Medinak Plus

Tarkib

1 g gel tarkibida quyidagilar mavjud:

Faol moddalar: diklofenak dietilamin 11,6 mg, diklofenakka ekvivalent natriy 10 mg, mentol 50 mg, metilsalitsilat 100 mg, zig‘ir moyi 30 mg.

Yordamchi moddalar: setomakrogol 1000, setostearil spirti, propilen glikol, metilparaben, propilparaben, karbomer, benzil spirti, tozalangan suv.

Tavsif

Bir jinsli, oq rangli, kesak va qum zarrachalarisiz gel.

Dori shakli

Sirtga qo‘llash uchun gel.

Farmakoterapevtik guruh

Mahalliy qo‘llash uchun nosteroid yallig‘lanishga qarshi preparatlar. Diklofenak, kombinatsiyalar. ATX kodi: M02AA65 **.

Farmakologik xususiyatlari

Diklofenak nosteroid yallig‘lanishga qarshi dorilar guruhiga kiradi, siklooksigenazani bostiradi va isitma, yallig‘lanish va og‘riq genezida muhim rol o‘ynaydigan endogen moddalar - prostaglandinlar biosintezini tormozlaydi. Diklofenak og‘riqni qoldiradi, yallig‘lanishni yo‘qotadi.

Mentol sovuqlik retseptorlarini ta’sirlantiradi. Bu uni qo‘llashda kapillyarlar o‘tkazuvchanligining torayishi va kamayishi, salqinlik hissi bilan kechadi. Mahalliy chalg‘ituvchi ta’sir ko‘rsatadi, o‘rtacha ifodalangan og‘riq qoldiruvchi ta’sirga ega, mentolning yutilishi ahamiyatsizdir. Mentol jigarda metabolizmga uchraydi va buyraklar hamda o‘t orqali glyukuronidlar sifatida chiqariladi.

Metil salitsilat salitsil kislotasining hosilasi bo‘lib, mahalliy ta’sirlovchi ta’sirga ega. Metilsalitsilat teri retseptorlarini ta’sirlab, og‘riqni kamaytiradi. Bundan tashqari, metilsalitsilat prostaglandinlar sintezini tormozlaydi, shish va yallig‘langan to‘qimalar infiltratsiyasini kamaytiradi. Mahalliy qo‘llanganda shikastlanmagan teri orqali yallig‘lanish o‘chog‘ining ichkarisiga oson kirib, yuqori terapevtik konsentratsiyalar hosil qiladi. Yallig‘langan to‘qimalarda metilsalitsilat gidrolizlanib, salitsil kislota anioniga aylanadi, u jigarda digidroksibenzoy kislotaga metabolizmga uchraydi va buyraklar orqali chiqariladi. Yarim chiqarilish davri 2 soatni tashkil etadi.

Zig‘ir moyi, alfa-linolen kislotasining asosiy komponenti (to‘yinmagan yog‘ kislotasining etil efiri), yallig‘lanishga qarshi ta’sir ko‘rsatadi, antioksidant xususiyatlarga ega, qo‘llash joyida qon aylanishini yaxshilaydi.

Farmakokinetika

Diklofenak gel ko‘rinishida qo‘llanganda sekin so‘rilib, to‘g‘ridan-to‘g‘ri kirish orqali teri osti yog‘ to‘qimasi, mushak to‘qimasi, bo‘g‘im kapsulasi va sinovial suyuqlikka chuqur kirib boradi. Uzoq davolanganda yoki jarohatning katta joylariga surtilganda, diklofenak asta-sekin qon plazmasiga o‘tadi (teriga surtilgan dozaning 3-6% i).

Diklofenak jigarda glyukuron kislotasi bilan konyugatsiya yo‘li bilan metabolizmga uchraydi. Diklofenakning taxminan 70% siydik bilan chiqariladi, qolgani najas bilan.

Metilsalitsilat mahalliy qo‘llanganda, teri osti kletchatkasi, mushaklar va bo‘g‘im kapsulasiga tez so‘riladi va gidroksillanish vositalari orqali salitsil kislota anioniga aylanadi.

