Rotafer Plus kapsulalari №30 (2 blister х 15 kapsula)

Tarkib

1 kapsulada quyidagilar mavjud:

Faol moddalar: temir (III) gidroksid polimaltoza kompleksi - 50 mg, rux glyukonat - 50 mg, folat kislota - 0,35 mg, vitamin B1 (tiamin gidroxlorid) - 2 mg, vitamin B2 (riboflavin) - 1 mg, vitamin B6 (piridoksin gidroxlorid) - 2 mg.

Yordamchi moddalar: mikrokristall sellyuloza, mannit, suvsiz kolloid kremniy dioksidi, magniy stearati.

Kapsula qobig‘ining tarkibi: titan dioksidi, qizil temir oksidi, jelatin.

Tavsif

O‘lchami ’0’ bo‘lgan qattiq jelatinli kapsulalar, korpusi va qopqog‘i jigarrang-pushti rangda bo‘lib, tarkibida kulrangdan to‘q kulranggacha bo‘lgan oq zarrachali kukun mavjud.

Dori shakli

Kapsulalar.

Farmakoterapevtik guruh

Eritropoezni stimullovchi vosita. ATX kodi: B03AE04.

Farmakologik xususiyatlari

Rotafer Plyus - temir, rux va B guruhi vitaminlarining kombinatsiyalangan preparati.

Preparat tarkibidagi temir Fe3+ gidroksidining polimaltoza kompleksi ko‘rinishida bo‘ladi. Tashqi tomondan Fe3+ gidroksidining ko‘p yadroli markazlari ko‘plab kovalent bog‘lanmagan polimaltoza molekulalari bilan o‘ralgan bo‘lib, umumiy molekulyar og‘irligi 50000 Dalton bo‘lgan kompleksni hosil qiladi, bu shunchalik kattaki, uning ichak shilliq qavati membranalari orqali diffuziyasi Fe2+ geksagidratnikiga qaraganda taxminan 40 baravar kam.

Ushbu makromolekulyar kompleks barqaror, temirni erkin ionlar ko‘rinishida ajratmaydi, tuzilishi bo‘yicha temirning tabiiy birikmasi va ferritinga o‘xshaydi. Bunday o‘xshashlik tufayli Fe3+ ionlari ichakdan qonga faqat faol so‘rilish orqali o‘tadi, bu esa so‘rilishi konsentratsiya gradiyenti bo‘yicha sodir bo‘ladigan oddiy temir tuzlaridan farqli o‘laroq, preparat bilan dozani oshirib yuborish (va zaharlanish) mumkin emasligini tushuntiradi.

So‘rilgan temir ferritin bilan bog‘langan holda asosan jigarda to‘planadi. Keyinchalik ko‘mikda gemoglobinga qo‘shiladi. Polimaltoza kompleksining Fe3+-gidroksidi tarkibiga kiruvchi temir prooksidant xossalarga ega emas (oddiy Fe2+ tuzlariga xos), bu esa past zichlikdagi lipoproteinlar (PZLP) va juda past zichlikdagi lipoproteinlar (JPZLP) oksidlanishining pasayishiga olib keladi.

Preparat qabul qilinganda organizmdagi temir tanqisligi tezda qoplanadi, eritropoez rag‘batlantiriladi, gemoglobin miqdori tiklanadi.

Rux - inson organizmining muhim elementi bo‘lib, u asosan eritrotsitlarda rux metalloenzim karboangidraza ko‘rinishida va kamroq darajada qon plazmasida α-2-makroglobulin bilan bog‘langan holda mavjud. DNK, RNK, oqsillar sintezining asosiy bosqichlarini katalizlovchi 70 dan ortiq fermentlar tarkibiga kiradi. To‘qimalarning o‘sishi va yetilishi jarayonlariga yaqqol ta’sir ko‘rsatadi, bolalarda aqliy va jismoniy rivojlanishning kechikishida ijobiy ta’sir ko‘rsatadi. Hujayra membranalarini barqarorlashtiradi, regeneratsiya jarayonlariga, nerv impulslarining uzatilishiga ta’sir ko‘rsatadi, insulin ta’sirini kuchaytiradi. Soch o‘sishini rag‘batlantiradi, immunitetning T-hujayrali bo‘g‘iniga immunomodullovchi ta’sir ko‘rsatadi va nospetsifik immun himoya omillarini oshiradi. Kuchli antioksidant hisoblanadi. Husnbuzar toshmasi va alopetsiyani davolashda samarali.

