Dolaren Aktiv

Tarkib

1 g gel tarkibida quyidagilar mavjud:

faol moddalar: diklofenak natriy 10 mg, mentol 50 mg, metilsalitsilat 100 mg;

yordamchi moddalar: benzil spirti, zig‘ir moyi, karbomer 940, dietilamin, propilenglikol, dinatriy edetat, natriy metilparaben, natriy bisulfit, butilgidroksitoluol, butilgidroksianizol, gipromelloza, tozalangan suv.

Tavsif

Yumshoq konsistensiyali, o‘ziga xos hidli, oqdan sarg‘ish ranggacha bo‘lgan gel.

Dori shakli

Gel.

Farmakoterapevtik guruh

Mahalliy qo‘llanadigan nosteroid yallig‘lanishga qarshi vositalar. ATX kodi: M01AB05.

Farmakologik xususiyatlari

Farmakodinamika

Ta’sir uning tarkibiga kiruvchi komponentlar bilan belgilanadi.

Diklofenak yallig‘lanishga qarshi nosteroid vosita bo‘lib, kuchli revmatizmga qarshi, og‘riq qoldiruvchi, yallig‘lanishga qarshi va isitmani tushiruvchi ta’sirga ega. Asosiy ta’sir mexanizmi prostaglandinlar biosintezini susaytirishdir.

Jarohatlar yoki revmatik kasalliklar tufayli kelib chiqqan yallig‘lanishda diklofenakni qo‘llash og‘riq kuchini, to‘qimalar shishini kamaytirishga va shikastlangan bo‘g‘imlar, boylamlar, paylar hamda mushaklar funksiyasining tiklanish davrini qisqartirishga yordam beradi.

Mentol sovuqlik retseptorlarini ta’sirlantiradi. Bu surtilgan joyda kapillyarlar o‘tkazuvchanligining torayishi va kamayishi, salqinlik hissi bilan kechadi. Mentol mahalliy so‘ruvchi va o‘rtacha og‘riq qoldiruvchi ta’sir ko‘rsatadi.

Metilsalitsilat salitsil kislotasining hosilasi bo‘lib, mahalliy ta’sirlovchi ta’sir ko‘rsatadi. Metilsalitsilat teri retseptorlarini ta’sirlab, og‘riq sezuvchanligini boshqaruvchi ko‘p miqdordagi biologik faol moddalar hosil bo‘lishiga va qonga chiqarilishiga sabab bo‘ladi. Neyronlardan R substansiyasi ajralib chiqadi. Nerv oxirlarida R substansiyasi akkumulyatsiyasining kamayishi og‘riq sezgisining kamayishiga olib keladi. Bundan tashqari, nosteroid yallig‘lanishga qarshi dorilar (NYQD) guruhiga mansub metilsalitsilat siklooksigenazalarni susaytirishi tufayli prostaglandinlar sintezini tormozlaydi, bu esa yallig‘langan to‘qimalarning shishishi va infiltratsiyasini kamaytiradi.

Farmakokinetika

Ta’siri teriga surtilgandan bir necha daqiqa o‘tgach boshlanadi. 20-30 daqiqadan so‘ng gelning ta’siri maksimal darajaga yetadi. Mahalliy qo‘llanganda gel dozaning 5% dan kamrog‘ini so‘radi, shuning uchun dori vositasining tizimli ta’siri minimal bo‘ladi.

Ko‘rsatmalar

Bo‘g‘imlar, bel, mushaklar, boylamlar va paylarning revmatik yoki travmatik kelib chiqishga ega bo‘lgan og‘rig‘i va yallig‘lanishini mahalliy davolash uchun.

Qo‘llash usuli va dozalari

Sirtga qo‘llash!

Kattalar va 14 yoshdan oshgan bolalarga sutkasiga 2-3 marta teriga 2-4 g geldan yupqa qatlam qilib surtiladi (4-8 sm li tasma) va yengil ishqalanadi.

O‘rtacha sutkalik doza 10 g gelni tashkil etadi, bu 100 mg diklofenak natriyga to‘g‘ri keladi.

Dori vositasini shikastlanmagan teriga surtish, ko‘zga va shilliq qavatlarga tushishidan saqlanish kerak. Ochiq jarohatlarga gel surtmaslik.

Preparatni surtgandan so‘ng, ushbu soha davolanishi kerak bo‘lgan hollardan tashqari, qo‘llarni yuvish lozim.

