‘zg‘alishiga olib kelishi mumkin.

Bir vaqtning o‘zida qo‘llanilganda drotaverin levodopaning parkinsonizmga qarshi ta’sirini susaytirishi mumkin.

Feniramin trankvilizatorlar, uxlatuvchi vositalar, monoaminoksidaza ingibitorlari, alkogol bilan bir vaqtda qo‘llanganda markaziy asab tizimiga susaytiruvchi ta’siri kuchayishi mumkin.

Maxsus ko‘rsatmalar

Preparatni paratsetamol va/yoki boshqa nosteroid yallig‘lanishga qarshi vositalar, shuningdek, "shamollash," gripp va burun bitishi belgilarini yengillashtiruvchi vositalar bilan bir vaqtda qo‘llashdan saqlanish kerak.

Preparat 5-7 kundan ortiq qo‘llanganda periferik qon ko‘rsatkichlari va jigarning funksional holatini nazorat qilish lozim.

Paratsetamol qon plazmasidagi glyukoza va siydik kislotasi miqdorini laborator tekshirish natijalarini buzib ko‘rsatadi.

Agar 17-ketosteroidlarni aniqlash zarur bo‘lsa, preparatni tekshirishdan 48 soat oldin to‘xtatish kerak. Naproksen qon ketish vaqtini uzaytirishini hisobga olish kerak.

Kofeinning markaziy asab tizimiga ta’siri asab tizimining turiga bog‘liq bo‘lib, oliy asab faoliyatining qo‘zg‘alishi va tormozlanishi bilan namoyon bo‘lishi mumkin.

Davolanish davrida spirtli ichimliklarni iste’mol qilmaslik kerak.

Ayrim hollarda diqqat konsentratsiyasi va psixomotor reaksiyalar tezligining pasayishi mumkin, shuning uchun davolanish davrida avtotransportni boshqarishda va diqqatning yuqori konsentratsiyasi hamda psixomotor reaksiyalar tezligini talab qiladigan boshqa potensial xavfli faoliyat turlari bilan shug‘ullanishda ehtiyot bo‘lish kerak.

Preparatni bolalar qo‘li yetmaydigan joyda saqlang va yaroqlilik muddati tugaganidan keyin ishlatmang.

Dozani oshirib yuborish

Belgilari: teri rangining oqarishi, anoreksiya (ishtahaning yo‘qolishi), qorinda og‘riq, ko‘ngil aynishi, qusish, oshqozon-ichakdan qon ketishi, qo‘zg‘alish, harakatning bezovtalanishi, ongning chalkashishi, taxikardiya, aritmiya, gipertermiya (tana haroratining ko‘tarilishi), tez-tez siyish, bosh og‘rig‘i, tremor yoki mushaklarning tortishishi; epileptik tutqanoqlar, "jigar" transaminazalari faolligining oshishi, gepatonekroz, protrombin vaqtining oshishi. Jigar funksiyasining buzilishi belgilari dozani oshirib yuborgandan keyin 12-48 soat o‘tgach paydo bo‘lishi mumkin. Og‘ir dozada oshirib yuborilganda progressiv ensefalopatiya bilan kechuvchi jigar yetishmovchiligi, koma, o‘lim; tubulyar nekroz bilan kechuvchi o‘tkir buyrak yetishmovchiligi; aritmiya, pankreatit rivojlanadi. Dozani oshirib yuborishga shubha tug‘ilganda, darhol shifokor yordamiga murojaat qilish lozim.

Davolash: oshqozonni yuvish va faollashtirilgan ko‘mir qabul qilish. Paratsetamol bilan zaharlanishda o‘ziga xos antidot atsetilsisteindir. Oshqozon-ichakdan qon ketishida antatsid vositalarni yuborish va oshqozonni muzli 0,9% natriy xlorid eritmasi bilan yuvish; o‘pka ventilyatsiyasi va oksigenatsiyasini qo‘llab-quvvatlash; epileptik tutqanoqlarda diazepamni vena ichiga yuborish; suyuqlik va tuzlar muvozanatini saqlash zarur.

Chiqarish shakli

Plyonkali qobiq bilan qoplangan tabletkalar.

Polivinilxlorid plyonkasi va laklangan alyuminiy bosma folgasidan yasalgan konturli katakli o‘ramga 2, 6, 10 yoki 12 tadan tabletka solinadi.

Karton qutiga qo‘llash bo‘yicha yo‘riqnoma bilan birga 1 yoki 2 ta konturli katakli o‘ram.

Saqlash shartlari

25 °C dan yuqori bo‘lmagan haroratda saqlanadi.

Yaroqlilik muddati

2 yil.

Dorixonalardan berish shartlari

Retseptsiz.

Ishlab chiqaruvchi

"Farmstandart-Dori vositalari" OAJ

305022, Rossiya, Kursk shahri, 2-Agregatnaya ko‘chasi, 1a/18-uy

tel/faks: (4712) 34-03-13

"Farmstandart-Tomskximfarm" OAJ

634009, Rossiya, Tomsk shahri, Lenin shoh ko‘chasi, 211

tel/faks: (3822) 40-28-56

www.pharmstd.ru