Folat kislotasi asosiy biologik jarayonlarda, ya’ni DNK, RNK va oqsillar sintezida ishtirok etuvchi B guruh vitaminidir. Homiladorlikda folat kislotasi homilada nerv nayi nuqsonlari rivojlanishining oldini oladi. Folatlar yetishmovchiligi megaloblastik anemiya rivojlanishiga olib keladi. Folat kislotasi yetishmaganda homiladorlikning to‘xtashi, muddatidan oldin tug‘ruq va bolaning aqliy rivojlanishi buzilishi kuzatilishi mumkin.

Vitamin B1 (tiamin gidroxlorid) muhim faol moddadir. Organizmda fosforlanish jarayonlari natijasida ko‘plab ferment reaksiyalarining kofermenti bo‘lgan kokarboksilazaga aylanadi. Uglevod, oqsil va yog‘ almashinuvida, sinapslarda nerv qo‘zg‘alishini o‘tkazish jarayonlarida muhim rol o‘ynaydi. Hujayra membranalarini peroksidlanish mahsulotlarining zaharli ta’siridan himoya qiladi.

Vitamin B2 (riboflavin) hujayraviy nafas olish va ko‘rish qobiliyatining katalizatori hisoblanadi; u DNK hosil bo‘lishida muhim rol o‘ynaydi, to‘qimalarning (shu jumladan teri hujayralarining) tiklanish jarayonlariga yordam beradi.

Vitamin B6 (piridoksin gidroxlorid) fosforillangan shaklda aminokislotalarning dekarboksillanishi va qayta aminlanishi, lipidlar almashinuvi jarayonlarida ishtirok etuvchi fermentlar tarkibiga kiradi. Periferik asab tizimi va markaziy asab tizimining (MAT) normal ishlashi uchun zarur.

Farmakokinetika

Kompleks tarkibi tufayli farmakokinetik tadqiqotlar o‘tkazishning imkoni yo‘q.

Qo‘llanilishi

Kompleks terapiya tarkibida quyidagi kasalliklarni simptomatik davolash:

turli genezli temir tanqisligi kamqonligi va yashirin tanqislikni davolash;

temirga bo‘lgan yuqori ehtiyoj (homiladorlik, emizish davri, donorlik, jadal o‘sish davri, vegetarianlik, keksalik).

Qo‘llash usuli va dozalari

Rotafer Plyus preparati ichishga mo‘ljallangan.

Preparatning dozasi va davolash davomiyligi temir tanqisligining darajasiga bog‘liq. Preparatning sutkalik dozasi sutkada 1 marta qabul qilinishi mumkin. Ovqat vaqtida yoki darhol ovqatdan keyin suv bilan ichiladi.

Klinik jihatdan yaqqol ifodalangan yengil va o‘rtacha darajadagi temir tanqisligini (temir tanqisligi anemiyasi) davolash: Qondagi gemoglobin darajasi me’yorlashgunga qadar 3-5 oy davomida kuniga 2 kapsuladan. Qondagi gemoglobin miqdori normallashgandan so‘ng, shifokor tavsiyasiga ko‘ra ushlab turuvchi doza buyuriladi.

Homilador ayollar gemoglobin darajasi me’yorlashgunga qadar kuniga 1-2 kapsula qabul qilishlari kerak. So‘ngra davolash temir zaxiralarini tiklash uchun kamida tug‘ruqqacha kuniga 1 kapsula dozasida davom ettirilishi kerak.

Yashirin temir tanqisligini davolash va oldini olish uchun kompleks terapiya tarkibida bemorlar kuniga 1 kapsuladan qabul qilishlari kerak.

Nojo‘ya ta’sirlari

Ovqat hazm qilish tizimi tomonidan: juda kam hollarda - oshqozon-ichak traktining ta’sirlanish belgilari (shu jumladan, epigastral sohada to‘lish, bosim hissi, ko‘ngil aynishi, qabziyat yoki ich ketishi). So‘rilmagan temir ajralishi tufayli najasning to‘q rangga bo‘yalishi mumkin (klinik ahamiyatga ega emas).

Boshqalar: folat kislotasiga allergik reaksiyalar.

Qarshi ko‘rsatmalar

preparatning har qanday tarkibiy qismiga yuqori sezuvchanlik;

organizmda temir miqdorining ko‘payishi (masalan, gemoxromatoz, gemosideroz);

temir utilizatsiyasining buzilishi (qo‘rg‘oshin kamqonligi, sideroblast kamqonlik, talassemiya);

temir tanqisligi bo‘lmagan anemiyalar (gemolitik anemiya yoki megaloblastik anemiya, B12 vitamini tanqisligidan kelib chiqqan anemiya);

12 yoshgacha bo‘lgan bolalar (klinik ma’lumotlar yo‘qligi sababli).