Davolash davomiyligini shifokor kasallikning xarakteri va kechishiga, davolash samaradorligiga qarab belgilaydi.

Yumshoq to‘qimalarning shikastlanishi va revmatizmida davolashning tavsiya etilgan davomiyligi 7-14 kunni tashkil etadi, shundan so‘ng terapiyani qayta ko‘rib chiqish lozim.

Tizza bo‘g‘imi kabi yuzaki bo‘g‘imlarning osteoartritini davolashda davolash 21 kundan keyin qayta ko‘rib chiqilishi kerak.

Keksa yoshdagi bemorlar dozani tuzatishga muhtoj emaslar.

Bolalar

14 yoshdan kichik bolalarga qo‘llash mumkin emas. Dori vositasi 14 yoshdan oshgan bolalarga 7 kundan ortiq qo‘llanganda yoki kasallik belgilari kuchayganda shifokor maslahatiga murojaat qilish zarur.

Qarshi ko‘rsatmalar

Diklofenak yoki dori vositasining boshqa komponentlariga yuqori sezuvchanlik.

Anamnezda bronxial astma, eshakemi yoki o‘tkir rinit, atsetilsalitsil kislotasi yoki boshqa nosteroid yallig‘lanishga qarshi dorilarni qabul qilish bilan bog‘liq endoderma xurujlarining mavjudligi.

Epidermisning shikastlanishi, qo‘llanilish sohasidagi ochiq jarohatlar.

Homiladorlikning oxirgi uch oyligi.

Oshqozon va o‘n ikki barmoqli ichak yara kasalligi qo‘zish fazasida.

Yurak operatsiyalaridan bevosita oldin yoki keyin darhol qo‘llash mumkin emas.

14 yoshdan kichik bolalar.

Salbiy ta’sirlar

Odatda yaxshi ko‘tariladi. Nojo‘ya reaksiyalar surtilgan joydagi terida yengil vaqtinchalik reaksiyalarni o‘z ichiga oladi. Kamdan-kam hollarda allergik reaksiyalar kuzatilishi mumkin.

Quyida nojo‘ya reaksiyalar chastotasi ko‘rsatilgan holda keltirilgan: juda keng tarqalgan (≥ 1/10), tarqalgan (≥ 1/100, ≤ 1/10), tarqalmagan (≥ 1/1000, ≤ 1/100), kam tarqalgan (≥ 1/10 000, ≤ 1/1000), juda kam tarqalgan (<1/10 000).

Infeksiyalar va invaziyalar: juda kam tarqalgan - yiringli toshma.

Teri tomonidan: keng tarqalmagan - toshma, qichishish, qizarish, ekzema, ekzantema, eritema, achishish, shish va pufakchalar paydo bo‘lishi, papulalar, pustulalar, terining po‘st tashlashi va quruqligi, dermatit (shu jumladan kontakt dermatit), teri shishi, terining achishish hissi; kamdan-kam tarqalgan - bullyoz dermatit; juda kam tarqalgan - yorug‘likka sezuvchanlik reaksiyalari, tarqoq teri toshmasi, terining achishish hissi.

Immun tizimi tomonidan: juda kam uchraydigan - yuqori sezuvchanlik reaksiyalari (shu jumladan eshakem), angionevrotik shish, nafas qisilishi.

Nafas olish tizimi tomonidan: juda kam tarqalgan - bronxial astma, bronxospazm.

Nojo‘ya ta’sirlar kuzatilsa, davolashni to‘xtatish va shifokorga murojaat qilish lozim.

Gel yuqori dozalarda qo‘llanilganda yoki terining katta sohalariga surtilganda tizimli nojo‘ya reaksiyalar, shuningdek, angioedema, dispnoe ko‘rinishidagi yuqori sezuvchanlik reaksiyalari yuzaga kelishi ehtimolini istisno qilib bo‘lmaydi.

Bemorga dori vositasini qo‘llashni to‘xtatish va biror-bir nojo‘ya ta’sirlar yoki boshqa noodatiy reaksiyalar paydo bo‘lgan taqdirda shifokorga murojaat qilish zarurligi haqida ma’lumot berish lozim.

Dozani oshirib yuborish

Mahalliy qo‘llanganda diklofenakning tizimli qon oqimiga so‘rilishi pastligi sababli dozani oshirib yuborish ehtimoli kam.

Tasodifan yutib yuborilganda, 1 tuba 100 g dori vositasi 1 g diklofenak natriy ekvivalentini o‘z ichiga olishini hisobga olish kerak; bunda tizimli nojo‘ya reaksiyalar rivojlanishi mumkin.