Qo‘llanilishi

pay va paylar, mushaklar va bo‘g‘imlarning jarohatdan keyingi yallig‘lanishi;

(boylamlar bo‘shashishi, boylamlar, mushaklar, paylarning cho‘zilishi, mushaklar va bo‘g‘imlarda og‘riq, zo‘riqish va lat yeyishlar);

yumshoq to‘qimalarning yallig‘lanish-degenerativ kasalliklari (tendovaginit, bursit, periartrit, miozit);

mushak va bo‘g‘im kasalliklari (revmatoid artrit, osteoartroz, radikulitlar, lyumbago, ishias) bilan bog‘liq og‘riq sindromi va shish.

Qo‘llash usuli va dozalari

Og‘riq sohasiga qarab, 2-4 g gel (chizig‘i 4-8 sm) teriga yupqa qilib surtiladi va kuniga 2-3 marta yengil surtiladi. O‘rtacha sutkalik doza 10 g gelni tashkil etadi. Gel shikastlanmagan teriga surtiladi, ko‘zga va shilliq qavatlarga tushishidan saqlanadi. Gel ochiq jarohatlarga surtilmasligi kerak. Davolash davomiyligi shifokor bilan maslahatlashmasdan 10 kundan oshmasligi kerak.

Nojo‘ya ta’sirlari

Kamdan-kam hollarda: toshma, eritema, qichishish, eshakemi, achishish.

Uzoq muddat qo‘llanganda tizimli nojo‘ya ta’sirlar - tarqalgan teri toshmasi, bronxospazm, angionevrotik shish, fotosensibilizatsiya kuzatilishi mumkin.

Ko‘rsatilgan belgilar paydo bo‘lganda preparatni qo‘llashni to‘xtatish kerak.

Qarshi ko‘rsatmalar

diklofenak va boshqa tarkibiy qismlarga yuqori sezuvchanlik;

teri qoplamlari butunligining buzilishi;

aspirin qabul qilayotgan bemorlarda astmatik holat;

homiladorlik va laktatsiya;

12 yoshgacha bo‘lgan bolalar.

Dorilarning o‘zaro ta’siri

Preparat boshqa og‘iz orqali qabul qilinadigan dorilar bilan birga qo‘llanilishi mumkin, chunki bu preparatning tarkibiy qismlari boshqa dorilar bilan tizimli ravishda o‘zaro ta’sirlashmaydi, shu jumladan diklofenak natriyni og‘iz orqali qabul qilishda qo‘llash.

Tarkibida N-atsil - etanolamin - amidaza kislotasi bo‘lgan mahalliy dorilarni parallel qo‘llash terini mahalliy ravishda eshakem, qizarish, po‘st tashlash ko‘rinishida ta’sirlashi mumkin.

Maxsus ko‘rsatmalar

Homiladorlik va laktatsiya davrida preparatni qo‘llashdan oldin shifokor bilan maslahatlashing. Ko‘z va shilliq qavatlarga tushishidan saqlanish kerak. Gel ochiq jarohatlarga surtilmasligi kerak.

Dozani oshirib yuborish

Mahalliy qo‘llash natijasida diklofenakning tizimli so‘rilishi pastligi sababli, dozani oshirib yuborish ehtimoli juda past.

Chiqarish shakli

Tubada 30 g dan. Har bir tuba yo‘riqnoma yoki vkladishli varaq bilan karton o‘ramga joylanadi.

Saqlash shartlari

Harorati 25 °C dan yuqori bo‘lmagan, quruq, yorug‘likdan himoyalangan joyda saqlanadi.

Yaroqlilik muddati

3 yil.

Dorixonalardan berish shartlari

Retseptsiz.

Ishlab chiqaruvchi

 "Mediwin Pharmaceuticals.," Hindiston

Joylashuv 128/A, Phase I & II, G.I.D.C., Naroda Ahmedabad - 382 330. (India).