Ehtiyotkorlik bilan: oshqozon va o‘n ikki barmoqli ichak yara kasalligi, ichakning yallig‘lanish kasalliklari (enterit, divertikulit, yarali kolit, Kron kasalligi).

Dorilarning o‘zaro ta’siri

Tarkibida alyuminiy, magniy, kalsiy tuzlari bo‘lgan antatsidlar bilan bir vaqtda buyurish mumkin emas, chunki temirning so‘rilishi kamayadi.

Tarkibida temir bo‘lgan inyeksion preparatlar bilan bir vaqtda qo‘llash mumkin emas (OITdan temirning so‘rilishi kamayadi), shuning uchun tarkibida temir bo‘lgan peroral preparatlar bilan davolashni oxirgi inyeksiyadan keyin kamida 1 hafta o‘tgach boshlash kerak.

Temir tetratsiklin qatori preparatlarining absorbsiyasini kamaytiradi.

Piridoksin levodopaning terapevtik samarasini kamaytiradi.

Rux tetratsiklinlar va misning so‘rilishini kamaytiradi va kumush, qo‘rg‘oshin, xinin, sitral tuzlari bilan farmatsevtik jihatdan mos kelmaydi (yomon eriydigan birikmalar hosil qiladi).

Tiazidli diuretiklar ruxning siydik bilan chiqarilishini kuchaytiradi.

Tiosemikarbazon va 5-ftoruratsil vitamin B1 ning samaradorligini pasaytirib, uning antagonistlari hisoblanadi. Antatsidlar B1 vitaminining so‘rilishini sekinlashtiradi.

Folat kislotasining yuqori dozalari uzoq vaqt davomida B12 vitamini konsentratsiyasini pasaytirishi mumkin.

Maxsus ko‘rsatmalar

Dozani oshirib yubormaslik uchun boshqa polivitamin va mineral komplekslarni bir vaqtning o‘zida qo‘llash tavsiya etilmaydi.

Sut, sut mahsulotlari, kompleks hosil qiluvchi dori preparatlarini (bikarbonatlar, karbonatlar, oksalatlar, fosfatlar, tetratsiklinlar va mis) iste’mol qilishdan 1 soat oldin yoki 2 soat keyin qabul qilish kerak.

Rux preparatlari uzoq vaqt qo‘llanganda mis tanqisligi yuzaga kelishi ehtimolini hisobga olish kerak. 3-4 oydan ortiq qabul qilinganda mis preparatlarini buyurish tavsiya etiladi.

Tarkibida etanol bo‘lgan ichimliklarni iste’mol qilishdan qochish kerak.

Homiladorlik va laktatsiyada qo‘llash

Zarurat tug‘ilganda preparatni homiladorlik va laktatsiya davrida qo‘llash mumkin.

Pediatriyada qo‘llanishi

12 yoshgacha bo‘lgan bolalarda Rotafer Plyus preparatini qo‘llash samaradorligi va xavfsizligi bo‘yicha ma’lumotlar mavjud emas. Preparat ushbu yosh guruhida qo‘llash uchun tavsiya etilmaydi.

Preparatni bolalar qo‘li yetmaydigan joyda saqlash va yaroqlilik muddati tugaganidan keyin ishlatmaslik kerak.

Avtotransport va mexanizmlarni boshqarish qobiliyatiga ta’siri

Transport vositalari haydovchilari va potensial xavfli mexanizmlar bilan ishlaydigan shaxslarda preparatni qo‘llash bo‘yicha hech qanday ogohlantirishlar yo‘q.

Dozani oshirib yuborish

Hozirgacha preparatning dozasini oshirib yuborish holatlari haqida xabar berilmagan.

Chiqarish shakli

Qattiq jelatinli kapsulalar. Blisterda 15 ta kapsula. 2 ta blister qo‘llanmasi bilan birga karton qutida.

Saqlash shartlari

Namlik va yorug‘likdan himoyalangan joyda, 25 °C dan yuqori bo‘lmagan haroratda saqlanadi.

Yaroqlilik muddati

3 yil.

Dorixonalardan berish shartlari

Retseptsiz.

Ishlab chiqaruvchi

Savdo belgisi va ro‘yxatdan o‘tkazish guvohnomasining egasi kompaniya hisoblanadi

"Rotafarm Limited," Buyuk Britaniya

("Rotapharm Limited," Buyuk Britaniya).

Ishlab chiqarilgan

"Adifarm Ltd," 130 Simeonovo shossesi bulvari, 1700 Sofiya, Bolgariya

"Adipharm Ltd," 130 Simeonovskoshosseblvd., 1700 Sofia, Bulgaria.