Nosteroid yallig‘lanishga qarshi dorilarning o‘tkir dozasini oshirib yuborgan bemorlarning aksariyatida ovqat hazm qilish traktida hech qanday alomatlar bo‘lmaydi yoki tibbiy aralashuvsiz yo‘qoladigan yengil alomatlar bo‘lishi mumkin. Biroq, nosteroid yallig‘lanishga qarshi dorilarning o‘tkir dozasini oshirib yuborgan ba’zi bemorlarda ancha o‘rtacha va jiddiy klinik asoratlar, jumladan, tutqanoqlar, metabolik atsidoz, koma, gipotenziya, gipotermiya, rabdomioliz, elektrolitlar muvozanatining buzilishi, yurak aritmiyasi va o‘tkir buyrak yetishmovchiligi qayd etilgan. Uyquchanlik, ongning chalkashligi, nistagm, ko‘rishning buzilishi, diplopiya, bosh og‘rig‘i, eshitish gallyutsinatsiyalari va quloq shang‘illashi ibuprofen, diklofenak, naproksen va mefenamin kislotasining dozasini oshirib yuborishdan keyin qayd etilgan. Bu alomatlar odatda dorilarning yuqori dozalarini ichish bilan bog‘liq. YAQNDVning katta dozasini yutish poliorgan yetishmovchiligi va o‘limga olib kelishi mumkin. Diklofenakni mahalliy qo‘llash og‘iz orqali qabul qilishga qaraganda kamroq tizimli ta’sirni ta’minlaydi.

Mentolning o‘tkir dozasini oshirib yuborish qorin og‘rig‘i, ko‘ngil aynishi, qusish, bosh aylanishi, koordinatsiya buzilishi va uyquchanlikni keltirib chiqarishi mumkin.

Metilsalitsilatning dozasini oshirib yuborish salitsil kislotasi bilan zaharlanishga olib kelishi mumkin. Simptomlar ko‘ngil aynishi, qusish, ongning buzilishi, bosh aylanishi, alahsirash, psixoz, stupor, komani o‘z ichiga olishi mumkin. O‘lim bilan tugashi mumkin.

Dori vositasi bexosdan yutib yuborilganda, darhol oshqozonni bo‘shatish va adsorbentni qabul qilish lozim. Nosteroid yallig‘lanishga qarshi dorilar bilan zaharlanganda qo‘llaniladigan terapevtik choralar bilan simptomatik davolash ko‘rsatilgan. Bemor shifokorga murojaat qilishi kerak.

Simptomatik davolash qon bosimining ko‘tarilishi, buyrak yetishmovchiligi, talvasalar, nafas olishning pasayishi, ovqat hazm qilish yo‘li tomonidan asoratlar rivojlanishi belgilari paydo bo‘lganda o‘tkaziladi.

Ehtiyot choralari va qo‘llash xususiyatlari

Faqat tashqi vosita sifatida qo‘llanilsin.

Og‘iz orqali qabul qilinadigan nosteroid yallig‘lanishga qarshi preparatlar bilan bir vaqtda ehtiyotkorlik bilan qo‘llash lozim. YAQNDV oshqozon-ichakdan qon ketishiga sabab bo‘lishi mumkin. Xavf doza va qo‘llash davomiyligi ortishi bilan ortadi va keksa yoshdagi bemorlarda, anamnezida oshqozon yarasi bo‘lgan bemorlarda, gemostaz buzilishlari bo‘lgan bemorlarda va antikoagulyantlar, glyukokortikoidlar yoki boshqa nosteroid yallig‘lanishga qarshi dorilarni qabul qiluvchi bemorlarda, shuningdek, alkogol iste’mol qilganda yuqori bo‘ladi.

Diklofenakni mahalliy qo‘llashda tizimli nojo‘ya ta’sirlarning rivojlanish ehtimoli uning peroral shakllarini qo‘llashga nisbatan ahamiyatsiz, ammo preparatni terining nisbatan katta sohalarida uzoq vaqt davomida qo‘llashda u ortadi.

Tarkibida diklofenak bo‘lgan boshqa vositalar bilan qo‘llash mumkin emas.

Dori vositasini oshqozon va o‘n ikki barmoqli ichakning peptik yarasi qo‘zg‘alish bosqichida yoki anamnezda mavjud bo‘lganda, jigar/buyrak faoliyatining buzilishida, qon hosil bo‘lishining buzilishida, burun bo‘shlig‘i shilliq qavatining polipozida, bronxial astma, oshqozon-ichak kasalliklari, arterial gipertenziya, suyuqlik ushlanib qolishi va h.k. mavjud bemorlarda ehtiyotkorlik bilan qo‘llash lozim.

Yallig‘langan, jarohatlangan yoki infeksiyalangan teriga tushishining oldini olgan holda, faqat terining shikastlanmagan qismlariga surtish tavsiya etiladi. Dori vositasining ko‘z va shilliq qavatlarga tegishidan saqlanish kerak. Preparatni yutib yubormang.

Dori vositasi, ayniqsa, atsetilsalitsil kislotasiga allergiyasi bo‘lgan bemorlarda jiddiy allergik reaksiyalarni keltirib chiqarishi mumkin. Simptomlar orasida eshakem, yuz shishi, astma (xirillashlar), shok, terining qizarishi, toshmalar yoki pufakchalar bo‘lishi mumkin. Ushbu alomatlardan birortasi paydo bo‘lganda, bemorlar preparatni qo‘llashni to‘xtatishlari va yordam so‘rashlari kerak.

YAQNDV jiddiy yurak-qon tomir trombotik hodisalari, miokard infarkti va insult xavfini oshiradi, ayniqsa yurak-qon tomir kasalliklari yoki bunday kasalliklarning xavf omillari bo‘lgan bemorlarda. Bu xavf doza va qo‘llash davomiyligi ortishi bilan ortadi. Yurak-qon tomir kasalliklari bo‘lgan bemorlarga YAQNDVlarni ehtiyotkorlik bilan qo‘llash lozim.

Salitsilyatlarni qo‘llash Rey sindromi rivojlanishi bilan bog‘liq deb hisoblanadi.

Yorug‘likka sezgirlik ehtimoli tufayli davolash davomida va davolash to‘xtatilgandan keyin 2 hafta davomida to‘g‘ridan-to‘g‘ri quyosh nuri ta’siridan va solyariyga tashrif buyurishdan saqlanish kerak. Bemorlar ishlov berilgan joylarga tabiiy yoki sun’iy quyosh nuri ta’sirini kamaytirishlari yoki undan saqlanishlari kerak.

Dori vositasi tarkibida aspiringa o‘xshash moddalar bo‘lgan salitsilatlar mavjud, shuning uchun atsetilsalitsil kislotasi bilan bir xil ehtiyot choralariga rioya qilish kerak.

Tarkibida terini ta’sirlashi mumkin bo‘lgan propilenglikol mavjud.

Tarkibida butilgidroksianizol (E320) va butilgidroksitoluol (E321) mavjud bo‘lib, ular mahalliy teri reaksiyalarini (masalan, kontaktli dermatit) yoki ko‘z va shilliq qavatlarning ta’sirlanishini keltirib chiqarishi mumkin.

Har qanday teri toshmasi paydo bo‘lganda preparat bilan davolashni to‘xtatish kerak. Izolyatsiyalovchi okklyuzion bog‘lam yoki isituvchi kompresslar ostida qo‘llash mumkin emas. Paylar cho‘zilgan bo‘lsa, jarohatlangan joyni bint bilan bog‘lash mumkin.

Noqulay alomatlar saqlanib qolsa yoki yomonlashsa yoki yangi alomatlar paydo bo‘lsa, dori vositasini qo‘llashni to‘xtatish va shifokorga murojaat qilish lozim.

Homiladorlik va laktatsiyada qo‘llash

Homiladorlarda qo‘llashning klinik tajribasi cheklangan, shuning uchun homiladorlik yoki emizish davrida ushbu dori vositasini qo‘llash tavsiya etilmaydi. Homiladorlikning I va II trimestrlari davomida preparatni faqat zarurat tug‘ilganda qisqa vaqt davomida kichik joylarga qo‘llash mumkin. Dolaren® geli, tug‘ruq faoliyatining zaifligi, o‘pka gipertenziyasi va/yoki arterial yo‘lning muddatidan oldin yopilishi rivojlanishi mumkinligi sababli, homiladorlikning III trimestrida qo‘llash mumkin emas.

Emizish davrida faqat shifokor tavsiyasiga ko‘ra, shifokorning fikriga ko‘ra, preparatning kutilayotgan foydasi potensial xavfdan yuqori bo‘lgan jiddiy asoslar mavjud bo‘lganda qo‘llash mumkin.

Gel sut bezlariga yoki terining katta qismlariga surtilmasligi va uzoq vaqt (1 haftadan ortiq) qo‘llanilmasligi kerak.

Avtotransport va murakkab mexanizmlarni boshqarish qobiliyatiga ta’siri

Ta’sir qilmaydi.

Boshqa dorilar bilan o‘zaro ta’siri

Dori vositasini mahalliy qo‘llashda tizimli absorbsiya juda past bo‘lganligi sababli, o‘zaro ta’sirlarning yuzaga kelish ehtimoli juda past. Biroq diklofenakning peroral shakllariga xos bo‘lgan mumkin bo‘lgan o‘zaro ta’sirlarni hisobga olish kerak.

O‘zaro ta’sirning yetarli darajada nazorat qilinadigan tadqiqotlari o‘tkazilmagan bo‘lsa-da, mahalliy qo‘llash uchun salitsilatlarning haddan tashqari ko‘p qo‘llanilishi kumarinli antikoagulyantlar va antitrombotsitar preparatlarning ta’sirini oshirishi mumkin. Shu sababli, kumarinli antikoagulyantlar va antitrombotsitar preparatlar, shu jumladan atsetilsalitsil kislotasi qabul qilayotgan bemorlar ehtiyotkor bo‘lishlari lozim. Antikoagulyantlar bilan bir vaqtda qo‘llanganda qon ivish tizimining holatini nazorat qilish kerak, chunki YAQNDV, shu jumladan diklofenak, oshqozon-ichakdan qon ketishiga olib kelishi mumkin.

Diklofenak natriy o‘ziga xos ta’sirlarni, xususan, kortikosteroidlarning ulserogen ta’sirini kuchaytirishi, qon plazmasida litiy konsentratsiyasini oshirishi, siydik haydovchi vositalar va tiazid hamda furosemid guruhidagi saluretiklar ta’sirini susaytirishi mumkinligini hisobga olish zarur.

Gel shaklidagi metilsalitsilat varfarinning ta’sirini kuchaytirishi mumkin. Metilsalitsilatning yuqori va past dozalari qo‘llanilganda qon ketishi, qontalashlar va/yoki xalqaro normallashgan nisbat (XNN) qiymatining oshishi kuzatildi.

Gelni og‘iz orqali qabul qilinadigan nosteroid yallig‘lanishga qarshi dori vositalari, jumladan atsetilsalitsil kislotasi bilan bir vaqtda qo‘llashda ehtiyot bo‘lish kerak, chunki toksik ta’sirlarning, ayniqsa tizimli nojo‘ya ta’sirlarning o‘zaro kuchayishi xavfi mavjud.

Alkogol nosteroid yallig‘lanishga qarshi dorilar bilan birga iste’mol qilinganda oshqozon-ichakdan qon ketish xavfini oshiradi.

Diklofenak fotosensibilizatsiyani chaqiruvchi dori vositalarining ta’sirini kuchaytirishi mumkin. Bemorlar ishlov berilgan joylarga tabiiy yoki sun’iy quyosh nuri ta’sirini kamaytirishlari yoki undan saqlanishlari kerak, chunki hayvonlarda o‘tkazilgan tadqiqotlar diklofenak bilan mahalliy davolash ultrabinafsha nurlari ta’sirida yuzaga keladigan teri o‘smalarining ertaroq paydo bo‘lishiga olib kelishini ko‘rsatdi. Diklofenak gelini ultrabinafsha nurlari ta’sirida inson terisiga mahalliy qo‘llashning potensial ta’siri noma’lum. Diklofenakni mahalliy qo‘llash natijasida yuzaga keladigan yorug‘likka sezgirlik reaksiyasini doimo ochiq quyoshda ishlaydigan bemorlarda ko‘rib chiqish kerak, bu esa pufakchali eritematoz va tangachasimon pilakchalar hamda sariq po‘stloq kabi shikastlanishlarning rivojlanishiga yordam beradi.

Chiqarish shakli

Tubada 20 g yoki 50 g dan. Karton o‘ramda 1 tadan tuba.

Yaroqlilik muddati

3 yil.

Tubani birinchi marta ochgandan keyin - 6 oy.

Saqlash shartlari

Asl qadoqda 25 °C dan yuqori bo‘lmagan haroratda saqlanadi.

Bolalar qo‘li yetmaydigan joyda saqlang.

Muzlatmang.

Ta’til shartlari

Retseptsiz.

Ishlab chiqaruvchi

Nabros Farma Pvt. Ltd. Hindiston